KO MÚNDOPE ningo ñandeahoʼi umi provléma, upévare pe kongregasión haʼe vaʼerã pe lugár ikatuhápe ñandevevýi ha ñandepiroʼy umi provlémagui. Upéicha rupi koʼýte umi ansiáno oñehaʼãmbaite vaʼerã omokyreʼỹ ha omombarete ermanokuérape umi diskúrso ha konsého rupive. Péicha umi ansiáno ‘haʼetéta peteĩ lugár isegúro porãva ikatuhápe ñañemoʼã torménta ha yvytúgui, ojoguáta peteĩ arrójo osyrýva desiértope, ha ita guasu isómbra porãva peteĩ desiértope’ (Is. 32:2).

Oiméramo nde ansiáno, ¿omokyreʼỹ ha okonsolápa umi ermánope nde diskúrso? ¿Opytápa ikyreʼỹve hikuái oservi hag̃ua Jehovápe? ¿Remombaretépa chupekuéra osegi hag̃ua iñeʼẽrendu Jehovápe jepe oĩ oñemoĩ mbaretéva hesekuéra? ¿Oĩpa umi nerendúva apytépe oñedeprimíva, ohasa asýva imboriahu rupi térã orekóva peteĩ mbaʼasy ndaikatúiva oñemonguera? Nde ikatu hína ‘remombarete chupekuéra ne ñeʼẽ rupive’ (Job 16:5).

Otoka jave ndéve diskúrso reaprovecha vaʼerã remombareteve hag̃ua umi ermáno jerovia ha eipytyvõ chupekuéra oreko hag̃ua esperánsa. Rehechauka vaʼerã chupekuéra mbaʼéichapa ikatu imbareteve Jehová organisasión rupive (Rom. 15:13; Efes. 6:10).

Emomanduʼa chupekuéra mbaʼépa Jehová ojapóma ñanderehehápe. Iporãta remombeʼúramo nde diskúrsope mbaʼépa Jehová ojapo vaʼekue ipuévlo rehehápe oñangareko hag̃ua hesekuéra ohasa asýrõ guare hikuái. Koʼã mbaʼe katuete opokóta umi nerendúva korasõre ha omombaretéta chupekuéra (Rom. 15:4).

Jehová heʼi vaʼekue Moiséspe ‘omombarete’ ha ‘omokyreʼỹ’ vaʼerãha Josuépe ojagarra mboyve pe yvy oñepromete vaʼekue chupekuéra, ¿mbaʼérepa? Pórke upérõ iñenemigokuéra oiko vaʼekue upe lugárpe ha Josué omoakã vaʼerã umi isrraelítape oike hag̃ua upépe. ¿Mbaʼéichapa Moisés ojapo upéva? Omomanduʼa umi isrraelítape opa  mbaʼe Jehová ojapo vaʼekue hesehapekuéra osẽ rire Egíptogui, ha Josué ohendu avei koʼã mbaʼe (Deut. 3:28; 7:18). Moisés imanduʼa avei mbaʼéichapa Jehová oipytyvõ chupekuéra ohundi hag̃ua umi amorréope. Upe rire heʼi Josuépe: “Ndepyʼaguasu ha nembaretéke” (Deut. 31:1-8). Upéicharõ, remokyreʼỹse jave umi ermánope remomanduʼa vaʼerã avei chupekuéra umi mbaʼe porã Jehová ojapómava hesehapekuéra.

Heta hénte oñekevrantaháre oiko ojahoʼígui chupekuéra umi provléma, upéicha rupi ndojeroviavéima Ñandejára goviérno ikatúne hag̃ua osolusiona koʼã mbaʼe. Upévare remyesakã vaʼerã oñekumplitaha katuete umi promésa Jehová ojapóva (Jos. 23:14).

Oĩ goviérno oproivíva umi ermánope opredika, umi lugárpe tekotevẽ umi ansiáno omokyreʼỹ ha omombarete chupekuéra. Upearã omombeʼukuaa umi ermánope mbaʼéichapa Jesucristo apostolkuéra heta ohasa asy avei ojepersegírõ guare chupekuéra (Hech. 4:1–5:42). Avei ikatu omomanduʼa umi ermánope mbaʼéichapa Ñandejára osalva vaʼekue isiervokuérape, oñemombeʼuháicha lívro de Estérpe.

Oĩ persóna ohóva jepi rreunionhápe péro ndojedesidíri oservi Jehovápe, ¿mbaʼépa oiméne ojoko chupekuéra? Oiméne ymave ojapo vaʼekue heta mbaʼe vai ha opensa Ñandejára núnka noperdonamoʼãiha chupekuéra. Upéicharõ ikatu remombeʼu Jehová operdona hague rréi Manaséspe, térã umi Corintogua oheja hague hembiapo vaikue ha Jehová oiporiahuvereko chupekuéra. Ha ipahápe Ñandejára heʼi hesekuéra hekojojaha (2 Crón. 33:1-16; 1 Cor. 6:9-11).

Sapyʼánte oĩ opensáva orekoha provléma Ñandejára okastiga rupi chupe, ¿mbaʼéicha ikatu rekonsola chupekuéra? Reñeʼẽkuaa Job rembiasakuére, mbaʼéichapa haʼe hetaite osufri ha upéi Jehová hetaiteve ovendesi chupe osegi rupi iñeʼẽrendu (Job 1:1-22; 10:1; 42:12, 13; Sal. 34:19). Umi iñamígo guaʼu katu ou heʼi Jóbpe Ñandejára okastigaha chupe hembiapo vai haguére, péro tuicha ojavy hikuái (Job 4:7, 8; 8:5, 6). Ndojoguaiete hikuái apóstol Pablo ha Bernabépe, haʼekuéra “omombarete umi disípulope ha omokyreʼỹ chupekuéra ojerovia mbarete hag̃ua, heʼívo: ‘Heta jahasa asy vaʼerã jaike hag̃ua Ñandejára Rréinope’” (Hech. 14:21, 22). Upéicha avei koʼág̃a umi ohasáva heta mbaʼe ijetuʼúva, imbaretevéta remomanduʼáramo chupekuéra enterove jaservíva Jehovápe ñaaguanta vaʼerãha heta jehasa asy.  Péro ere avei Ñandejára omombaʼetereiha umi péicha oaguantávape (Prov. 27:11; Mat. 24:13; Rom. 5:3, 4; 2 Tim. 3:12).

