OÑEMEʼẼ jave ndéve peteĩ asignasión upéva hína peteĩ oportunida ndekatupyryve hag̃ua, ha reñehaʼãmbaitéramo rejapo porã, entéro ohechakuaáta reprogresaha rehóvo (1 Tim. 4:15). Ko eskuéla nepytyvõta reiporu porãve hag̃ua pe katupyry Jehová omeʼẽva ndéve.

¿Mbaʼéichapa reñeñandu reñeʼẽta jave en púvliko? Heta oĩ inerviósova ha ochuchupáva voi. Oimérõ nde reñeñandu jepi péicha, ani rejepyʼapy, umi heta áñorema oĩva ko eskuélape jepe oñeñandu avei upéicha. Péro, ¿mbaʼépa ikatu rejapo ani hag̃ua nenerviosoiterei rejapóta jave nde párte? Reime jave nde rógape rejepokuaa vaʼerã relee en vos álta. Eñehaʼã ekomenta meme rreunionhápe, ha oimérõ nde haʼéma puvlikadór, resẽ meme vaʼerã repredika, péicha ndekatupyryvétama reñeʼẽ hag̃ua en púvliko. Avei oñemeʼẽ jave ndéve peteĩ asignasión pyaʼe voi reñehaʼã vaʼerã reprepara, ikatu hag̃uáicha netiempove reñensaja hag̃ua. Ani nderesarái umi nerendúva ndotakymoʼãiha nderehe, haʼekuéra oguerohorýta guei la rejapóva. Ha opa mbaʼe ári, rejapo mboyve nde párte reñemboʼe vaʼerã Jehovápe, haʼe ningo omeʼẽse voi espíritu sánto umi ojerurévape chupe (Luc. 11:13; Filip. 4:6, 7).

Nepasiénsiakena ndejehe, saʼi saʼípente voi ningo rejapokuaáta diskúrso ha reporomboʼekuaáta, ani repensa peteĩ tesapirĩme ndevaletereíma vaʼerãha (Miq. 6:8). Oimérõ ndepyahu gueteri ko eskuélape, ani reimoʼã rejapotamaha sapyʼaitépe umi diskúrso neporãmba jepéva. Upéva rangue reñehaʼã vaʼerã restudia porã pe leksión otokáva ndéve ha eñehaʼã esegi umi konsého oĩva upépe. Rejapo mboyve nde diskúrso iporãta avei rejapóramo umi taréa oñemoĩva pe leksión otokávape ndéve rembaʼapo. Péicha katuete reñakãrapuʼãta.

¿Mbaʼépa nepytyvõta relee porã hag̃ua en púvliko? Rejeprepara jave ndahaʼéi releénte vaʼerã pe informasión, síno reñehaʼã vaʼerã rentende mbaʼépa heʼise pe releéva. Upearã oñemeʼẽre ndéve ne asignasión rejepreparáma vaʼerã. Eñehaʼã entende mbaʼépa heʼise káda fráse ha pe idéa prinsipál oĩva káda párrafope. Péicha nde lektúra ndaikaiguemoʼãi, remog̃uahẽta hekoitépe pe informasión ha releéta con  sentimiénto. Retopáramo peteĩ palávra nerentendéiva térã ndereikuaáiva mbaʼéichapa oñepronunsia, ikatu reheka diksionáriope térã reporandu ótrope. Ideprovéchota avei reñensaja ha relee meméramo pe informasión. Tuvakuéra oipytyvõkuaa ifamíliape ipárteta jave.

Ojejeruréramo ndéve relee hag̃ua peteĩ párte la Bíbliagui térã rrevísta Ñemañahágui, iporãta rehendúramo umi gravasión oĩva CD-pe. Eñatende mbaʼéichapa olee hikuái: opronunsia lája, moõpa ojapo páusa, mbaʼe palávrapa orresalta, moõpa olee pyaʼeve térã mbegueve, ha reñehaʼã vaʼerã resegi iñehémplo relee jave.

Rejeprepara mboyve ne asignasionrã restudia porã vaʼerã pe leksión otokáva ndéve rembaʼapo. Ha ikatúramo errepasa jey upe leksión reñensajapa rire pe releétava. Eñehaʼãmbaitékena esegi umi konsého oñemeʼẽva upépe.

Koʼã mbaʼe reaprendéva ideprovechoitereíta ndéve predikasiónpe, upépe ningo ikatu otoka ndéve relee heta hénte rovake. Reikuaaháicha la Biblia ikatu okambia umi hénte opensa lája, ha upévare iñimportánte jalee porã (Heb. 4:12). Tiémpo rirémante ikatúta relee ojeʼehaichaite ko lívrope, ani rehaʼarõ una térã dos vésepe nevakeanotamaha. Apóstol Pablo oskrivi vaʼekue peteĩ ansiáno heta tiémporema oservíva Jehovápe: “Resegi vaʼerã reñehaʼãmbaite relee opavave renondépe” (1 Tim. 4:13).

¿Mbaʼe mbaʼépa rejapo vaʼerã otokáramo ndéve rejapo demostrasión?

Rehecha vaʼerã mbohapy mbaʼe iñimportánteva: 1) pe téma; 2) mbaʼe situasiónpe otoka ndéve rejapo, ha 3) mbaʼe leksiónpepa rembaʼapo vaʼerã.

