LA Biblia omombeʼu rréi Salomón “ojepyʼamongeta ha ohesaʼỹijo hague hekoitépe” umi informasión, “ikatu hag̃uáicha oskrivi ha omohenda porã umi proverbio”. ¿Mbaʼéicha rupípa ojapo upéva? “Oskrivi hag̃ua hekoitépe umi ñeʼẽ añeteguáva” (Ecl. 12:9, 10). Lucas katu ‘ohesaʼỹijo porãmbaite iñepyrũ guive’ umi mbaʼe oñeʼẽva Crístore, oskrivi hag̃ua umíva en órden oiko hagueichaite (Luc. 1:3). Oinvestiga porã rupi, Salomón ha Lucas ojapo porãiterei hembiapo.

¿Mbaʼépa heʼise ñainvestiga? Heʼise jaheka porã umi informasión oñeʼẽva peteĩ témare. Upearã tekotevẽ jalee, jastudia porã ha sapyʼánte katu ñaporandu voi ótrope.

¿Mbaʼéicha javépa tekotevẽta reinvestiga? Por ehémplo restudia térã relee jave la Biblia ikatu retopa peteĩ mbaʼe nerentendeporãiva; sapyʼánte predikasiónpe oñeporandu ndéve peteĩ mbaʼe ndereikuaáiva ha rehekase informasión rembohovái porã hag̃ua, térã rejapótaramo peteĩ diskúrso.

Ñapensamína rejapotaha peteĩ diskúrso. Pe informasión reiporútava haʼetévaicha oñeʼẽva heta mbaʼére ha hetaiterei héntepe g̃uarã. ¿Mbaʼépa ikatu rejapo ideprovécho hag̃ua umi nerendúvape? Tuicha nepytyvõta rejeporekáramo heta informasiónre. Sapyʼánte peteĩ téma ikonosídova ikatu iñinteresanteve jaiporúramo peteĩ ehémplo térã ñamombeʼu umi sífra ha porsentáhe osẽ ramovéva upe témagui. Ikatu pe téma rejapo vaʼerã ojeskrivi kuri enterove tapicha oikóva ko múndope g̃uarã, péro nde repensa vaʼerã mbaʼe ehémplopa ikatu reiporu ha mbaʼéichapa ikatu remyesakãve, ikatu hag̃uáicha pe téma ideprovécho pe kongregasiónpe, térã peteĩ persónape g̃uarã. ¿Mbaʼéichapa rejapokuaa upéva?

Rejapo mboyve ne investigasión reñeporandu vaʼerã: “¿Mbaʼe mbaʼépa oikuaáma voi umi cherendúva? ¿Mbaʼépa tekotevẽ oikuaa hikuái?”. Upe rire rehecha vaʼerã mbaʼépa rehupytyse nde diskúrso rupive. Por ehémplo, ¿tekotevẽpa remyesakã peteĩ púnto? Upearã remeʼẽve vaʼerã informasión oñeʼẽva upe témare hesakã porãve hag̃ua pe  oikuaámava voi hikuái, iporãta remombeʼu arakaʼetépa oiko ha mbaʼéichapa. ¿Tekotevẽpa rekonvense umi nerendúvape oguerovia hag̃ua peteĩ enseñánsa? Upearã reiporu vaʼerã informasión ohechaukáva mbaʼérepa ogueroviakuaa hikuái upéva. ¿Tekotevẽpa rehechauka japuha peteĩ enseñánsa? Upéicharõ reikuaa porã vaʼerã mbaʼérepa oĩ ogueroviáva upéva ha remeʼẽ vaʼerã pruéva omyesakãva japuha upe enseñánsa. Péro reñatende vaʼerã ani remoñeñandu vai térã rembopochy umi nerendúvape. Remokyreʼỹtarõ ojesegi hag̃ua peteĩ konsého, tekotevẽ repoko umi nerendúva korasõre, pe diskúrso omomýi vaʼerã chupekuéra ojapo hag̃ua Jehová oipotáva. Upearã ideprovéchota remombeʼúramo umi experiénsia ohechaukáva mbaʼéichapa oĩ vaʼekue osegíva umi konsého, ohasáramo jepe heta mbaʼe ijetuʼúva.