Emokyreʼỹ umi nerendúvape ojepyʼamongeta hag̃ua umi mbaʼe porã Jehová ojapómavare hesehapekuéra. Péicha ikatúta ohechakuaa hikuái Jehová okumpliha umi mbaʼe oprometéva ha ndofallamoʼãiha hendivekuéra. Jehová opromete isiervokuérape: “Che roipytyvõta nearandu hag̃ua ha ahechaukáta ndéve moõrupipa reho vaʼerã. Rohekomboʼéta ha ajesarekóta nderehe” (Sal. 32:8). Remomanduʼáramo umi nerendúvape mbaʼéichapa Jehová omombarete ha oipytyvõ chupekuéra odesidi porã hag̃ua, haʼekuéra ohechakuaáta Jehová oñeinteresaha hesekuéra ha siémpre oĩtaha hendivekuéra ojejopy vai jave (Is. 41:10, 13; 1 Ped. 5:7).

Ehechauka revyʼaha umi mbaʼe porã ojapóvare koʼág̃a Jehová. Emyesakã mbaʼépa Jehová ojapo hína koʼág̃a isiervokuéra rehehápe, upéva katuete omokyreʼỹta umi nerendúvape. Ne ñeʼẽre ojekuaa vaʼerã mbaʼéichapa nde revyʼa ha remombaʼe Jehová ojapóva, upéicha umi nerendúva ovyʼáta avei.

Por ehémplo, ikatu ere mbaʼéichapa Jehová káda día ñanepytyvõ ñambohovái hag̃ua umi provléma ha ohechauka ñandéve mbaʼépa jajapo vaʼerã javyʼa hag̃ua (Is. 30:21). La Biblia rupive Ñandejára omyesakã ñandéve mbaʼéicha rupípa ñanderasy, ñamano, mbaʼérepa oĩ hetaiterei mondaha ha inhustísia, ha mbaʼéichapa haʼe oipeʼapáta koʼã mbaʼe. Avei pe kongregasiónpe jatopa heta ermáno ñanderayhuetereíva. Ha ikatu ñañemoag̃ui Jehováre ñemboʼe rupive. Javyʼa avei Jehová ñandeporavo haguére jaiko hag̃ua itestígoramo. Ha oikuaauka ñandéve Cristo ogovernamaha yvágape ha ko múndo aña koʼẽrõitéma oñehunditaha (Apoc. 12:1-12).

Ikatu remombeʼu avei mbaʼéichapa Jehová ñanepytyvõ umi rreunión ha asambléa rupive. Ojekuaáramo nde reagradese ha remombaʼeha koʼã mbaʼe, umi nerendúva ohechakuaáta iñimportanteha oho meme rreunionhápe (Heb. 10:23-25).

Pablo ha Bernabé ohokuévo Jerusalénpe, omombeʼu umi ermánope ‘mbaʼéichapa umi tetã ambuegua okambia ha omombaʼeguasu Ñandejárape, ha umi ermáno ovyʼaiterei ohendúvo upéva’ (Hech. 15:3). Nde ikatu avei remombeʼu mbaʼéichapa Jehová ovendesi rupi  iñorganisasión, koʼág̃a ojepredika hetaiterei lugárpe, térã emombeʼu peteĩ experiénsia iñinteresánteva. Koʼã mbaʼe omombaretéta katuete umi nerendúvape.

Umi ermáno koʼýte ikyreʼỹta avei rehechaukáramo Jehová omombaʼeha upe ojapóva hikuái. Eguerohory chupekuéra opredika meme rupi, ha oimérõ oĩ umi ijedámava térã hasykatúva, emombaʼe avei koʼã ermánope ojapo haguére ikatumíva. Ere chupekuéra Ñandejára siémpre imanduʼataha umi mbaʼe porã ojapo vaʼekuére (Heb. 6:10). Avei remyesakã vaʼerã ñaaguantáramo umi jehasa asy jahechaukaha ñande jerovia imbareteha, ha upéva ovaleterei Jehovápe g̃uarã (1 Ped. 1:6, 7). Koʼã mbaʼe ningo omokyreʼỹetereíta umi ermánope.

Kyreʼỹme reñeʼẽ vaʼerã Ñandejára promésare. Umi promésa oĩva Ñandejára Ñeʼẽme ñanemokyreʼỹeterei. Oiméne umi ermáno heta vésema ohendu koʼã mbaʼe, ¿mbaʼépa ikatu rejapo upéicharõ og̃uahẽve hag̃ua umi nerendúva korasõme? Reñeʼẽ vaʼerã con sentimiénto koʼã promésare, upéicha haʼekuéra ogueroviáta, omombaʼevéta umíva, ha ohechakuaáta oñekumplitaha katuete. Umi suherénsia jahecha vaʼekue ko eskuélape nepytyvõta rejapo porã hag̃ua upéva.

Añetehápe ningo Jehová hína pe omokyreʼỹ ha omombaretéva enterove isiervokuérape. Péro nde ikatu avei reipytyvõ chupe, otoka jave ndéve diskúrso reaprovecha vaʼerã rejapo hag̃ua upéva.