¿MBAʼÉREPA ideprovechoite jaiporu umi fóto ha divúho ñaporomboʼe jave? Pórke umíva rupive iñinteresánte ha oñentende porãve pe ñamboʼeséva. Jehová ha Jesucristo oiporu vaʼekue avei koʼã mbaʼe ha ñande ikatu ñaaprende chuguikuéra. Ha remyesakãramo mbaʼépa heʼise, umi hénte oñatendevéta pe mensáhere ha imanduʼa porãvéta pe informasiónre, ohendu ha ohecha rupi upe remboʼeséva hína. ¿Mbaʼéichapa ikatu avei reiporu koʼã mbaʼe repredika jave? ¿Mbaʼéichapa ikatu repilla oimépa reiporu porã hína?

Ñaaprende umi Mboʼehára ikatupyryvévagui. Jehová omboʼérõ guare isiervokuérape ojevale heta mbaʼére, por ehémplo peteĩ pyhare heʼi Abrahánpe osẽ hag̃ua okápe ha heʼi chupe: ‘Emañamína yvágare ha ekonta umi estrélla, oimérõ ikatu rekontapa. Upeichaite avei hetáta ne família’ (Gén. 15:5). Jepe haʼete ndaikatumoʼãiva oñekumpli upe heʼíva, Abrahán rehe opokoiterei upe ehémplo ha ojerovia Ñandejárare. Ha Jeremíaspe Jehová heʼi vaʼekue oho hag̃ua ohecha mbaʼéichapa peteĩ alfaréro omoldea pe ñaiʼũ. Katuete haʼe ijurujáine raʼe ohechakuaávo upeichaite avei ñande Apohare ikatuha ñanemoldea nañañemohatãiramo (Jer. 18:1-6). Avei omboʼe hag̃ua Jonáspe oiporiahuvereko vaʼerãha hapichápe, Jehová omongakuaa vaʼekue peteĩ enrramáda. Katuete pe enseñánsa opytaiténe raʼe iñakãme (Jon. 4:6-11). Jehová omanda vaʼekue iprofetakuérape oiporu hag̃ua diferénte kósa orrepresenta hag̃ua upe oprofetisáva hína (1 Rey. 11:29-32; Jer. 27:1-8; Ezeq. 4:1-17). Pe tavernákulo ha pe témplo orrepresenta umi mbaʼe oĩva yvágape (Heb. 9:9, 23, 24). Avei umi visión rupive Jehová oikuaauka isiervokuérape heta mensáhe iñimportánteva (Ezeq. 1:4-28; 8:2-18; Hech. 10:9-16; 16:9, 10; Apoc. 1:1).

¿Ha mbaʼépa ikatu ñaaprende Jesúsgui? Peteĩ jey umi fariséo ha Herodes segidorkuéra oho Jesús rendápe omoñuhã hag̃ua chupe. Upévo Jesús ohechauka chupekuéra peteĩ denário ha oporandu máva raʼangápa oĩ hese. Upéi heʼi: “Pemeʼẽ Césarpe imbaʼéva, péro pemeʼẽ Ñandejárape imbaʼéva” (Mat. 22:19-21). Ha omboʼe hag̃ua umi héntepe ñameʼẽ  vaʼerãha Jehovápe iporãnguete, Jesús oiporu ehémploramo peteĩ viúda ojapo vaʼekue. Jepe omeʼẽ mokõi monéda saʼieterei ovaléva, haʼe omeʼẽmbaite pe orekomíva (Luc. 21:1-4). Ótra vuéltape ohenói peteĩ mitãʼípe omboʼe hag̃ua idisipulokuérape ndaijejapói ha iñumílde vaʼerãha hikuái (Mat. 18:2-6). Ha Jesús voi ohechauka vaʼekue mbaʼéichapa ñaneumílde vaʼerã ojohéivo idisipulokuérape ipy (Juan 13:14).

Mbaʼéichapa reiporu vaʼerã umi taʼanga. Ndaikatúiramo jepe jaiporu umi visión Jehová ojapo haguéicha yma, ñande ikatu jaiporu umi taʼanga ha divuhokuéra oĩva ñane puvlikasiónpe. Eiporúkena umíva rehechauka hag̃ua umi héntepe mbaʼeichaitépa iporãta pe paraíso oĩtava ko yvy ape ári. Rehechauka vaʼerã avei ne estudiántepe umi divúho oĩva káda leksión pe puvlikasión pestudiávagui, ha eporandu chupe mbaʼépa ohecha upépe. Jehová ojapo vaʼekue koʼãichagua porandu, por ehémplo ohechauka rire peteĩ visión Amóspe, oporandu chupe: “¿Mbaʼépa rehecha hína?” (Amós 7:7, 8; 8:1, 2). Iporãta rejapóramo peichagua porandu reiporu jave umi taʼanga térã fóto oĩva ñane puvlikasiónpe.

Rehechauka hag̃ua mbaʼe tiémpopepa oñekumpli umi profesía ikatu reskrivi umi fécha, térã rejapo voi peteĩ divúho omarkáva ohóvo pe tiémpo oiko hague. Por ehémplo, ikatu rehechauka mbaʼéichapa oñekumpli pe profesía oñeʼẽva umi siete tiémpore, oĩva Daniel 4:16-pe, térã pe profesía oñeʼẽva umi setenta semánare, oĩva Daniel 9:24-pe. Koʼãichagua divúho osẽ jepi avei ñane puvlikasionkuérape.