Péro ofalta gueteri rehecha mboy informasiónpa reikotevẽ. Upearã rehecha vaʼerã mboy tiémpopa reguereko. Otokáramo ndéve peteĩ párte kongregasiónpe, ¿mboy minútopa ipuku vaʼerã, cinco térã treinta minúto? Péro rejapótaramo peteĩ estúdio de la Biblia térã visíta de pastoréo erekove tiémpo.

Ipahaitépe rehecha vaʼerã moõguipa ikatu rekonsegi umi informasión. Oiméne reguereko voi nde rógape heta puvlikasión, ha ikatu avei rehecha oĩramo peteĩ biblioteca ne salónpe, térã reiporukuaa peteĩ ermánogui oĩva ne kongregasiónpe. Ha oĩramo peteĩ biblioteca peteĩ eskuélape térã nde róga jerére ikatu ideprovécho avei ndéve.

Rehesaʼỹijoséramo peteĩ téxto, reñepyrũ vaʼerã la Bíbliagui voi. Upearã ikatu rehecha koʼã mbaʼe.

Relee vaʼerã umi versíkulo oĩva upe mboyve ha upe rire. Upéi eñeporandu: “¿Mávape g̃uarãpa ojeskrivi pe téxto?¿Mbaʼépa oiko vaʼekue upe tiémpope ajeve oiko térã ojeskrivi upéva? ¿Mbaʼeichagua persónarepa oñeñeʼẽ?”. Koʼã mbaʼe nepytyvõta rentende hag̃ua pe téxto ha igustove hag̃ua nde diskúrso.

Epensamína Hebreos 4:12 heʼívare. Upe téxto ojeporu jepi ojehechauka hag̃ua mbaʼéichapa Ñandejára Ñeʼẽ ipoderóso, opoko umi hénte korasõre ha oipytyvõ chupekuéra okambia hag̃ua. Péro jahecháramo umi téxto oĩva upe mboyve ha upe rire, ikatúta ñantende porãve. Upérõ apóstol Pablo imanduʼa mbaʼépa ohasa vaʼekue umi isrraelíta oĩrõ guare pe desiértope cuarenta áñore, oike mboyve pe yvy Jehová opromete vaʼekuépe Abrahánpe (Heb. 3:7–4:13). Upe tiémpope  oñekumpli potaitéma “Ñandejára ñeʼẽ”, pe promésa Jehová ojapo vaʼekue chupekuéra, upévare ikatu jaʼe ‘Iñeʼẽ’ oikoveha ha ni mbaʼevéicharõ ndopytareimoʼãiha. Upévare umi isrraelíta ojerovia vaʼerã kuri Jehová ñeʼẽre. Upéicharõ jepe, heta vése haʼekuéra naiñeʼẽrendúi ha ohechauka ndojeroviaiha ipromésare. Ha péicha ojekuaa mbaʼépa añetehápe oĩ ikorasõme. Koʼág̃a avei umi promésa omeʼẽva Ñandejára ohechauka mbaʼépa añetehápe oĩ umi hénte korasõme.

Eheka umi rreferénsia. Oĩ heta Biblia orekóva rreferénsia ha umíva ikatu nepytyvõ. Por ehémplo ikatu rehecha 1 Pedro 3:6 Traducción del Nuevo Mundo de las Santas Escritúraspe, upépe oñeñeʼẽ Sara rehe, ha oñemoĩ voi chupe ehémploramo tembirekokuérape g̃uarã. Pe rreferénsia oĩva upe téxtope ñandegueraha Génesis 18:12-pe, upépe ohechauka Sara oñemoĩ hague Abrahán poguýpe ha “ipyʼapýpe” jepe, haʼe ohenói hague chupe “che karai”. Umi rreferénsia ndahaʼéi omyesakãnteva peteĩ téxto, síno ikatu ohechauka mbaʼéichapa oñekumpli peteĩ profesía, térã omombeʼu mbaʼéichapa umi isrraelíta ojapo vaʼekue umi sakrifísio ha hetave mbaʼe pe Léi poguýpe. Péro naentéroi umi rreferénsia omyesakã koʼã mbaʼe, oĩ omombeʼúnteva mbaʼe téxtopepa oñeñeʼẽ avei pe témare, térã omeʼẽnte informasión umi lugár ha umi héntere.

