KÁDA kongregasiónpe ojelehi jepi peteĩ ansiáno omoakã hag̃ua pe Eskuéla Jaiporukuaa Hag̃ua la Biblia. Oiméramo ndéve oñemeʼẽ upe rresponsavilida, tuicha reipytyvõta umi estudiántepe reñeinteresáramo enterovére, nekyreʼỹ ha rejapo porãramo ne rembiapo.

Remoakãvo káda semána pe eskuéla, iporãta nemanduʼárõ ndahaʼeiha umi orekótava párte añónte la oĩtava upépe, síno oĩta avei heta ermáno. Upévare, remeʼẽ jave umi konsého reñehaʼã vaʼerã taideprovécho opavavépe. Péicha rejapóramo oñekumplíta umi mbaʼe ojehupytyséva ko eskuéla rupive, heʼiháicha ko lívro páhina 5 guive 8 peve.

Reñeinteresa vaʼerã entéro umi estudiántere, tahaʼe umi orekóva lektúra, demostrasión, térã diskúrso. Haʼekuéra ohechakuaa vaʼerã umi párte ndahaʼeiha peteĩ asignasión reínte, síno umíva ombokatupyrytaha chupekuéra oservi porãve hag̃ua Jehovápe. Jaikuaa ningo káda estudiánte oñehaʼã vaʼerãha ijehegui oprogresa, péro iñimportanteterei avei reñeinteresa hesekuéra. Tekotevẽ avei reipytyvõ káda únope ohechakuaa hag̃ua mbaʼérepa iñimportánte osegi umi konsého remeʼẽva, ha emyesakã chupekuéra mbaʼéichapa osegi vaʼerã umi suherénsia. Upearã tekotevẽ rejapysaka porã hesekuéra ojapo jave ipárte, péicha reikuaáta mbaʼe mbaʼépa ere vaʼerã umi estudiántepe omehora hag̃ua.

Aníke nderesarái pe eskuéla oñepyrũ vaʼerãha órape, ha opa vaʼerãha avei oraitépe. Nde voi remoĩta ehémplo ndereikóiramo rembopukueterei ne komentariokuéra. Oĩrõ estudiánte ohasáva itiémpo, nde térã ne ajudánte oavisa vaʼerã chupe omohuʼãma hag̃ua ipárte, upéicharõ haʼe otermina vaʼerã pe idéa heʼíva ha oguejy pe platafórmagui. Pe eskuéla aja oĩramo ótro ohasáva itiémpo, tekotevẽ remombykyve ne komentário, ha rreunión opa rire eñeʼẽ upe ermánondi.

Ndaikatúiramo reho rreunionhápe, ótro ansiáno omoakãta nde vése pe eskuéla (Upearã pe kuérpo de ansiáno oelehíma vaʼerã mávapa ikatu nerremplasa). Reikotevẽramo ajúda reprepara hag̃ua pe prográma, remyenyhẽ ha rerreparti hag̃ua umi óha de asignasión, nepytyvõkuaa peteĩ siérvo ministeriál, kuérpo de ansiáno oelehi vaʼekue. Ha oĩramo ndaikatumoʼãiva ojapo ipárte, erekuaa chupe toheka mávapa ikatu ojapo upe rrempláso.

