ÑAÑEMONDE ha jajarregla lájare jahechauka mbaʼeichagua persónapa ñande. ¿Mbaʼérepa upéva? Yvyporakuéra ningo ojesareko hapicháre “ipíntarente”, Jehová katu ohecha mbaʼépa oĩ ñande pyʼapýpe (1 Sam. 16:7). Reikóramo péicha péichante ha nderejarreglái voi, umi hénte heʼíta nerepenaiha ndejehe ha nanerendusemoʼãi hikuái. Reñemonde porãramo katu oñeñeʼẽ porãta Jehová ha iñorganisasiónre.

Mbaʼépa jareko vaʼerã enkuénta. La Biblia nomoĩri peteĩ lísta heʼíva mbaʼe mbaʼépa ovale térã ndovaléi ñamonde. Péro omeʼẽ ñandéve konsého ñanepytyvõva jadesidi porã hag̃ua mbaʼéichapa ñañemonde vaʼerã. Por ehémplo, ñanemomanduʼa ‘jajapo vaʼerãha opa mbaʼe ñambotuicha hag̃ua Ñandejárape’ (1 Cor. 10:31). ¿Mbaʼéichapa ikatu jasegi ko konsého?

Primero: La Biblia heʼi ñande ao ha ñande rete ipotĩ vaʼerãha. Pe Léi Jehová omeʼẽ vaʼekue umi isrraelítape heʼi mbaʼe mbaʼépa ojapo vaʼerã hikuái ipotĩ hag̃ua. Por ehémplo, umi saserdóte ojahu ha ojohéi vaʼerã ijao ojapo mboyve térã ojapo rire hembiapokuéra (Lev. 16:4, 24, 26, 28). Ñande kristiáno natekotevẽvéima ñakumpli pe Léi oñemeʼẽ vaʼekue Moiséspe, péro ikatu ñaaprende chugui heta mbaʼe ideprovéchotava ñandéve koʼág̃a peve (Juan 13:10; Apoc. 19:8). Jahechakuaa upéicharõ iñimportanteha ñande rete ha ñande ao akóinte ipotĩ, ha ani ñande jurune, koʼýte jaha jave rreunionhápe térã predikasiónpe, ani hag̃ua umi hénte ojeguaru ñandehegui. Umi orekótava asignasión kongregasiónpe omoĩ vaʼerã ehémplo koʼã mbaʼépe. Ñañatendévo ñandejehe ha ñañemonde lájare, jahechauka jarrespetaha Jehová ha iñorganisasiónpe.

Segundo: La Biblia heʼi ñaneakãguapy ha ñañemonde vaʼerãha hekópe. Apóstol Pablo heʼi: “Aipota umi kuña oñemoporã jave, toñemonde hekópe ha taiñakãguapy, ani otrensa iñakãrague ni oiporu óro,  pérla ni ao hepyetereíva. Upéva rangue oiko vaʼerã hikuái umi kuña omombaʼeguasúva Ñandejárape oikoháicha” (1 Tim. 2:9, 10). Kuimbaʼekuéra osegi vaʼerã avei koʼã konsého odesidíta jave mbaʼéichapa oñemonde ha ojarregláta.

Ñañemondéramo hekópe ndajaikomoʼãi jajechaukase ni ñamoñeñandu vai ñande rapichápe. Ñaneakãguapýramo jadesidi porãta mbaʼéichapa ñañemondéta. Jasegíramo koʼã konsého la Biblia omeʼẽva ndajaiporumoʼãi umi ao illamativoitereíva oĩramo jepe de móda, upéva ndeʼiséi avei reiporutaha umi ao hyrupa guasúva nderehe térã ndojeporuvéimava koʼág̃arupi (1 Juan 2:16). Ñanemanduʼa vaʼerã koʼã mbaʼére tahaʼe ñasẽta jave japredika, jaháta jave rreunionhápe térã oimeha lugárpe. Iñimportánte avei ñañemonde hekópe ñasẽ jave jajediverti hag̃ua. Ha akóinte ñanepotĩ ha jajarregla porãramo, ikatúta japredika jareko jave oportunida ñande travahohápe térã koléhiope.

