LA Biblia heʼi: “Ovyʼa pe kuimbaʼe ipyʼaite guive oguerohorýva Jehová Léi”, ha oleéva Ñandejára Ñeʼẽ ha “ojepyʼamongetáva hese ára ha pyhare” (Sal. 1:1, 2). ¿Igústopa ndéve relee la Biblia? ¿Mbaʼépa ikatu rejapo ikatu hag̃uáicha revyʼave releévo Ñandejára Ñeʼẽ?

Reiko rangue releénte umi mbaʼe oĩva la Bíbliape, reñehaʼã vaʼerã rehecha ha rehendu umi mbaʼe releéva reimeramoguáicha upépe. Por ehémplo, releévo Génesis eñehaʼã ehendu Jehovápe omombeʼu jave mbaʼe mbaʼépa ojapo opreparávo ko yvy Adán ha Évape g̃uarã. Upéi eñeimahina rehechaha Ñandejára ykére oĩha Itaʼýra, pe oipytyvõva chupe opaite mbaʼerã, ha peichahágui rehendu heʼiha chupe: “Og̃uahẽma pe óra jajapo hag̃ua yvyporakuérape”. Upe rire katu rehecháma mbaʼéichapa Adán ha Eva opuʼã Ñandejárare, ojehusga ha oñemosẽma pe hardíngui (Gén., kap. 1–3). Koʼág̃a katu eñeimahinami reimeha rrío Jordán kóstare, ha rehendu peteĩ tyapu hatãitereíva ha rejapysaka porãvo hese, nepirĩmba voi rehendúvo peteĩ oñeʼẽ ha heʼíva: “Kóva hína che Raʼy ahayhuetéva ha aguerohorýva” (Mat. 3:16, 17). Avei epensamíntena mbaʼeichaitépa oñeñandúne raʼe apóstol Juan ohendúvo Jehová heʼiha chupe: “¡Péina! Ambopyahu hína opa mbaʼe” (Apoc. 21:5). Péicha añetehápe igustoitereíta jalee la Biblia.

Jalee meméramo Ñandejára Ñeʼẽ ikatúta jaikuaa porãve Jehovápe, jahecháta mbaʼéichapa haʼe ipoderóso, tuicha ha ndaijojahái. Katuete jaikuaávo haʼe ñanderayhu ha ñandeporiahuverekoha ñañemoag̃uisevéta hese ára ha ára. Haʼe ningo ñanepytyvõse ñañehaʼãramo ñaneumílde ha jajapo hembipota, ha haʼete voi ohechaukáva ñandéve mbaʼe tapérupipa jaha vaʼerã ñasẽ porã hag̃ua (Jos. 1:8; Sal. 8:1; Is. 41:10).

Revyʼave hag̃ua releévo la Biblia, remboykeve vaʼerã tiémpo, pórke upéicha rentendevéta mbaʼépa Ñandejára oipota rejapo. Ha ndahaʼéi upévante, koʼýte reñeñandu porãta rehechávo mbaʼéichapa umi mbaʼe reaprendéva nepytyvõ rembohovái porã hag̃ua ne provlemakuéra. Ikatúta reñeñandu pe salmísta heʼi haguéicha: “Ne konsého ndaijojahái,  upévare che pyʼaite guive akumpli” (Sal. 119:129). Nde avei revyʼáta pe salmístaicha retopávo heta konsého nepytyvõtava repensa hag̃ua Jehová oipotaháicha, ha rejapose hag̃ua iporãva (Is. 55:8, 9).

La Bíbliape jatopa heta konsého ohechaukáva mbaʼéichapa ñañekomporta vaʼerã opa mbaʼépe, ikatu hag̃uáicha jaguata tape porãre. Upépe jahechakuaa mbaʼérepa ojeʼe Jehová haʼeha ñande Túva: haʼe hakateʼỹ ñanderehe ha oipota ñasẽ porã, oñemoñeʼẽ ñandéve oikuaágui heta jahasa asytaha ñañemeʼẽramo umi mbaʼe vai ñandestirávape, ha oipota jajei umi akãrasýgui. Jaleéramo la Biblia ñamombaʼevéta ñande Ru ñanderayhuetéva Jehovápe.