Mávapa ikatu oñanota. Emokyreʼỹkena entéro puvlikadórpe oñanota hag̃ua ko eskuélape, tahaʼe umi ojevautisámava térã ndojevautisáiva. Umi estudiánte ou meméva rreunionhápe ha ndahaʼéiva gueteri puvlikadór ikatu avei oñanota, ogueroviáma guive la Biblia omboʼéva, ha oiko Ñandejára Ñeʼẽ heʼiháicha. Peteĩ estudiánte oñembojáramo ne rendápe ha oñanotase ko eskuélape, reguerohory vaʼerã chupe. Rehecha hag̃ua okumplípa oñehaʼarõva chugui reñembyaty vaʼerã hendive ha imboʼehárandi, térã ituvakuéra haʼéramo Testígo, peteĩva oĩkuaa penendive. ¿Mbaʼe mbaʼépa oñehaʼarõ okumpli peteĩ persóna oñanota hag̃ua ko eskuélape? Okumpli vaʼerã umi mbaʼe oñehaʼarõva peteĩ puvlikadór no vautisádogui. Ikatu rehecha, lívro Organizados para hacer la voluntad de Jehová páhina 79 guive 82 peve. Reguereko vaʼerã peteĩ lísta oĩháme umi opartisipáva ko eskuélape, ha oĩ jave ipyahúva katuete reanota vaʼerã upépe.

 Umi leksión ombaʼapo hag̃ua pe estudiánte. Umi estudiánte otopáta ilívrope páhina 79 guive 81 peve peteĩ lísta oĩháme umi leksión otokátava chupekuéra ombaʼapo. Upe lísta ohechauka diferénte kolórpe mbaʼe leksiónpa ojeporu vaʼerã káda asignasiónpe g̃uarã. Por ehémplo, asignasión de lektúrape g̃uarã oñemarka umi leksión 1 guive 17 peve. Umi demostrasiónpe g̃uarã oñemarkapa lénto voi, péro noñemarkái umi leksión 7, 52, ha 53. Ha umi diskúrsope g̃uarã haimete avei oñemarkapa umi leksión, péro noñemarkái umi leksión 7, 18 ha 30.

Oñemoĩ jave pe estudiántepe ombaʼapo hag̃ua peteĩ leksiónpe, nde rehecha vaʼerã toñanota lápispe pe párte heʼihápe “Arakaʼépa oñasigna ndéve”, upépe oñemoĩ vaʼerã mbaʼe féchapa oñepyrũ ombaʼapo upe leksiónpe. Ojapopa rire ipárte, reporandu vaʼerã pe estudiántepe haʼeñoháme ojapópa raʼe pe taréa oĩva upe leksiónpe. Heʼíramo ojapo hague, ikatúma remarka pe kasílla oĩva upépe. Rehechakuaáramo tekotevẽha gueteri ombaʼapo pe leksiónpe, natekotevẽi reanota mbaʼeve pe párte heʼihápe “Arakaʼépa remohuʼã”, rehejánte vaʼerã nandi. Upéva remyenyhẽta ág̃a pe estudiánte oĩ vove preparádo ombaʼapo hag̃ua ótra leksiónpe. Páhina 82-pe oĩ peteĩ lísta ohechaukáva mbaʼe situasiónpe ikatu ojejapo umi demostrasión, ha oñanota vaʼerã upépe pe fécha umi ermána ojapopa rire ipárte. Umi lísta oĩva páhina 79-82 oreko dos lugár oñanota hag̃ua, upéva heʼise pe estudiánte ikatuha ombaʼapo dos vése káda leksiónpe, térã oiporu jey pe situasión oiporúma vaʼekue. Umi estudiánte oreko vaʼerã ilívro pe eskuéla aja.

Reasigna vaʼerã peteĩ leksiónte pe estudiánte ojapóta jave ipárte. Ha iporãvéta ombaʼapórõ káda leksión en órden pe lístape oĩháicha. Péro oĩrõ estudiánte ivaletereíva, natekotevẽi katuete osegi en órden umi leksión, síno emokyreʼỹ chupe tostudia umi ótra leksión ijehegui ha tosegi umi suherénsia oĩva upépe. Ha otoka vove chupe ipárte, emoĩ chupe ombaʼapo hag̃ua umi leksión oikotevẽhápe, péicha oikóta chugui peteĩ diskursánte vale ha mboʼehára katupyry.