Jaikuaa ningo káda uno jarekoha diferénte gústo, upévare nañañemondéi peteĩchapa. Péro enterovénte jasegi vaʼerã umi konsého oĩva la Bíbliape.

Apóstol Pedro heʼi vaʼekue: “Iñimportanteve hína pemoporã perekóva pende pyʼapýpe”. Péicha jahecha ñane korasõme oĩva ovaleveha ñane píntagui (1 Ped. 3:3, 4). Ñañehaʼã vaʼerã japorohayhu, javyʼa, ñandepyʼaguapy, ñanembaʼeporã ha jajerovia mbarete. Koʼãichagua adórno ovaleterei Ñandejára renondépe, ha arakaʼeve noñehundimoʼãi.

Tercero: La Biblia heʼi jajarregla porã vaʼerãha. Pablo heʼi vaʼekue 1 Timoteo 2:9-pe ‘kuñanguéra oñemonde vaʼerãha hekópe’. Péro iñimportánte avei kuimbaʼekuéra osegi ko konsého ojarregla jave. Ñanemboriahúramo jepe entéro ikatu ñanepotĩ ha jajarregla porã.

Omaña jave ñanderehe umi hénte, katuete ojesareko ñane akãraguére, upévare tekotevẽ siémpre ipotĩ ha ñañepeina porã. Káda uno jareko diferénte peinádo, ha odepende jepi umi kostúmbre oĩvare ñande jaikohárupi jaiporavo hag̃ua mbaʼéichapa ñañepeináta. Apóstol Pablo opensa vaʼekue koʼã mbaʼére ohaírõ guare pe konsého jatopáva 1 Corintios 11:14, 15-pe. Upéicharõ jepe ñañatende vaʼerã ani ipeinádore ojeʼe peteĩ kuimbaʼére ojoguaseha peteĩ kuñáme, térã peteĩ kuña ojoguaseha peteĩ arriérope (Deut. 22:5).

 Kuimbaʼekuéra avei tekotevẽ ojafeita porã, ha oiporúramo vigóte torrekorta porã.

Cuarto: Jajarregla lájare ndajahechaukái vaʼerã jahayhuha ko múndo. Apóstol Juan heʼi vaʼekue: “Ani pehayhu ko múndo ni umi mbaʼe oĩva ipype” (1 Juan 2:15-17). Ko múndo ñanemokyreʼỹ ñamotenonde hag̃ua ñande rete rembipota vai ha jaiko hag̃ua jajechaukase umi mbaʼe jarekóvare. La Bíbliape heʼi avei ko múndope umi hénte naiñeʼẽrendúi ha oikoha iñakãre (Prov. 17:11; Efes. 2:2). Oñemonde ha ojarregla lájare umi hénte ohechauka koʼã mbaʼe, upévare oiporu jepi umi ao hesakã, mbyky ha ijahustadoitereíva. Ha ótro katu oñemonde kachafa ha chalaipa. Ñande jaservíva Jehovápe katu ñañehaʼã ñamboyke umi móda naiporãiva oĩva ko múndope.

Jaiko rangue ñahaʼanga ko múndope iporãve jasegi umi ermáno ha ermána iñakãguapýva ehémplo. Umi mitãrusu ojaposéramo diskúrso púvliko amo gotyove, ojesareko vaʼerã mbaʼéichapa oñemonde umi ermáno orekómava koʼã priviléhio. Añetehápe, enterove ikatu hína ñaaprende heta mbaʼe umi ermánogui heta áñorema oservíva Jehovápe (1 Tim. 4:12; 1 Ped. 5:2, 3).

