REÑEʼẼ jave reñatende vaʼerã ani reofende nde rapichápe, upearã retrata porã vaʼerã chupekuéra ha erekuaa vaʼerã opa mbaʼe. Péro upéva ndeʼiséi reikotaha remoʼã térã neremombeʼupái pe oiko vaʼekue nerembopochyséigui ótrope. Ndeʼiséi avei rekyhyjeha nde rapichágui ere hag̃ua pe añetegua (Prov. 29:25).

Umi mbaʼe porã oúva Ñandejára espíritugui ñanepytyvõta ñañatende hag̃ua umi mbaʼe jaʼévare pono japoi rei reínte ñande jurúgui. ¿Mbaʼérepa? Por ehémplo japorohayhúramo ñañehaʼãta ñaipytyvõ ñande rapichápe ñambopochy rangue chupe. Pe persóna imbaʼeporãva ha ndaipochyreíriva ijedukádo ha oporotratakuaa. Pe ipyʼaguapýva oñehaʼãmbaite ojogueraha porã hapichándi. Ha pe ipasiénsiava nainerviosoreíri, jepe oĩ otrata vaíva chupe (Gál. 5:22, 23).

Péva ndeʼiséi entéro nerendu porãtaha predikasiónpe, oĩta katuete umi ipochýva. Jesucristo oĩrõ guare ko yvy ape ári, oĩ vaʼekue heta hudío iñañáva, hembiapo vaíva ha nohenduséiva chupe, upéicha rupi “umi hénte oñepysanga” ikáusare ha ipochy hendive (1 Ped. 2:7, 8). Jesús oikuaa voi naentéroi oguerohorytaha pe mensáhe, upévare heʼi: “Che aju amyendy hag̃ua tata ko yvy ape ári” (Luc. 12:49). Ñande ningo jaikuaauka entéro yvypóra ohechakuaa vaʼerãha Ñandejára añoite orekoha derécho ñanegoverna hag̃ua. Avei ñamombeʼu Ñandejára Rréino ohunditaha ko múndo aña, ha heta héntepe ndogustái upéva. Upéicharõ jepe, ñande ñaneñeʼẽrendu ha jasegi japredika, péro iñimportánte jareko enkuénta ko konsého: “Peñehaʼãmbaitékena peiko pyʼaguapýpe enterove pende rapichakuéra ndive” (Rom. 12:18).

Japredika jave. Ñande pyʼỹinte voi ñamombeʼu ñande rapichakuérape umi mbaʼe jagueroviáva, por ehémplo ñasẽ jave japredika, ñañemongeta jave ñane hentekuérandi, ñane kompañéro de traváho térã  eskuelapegua ndive. Iñimportánte siémpre jaʼekuaa opa mbaʼe ha ani ñaofende avavépe.

Umi hénte katuete ipochýta ñanendive ñañepyrũramo ñasermonea chupekuéra japredika jave. Oiméramo peteĩ persóna ndojeruréi ndéve konsého ani nentremetído ha ere chupe oĩ vaiha pe ojapóva, cháke ikatu reofende hína chupe. ¿Mbaʼépa ikatu nepytyvõ ani hag̃ua reofende chupe? Reaprende vaʼerã mbaʼéichapa reikekuaa nde rapichápe rembopochyʼỹ hag̃uáicha chupe.

Reñepyrũ hag̃ua reñemongeta remombeʼukuaa peteĩ mbaʼe ointeresátava pe persónape. Oimérõ reñemongeta hína ne pariénte, ne kompañéro de traváho térã eskuelapeguándi oiméne reikuaáma voi mbaʼépa ointeresave chupe. Péro reñeʼẽrõ peteĩ deskonosídondi, ikatu remombeʼu peteĩ notísia osẽ vaʼekue télepe térã diáriope. Ha repredika jave ogahárupi remaña vaʼerã pe ógare ha ijerére, jahecha oĩpa hugéte térã algúna kósa ohechaukáva irrelihiosoha, koʼã mbaʼe nepytyvõta reikuaa hag̃ua mbaʼépa ointeresavéta pe ogajárape. Peñemongeta vove ejapysaka porã hese, péicha repilláta avei tekotevẽtapa rekambia ne presentasión.

Upéi peñemongetavévo ikatu reñeʼẽ peteĩ téxto vívlikore térã remombeʼu mbykymi peteĩ mbaʼe osẽ vaʼekue ñane puvlikasiónpe. Péro aníkena ndénte reñeʼẽ, síno eñehaʼã pe ogajára topartisipa (Ecl. 3:7). Ereko enkuénta umi mbaʼe opensáva ha heʼíva, péicha reikuaáta mbaʼérehepa ha mbaʼéichapa iporãve reñeʼẽ.