Oĩrõ jepe ermáno heta áñorema orekóva párte ko eskuélape, lomímonte ideprovéchota chupe ostudia ha osegírõ umi konsého oĩva káda leksiónpe. Ha rehecháramo peteĩ ermáno tekotevẽha omehora peteĩ púntope, ikatu remoĩ chupe ombaʼapo hag̃ua pe leksión oipytyvõtavape chupe upearã, péicha jave natekotevẽmoʼãi katuete ombaʼapo en órden pe lístape oĩhaichaite.

Mbaʼéichapa remeʼẽ vaʼerã konsého. Reñemoñeʼẽ jave umi estudiántepe, resegi vaʼerã umi ehémplo ha konsého oĩva Ñandejára Ñeʼẽme. Haʼekuéra ohechakuaa vaʼerã nde reipytyvõseha chupekuéra, ha rejapoha hína upéva la Biblia heʼiháicha.

Aníkena nderesarái pe estudiánte ndahaʼeiha ne rembiguái, nde ningo ‘rembaʼapónte hína ijykére reipytyvõ’ hag̃ua chupe (2 Cor. 1:24). Nde avei tekotevẽ akóinte reñehaʼã ikatu hag̃uáicha ndekatupyryve ha remboʼe porãve. Estudiákena ko lívro ha esegi umi suherénsia oĩva pype, péicha rejapórõ remoĩta ehémplo porã ermanokuérape g̃uarã.

Reñehaʼãmbaite vaʼerã reipytyvõ umi estudiántepe olee porã hag̃ua, ojapokuaa hag̃ua diskúrso, ha omboʼe porã hag̃ua. Upearã tekotevẽ remyesakã porã chupekuéra umi leksión, ehechauka mbaʼérepa iñimportánte, ha mbaʼéichapa oiporu vaʼerã. Ko lívro tuichaiterei nepytyvõta rejapo hag̃ua upéva, péro  ndahaʼéi releénte vaʼerã peteĩ párte umi estudiántepe, síno reexplika vaʼerã mbaʼépa heʼise ha mbaʼéichapa haʼekuéra ikatúta osegi umi konsého.

Rehecha jave peteĩ estudiánte ombaʼapo porãha peteĩ leksiónpe, reguerohory vaʼerã chupe. Erresalta mbaʼépa la ojapo porã vaʼekue ha ere mbaʼérepa upéva ideprovéchota chupe oprogresa hag̃ua. Ere jave chupe haʼeñoháme omehora vaʼerãha peteĩ púntope, rehechauka vaʼerã mbaʼérepa tekotevẽ ojapo upéva ha mbaʼéichapa ikatúta omehora. Emyesakã porãkena pe estudiántepe mbaʼépa ojapo vaʼerã, péro eñeʼẽ chupe mborayhúpe.

Ani nderesarái heta persónape ijetuʼuetereiha oñeʼẽ hag̃ua en púvliko. Oĩ voi umi oñeñandu vaíva ojapo rire ipárte, openságui tuicha ojavy hague ha noñanimavéima voi ojapo. Esegíkena Jesús ehémplo, la Biblia heʼi hese ndojopýi hague hapichándi, ha nomoñeñanduvaíri hague avavépe oñemoñeʼẽ jave (Mat. 12:20). Remeʼẽ jave konsého peteĩ estudiántepe, reguereko vaʼerã enkuénta mbaʼéichapa oñeñandu. Odepende avei hína oimépa ipyahu ha oñepyrũ ramo ojapo ipárte, térãpa orekovéma experiénsia. Reñeʼẽrõ mborayhúpe ha reguerohory chupe, katuete ikyreʼỹta ha oñehaʼãmbaitéta oprogresa.