Eiporu umi concordancia. ¿Mbaʼépa hína umi concordancia? Peteĩ lísta orekóva umi palávra ojeporuvéva la Bíbliape ha oñemoĩva en órden alfabetico. Umíva nepytyvõta retopa hag̃ua hetave téxto omyesakãva pe téma rehesaʼỹijóva hína. Péicha ikatúta retopa umi “ñeʼẽ porãite” oĩva Ñandejára Ñeʼẽme (2 Tim. 1:13). Pe Biblia Ñandejára Ñeʼẽ Mateo – Apocalipsis oreko peteĩ concordancia hérava “Palávra ojeporuvéva ko Bíbliape”. Jareko avei pe lívro hérava Gran Concordancia, oĩva heta idiómape ha kompletoite oreko umi téxto ha palávra oĩva la Bíbliape.

Pe  rrekuádro oĩva páhina 33-pe retopáta hetave puvlikasión omeʼẽva “tembiguái jeroviaha ha iñarandúva” (Mat. 24:45-47). Heta puvlikasión oreko peteĩ índise ha opakuévo oreko jepi avei peteĩ lísta de palávra nepytyvõtava retopa hag̃ua pe informasión reipotáva. Avei rrevísta ¡Despertad!, ha Ñemañaháme osẽ jepi diciémbrepe káda áño peteĩ índise, ha upépe retopáta umi informasión osẽ vaʼekue upe áñope.

Reikuaáramo mbaʼe informasiónpa ikatu retopa káda puvlikasiónpe, péicha pyaʼeve rejuhúta pe rehekáva. Ñamoĩ chupe rehesaʼỹijotaha peteĩ profesía, peteĩ enseñánsa vívlika, térã peteĩ konsého kristianokuérape  g̃uarã. Upéicharõ Ñemañaháme ikatu retopa informasión oñeʼẽva umi témare. Rrevísta ¡Despertad!, katu oñeʼẽve umi provléma oĩvare ñane tiémpope, rrelihiónre, ciencia ha umi hénte opa tetãyguáre. Pe lívro El hombre más grande, omombeʼu Jesús rekovekue, onase mboyve guive oho jey peve yvágape. Ha pe lívro “Testimonio cabal”, omombeʼu mbaʼéichapa oñepyrũ pe kongregasión kristiána ha mbaʼépa ombohovái umi kristiáno ypykue, Héchospe oĩhaichaite. Rehesaʼỹijoséramo versíkulo por versíkulo peteĩ lívro oĩva la Bíbliape, koʼã puvlikasión ikatu nepytyvõ: Apocalipsis... ¡se acerca su magnífica culminación!, Prestemos atención a las profecías de Daniel ha Las profecías de Isaías, volumen 1 ha 2. Pe lívro Razonamiéntope oĩ informasión nepytyvõtava rembohovái hag̃ua umi mbaʼe oñeporandúva ndéve predikasiónpe. Reikuaasevéramo mbaʼe mbaʼépa oñemboʼe umi ótra rrelihiónpe ha mbaʼéicha umíva oñepyrũ, ikatu reheka lívro héravape El hombre en busca de Dios. Pe lívro Los testigos de Jehová, proclamadores del Reino de Dios ha umi DVD hérava Ohechauka ojeroviaha, párte 1 ha 2 omombeʼu mbaʼéichapa oñepyrũ rakaʼe testígo de Jehová ñane tiémpope. Umi Anuáriope ojehechauka mboy órapa ha moõ moõpa ojepredika hína umi marandu porã ko múndo tuichakuére. Lívro Perspicacia volumen 1 ha 2 oreko hetaiterei informasión omombeʼúva mbaʼéichapa rakaʼe umi hénte yma guare, umi lugár, umi mbaʼe oiporúva hikuái, umi idióma oñeñeʼẽva upérõ, ha omyesakã mbaʼéicha oñekumpli umi profesía.

