ENTEROVE ningo jaipota oiko ñandehegui mboʼehára ikatupyrýva. ¿Mbaʼérepa iñimportantete upéva? Oimérõ ramoiténte oiko hague ndehegui puvlikadór katuete rerekoséta peteĩ estúdio vívliko, Jesús heʼi voi ñaipytyvõ vaʼerãha ñande rapichápe oiko hag̃ua chuguikuéra idisípulo (Mat. 28:19, 20). Ha oimérõ heta tiémporema repredika, katuete ndekatupyryseve reg̃uahẽ hag̃ua umi nerendúva korasõme. Umi sy ha túva katu tekotevẽ omboʼe ifamíliape ohayhu hag̃ua Jehovápe, ikatu hag̃uáicha ijeheguiete odesidi hikuái oservi chupe (3 Juan 4). Ha nde ansiánoramo térã rehupytyse upe priviléhio, nde diskúrso rupive oiméne reipytyvõse ne ermanokuérape ohayhu hag̃ua Jehovápe ha umi léi haʼe omeʼẽva. ¿Mbaʼépa nepytyvõta rejapo porã hag̃ua koʼã mbaʼe?

Jesucristo hína pe Mboʼehára Ikatupyryvéva, upévare jasegi vaʼerã iñehémplo (Luc. 6:40). Haʼe omboʼe jave opoko umi hénte korasõre ha umi mbaʼe omboʼéva ndopytái tesaráipe. Umi mbaʼe heʼíva rupive Jesús oipytyvõ vaʼekue umi héntepe opensa hag̃ua ha oservi hag̃ua Jehovápe ipyʼaite guive. Umi héntepe ndaijetuʼúi vaʼekue ontende mbaʼépa ojapo vaʼerã. ¿Ikatútapa nde avei péicha reipytyvõ umi nerendúvape?

Jesús oporomboʼe porãiterei vaʼekue oaprende rupi heta mbaʼe itúva Jehovágui ha pe espíritu sánto oipytyvõgui chupe. ¿Rejerurépa avei Jehovápe tanepytyvõ remboʼe porãve hag̃ua ne estudiantekuérape? Rerekóramo família, ¿rejerurépa Jehovápe tanemoarandu rehekomboʼe porã hag̃ua chupekuéra? ¿Reñemboʼépa Jehovápe nde pyʼaite guive rejapóta jave diskúrso térã otokáramo ndéve párte rreunionhápe? Reñemboʼéramo rehechauka hína rejeroviaha Jehováre, ha upéva nepytyvõta ndekatupyryve hag̃ua.

Jahechauka avei jajeroviaha Jehováre jaiporúvo la Biblia ñaporomboʼe jave. Pe pyhare omano mboyve Jesús heʼi vaʼekue itúvape: “Che ameʼẽ chupekuéra ne ñeʼẽ” (Juan 17:14). Jepe Jesús iñarandu ha oikuaa hetaiterei mbaʼe, haʼe nomboʼéi mbaʼeve ijehegui reínte, síno umi mbaʼe oaprende vaʼekue itúvagui. Tekotevẽ ñande jasegi avei iñehémplo (Juan 12:49, 50). Ñandejára ñeʼẽ ningo ipoderosoiterei ha ikatu okambia umi hénte rekove, umi mbaʼe opensáva ha opoko hemiandúre  (Heb. 4:12). Upéicharõ, jaikuaa porãvévo la Bíbliape oĩva ha jaiporúramo predikasiónpe, ñandekatupyryvéta jahávo ñaipytyvõ hag̃ua ñande rapichápe oñemoag̃ui hag̃ua Ñandejárare (2 Tim. 3:16, 17).

¿Mbaʼéichapa ikatu ñahaʼanga Crístope? Upearã ndahaʼéi jajapónte vaʼerã diskúrso iporã ha igustoitereíva. Jesús omboʼe jave, umi hénte “ohecharamoiterei umi ñeʼẽ porãite oiporúva”, péro haʼe ndojapói upéva oñembovale hag̃ua, síno ombotuicha hag̃ua Itúvape (Luc. 4:22; Juan 7:16-18). Haʼe heʼi voi idisipulokuérape: “Peẽ pehesape vaʼerã umi hénte renondépe, haʼekuéra ohecha hag̃ua umi mbaʼe porã pejapóva ha ombotuicha pende Ru oĩva yvágape” (Mat. 5:16). Akóinte ñanemanduʼa vaʼerã upévare ñaporomboʼe jave ha ani jaʼe mbaʼeve ñandejehegui rei. Upévare ñañeporandu vaʼerã: “Koʼã mbaʼe haʼéva rupive, ¿mávapepa oñembotuicháta, chéve térã Jehovápe?”.