Reñeʼẽ jave rehechauka vaʼerã rerrespetaha káda estudiántepe. Romanos 12:10 heʼíva iñimportanteterei entéro umi omoakãvape g̃uarã ko eskuéla. Upépe heʼi: “Peñehaʼã peẽ raẽ pehechauka pemombaʼeha pende rapichápe”. Oimérõ pe estudiánte ijedáma, rereko vaʼerã enkuénta mbaʼépa heʼi 1 Timoteo 5:1, 2. Amo ipahápe pe konsého og̃uahẽvéta pe estudiántepe reñeʼẽramo chupe mborayhúpe, tahaʼe ijedáva térã imitãva (Prov. 25:11).

Remeʼẽ jave konsého peteĩ estudiántepe, remyesakã porã vaʼerã mbaʼépa jahupytyse ko eskuéla rupive. Ndahaʼéi hína jajapo porãséva ñande párte jahasáma hag̃ua ótra leksiónpe, ni jaipotáva umi hénte ñandeguerohory ñañeʼẽkuaa térã ñamboʼe porã haguére (Prov. 25:27). Ñande ñamombaʼeguasuse Jehovápe hekoitépe ñane ñeʼẽ rupive, ha ñaipytyvõse avei umi ñanerendúvape oikuaa ha ohayhu hag̃ua chupe. Ko eskuéla avei oñemoĩ ikatu hag̃uáicha ñandekatupyry ha jajapo porã pe tembiapo Jesús oheja vaʼekue ñandéve (Mat. 24:14; 28:19, 20). Ha umi kuimbaʼe ojevautisámava ha omombaretévape ohóvo ijerovia oñemokyreʼỹ oñangareko hag̃ua “Ñandejára ovechakuérare”, ojapóvo diskúrso ha omboʼévo kongregasiónpe (1 Ped. 5:2, 3).

Erékena umi estudiántepe orresivíre iñasignasión toleémandi voi ensegída pe leksión otokáva chupe. Emokyreʼỹ chupe tosegi umi suherénsia oĩva upépe, tahaʼe ojapóvo ipárte eskuélape, oñemongeta jave ótrondi, okomenta jave rreunionhápe, térã opredika jave.

Mbaʼéichapa reprepara vaʼerã pe prográma eskuélape g̃uarã. Reprepara vaʼerã umi asignasión por lo ménos tres semána mboyve. Ikatúma guive remyenyhẽ vaʼerã pe óha de asignasión ha rentrega chupekuéra por eskríto.

Umi ansiáno ikatupyrýva ojapo vaʼerã umi párte ojepreparáva oñemboʼe hag̃ua kongregasiónpe. Ikatu avei ojapo umi siérvo ministeriál oporomboʼekuaáva.

Reikuaa hag̃ua mbaʼe asignasiónpa ikatu remeʼẽ kuña térã kuimbaʼépe, relee vaʼerã pe instruksión oúva pe prográma de eskuélandi. Oĩramo hetave ermána opartisipáva, reñatende vaʼerã ani remeʼẽ lektúrante ermanokuérape, remeʼẽ vaʼerã avei chupekuéra diskúrso.

 Rejapóvo pe prográma reguereko vaʼerã enkuénta mávapepa opyta porãvéta ojapo hag̃ua káda párte. Reñatende vaʼerã oimépa peteĩ ansiáno térã siérvo ministeriál orekótama voi peteĩ párte pe Aty Ñanemboʼéva Japredika Hag̃uáme, térã otokápa chupe diskúrso púvliko upe semánape ne kongregasiónpe. Avei reasigna mboyve peteĩ ermána orekóvape mitã michĩva, ehecha noiméipa kavalete imemby orekóta avei párte, pórke katuete oiméne haʼe oipytyvõta hína imembýpe ojeprepara hag̃ua. Ereko avei enkuénta oĩ porãtapa pe téma reasignáva ojapo hag̃ua peteĩ mitã, mitãrusu, térã peteĩ ndojevautisáiva gueteri. Rehecha vaʼerã avei oho porãtapa pe leksión remoĩ vaʼekuéndi ombaʼapo hag̃ua.

