PE Eskuéla Jaiporukuaa Hag̃ua la Biblia ojeprepara oñepytyvõ hag̃ua entéro oĩva kongregasiónpe. Ha umi ótra rreunión ha aty guasúpe oñemeʼẽ avei heta informasión ideprovéchova opavavépe. Umi ermáno oikuaa umi rreunión rupive ikatuha oñemoag̃uive Jehováre, upévare omboyke itiémpo ha oĩ voi heta ojesakrifikáva oho hag̃ua salónpe. Upéicharõ, oñemeʼẽramo ndéve peteĩ asignasión koʼã rreuniónpe g̃uarã, ojeheja hína nde kárgope peteĩ rresponsavilida tuichaitereíva. Apóstol Pablo heʼi vaʼekue Timotéope: “Akóintekena eñatende ndejehe ha remboʼe lájare” (1 Tim. 4:16). Hiʼarive upérõ Timoteo haʼéma vaʼekue ansiáno. ¿Mbaʼéichapa nde ikatu rejeprepara porã otokáramo ndéve peteĩ párte koʼã atyhápe?

Ko pártepe ojeporu pe otokáva ojelee la Bíbliagui káda semána, ha oñemyesakã vaʼerã mbaʼéichapa ideprovécho ñandéve. ¿Mbaʼéicha rejapo vaʼerã ko párte? La Bíbliape oñemombeʼu pe saserdóte Esdras ha umi levíta olee hague Ñandejára Ñeʼẽ opavave renondépe, ha “oipytyvõ umi héntepe ontende hag̃ua mbaʼépa heʼise pe ojeleéva hína” (Neh. 8:8). Nde ikatu resegi iñehémplo.

¿Mbaʼéicha repreparakuaa ko asignasión? Ikatúma guive, relee vaʼerã pe párte otokáva ndéve por lo méno una semána mboyve. Reñemboʼe vaʼerã Jehovápe ha epensa mbaʼéichapa pe informasión ikatu ideprovécho ne kongregasiónpe. Relee jave reñeporandu vaʼerã: “¿Mbaʼe konsého térã ehémplopa ikatu aiporu aipytyvõ hag̃ua che kongregasiónpe?”.

Tekotevẽterei reheka informasión omyesakãvéva umi téxto, por ehémplo ikatu reiporu Watchtower Library en CD-ROM, pe Índice de las publicaciones Watch Tower, térã pe Gía oiporúva Testígo de Jehová otopa hag̃ua informasión. Ndereguerekóiramo koʼã puvlikasión ikatu reiporu pe índise osẽva diciémbrepe rrevísta Ñemañaháme. Umi informasión oñeʼẽva umi téxtore omyesakã mbaʼépa oiko vaʼekue upe tiémpope ha mbaʼéicha oñekumpli umi profesía. Omombeʼu mbaʼépa ñanemboʼe umíva Jehovágui, térã mbaʼéichapa umi konsého oĩva  la Bíbliape ideprovécho ñandéve. Reiko rangue reñeʼẽ hetaiterei téxtore, ikuentave remyesakã porã peteĩ térã mbovymi púntonte.

Ko pártepe umi nerendúva ikatu avei okomenta mbaʼépa oaprende oleévo la Biblia upe semánape. Otoka jave ndéve ko asignasión ikatu reporandu: ¿Mbaʼépa petopa ikatútava peiporu pejapo jave pende estúdio personál, pestudia jave pende rogayguándi, pepredika jave térã pende rekovépe? ¿Mbaʼe mbaʼépa ikatu ñaaprende Jehovágui jahechávo mbaʼéichapa haʼe otrata umi héntepe? ¿Mbaʼe iporãvapa petopa omombaretéva pende jerovia ha penepytyvõva pehayhuve hag̃ua Jehovápe? Rejeprepara jave ani rejesareko umi detálle naiñimportanteguasúivare, upéva rangue ehechauka mbaʼépa heʼise umi versíkulo reiporavo vaʼekue ha mbaʼéichapa ikatu ideprovécho chupekuéra pe informasión.

Ojejapo hag̃ua koʼã diskúrso ojeporu rrevísta Ñemañaha, ¡Despertad! térã informasión oñeguenohẽva peteĩ lívrogui. Katuete reguerekóta voi hetaiterei informasión ndaikatumoʼãiva reiporupa. ¿Mbaʼéichapa ikatu rejapo ko diskúrso? Peteĩ mboʼehára oporomboʼéva hekoitépe ndahaʼéi ojupínteva olee informasión, síno heʼiháicha la Biblia, enterove ansiáno “ikatupyry vaʼerã oporomboʼe hag̃ua” (1 Tim. 3:2).

