UMI púnto prinsipál haʼe hína umi idéa iñimportantevéva peteĩ diskúrsope. Reipotáramo umi nerendúva ontende pe informasión ha osegi umi konsého, tekotevẽ remyesakã porã umíva.

¿Mbaʼépa nepytyvõta rerresalta hag̃ua pe idéa iñimportantevéva? Tekotevẽ reiporavo porã pe informasión reiporútava ha remohenda hekoitépe. Reprepara jave nde diskúrso ningo katuete retopáta hetaiterei informasión, ¿mbaʼéichapa reikuaáta mavaitévapa reiporúta?

Tenonderã rehecha vaʼerã mbaʼe mbaʼépa oikuaáma voi umi nerendúva upe témagui. Por ehémplo, ¿ipyahúpa chupekuéra g̃uarã pe informasión, térãpa oĩ umi oikuaámava voi? ¿Ogueroviápa enterove la Biblia heʼíva ikatuha ideprovécho ñandéve, térãpa oĩ umi ndojeroviaguasúiva? ¿Mbaʼe mbaʼépa ombohovái vaʼerã hikuái káda día ikatu hag̃uáicha osegi umi konsého oĩva la Bíbliape? Upe rire repensa vaʼerã mbaʼépa nde rehupytyse pe diskúrso rupive. Rerekóramo enkuénta koʼã mbaʼe, ikatúta reiporavo umi informasión ideprovechokueténte.

Oñemeʼẽramo ndéve peteĩ voského, reiporu vaʼerã umi púnto prinsipál oĩmava voi pe voskéhope. Ha remyesakã jave káda púnto, rereko vaʼerã enkuénta umi mbaʼe jahecha vaʼekue pe ótro párrafope, péicha pe informasión ideprovechoitereíta umi nerendúvape. Péro noñemeʼẽiramo ndéve peteĩ voského, ndete reiporavo vaʼerã umi púnto prinsipál.

Katuete ningo ndahasymoʼãi ndéve rejapo hag̃ua pe diskúrso rerekóramo ne akãme umi idéa iñimportantevéva, ha remohenda porãramo pe informasión omopyendáva káda púnto. Avei péicha igustovéta la nde diskúrso ha ideprovéchota umi nerendúvape.

Mbaʼéichapa remohenda vaʼerã pe informasión. Nde diskúrsope nde ikatu remohenda pe informasión de diferénte fórma. Odependétantema upe rehupytyséva nde diskúrso rupive reikuaa hag̃ua  mbaʼéichapa remohendáta. Upéicharõ, jahechami mbaʼéichapa rejapokuaa upéva.

Ikatu redividi peteĩ idéa diferénte pártepe. (Remyesakãramo káda párte ikatúta oñentende mbaʼépa hína pe téma prinsipál, ha nepytyvõta rehechauka hag̃ua mbaʼérepa iñimportánte ojesegi umi konsého remeʼẽva nde diskúrsope.) Avei ikatu remohenda umi mbaʼe oiko vaʼekue en órden. (Por ehémplo, reñepyrũ hag̃ua ikatu remombeʼu umi mbaʼe oiko vaʼekue pe Dilúvio mboyve, upe rire ikatu remyesakã umi mbaʼe oiko vaʼekue oñehundi mboyve Jerusalén, áño 70-pe. Ha ipahaite remombeʼukuaa umi mbaʼe oikóva ñane tiémpope.) Ikatu avei remyesakã mbaʼépa oikóta jadesidi porãramo térã jadesidi vaíramo. (Remohendakuaa pe informasión reñeʼẽ hag̃ua peteĩ provlémare ha rehechauka mbaʼérepa oiko upéva.) Avei ikatu remohenda pe informasión rehechauka hag̃ua mbaʼépepa idiferénte ojuehegui mokõi mbaʼe, térã mokõi situasión. (Por ehémplo, ikatu rehechauka mbaʼeichaitépa jajeperhudikáta nañaneñeʼẽrendúiramo Jehovápe, ha avei ñasẽ porãtaha jasegíramo umi konsého haʼe omeʼẽva.) Rejapo vove nde diskúrso ikatu remohenda pe informasión mokõi térã hetave hendáicha.