Índice de las publicaciones Watch Tower. Ko lívro oĩma veinte idióma rasápe ha nepytyvõta retopa hag̃ua informasión osẽ vaʼekue ñane puvlikasionkuérape. Oreko peteĩ lísta de palávra ha ótro de téxto vívliko. Retopasérõ informasión oñeʼẽva peteĩ témare, eheka peteĩ palávra ohóva hese. Ha rehekasérõ informasión omyesakãva peteĩ téxto, eheka upe téxto pe lístape. Oĩramo informasión omyesakãvéva pe téma térã téxto, ijykére retopáta moõ moõpa ikatu rejuhu umíva. Oñepyrũnguévo pe índise oreko peteĩ lísta reikuaa hag̃ua umi puvlikasión avreviatúra. Por ehémplo w99 1/3 15 heʼise La Atalaya de 1999, 1 de marzo, páhina 15. Rejaposéramo diskúrso omokyreʼỹva kongregasiónpe, ideprovéchota ndéve pe párte heʼihápe “Biografías de testigos de Jehová” ha “Ministerio del campo”. Oĩ avei pe lívro Gía oiporúva testígo de Jehová otopa hag̃ua informasión, upépe oĩ heta informasión osẽ vaʼekue guaraníme ha oñemoĩ por téma.

Rejeporeka jave informasiónre eñehaʼã eheka upe reikotevẽvante, ha ani rejedistrae ha relee kuánto informasión retopáva. Pe Índice térã pe  Gía ndedirihíramo peteĩ puvlikasiónpe, eho direktoite pe páhina heʼihápe ha emaña umi subtítulore térã oñepyrũnguévo umi párrafo, repilla hag̃ua moõitépa oñeñeʼẽ pe nde reikotevẽvare. Ha rehekáramo informasión oñeʼẽva peteĩ téxtore, eho pe páhina ojeʼehápe ndéve ha eñehaʼã etopa pe téxto reipotáva, upéi elee umi komentário oĩva pe téxto vívliko rire ha pe téxto mboyve.

Watchtower Library en CD-ROM. Reguerekóramo komputadóra ikatu reiporu ko CD orekóva hetaiterei informasión osẽ vaʼekue ñane puvlikasiónpe. Oreko peteĩ prográma retopa pyaʼeve hag̃ua umi mbaʼe rehekáva, tahaʼe téxto térã palávra. Ndaipóriramo ne idiómape ikatu reiporu peteĩ idióma rentendéva, térã ikatu avei reike Internétpe www.pr418.com/gug ha reike heʼihápe Vivliotéka en línea.

Apóstol Pablo heʼi vaʼekue Timotéope: “Egueru avei umi kuatiañeʼẽ, koʼýte umi ojejapóva mymba pirégui” (2 Tim. 4:13). Upéva ohechauka haʼe omombaʼe ha oñongatu hague umi kuatiañeʼẽ oĩ vaʼekue upe tiémpope. ¿Reñongatúpa nde avei umi rrevísta ¡Despertad!, Ñemañaha, ha Ñane Marandu Porã restudiapa rire? Iporã vaʼerã rerekóramo umíva peteĩ bibliotécape rembyatyhápe entéro umi puvlikasión osẽma vaʼekue. Heta kongregasión oreko jepi peteĩ biblioteca pe salónpe voi, ikatúva reiporu reho jave upépe.

Reñongatu vaʼerã umi mbaʼe reiporuséva predikasiónpe térã peteĩ diskúrsope. Por ehémplo ikatu osẽ diáriope peteĩ notísia térã ehémplo ikatúva reiporu, umíva reñongatukuaa. Péro iporã reanota mbaʼe fechapegua ha moõguipa reguenohẽ, térã mávapa oskrivi. Reime jave rreunionhápe eanota avei umi púnto térã ehémplo ikatútava reiporu predikasiónpe. Ha sapyʼánte ikatu repensa peteĩ ehémplo iporãitereívare péro ndaijái reiporu hag̃ua ensegída, upéicharõ reanota ha reñongatu vaʼerã. Ikatu avei reñongatu umi diskúrso térã nóta reiporu vaʼekue rejapórõ guare ne asignasión eskuélape, ikatu amo gotyove ideprovécho jey ndéve.