Iporãramo jepe remombeʼu ehémplo ha experiénsia reporomboʼe jave, reñatende vaʼerã ani ipukueterei térã odistrae umi nerendúvape ha ipahápe noñentendeporãi pe remboʼeséva hína. Ikatu igústo umi nerendúvape remombeʼúramo umi káso oiko vaʼekue, péro iporã reñeporandu: “¿Añetehápepa chepytyvõ umíva amog̃uahẽ hag̃ua pe añetegua? Ohendu rire hikuái ko amombeʼúva, ¿mávapepa oñembotuicháta: chéve térã Jehovápe?”. Pe mboʼehára ikatupyrýva oipota siémpre oñembotuicha Jehovápe.

Peteĩ persóna oservi hag̃ua Jehovápe tekotevẽ ontende porã umi mbaʼe oaprendéva. Haʼe ohechakuaa vaʼerã mbaʼépepa idiferénte pe añetegua umi enseñánsa japúgui. Umi mboʼehára ikatupyrýva oikuaa iñimportanteha ojapo upéva oporomboʼe jave.

Heta vése Jehová heʼi vaʼekue isiervokuérape ‘ohechakuaa vaʼerãha hikuái mbaʼépepa idiferénte’ ojuehegui umi mbaʼe ipotĩva umi mbaʼe ikyʼávagui (Lev. 10:9-11). Heʼi vaʼekue avei umi oservíva chupe omboʼetaha “mbaʼépepa idiferénte peteĩ mbaʼe imarangatúva peteĩ mbaʼe kyʼágui” (Ezeq. 44:23). Provérbiospe heta vése ojehechauka mbaʼéichapa idiferénte ojuehegui peteĩ persóna hekojojáva peteĩ naiñeʼẽrendúivagui, pe iñarandúva itavývagui. Ha apóstol Pablo avei heʼi idiferenteha ojuehegui peteĩ hekojojáva peteĩ ivuénovagui (Rom. 5:7). Hebréospe katu Pablo ohechauka Cristo haʼeha saserdóte guasu, ha heʼi iservísio iporãveha upe Aarón ojapo vaʼekuégui. Síglo 17-pe peteĩ profesór  hérava Johann Amos Comenius heʼi vaʼekue: “Ñaporomboʼe heʼise jahechauka mbaʼépepa idiferénte ojuehegui umi mbaʼe; por ehémplo maʼerãpa ojejapo, mbaʼéichapa oñepyrũ ha mbaʼérepa tuichave térã michĩve. [...] Pe persóna ohechauka porãva mbaʼéichapa idiferénte ojuehegui umi mbaʼe, oporomboʼe porã hína”.

Ñamoĩ chupe nde reñeʼẽha peteĩ persónandi Ñandejára Rréinore, ha haʼe nontendeporãi mbaʼépa heʼise. Upéicharõ ikatu remyesakã chupe la Biblia omboʼéva: ko Rréino ndahaʼeiha peteĩ mbaʼe jarekóva ñane korasõme, ha mbaʼérepa idiferénte yvyporakuéra goviérnogui. Péro haʼe oikuaámarõ koʼã mbaʼe ikatu rehechauka chupe mbaʼéichapa idiferénte Ñandejára Rréino oĩva Cristo poguýpe, Ñandejára goviérnogui oĩva Salmo 103:19-pe. Idiferenteha avei pe ‘taʼýra ohayhuetéva rréinogui’, oĩva Colosenses 1:13-pe, térã mbaʼéichapa Ñandejára Rréino idiferénte avei upe ojeʼévagui Efesios 1:10-pe, upépe oñemombeʼu mbaʼéichapa Ñandejára ‘odirihi ha ojapo’ ohóvo opa mbaʼe oĩ hag̃ua Cristo poguýpe. Rehechaukáramo mbaʼépepa idiferénte koʼã mbaʼe, umi nerendúva ontende porãvéta la Biblia omboʼéva.