Ere mboyve peteĩ mbaʼe repensa vaʼerã mbaʼéichapa ojagarráta pe ogajára pe eréva. La Biblia heʼi Proverbios 12:8-pe iporãha ‘jajokokuaa ñande juru’. Pe palávra evréa ojeporúva ko téxtope heʼise ñañeʼẽ jave ñanearandu ha ñaneakãguapy vaʼerãha. Upéicharõ, ñañeʼẽ mboyve ñapensa raẽ vaʼerã mbaʼéichapa ñañeʼẽta ani hag̃ua ojejagarra vai ñandehegui pe jaʼéva. Versíkulo 18-pe heʼi porã ñandéve umi “opoi rei reínteva ijurúgui oporokutu rasy kysepeguáicha”. Añetehápe ikatu ñadefende pe añetegua pyʼaguapýpente, ñaofendeʼỹre avavépe.

Jaiporavo porãramo umi palávra jaiporútava ikatúta avei ñañemongeta porãve ñande rapichándi. Por ehémplo oĩ lugárpe ojeʼe rangue la Biblia, iporãvéta ojeʼéramo “peteĩ lívro iñimportantetereíva”, térã “peteĩ lívro ojetradusímava heta idiómape”. Térã ikatu reporandu mbaʼépa  haʼe opensa la Bíbliare, ha upéi ereko enkuénta upe heʼi vaʼekue reñemongetave hag̃ua hendive.

Iñimportánte avei jahecha mbaʼe moméntopepa iporãve ñañeʼẽ (Prov. 25:11). Jepe noĩporãi peteĩ mbaʼe heʼíva pe ogajára, natekotevẽi manterei jakorrehi chupe. Ndovaléi avei unavetépe ñamboʼese chupe hetaiterei mbaʼe. Jesús jepe heʼi vaʼekue idisipulokuérape: “Heta mbaʼe gueteri areko haʼe vaʼerã peẽme, péro peẽ ndaikatumoʼãi pegueropuʼaka koʼág̃a” (Juan 16:12).

Jepe pe ogajára ikatu ojekivoka pe heʼívape, otoka porã jave ndéve eguerohory chupe. Upéicha ojapo vaʼekue apóstol Pablo oñeʼẽrõ guare umi filósofondi Aténaspe. Haʼekuéra ningo “ojodiskuti hendive”, ¿mbaʼépa ojapo upémarõ? Haʼe ohecha kuri heta taʼanga ojapóva hikuái umi diós guaʼúpe g̃uarã, péro ojaʼo rangue chupekuéra oadora haguére umíva, Pablo oikekuaa ha oguerohory umi filósofope irrelihióso haguére. Heʼi chupekuéra: “Kuimbaʼekuéra Atenasgua, opa mbaʼépe ahecha peẽ pekyhyjeveha ñandejarakuéragui ótro héntegui”. Péicha pyʼaguapýpe oñeʼẽ rupi, ombohape porãiterei oñeʼẽ hag̃ua chupekuéra Ñandejára teére, ha ijapyteguikuéra oĩ ojeroviáva Jesús rehe (Hech. 17:18, 22, 34).

¿Mbaʼépa rejapóta pe ogajára heʼíramo ndéve ndogueroviaha pe enseñánsa nde remyesakãva chupe? Ani rejagarra vai, eñetrankilisánte ha eñehaʼã entende mbaʼérepa opensa péicha pe persóna. Ikatu reagradese chupe omombeʼu haguére ndéve la opensáva. Péro heʼi arhél guasúramo ndéve: “¡Che areko voi che rrelihión!”, ¿mbaʼépa rejapóta péicha jave? Ikatu reporandu porãnte chupe: “¿Nde piko siémpre rejeroviáva Ñandejárare?”. Ombohovái rire ndéve, ere jey: “Mbaʼépa nde repensa, ¿ikatúnepa algún día enterove persóna jareko peteĩ rrelihiónte?”. Koʼã porandu nepytyvõta reñemongetave hag̃ua hendive.