Restudia jave ne famíliandi iporãta avei reiporúramo umi divúho ha taʼangakuéra. Por ehémplo, ¿mbaʼépa ikatu peiporu pentende porãve hag̃ua hetave detálle oreko vaʼekue pe tavernákulo, pe témplo de Jerusalén, térã pe témplo Ezequiel ohecha vaʼekue peteĩ visión rupive? Reiporukuaa umi taʼanga oĩva lívro Perspicacia para comprender las Escritúraspe, pe apéndice orekóva Traducción del Nuevo Mundo de las Santas Escrituras (con referencias), térã umi divúho osẽ vaʼekue rrevísta Ñemañaháme.

Relee vove la Biblia ne famíliandi eñehaʼã eiporu umi mápa osẽva ñane puvlikasiónpe. Ikatu rehecha mbaʼe tapérupipa oviaha vaʼekue Abrahán osẽrõ guare Úrgui, ohasávo Haránrupi og̃uahẽ hag̃ua Betélpe. Ehecha avei mbaʼe tapépa ojagarra umi isrraelíta osẽrõ guare Egíptogui oho hag̃ua pe Tiérra Prometídape. Eñehaʼã etopa pe mápape mbaʼe pártepa  otoka káda trívupe ojerrepartírõ guare chupekuéra pe yvy. Ikatu rehecha avei moõ pevépa ogoverna raʼe Salomón, térã moõrupipa ohasa ohóvo Elías okañýrõ guare Jezabélgui, upérõ osẽ Jezreélgui ha oho desiértope opytáva Beer-seba jahasapávo (1 Rey. 18:46–19:4). Eheka umi puévlo ha siuda Jesús opredika haguérupi ha umi viáhe Pablo ojapo vaʼekue.

Ne estudiantekuéra ontende porãvéta mbaʼéichapa Jehová odirihi iñorganisasión rehechaukáramo chupe divúho ha fóto osẽva ñane puvlikasionkuérape. Por ehémplo, ikatu rehechauka chupe peteĩ prográma ñande aty guasupegua ha remyesakã umi téma oñehesaʼỹijótava pe asambléape. Ikatu avei reinvita chupe oho hag̃ua salónpe térã ovisita hag̃ua pe sukursál. Ne estudiánte ohóramo primera ves rreunionhápe rehechauka vaʼerã chupe mbaʼépepa idiferénte pe Salón del Reino umi tupaógui: por ehémplo iporã ha isensíllo, upévare ikatu ñañekonsentra porã pe enseñánsare, avei ñane rreuniónpe ndojejapói kolékta síno oñemoĩ umi káha de kontrivusión. Avei ikatu rehechauka chupe mbaʼe mbaʼépa ojejapo ojepredika porã hag̃ua, por ehémplo pe mápa pende territoriopegua ha pe lugár ojerretirahápe umi puvlikasión. Hetápe oipytyvõ okambia hag̃ua pe opensáva ñanderehe ojapo rire koʼãichagua visíta, ohechakuaa rupi japuha umi mbaʼe ojeʼéva jepi testígo de Jehováre.

Ikatu rehechauka ne estudiántepe umi vidéo onohẽva ñane organisasión, ikatu hag̃uáicha ojeroviave la Biblia heʼívare térã ohechakuaa hag̃ua mbaʼéichapa ombaʼapo Jehová organisasión. Upéva ikatu omokyreʼỹ chupe oiko hag̃ua Ñandejára oipotaháicha.

Reñeʼẽ jave heta hénte renondépe. Reiporúramo hendaitépe umi divúho ha taʼanga, umíva ikatu nepytyvõ remog̃uahẽ porãve hag̃ua pe informasión remboʼe jave heta héntepe. Ikatu reiporu umi osẽva ñane puvlikasionkuérape.

Umi artíkulo jastudiáva tahaʼe pe rrevísta Ñemañahágui térã ótra puvlikasióngui oreko jepi divúho ha fóto omyesakãvéva umi púnto iñimportantevéva. Oiméramo otoka ndéve redirihi koʼã párte kongregasiónpe, ani nderesarái reiporu vaʼerãha umíva reporomboʼe porãve hag̃ua.

Oĩ diskúrso ikatuhápe reiporu umi divúho térã taʼanga rerresalta hag̃ua peteĩ idéa, péro ani rembotapykue la Biblia, pórke upéva omopyenda hína nde diskúrso ha umi nerendúva orekóta voi ipópe. Péro sapyʼa rei reiporútaramo peteĩ divúho rerresalta hag̃ua umi púnto prinsipál, rejasegura vaʼerã ohecha porãtapa enterove. Ani nderesarái hendaitépente reiporu vaʼerãha koʼã mbaʼe.

 Umi divúho ha taʼanga reiporu vaʼerã reporomboʼe porãve hag̃ua ha ndahaʼéi reentretene hag̃ua umi nerendúvape. Reiporúramo hendaitépe umi idéa ojerresalta ha oñentende porãvéta. Avei péicha pe mensáhe og̃uahẽta ikorasõme ha ndahesaraimoʼãi hikuái upe ehémplo ni pe enseñánsagui.

Eñehaʼãkena esegi Jehová ha Jesús ehémplo ha eiporu umi divúho térã fóto reporomboʼe jave. Péicha umi mbaʼe eréva opyta porãvéta umi nerendúva akãme, pórke ndahaʼéi ohendútanteva síno ohecháta avei la remboʼeséva hína.