Oporomboʼe jave Jesús ohechauka idiferenteha umi hénte ontende lája pe Léi, ha mbaʼéichapa añetehápe oñentende vaʼerã (Mat. 5:21-48). Ohechauka avei idiferenteha umi omombaʼeguasúva ipyʼaite guive Ñandejárape umi fariséo rovamokõigui (Mat. 6:1-18). Omyesakã idisipulokuéra tekotevẽha isakrifikádo ha ndojoguái vaʼerãha umi oikóvape omandasénte ótrope (Mat. 20:25-28). Ha peteĩ vuéltape omokyreʼỹ umi héntepe ijeheguiete ohechakuaa hag̃ua idiferenteha peteĩ persóna oñarrepentíva ipyʼaite guive, ha umi oñembohekojoja guaʼúnteva (Mat. 21:28-32). Upérõ guare Jesús ñanemboʼe ótra kósa tekotevẽva jajapo ñaporomboʼe jave. Jahechami upéva.

Pe mboʼehára ikatupyrýva ndahaʼéi heʼínteva mbaʼépa ojapo vaʼerã umi ohendúva chupe, síno oipytyvõ chupekuéra opensa hag̃ua ha ijeheguiete opilla hag̃ua mbaʼépa ojapo vaʼerã (Prov. 3:21; Rom. 12:1). ¿Mbaʼéicha nde ikatu rejapo upéva? Ikatu rejevale umi pregúntare, Jesús ojapo haguéicha. Haʼe pyʼỹinte oporandu vaʼekue: “¿Mbaʼépa peẽ peje?” (Mat. 21:28). Ótra vuéltape oporandu Pédrope: “¿Mbaʼépa ere Simón? ¿Mávapa opaga umi impuestokuéra umi mburuvicha guasúpe? ¿Itaʼyrakuéra térãpa ótro hénte?”. Péicha Jesús oipytyvõ Pédrope ohechakuaa hag̃ua ijeheguiete máva mávapa opaga vaʼerã umi impuésto  (Mat. 17:25). Peteĩ kuimbaʼe oporandúrõ guare chupe: “¿Máva piko añetehápe che rapicha?”, ombohovái rangue chupe direktoite, Jesús omombeʼu peteĩ káso. Upe káso oñeʼẽ hína peteĩ levíta, peteĩ saserdóte ha peteĩ samaritánore, ha upe rire Jesús oporandu upe kuimbaʼépe: “¿Mávapa koʼã mbohapy apytépe ohechauka ohayhuha pe kuimbaʼe oñemondapa vaʼekuépe?” (Luc. 10:29-36). Ha péicha Jesús omokyreʼỹ pe kuimbaʼépe haʼete ohechakuaa hag̃ua mávapa hína hapicha (Luc. 7:41-43).

Umi mboʼehára ontende porãva la Biblia, ohechakuaa jaadora hag̃ua Ñandejárape hekoitépe ndahaʼéi jaikuaánte vaʼerãha de memória heta mbaʼe ha upéi ñakumpli. Síno tekotevẽ ñañemoag̃ui Jehováre ha jahayhu iléi ñande pyʼaite guive, upéicharõ jahechakuaa pe iñimportantevéva hína pe oĩva ñane korasõme (Deut. 10:12, 13; Luc. 10:25-27). La Bíbliape pe palávra korasõ heʼise mbaʼeichagua persónapa ñande, oike hína umi mbaʼe oĩva ñande pyʼapýpe, ñapensáva, ñañandúva, ha jaipotáva.