Tenonderãite restudia vaʼerã pe párte otokáva ndéve, eheka avei umi téxto ha ejepyʼamongeta hese. Tekotevẽ voimíma voi rejapo upéva. Umi ermáno ningo oleéta voi pe puvlikasión, upévare ndovaléi rerrepasa pyaʼe pyaʼénte pe informasión, síno rehechauka vaʼerã mbaʼéichapa ikatu ojejapo umi konsého oĩva upépe. Eñehaʼãkena eiporavo umi púnto iñimportantevéva ha ideprovéchotava ne kongregasiónpe.

Umi mitã jepe ningo idiferénte ojuehegui, upéicha avei káda kongregasión idiferénte. Ha peteĩ túva ikatupyrýva ohekomboʼe jave ifamíliape ndoikói ombohysýi mbaʼépa oĩ porã ha mbaʼépa oĩ vai, síno orrasona itaʼýrandi, haʼete voi ohechakuaa hag̃ua upéva. Pe túva oikuaa ifamília lája ha mbaʼe provlémapa ohasa hína. Upéicha avei umi oporomboʼéva kongregasiónpe: oikuaa vaʼerã mbaʼe mbaʼépa ohasa ha oikotevẽ pe kongregasión. Haʼekuéra ndeʼíri vaʼerã mbaʼeve omotĩtava térã omoñeñandu vaítava umi ermánope. Ohechauka guei mbaʼéichapa ideprovécho ñandéve jaguata Jehová rapére ha omyesakã porã umi konsého ñanepytyvõva ñambohovái hag̃ua umi mbaʼe ijetuʼúva.

 Peteĩ mboʼehára ikatupyrýva omboʼe jave opoko umi hénte korasõre. Rehupyty hag̃ua upéva ndahaʼéi remyesakãnte vaʼerã pe informasión, síno rehechauka vaʼerã mbaʼéichapa ideprovécho upéva. Umi mbaʼe erévare ojekuaa vaʼerã sinséramente rejepyʼapyha hesekuéra. Umi ansiáno oikuaa porã vaʼerã mbaʼe situasión ijetuʼúvapa ohasa káda ermáno, upéicharõmante ojapo jave ipárte ikatúta oporomokyreʼỹ, oiporiahuvereko ha ohechaukáta ontendeha iñermanokuéra ohasáva.

Remboʼe porã hag̃ua kongregasiónpe tekotevẽ reikuaa mbaʼépa remboʼese nde diskúrso rupive. Rerresalta porã vaʼerã umi púnto prinsipál ikatu hag̃uáicha umi ermáno imanduʼa hese. Péicha umi nerendúva opilláta mbaʼe mbaʼépa tekotevẽ ojapo.

Otokáramo ndéve rejapo diskúrso oñeguenohẽva Ñane Marandu Porãgui, natekotevẽi rehekave informasión, síno remyesakã vaʼerã umi oĩmava voi Ñane Marandu Porãme. Reipytyvõ vaʼerã umi nerendúvape ohechakuaa hag̃ua mbaʼéichapa umi téxto vívliko omopyenda umi konsého oñemeʼẽva upépe (Tito 1:9). Ndahetái rupi pe tiémpo rerekóva ndaikatumoʼãi remoĩ ótro púnto noĩriva pe informasiónpe.

Sapyʼánte pe diskúrso otokáva ndéve oñeguenohẽ vaʼerã rrevísta Ñemañahágui térã oñemoĩnte mbaʼe témarepa reñeʼẽ vaʼerã. Ne rresponsavilida hína remboʼe pe kongregasiónpe, upévare reikuaa vaʼerã mbaʼe mbaʼépa ohasa ha oikotevẽ ne kongregasión, ha repensa vaʼerã upévare rejeprepara jave. Ikatu reiporu peteĩ ehémplo térã experiénsia ohóva pe témare. Nemanduʼákena ndahaʼéi ku reñeʼẽnte vaʼerã ko témare, síno remyesakã ha reipytyvõ vaʼerã umi ermánope ohechakuaa hag̃ua mbaʼéichapa ikatu kyreʼỹme jajapo Jehová ohaʼarõva ñandehegui (Hech. 20:20, 21).

Reprepara jave ne asignasión repensa vaʼerã mbaʼe mbaʼépa ohasa umi ermáno ne kongregasionpegua. Epensa mbaʼe mbaʼérehepa ikatu reguerohory chupekuéra, ha eñeporandu: “¿Mbaʼéichapa pe informasión ikatu oipytyvõ chupekuéra ikatupyryve ha ovyʼave hag̃ua predikasiónpe?”.

Oiméramo pe párte otokávape ndéve heʼi ojejapo vaʼerãha demostrasión térã entrevísta, ani reheja upéva última órape g̃uarã. Avei  naiporãmoʼãi rehejapánte umi ojapótava kárgope ohecha mbaʼéichapa ojapo vaʼerã. Ikatúma guive voimíre rehecháma vaʼerã mbaʼéichapa ojapóta hikuái pe demostrasión térã pe entrevísta. Reñatende vaʼerã avei tojejapo pe Marandu Porãme heʼihaichaite, upéicharõmante hesakãvéta umi púnto iñimportantevéva.