Oĩrõ guare pe Sanedrín renondépe, Esteban ojapo vaʼekue peteĩ diskúrso iporãitereíva, ¿mbaʼéichapa haʼe omohenda umi mbaʼe heʼíva? Haʼe omombeʼu umi mbaʼe oiko vaʼekue en órden Abrahán tiémpo guive. Jaleévo Hechos 7:2-53 jahecha haʼe oiporavo porã hague umi idéa omyesakãséva. Esteban omombeʼu umi mbaʼe ogueroviáva umi hudío, ha heʼi Ñandejára ojevale hague José rehe osalva hag̃ua iñermanokuérape, jepe haʼekuéra ñepyrũrã omboyke vaʼekue chupe. Upe rire omombeʼu avei umi isrraelíta naiñeʼẽrendúi hague Moiséspe, ha omohuʼã hag̃ua heʼi umi oĩva pe Sanedrínpe ojoguaha koʼã isrraelítape ojukauka haguére Ñandejára Raʼýpe.

Ani remoĩ hetaiterei púnto prinsipál. Tahaʼe haʼéva pe téma reñeʼẽtava, natekotevẽi remoĩ hetaiterei púnto remyesakã hag̃ua. Jepe nde diskúrso orekóta diez térã treinta minúto, ani remoĩ hetaiterei idéa prinsipál, pórke umi nerendúva naimanduʼapamoʼãi. Ndahaʼéi ipukúta haguére nde diskúrso remoĩ vaʼerã chupe hetave púnto, upéva rangue reñehaʼã vaʼerã rerresalta porãve umi reguerekóva.

 Remyesakã porã vaʼerã káda idéa prinsipál ha ani rejapuraiterei rehasa hag̃ua ótro púntope. Remeʼẽ vaʼerã tiémpo umi nerendúvape ojepyʼamongeta hag̃ua pe ere vaʼekuére, upéicharõ imanduʼáta hese hikuái.

Reñehaʼã vaʼerã taisensíllo la nde diskúrso, ani reiporuse hetaiterei informasión ha redesahusia umi nerendúvape. Remohendáramo umi idéa prinsipál ha iguýpe remoĩramo umi informasión omyesakãvéva umi púnto, nde diskúrso isentídota ha ndahasymoʼãi oñentende hag̃ua. Péicha umi nerendúva imanduʼa porãvéta hese.

Erresalta umi púnto prinsipál. Remohenda porãrõ umi informasión nde voskéhope, ikatúta rerresalta umi púnto prinsipál.

¿Mbaʼéichapa ikatu rerresalta umi púnto prinsipál? Reprepara vaʼerã umi téxto ha informasión orresalta porã hag̃uáicha upéva. Umi púnto sekundário avei omyesakã vaʼerã upe idéa, upévare ndovaléi remoĩnte oimeraẽ informasión ndegustágui rei. Ikatu hag̃uáicha umi nerendúva ontende porã pe ereséva, ikatu rerrepeti umi palávra iñimportantevéva térã rerrepeti pe idéa prinsipál.

Oĩ diskursánte onumeráva umi púnto prinsipál orresalta hag̃ua. Jepe ikatu avei ojejapo upéicha, iporãve hína reiporavo porã umi púnto rerresaltaséva ha emohenda pe informasión oñentende porã hag̃uáicha.

Ikatu avei káda párte mboyve remombeʼu mbaʼe idéapa rehesaʼỹijóta hína, péicha umi nerendúva oñatendevéta nderehe remyesakãvo rehóvo. Ha rehasa mboyve ótro púntope ikatu rejapo peteĩ rresúmen mbykymi pe púnto prinsipál rehesaʼỹijo vaʼekuégui.

Predikasiónpe. Koʼã suherénsia jahecha vaʼekue ikatu avei ideprovécho ndéve reñemongeta jave umi héntendi predikasiónpe. Resẽ mboyve repredika repensa vaʼerã mbaʼe témapa ointeresáta umi héntepe, ha mbaʼe téxtopa oho porãta hese. Ikatu reiporavo mokõi púnto prinsipál remyesakã hag̃ua chupe mbaʼe esperánsapa omeʼẽ la Biblia. Rehecha rire mbaʼe téxtopa releéta, repensa vaʼerã mbaʼe introduksiónpa reiporúta. Péicha rejepreparáramo ikatúta remyesakã porã pe mensáhe ha umi ogajára imanduʼáta pe ere vaʼekuére.