Jesús oikuaa yvyporakuéra omombaʼeha jepi hapichápe ipíntarente, Ñandejára katu ndaupéichai, haʼe ohecha mbaʼépa oĩ ñane korasõme (1 Sam. 16:7). Ñande jaservi vaʼerã Jehovápe jahayhúgui chupe, ndahaʼéi jajechauka hag̃ua ótrope (Mat. 6:5-8). Umi fariséo katu ojapo heta mbaʼe ojechaukaségui umi héntepe. Oñembotuicha okumpli haguére umi detalleʼi oĩva pe Léipe, ha omoĩ avei heta rrégla ipohýiva. Ha heʼínte hikuái omombaʼeha Ñandejárape, pórke ni vymi nohaʼangái chupe (Mat. 9:13; Luc. 11:42). Jesús omboʼe iñimportanteha ñakumpli umi mandamiénto, péro ohechauka porã avei ñaneñeʼẽrendu vaʼerãha ñande pyʼaite guive ha ani tovamokõime (Mat. 15:7-9; Mar. 7:20-23; Juan 3:36). Jasegíramo Jesús ehémplo katuete ñasẽ porãta. Tekotevẽramo jepe ñamboʼe ñande rapichápe Jehová ohaʼarõva chugui, iñimportánte avei oikuaa mbaʼeichagua persónapa haʼe. Péicha ohayhúta Jehovápe ha umi mbaʼe odesidívare ojekuaáta omombaʼeha chupe.

Péro tekotevẽ avei umi nerendúva ojepyʼamongeta ohecha hag̃ua mbaʼépa añetehápe oĩ ikorasõme. Jesús omokyreʼỹ vaʼekue umi héntepe ojepyʼamongeta hag̃ua, péicha oikuaáta hikuái mbaʼépa omomýi chupekuéra ojapo térã heʼi hag̃ua peteĩ mbaʼe. Oñemoñeʼẽ jave umi héntepe, Jesús oporandúmi chupekuéra mbaʼérepa haʼekuéra opensa upéicha térã mbaʼérepa ojapo upéva. Péro ndahaʼéi upévante, ombaʼeporandu  rire, katuete omoĩ peteĩ ehémplo omyesakã porã hag̃ua pe omboʼeséva hína (Mar. 2:8; 4:40; 8:17; Luc. 6:41, 46). Nde ikatu avei remokyreʼỹ umi nerendúvape toñeporandu koʼã mbaʼe: “¿Mbaʼérepa añetehápe chestira térã ajapose ko mbaʼe? Ojeʼe térã ojejapóramo peteĩ mbaʼe ndachegustáiva, ¿mbaʼépa che ajapo? ¿Mbaʼérepa añetehápe chemolesta upéva?”. Upéi eipytyvõ chupekuéra ohechakuaa hag̃ua iporãveha opensa hikuái Jehová opensaháicha.

Pe mboʼehára katupyry oikuaa hína pe “arandu haʼeha pe iñimportantevéva” (Prov. 4:7). ¿Mbaʼépa heʼise arandu? Heʼise jaiporu umi mbaʼe jaikuaáva ñambohovái hag̃ua umi provléma, jajehekýi hag̃ua pelígrogui, jahupyty hag̃ua peteĩ méta, térã avei ñaipytyvõ hag̃ua ñande rapichápe. Nde remboʼe vaʼerã ne estudiántepe mbaʼépa heʼi la Biblia, péro ndovaléi redesidi hese. Reiporúvo umi konsého oĩva Ñandejára Ñeʼẽme reipytyvõkuaa chupe ojepyʼamongeta hag̃ua. Ikatu remoĩ ehémploramo peteĩ provléma ha eporandu chupe mbaʼéichapa oipytyvõta chupe upe konsého odesidi porã hag̃ua (Heb. 5:14).

Pentekostés áño 33-pe apóstol Pedro ohechauka mbaʼéicha jajapo vaʼerã upéva. Upérõ haʼe ojapo peteĩ diskúrso iporãitereíva opokóva umi hénte korasõre (Hech. 2:14-36). Haʼe ohesaʼỹijo umi héntendi mbohapy téxto oĩva Ñandejára Ñeʼẽme, upéi ohechauka chupekuéra mbaʼéichapa oñekumpli umíva. Upévo umi hénte ohendúva hína chupe ohechakuaa pyaʼe okuʼe vaʼerãha ojapo hag̃ua Jehová rembipota. ¿Oñeñandúpa avei upéicha umi hénte nerendúva? Remyesakãnte rangue pe informasión, ¿rehechaukápa chupekuéra mbaʼérepa oguerovia ha ojapo vaʼerã upe eréva? ¿Reipytyvõpa chupekuéra ohechakuaa hag̃ua mbaʼépa ojapo vaʼerã? Oime vaʼerã opa rire nde diskúrso haʼekuéra ndeʼimoʼãi “¿mbaʼe piko rojapóta?”, oiko haguéicha pe Pentekostéspe, péro remyesakã porãramo mbaʼéichapa ikatu ojapo hikuái umi téxto heʼíva, upéva katuete omomýita chupekuéra (Hech. 2:37).