Reheka mboyve hetaiterei informasión oñeʼẽva pe témare, iporãta repensa mbaʼe situasiónpepa rejapóta pe demostrasión ha mávatapa ne ajudánte, pórke odepende hína koʼã mbaʼére reiporavo ha remohenda hag̃ua umi informasión. Iporã reñeporandu: ¿Mbaʼe situasiónpepa oikóta? ¿Repredika jave? Upéicharõ, ¿mávapepa repredikáta, ne vesíno, peteĩ deskonosídope? ¿Imitãvépa térã ijedave ndehegui la ne ajudánte? ¿Mbaʼéichapa haʼe ombohováita ndéve, nerendu porãtapa térã nahániri? ¿Mbaʼe iporãvapa oaprendéta umi ermáno ne asignasión rupive? Koʼã mbaʼe tekotevẽ reikuaa repreparáta jave nde párte.

 ¿Moõpa retopáta informasión reprepara hag̃ua ne asignasión? Ikatu rehecha pe párte hérava “Mbaʼéichapa ikatu reinvestiga porã” (páh. 33-38), ha ehecha mbaʼe puvlikasiónpa nde reguereko. Sapyʼaitépe retopátama hetaiterei informasión, elee porã umíva reikuaa hag̃ua mavaitévapa oho porãve ne témare. Upearã rereko vaʼerã enkuénta mbaʼe situasiónpepa rejapóta ne demostrasión ha mávapa ne ajudánte. Upe rire ikatúma reaparta umi informasión reiporútava.

Remohenda mboyve mbaʼeichaitépa rejapóta la ne asignasión, relee vaʼerã pe leksión otokáva ndéve rembaʼapo. Nemanduʼákena rejapóvo ne asignasión ojekuaa vaʼerãha resegiha umi konsého oĩva upe leksiónpe.

Rerrespetáramo pe tiémpo oñemeʼẽva ndéve, ikatúta remohuʼã porã ne asignasión. Pórke rehasáramo ne tiémpo, pe omoakãva pe eskuéla katuete ndeavisáta. Añetehápe ningo noñemoĩri ñandéve mboy tiémpopa ñañeʼẽ vaʼerã japredika jave, upéicharõ jepe reñensaja jave ne asignasión rekontrola vaʼerã ne tiémpo. Péro la iñimportantevéva hína remyesakã porã ne téma ideprovécho hag̃ua umi nerendúvape.

¿Mbaʼe situasiónpa reiporavóta ne demostrasionrã? Ehecha pe lísta oĩva páhina 82-pe ha eiporavo peteĩ ikatútava reiporu predikasiónpe, ha ohechaukáva umi mbaʼe oikohaichaite jepi nde territóriope. Oiméramo heta tiémporema reime hague ko eskuélape reaprovecha vaʼerã umi asignasión oñemeʼẽva ndéve ikatu hag̃uáicha reñembokatupyryve repredika hag̃ua.

Pe eskuéla omoakãva omoĩramo ndéve mbaʼe situasiónpepa rejapo vaʼerã la ne téma, reñanima vaʼerã rejapo, jepe haʼete ndéve la ijetuʼuetereíva. Haimete enterove situasión oñemoĩva pe lístape oho porã predikasiónre. Oimérõ neʼĩra repredika pe situasión otokávape ndéve, reporandukuaa peteĩ ikatupyryvévape, ha ikatúma guive iporãta retanteáramo repredika péicha nde territóriope. Péicha rejapóramo reaprovecha porãtama hína umi mbaʼe reaprendéva ko eskuélape.

Kuimbaʼekuérape otoka jepi ojapo hag̃ua diskúrso mbykýva. Upéva reprepara hag̃ua ikatu resegi umi konsého oñemeʼẽva umi orekóvape demostrasión. Péro pe diskúrsope reñeʼẽta opavave renondépe ha upévare idiferénteta remohenda lája pe informasión.

 Reprepara jave nde párte reñehaʼã vaʼerã taideprovécho opavavépe pe informasión. Umi nerendúva oiméne oikuaáma voi heta mbaʼe oĩva la Bíbliape, upévare repensa vaʼerã mbaʼéichapa ikatu remyesakãve umi mbaʼe oikuaámava voi hikuái. Iporãta reñeporandúramo: “¿Mbaʼéichapa ikatu chepytyvõ ko téma añemoag̃uive hag̃ua Jehováre, ha mbaʼéichapa oipytyvõta avei umi cherendúvape ojapo hag̃ua upéva? ¿Mbaʼéichapa ko informasión ohechauka mbaʼépa Jehová ohaʼarõ ñandehegui? Jepeve ko múndo ñanemokyreʼỹ jajapo hag̃ua ivaíva, ¿mbaʼéicha ko informasión ñanepytyvõ ñanderekoporã hag̃ua?” (Efes. 2:3). Rembohovái hag̃ua koʼã mbaʼe tekotevẽ reinvestiga porã. Reiporu jave la Biblia ani releénte umi téxto, síno eñehaʼã ehechauka mbaʼéichapa umi téxto ñanepytyvõ jaikuaa hag̃ua mbaʼépa tekotevẽ jajapo (Hech. 17:2, 3). Ani reñeʼẽ hetaiterei mbaʼére, síno eprepara nde diskúrso ikatu hag̃uáicha umi nerendúva imanduʼa porã umi informasiónre.

Remeʼẽ porãséramo nde párte tekotevẽ reprepara porã, ha reñensaja vaʼerã heta vése. Reñehaʼãmbaitéramo restudia ha resegi umi konsého oĩva ko lívrope pyaʼeve reñakãrapuʼãta. Tahaʼe heta tiémporema rejapo umi diskúrso térã reñepyrũ ramónte, tekotevẽ rejeprepara porã ikatu hag̃uáicha reñeʼẽ con sentimiénto, ha reime segúro pe erévare. Ani nderesarái mbaʼépa hína pe iñimportantevéva ojehupytýva ko eskuéla rupive: nembokatupyry remombaʼeguasu hag̃ua Jehovápe ne ñeʼẽ rupive (Sal. 150:6).