Jatrata porã hag̃ua ñande rapichápe ha jaʼe hag̃ua opa mbaʼe hendápe porã, tekotevẽ ñaneumílde. Ñane ñeʼẽre ojekuaa vaʼerã jajeroviaha ñande pyʼaite guive Jehováre ha iñeʼẽ la Bíbliare. Péro ndajarekói mbaʼérepa ñapensa hag̃ua ñandevaleveha ñande rapichágui (Ecl. 7:15, 16). Jaagradese ningo Jehovápe ñanevendesi ha omyesakã haguére ñandéve pe añetegua, péro ñarrekonose avei Ñandejára imbaʼeporãiterei rupínte jahupytyha upéva. Ñande ningo ñaime porã Jehová renondépe, Cristo sakrifísio rupivénte ha ndahaʼéi ñanderekojoja rupi (Efes. 2:8, 9). Avei ñanemanduʼa meme vaʼerã ko téxto heʼívare: “Pesegíkena pejesareko pendejehe pehecha hag̃ua peñakarama hatãpa pende jeroviáre.  Pehechauka memékena mbaʼeichagua persónapa peẽ” (2 Cor. 13:5). Upévare ndahaʼéi japredikánteva la héntepe ojapo hag̃ua la Biblia heʼíva, síno ñande voi ñañehaʼã ñakumpli umi mbaʼe heʼíva pype. Naiporãi avei jahusga ñande rapichápe, pórke Jehová ohejáma upéva ‘Itaʼýra kárgope’, ha enterove jajecháta hendive opa mbaʼe jajapo vaʼekuére (Juan 5:22; 2 Cor. 5:10).

Ñande rogayguándi ha kongregasiónpe. Ñaime jave ñande rogayguándi avei tekotevẽ jatrata porã ñane famíliape ha ani japoi rei reínte ñande jurúgui. Jahayhu rupi chupekuéra jareko vaʼerã enkuénta mbaʼépa opensa ha oñandu hikuái. Por ehémplo pe rréina Ester orrespetaiterei vaʼekue iménape, jepe haʼe ndoservíri Jehovápe, ha oñeʼẽtarõ guare umi hudío rehehápe oikekuaa ha ojerurekuaaiterei la oipotáva (Ester, kap. 3-8). ¿Mbaʼéichapa ikatu jatrata porã ñane hentekuéra ndahaʼéivape Testígo? Jaiko rangue japredikase chupekuéra manterei, ikuentave ñanembaʼeporã ha jatrata chupekuéra mborayhúpe ha péicha tohecha hikuái ñande ñanediferenteha, upéva katuete opokovéta hesekuéra (1 Ped. 3:1, 2).

Sapyʼánte jajepokuaa vaietereíma ñane ermanokuérare, péro ndahaʼéi upe haguére ñane ñeʼẽpohýitava chupekuéra ha upéi jaʼénte: “Haʼéngo chekuaa voi hína, ndojagarravaimoʼãingo chehegui”, térã “Chéngo péichante voi”. Oimérõ jahechakuaa jaikoha jepi ñaofende ñane ermánope ñañehaʼãmbaite vaʼerã ñakambia. Jajoayhúramo ñande pyʼaite guive, upéva ñanemomýita jajapo hag̃ua iporãva ñane ermanokuéra rehehápe (1 Ped. 4:8, 15; Gál. 6:10).

Reñeʼẽ jave platafórma guive. Ñane rreunionhápe ijaty jepi heta hénte, ha káda uno ikatu ohasa hína diferénte situasión. Oĩ avei umi oñepyrũ ramóva ostudia ha oúva primera ves Salónpe. Ikatu avei oĩ umi ojepyʼapýva hína ojopýgui chupe heta mbaʼe ijetuʼúva, péro ñande ndajaikuaáiva. ¿Mbaʼépa ñanepytyvõta ani hag̃ua ñaofende avavépe?

Tuicha ñanepytyvõta jasegíramo pe konsého apóstol Pablo omeʼẽ vaʼekue Títope, haʼe heʼi vaʼekue “kristianokuéra ndovaleiha okopi avavére, ndoikói vaʼerã oñorairõse, ndovaleiha oñemohatã haʼekuéra heʼívapente, ha ipyʼaporã vaʼerãha opavavéndi” (Tito 3:2). Aníkena jaiporu umi palávra vai oiporúva jepi umi hénte okopi térã oapoʼi hag̃ua umi hénte ótro tetãguápe, térã umi oñeʼẽvape ótro idióma (Apoc. 7:9, 10). Remyesakã porã vaʼerã mbaʼépa Ñandejára ohaʼãrõ ñandehegui, ha ehechauka mbaʼérepa ideprovécho ñandéve jajapo upéva. Péro ani rekritika ni remoñeñandu vai umi neʼĩravape osegi porã la Biblia heʼíva.  Upéva rangue emokyreʼỹ chupekuéra ohechakuaa hag̃ua ijeheguiete mbaʼépa Jehová oipota ojapo hikuái. Ha remeʼẽtaramo peteĩ konsého iporã siémpre reguerohory umi mbaʼe porã ojapómava hikuái. Umi palávra reiporúvare ha ne tónore ojekuaa vaʼerã mbaʼeichaitépa rehayhu umi ermánope (1 Tes. 4:1-12; 1 Ped. 3:8).