ÑAÑEMONGETA jave ñane amigokuérandi ñaime jepi trankílo, ha umi mbaʼe jaʼéva oúntema ñane akãme. Oĩ persóna noñeʼẽguasúiva, ha oĩ katu umi iñeʼẽngatuvéva. Tahaʼe haʼeháicha, umi mbaʼe jaʼéva katuete igustovéta ñañeʼẽramo jajapoháicha normálmente.

Ñañeʼẽ jave peteĩ deskonosídondi katu tekotevẽ ñanderrespetuóso ha naiporãmoʼãi ñañeʼẽ chupe jajepokuaaitereiramoguáicha hese. Péro upéi, jasaluda rire chupe ha ñañemongetavévo jahávo, ikatúma ñañemeʼẽve hendive.

Tekotevẽ avei ñañatende ñañeʼẽ jave platafórma guive. Ndovaléi ñañeʼẽ péicha péichante térã ñembojaru pórtepe, cháke péicha umi ñanerendúva ndojagarramoʼãi ensério umi mbaʼe jaʼéva. Heta idiómape oĩ voi palávra ojeporu vaʼerã oñeñeʼẽta jave umi ijedávape, profesorkuérape, tuvakuérape ha umi autoridápe (ehecha umi palávra ojeporúva Hechos 7:2 ha 13:16-pe). Oĩ avei palávra oiporúva ména oñeʼẽ hag̃ua hembirekópe, térã oiporúva umi oñoamigoitéva. Upéicharõ, jareko jave peteĩ asignasión ñane ñeʼẽre jahechauka vaʼerã ñande edukadoha, péro ani ñandeserioiterei.

Heta ermáno ojapo jave idiskúrso haʼete iserioitereíva ha oiporúva umi palávra hasýva ñantende hag̃ua, ¿mbaʼérepa oiko jepi upéva? Oiméne pe ermáno okopiánte umi palávra oĩva ivoskéhope térã oguenohẽ peichaite umi puvlikasióngui. Péro umi palávra jaiporúva ñañeʼẽ jave, idiferénte hína umi ojeporúvagui ojeskrivi hag̃ua umi puvlikasión. Jepe iporã jaheka informasión japrepara hag̃ua ñande diskúrso, ndovaléi jakopiánte peichaite, síno ñakambia mimi vaʼerã ñamoĩ hag̃ua ñane ñeʼẽtépe. Jaleénteramo oĩhaichaite pe voskéhope térã pe puvlikasiónpe, nañañeʼẽmoʼãi jajapoháicha jepi normálmente.

Naiporãmoʼãi avei rehónteramo hese de un puku ha peteĩ rrítmopente, pórke oĩta párte tekotevẽhápe reñeʼẽ pyaʼeve térã  mbegueve. Nerekambiáiramo haʼetéta ndeserioitereíva ha ikaiguéta la nde diskúrso.

Ñañeʼẽta jave heta hénte renondépe tekotevẽ ñañeʼẽ hatãmie ha kyreʼỹme, péicharõmante umi hénte oñatende porãta ñanderehe.

Reime jave predikasiónpe, ¿mbaʼéichapa ikatúta reñeʼẽ rejapoháicha jepi normálmente? Upearã tekotevẽ rejepokuaa reñeʼẽ porã káda día. Péva ndeʼiséi restudia vaʼerãha reñeʼẽkuaa hag̃ua. Péro reñehaʼã vaʼerã reñeʼẽ hekópe porã umi hénte nerenduse hag̃uáicha. Jahechamína mbaʼe mbaʼépepa ikatu remehora.

1. Ndovaléi reñeʼẽ atravesadopa ni reiporu umi palávra oiporúva umi patotéro, umi hekokyʼáva ha umi hénte oikóva iñakãre. Heʼiháicha Colosenses 3:8, naiporãi avei ndejurutieʼỹ ni reiporu umi palávra orekóva dóvle sentído. Péro péva ndeʼiséi ndovaleiha reñeʼẽ oñeʼẽháicha jepi umi hénte oñemongeta jave.

2. Reñeʼẽ jave eñehaʼã eiporu diferénte palávra ha fráse. Reiporavo porãramo umi palávra ha reiporu hendaitépe, umi nerendúva ontende porãta la ereséva chupekuéra.

3. Reñepyrũ mboyve reñeʼẽ, repensa raẽ vaʼerã mbaʼépa la ereséva, upéicharõ nerepaʼãmoʼãi, ni ndereikomoʼãi rerrepetipa jey pe ere vaʼekue.

4. Ani rejereterei remyesakã hag̃ua peteĩ mbaʼe. Ejepokuaa guei emyesakã porã pe ereséva peteĩ orasión mbykymíva rupivénte.

5. Tojekuaa ne ñeʼẽre rerrespetaha umi nerendúvape.