Nde ikatúramo jepe reasigna umi ermánape mbaʼe situasiónpepa ojapóta idemostrasión, haʼekuéra oelehikuaa avei mávapa oiporuse, ha upearã osegi vaʼerã umi konsého oĩva páhina 78 ha 82-pe. Oñasignáramo jepe chupe peteĩnte iñajudanterã, haʼe ikatu avei oiporuve ótra persónape oipotáramo. Peteĩ estudiánte heʼíramo mávandipa ojapose ipárte, pórke oipytyvõ porãvéta chupe upe situasiónpe, reguereko vaʼerã enkuénta upe ojeruréva.

Ojeporúramo ótra sála. Oĩramo mas de 50 estudiánte oñanotáva pe eskuélape, rehecha vaʼerã ikatútapa ojeporu ótra sála. Upe sálape ikatu ojejapopaite umi asignasión, térã umi número 2 ha 3.

Káda sála omoakã vaʼerã peteĩ ermáno ikatupyrýva: ansiáno, térã siérvo ministeriál ivaléva. Umíva oasigna vaʼerã pe kuérpo de ansiáno. Tekotevẽ pembaʼapo ha peñopytyvõ umi ermáno omoakãvandi umi ótra sála, ikatu hag̃uáicha pehecha mbaʼéichapa káda estudiánte oprogresa ohóvo, jepe ág̃a ótrope pe estudiánte ojapóta idiskúrso ótra sálape.

Kúrso de lektúra. Ansianokuéra ohecháramo oĩha heta oikotevẽva oñepytyvõ chupekuéra oleekuaa hag̃ua térã olee porãve hag̃ua, ikatu oorganisa peteĩ kúrso espesiál de lektúra, ikatu hag̃uáicha ikatupyryve hikuái pe idióma ojeporúvape upe kongregasiónpe. Ko prográma ndojejapomoʼãi pe eskuéla rekovia, síno ojejapo oñepytyvõ porãve hag̃ua umi ndoleekuaáivape, térã oñepytyvõ umi ermánope olee porãve hag̃ua.

Umi kláse ndojejapói vaʼerã oiko aja pe Eskuéla Jaiporukuaa Hag̃ua la Biblia, pórke katuete oñekotevẽvéta tiémpo oñemboʼe porã hag̃ua umi ermánope. Ansianokuéra ohecha vaʼerã mbaʼe mbaʼépepa tekotevẽ oñepytyvõ chupekuéra, ha mbaʼe órapa iporãve ojejapo pe kúrso. Ikatu oñemboʼe peteĩteĩme térã por grúpo.

Ojejapo hag̃ua ko kúrso oñekotevẽ peteĩ ermáno ikatupyrýva, olee ha ontende porãva pe idióma. Ndaipóriramo ni peteĩ ermáno ikatu vaʼerã omboʼe, umi ansiáno ikatu ojerure peteĩ ermánape omboʼe hag̃ua, ko ermána ivale ha omeʼẽ vaʼerã ehémplo porã kongregasiónpe. Haʼe omoĩ vaʼerã iñakã rehegua omeʼẽ aja pe kláse (1 Cor. 11:3-10; 1 Tim. 2:11, 12).

Ikatu ojeporu pe folléto Eñehaʼã elee ha ehaikuaa, upéva ojejapo vaʼekue voi ikatu hag̃uáicha oñemboʼe umi héntepe olee ha oskrivikuaa hag̃ua. Ikatu avei ojeporu ótro lívro rehechakuaáramo oipytyvõtaha umi estudiántepe. Umi oprogresáva ohóvo ikatúma oreko asignasión ko eskuélape.

Tuichaiterei ningo ikatu reipytyvõ ne kongregasiónpe remoakãvo ko eskuéla. Ejeprepara porãkena ha ejapo ne rembiapo heʼiháicha Romanos 12:6-8. Ehechakuaákena Ñandejáragui ouha ko asignasión, ha ejapo ikatúva entéro osẽ porã hag̃ua ndéve.