Umi ermáno ikatupyryvéva oporomboʼe hag̃ua ha ijerovia mbaretévape, oñemeʼẽ jepi diskúrso asambléa jave. Koʼã aty guasu iñimportanteterei, umíva rupive Jehová omboʼe isiervokuérape. Otokáramo ndéve rejapo hag̃ua, ikatu oñemeʼẽ ndéve peteĩ diskúrso relee hag̃ua oĩhaichaite, térã peteĩ voského. Ha otokáramo ndéve redirihi peteĩ dráma oñemeʼẽta ndéve umi instruksión mbaʼéichapa ojejapo vaʼerã. Rerresivíramo koʼãichagua asignasión restudia porã vaʼerã pe párte oñemeʼẽva ndéve, repilla porã meve mbaʼérepa iñimportánte upe informasión.

Oñemeʼẽramo ndéve rejapo hag̃ua peteĩ diskúrso leído, nerekambiái vaʼerã mbaʼevete, síno relee vaʼerã pe informasión oĩhaichaite. Restudia vaʼerã repilla peve umi púnto prinsipál ha mbaʼéichapa umíva oñemyesakã ohóvo. Ani hag̃ua nde diskúrso ikaigue térã haʼete releénteva hína, repraktika vaʼerã en vos álta, ikatu hag̃uáicha rerresalta umi idéa, eñeʼẽ kyreʼỹme ha umi mbaʼe eréva osẽ nde pyʼaite guive. Ha reiméta rupi heta hénte apytépe reikuaa vaʼerã moõpa tekotevẽta reñeʼẽ hatãmie térã mbegueve, pe eréva opoko hag̃ua umi nerendúva korasõre.

Péro oñemeʼẽro ndéve peteĩ voského, ndete reprepara vaʼerã nde diskúrso ha reiporu pe informasión oñemeʼẽva ndéve. Ani releénte umi mbaʼe oĩva upépe, ni reskrivipaite la erétava guive. Reñehaʼã vaʼerã rejapo ku reñemongetaramoguáicha umi nerendúvandi, ha umi mbaʼe eréva osẽ vaʼerã ne korasõite guive. Reiporu porãramo pe tiémpo oñemeʼẽva ndéve, ikatúta rehechauka mbaʼéichapa umi téxto vívliko omopyenda pe téma ha remyesakã porãta umi púnto prinsipál. Ani remboyke umi púnto iñimportánteva oĩva pe voskéhope remoĩségui peteĩ mbaʼe ndévente ndegustáva. Nemanduʼa vaʼerã opa mbaʼe remboʼéva oñemopyenda vaʼerãha la Bíbliape, ha koʼýte umi ansiáno oiporu vaʼerã Ñandejára Ñeʼẽ oporomboʼe hag̃ua (2 Tim. 4:1, 2). Upévare reñatende vaʼerã umi téxto oĩvare nde voskéhope, eiporu  umíva remopensa hag̃ua umi nerendúvape, ha ehechauka chupekuéra mbaʼéichapa jasegi vaʼerã umi konsého.

Oimérõ pyʼỹi otoka ndéve diskúrso ne kongregasiónpe, ¿mbaʼépa nepytyvõta rejapo hag̃ua hekoitépe? Voimi reheve repreparáma vaʼerã ne asignasión.

Reipotáramo nde diskúrso ideprovécho umi ermánope, tekotevẽ rejepyʼamongeta reprepara mboyve. Upévare rejepokuaa vaʼerã relee pe informasión oñemeʼẽre ndéve pe asignasión, péicha ikatúta rejepyʼamongeta hese rejapo aja ne rembiapokuéra. Ikatu upe semánape avei rehendu peteĩ komentário, térã oiko peteĩ mbaʼe ikatúva nepytyvõ reikuaa hag̃ua mbaʼéichapa rejapo vaʼerã nde párte térã mbaʼérepa ou porãta umi ermánope upe informasión. Jepeve remboyke vaʼerã heta tiémpo relee ha rejepyʼamongeta hag̃ua nde diskúrsore, upéva ideprovechoitereíta ndéve. ¿Mbaʼérepa? Ág̃a reprepara vove ne asignasión reikuaátama mbaʼe informasiónpa añetehápe ideprovéchota ha iporãta reiporu. Ha rejapóvo nde diskúrso katu reiméta trankilove, umi mbaʼe eréva oipytyvõta umi nerendúvape ha opokóta ikorasõre.

Oñemeʼẽvo ndéve peteĩ asignasión, Jehová ndeporu hína ohekomboʼe hag̃ua isiervokuérape. Eñehaʼãkena emombaʼe upe priviléhio, péicha rehechaukáta remombaʼeha chupe, ha reipytyvõta hína ne ermanokuérape (Is. 54:13; Rom. 12:6-8).