Peteĩ ñeʼẽnga heʼi: “Reikuaaséramo, reporandu vaʼerã”. Upéva ohechauka ikatuha ñaaprende heta mbaʼe ñande rapichágui. Por ehémplo Lucas oskrivi mboyve ilívro katuete oporandúne raʼe heta mbaʼe  umi oikuaa vaʼekuépe Jesúspe, péicha ombyaty heta informasión (Luc. 1:1-4). Sapyʼánte peteĩ ermáno ikatu omyesakã ndéve peteĩ mbaʼe reikuaase vaʼekue. Umi heta áñorema oservíva Jehovápe katuete nepytyvõkuaa. Ndareíri Efesios 4:8, 11-16-pe heʼi Cristo omeʼẽ hague kuimbaʼekuéra ikatupyrýva “rregáloramo”, koʼãva ñanepytyvõ ikatu hag̃uáicha ‘jaikuaa porã Ñandejára Raʼýpe’. Reñemongetávo ermanokuérandi ikatu rehendu mbaʼépa opensa hikuái, ha péicha reikuaa porãvéta mbaʼéichapa rejapo vaʼerã ne asignasión ideprovécho hag̃uáicha enterovépe.

Rembyatýramo nde kokuégui manduvi, rejoka raẽ vaʼerã reʼu hag̃ua ha ipirekue katu remombóntema. Upéicha avei rehesaʼỹijo jave peteĩ téma: rembyatypa rire umi informasión, reiporavo vaʼerã umi ideprovéchotava ndéve ha emboyke umi ndereiporumoʼãiva.

Reiporútaramo nde diskúrsope peteĩ informasión reñeporandu vaʼerã: “¿Añetehápe piko omyesakãve pe téma? ¿Ohópa añetehápe che témare térã ótro ladoitéma oho?”. Avei reiporútaramo peteĩ notísia térã informasión oñeʼẽva ciencia térã medicina rehe, rehecha vaʼerã pe informasión haʼépa hína pe ipyahuvéva. Ñane puvlikasionkuérape jepe oñekambiaʼimi jepi avei mbaʼéicha oñentende peteĩ téxto térã enseñánsa oĩva la Bíbliape, upévare rejeporeka vaʼerã umi ipyahuvévare.

Eñatende porãke oimérõ reiporúta informasión ndahaʼéiva Jehová organisasionpegua, reikuaáicha Ñandejára Ñeʼẽ hína pe añetegua (Juan 17:17). Ha Colosenses 2:3-pe heʼi Jesús rehe: “Pype oñemokañy porã opaichagua arandu ha mbaʼekuaa iporãitereíva”. Upévare repensa vaʼerã mbaʼeichagua informasiónpa la reiporútava, ikatu reñeporandu: “¿Noiméipa oexaheráma pe oiko vaʼekue, térã haʼete ijapu léntova hína? ¿Ojeskrivípa oñembotuicha hag̃ua peteĩ persónape térã oñevende hag̃ua peteĩ prodúkto? ¿Oĩpa ótra informasión ohechaukáva siertoha upéva?”. Péro pe iñimportantevéva hína, “¿oĩ porãpa la Biblia heʼívandi?”.

Proverbios 2:1-5 heʼi tekotevẽha ñanearandu, jahechakuaa mbaʼépa iporã ha mbaʼépa ivai, ha ñañatende vaʼerãha jajapótavare. Upépe ñanemokyreʼỹ voi jaheka hag̃ua koʼã mbaʼe ku pláta yvyguy jahekaramoguáicha. Jaheka jave informasión heta ñañehaʼã vaʼerã, péro jahupytýta hetaiterei mbaʼe porã, por ehémplo: jaikuaáta Jehová opensáva, ñanepytyvõ ñakambia hag̃ua ñapensa lája ha ñantende porãve pe añetegua. Péicha revyʼavéta ha nde diskúrso igústo ha ideprovechovéta opavavépe.