Olee jave la Biblia ifamíliandi, tuvakuéra ikatu oipytyvõ umi mitãme ohechakuaa hag̃ua hikuái mbaʼéichapa ikatu ideprovécho chupekuéra upe párte (Efes. 6:4). Por ehémplo, ikatu reiporavo pe párte otokávagui ojelee la Biblia upe semánape ha remyesakã rire, reporandu chupekuéra: “¿Mbaʼépa ñanemboʼe koʼã versíkulo? ¿Mbaʼéichapa ikatu jaiporu predikasiónpe? ¿Mbaʼépa ñanemboʼe Jehovágui? ¿Mbaʼéichapa koʼã versíkulo ñanepytyvõ jahayhuve hag̃ua chupe?”. Emokyreʼỹkena ne famíliape okomenta  hag̃ua umi mbaʼe, ojejapo jave pe párte Eskuéla Jaiporukuaa Hag̃ua la Bíbliape. Katuete opytaitéta iñakãme umi mbaʼe okomentáva hikuái.

Ñande ikatu ñamboʼe ñane ehémplo rupive, ha ndahaʼéi umi jaʼéva rupivénte. Upéicha jahechauka mbaʼéichapa ojesegi vaʼerã umi konsého ñande voi ñameʼẽva. Por ehémplo umi mitã ohaʼanga jepi ituvakuérape, ha péicha ohechauka ojoguaseha chupekuéra. Upéicha avei ne estudiánte osegi vove ne ehémplo, nde resegiháicha Cristo ehémplo, oñepyrũta oguata Jehová rapére ha ohupytýta heta mbaʼe porã (1 Cor. 11:1). Ojapóvo upéva haʼekuéra voi ohechakuaáta Jehová imbaʼeporãha ha oñemoag̃uivéta hese.

La Bíbliape ningo heʼi voi: “Peñatendéke mbaʼeichagua persónapa peẽ: penderekomarangatu ha pemombaʼeguasu vaʼerã Ñandejárape pende pyʼaite guive” (2 Ped. 3:11). Ñakumplívo umi mbaʼe heʼíva la Bíbliape ñamoĩ hína peteĩ ehémplo iporãva. Upévare nde remokyreʼỹramo ne estudiántepe olee hag̃ua káda día la Biblia, nde voi rejapo vaʼerã upéva. Reipotáramo ne família ojapo la Biblia heʼíva, ¿rehechaukápa hína nde voi rekumpliha umíva? Rreunionhápe eréramo kyreʼỹme ojepredika vaʼerãha, ¿ohechápa hikuái nde voi resẽ memeha repredika? Ñande voi ñakumplíramo umi mbaʼe ñamboʼéva, ñamomýita avei ñande rapichakuérape osegi hag̃ua ñane ehémplo (Rom. 2:21-23).

Oiko hag̃ua ndehegui peteĩ mboʼehára katupyry iporã reñeporandu koʼã mbaʼe: “Aporomboʼe jave, ¿aipytyvõpa umi cherendúvape okambia hag̃ua ilája, opensáva ha oñeʼẽ lája? ¿Ahechaukápa mbaʼéichapa idiferénte ojuehegui umi mbaʼe iporãva ivaívagui? ¿Mbaʼépa ajapo umi cherendúva imanduʼa hag̃ua umi mbaʼe haʼévare? ¿Ohechakuaápa hikuái mbaʼéichapa osegi vaʼerã umi konsého oĩva la Bíbliape? ¿Ohechápa hikuái che akumpliha upe amboʼéva? ¿Mbaʼépa ajapo ontende hag̃ua hikuái pe informasión ikatuha oipytyvõ chupekuéra oñemoag̃uive hag̃ua Jehováre?” (Prov. 9:10). Ndevalevéta reporomboʼe hag̃ua rejepyʼamongetáramo koʼã porandúre ha resegíramo apóstol Pablo konsého: “Akóintekena eñatende ndejehe ha remboʼe lájare. Esegíke ejapo koʼã mbaʼe; rejapóramo péicha rejesalváta nde ha avei umi nerendúva” (1 Tim. 4:16).