Quinto: Jadesidíta vove mbaʼépa ñamondéta ñanemanduʼa vaʼerã ‘Cristo jepe nomeʼẽi hague ijupe gústo’ (Rom. 15:3). Jesúspe g̃uarã iñimportanteve vaʼekue ojapo Jehová oipotáva, avei oipytyvõ hapichápe omeʼẽ rangue ijupe gústo. Upéicharõ, ¿mbaʼépa jajapóta jaikuaáramo jajarregla lája ikatuha omoñepysanga ótrope? Jasegíramo Jesús ehémplo ñaneumíldeta ha ndajaikomoʼãi ñañemohatã ñande jaʼévapente. Apóstol Pablo omeʼẽ ñandéve peteĩ konsého iporãitereíva heʼívo: ‘Ni mbaʼevéicharõ ndajajapói mbaʼeve oporomoñepysangátava’ (2 Cor. 6:3). Upévare ndajaikomoʼãi jaiporu ao térã peinádo omolestátava umi hénte japredikátavape.

Mbaʼéichapa ñañemboʼy vaʼerã. Iñimportánte avei ñañatende ñañemboʼy lájare japredika térã jareko jave ñane asignasión. Káda uno jareko mbaʼéichapa jajepokuaa ñañemboʼy, péro enterove ñañehaʼã vaʼerã ñañemboʼy porã. La Biblia heʼi ñañemboʼy lájare jahechaukaha mbaʼéichapa ñañeñandu, por ehémplo peteĩ pártepe heʼi: “Oñepyrũvo oiko koʼã mbaʼe peñemboʼy ha peñakãrapuʼã” (Luc. 21:28; Lev. 26:13). Añetehápe ningo oĩ heta ermáno ijaturúva ha ndaikatúi oñemboʼy porã ijedáma rupi térã ombaʼapo vai haguére heta áñorema. Péro ndajarekóirõ koʼãichagua provléma jajepokuaa  vaʼerã ñañemboʼy porã, ha ani ñañemboʼy kachafa térã vai guasu. Cháke péicha ikatu ojeʼe ñanderehe ñandekaigueha, térã nañaneimportaguasuiha la ñande diskúrso. Ha ndaivaíriramo jepe remoĩ sapyʼapyʼa nde po pe atríl ári, opyta vaietereíta rejekóramo hese térã ndereipeʼavéima voi nde po upégui.

Mbaʼéichapa oĩ vaʼerã ñande kosakuéra. Ndahaʼéi ñandénte la ñanepotĩ porã vaʼerã, síno ñañatende vaʼerã avei mbaʼéichapa oĩ umi mbaʼe jaiporúva predikasiónpe.

¿Mbaʼéichapa oĩ nde Biblia? Naentéroi ikatu ñambopyahu ñande Biblia tekotevẽ jave, péro jepe heta tiémporema jaiporu, ojekuaa vaʼerã hese jareko porãha.

Káda uno jareko mbaʼéichapa ñamohenda ñande kosakuéra ñande kartérape, péro ñañehaʼã vaʼerã taipotĩ ha ani opyta sarambipa upépe. Sapyʼánte oiméne rehecha algúno oavri jave la Biblia olee hag̃ua hoʼapa chugui atyraite kuatia, ha upéva katuete oiméne ndedistrae. Ani hag̃ua upéva oiko nderehe, eñongatu vaʼerã ótro lugárpe umi ne notakuéra. Avei reñatende vaʼerã moõpa remboguejy nde Biblia, pórke heta hendápe ojehecha vai oñemboguejy yvýpe rei la Biblia térã ótra puvlikasión.

Tekotevẽ upéicharõ ñañemonde ha jajarregla hekópe, upéicha katuete umi hénte oñatende porãta ñanderehe. Ha ndahaʼéi upévante, síno ‘péicha opa mbaʼe jajapóvape ñamoporãta ñande Salvadór Ñandejára omboʼéva’ (Tito 2:10).