Pe salmísta oskrivi vaʼekue mbaʼe iporãvapa ohupyty pe oleéva Ñandejára Ñeʼẽ ára ha ára, haʼe heʼi: “Opa mbaʼe ojapóva osẽ porãta chupe” (Sal. 1:3). Jepe ñaneimperfékto ha Satanás ha ko múndo aña oñehaʼãmbaite ñandereity, jalee meméramo la Biblia ha jajapo heʼíva pype ikatúta ñaime porã Jehovándi.

Káda día rejepyʼamongetáramo ñande Apohare heʼívare, tahaʼe sapyʼaitemi jepe raʼe, upéva nemombaretéta rembohovái hag̃ua ko múndo aña. Heta ermáno ohóva préso ndorekói vaʼekue la Biblia kompletoite, síno pedasomínte okonsegi vaʼekue umi diáriogui. Haʼekuéra olee, ojepyʼamongeta ha omemorisa umíva, ha Jehová ohovasa chupekuéra oñehaʼã rupi oikuaave chupe (Mat. 5:3). Péro péva ndeʼiséi oikotamaha peteĩ milágro jalee rupi pyaʼe pyaʼénte peteĩ versíkulo, nahániri, koʼág̃a ningo ñande jareko liverta jalee hag̃ua. Upéicharõ, jaipotáramo Jehová ñanderovasa, tekotevẽ jalee la Biblia káda día, jajepyʼamongeta hese ha jajapo heʼíva pype.

Péro jadesidíramo jepe ñamboyke peteĩ óra jalee hag̃ua, ikatu oiko oimeraẽ mbaʼe ñahaʼarõʼỹva. ¿Mbaʼépa jajapóta péicha jave? Ñapensa vaʼerã mbaʼépa añetehápe la iñimportantevéva. Por ehémplo, heta ñanerembiapóramo jepe ni mbaʼevéicharõ nañanderesaraimoʼãi jayʼu hag̃ua. Upéicha avei toiko oikóva tekotevẽ ñamboyke ñane tiémpo ha jalee la Biblia, ñanembopiroʼýva y roʼysã asýicha (Hech. 17:11).

¿Ndépa releéma la Biblia kompletoite? Oĩ heta opensáva ikaigue térã ijetuʼutaha chupe oleepaite hag̃ua Génesis guive Apocalipsis peve. Upévare oĩ ohekáva chupe ládo, ha odesidi oñepyrũtaha olee Mateo guive. ¿Mbaʼérepa? Oiméne ohechakuaa ifasilvetaha chupe oiporu umi  konsého oĩva koʼã pártepe ha péicha ikatúta osegi porãve Jesús ehémplo. Térã pe Escrituras Griegas mbykyve rupi. Péicha oleepa rire Mateo guive Apocalipsis peve, ikyreʼỹvéma otermina hag̃ua umi 39 lívro Escrituras Hebreaspegua. Upéi olee rire la Biblia kompletoite ojepokuaáma olee káda día, ha igustoitereíma chupe. Ipahápe ndaikatuvéima voi oiko oleeʼỹre Ñandejára Ñeʼẽ. Eñehaʼãkena nde avei ejapo upéicha.

Epensami, ¿oĩpa ne famíliape térã kongregasiónpe peteĩ ndaikatúiva olee? ¿Mbaʼére nereñekuaveʼẽi relee jepi hag̃ua chupe la Biblia? Péicha haʼe ikatúta ojepyʼamongeta ha ojapo Ñandejára Ñeʼẽ heʼíva, ha ndéve avei ou porãitereíta (Apoc. 1:3).

Upéi ikatu restudia porãve umi téxto ijetuʼuvéva térã ndegustavéva. Péicha hesakã porãvéta ndéve mbaʼéichapa la Biblia oñeʼẽ peteĩ témarente oñepyrũ guive opa peve. Oiméramo nde Biblia oreko nóta ha rreferénsia, umíva nepytyvõta reikuaa hag̃ua hetave detálle, por ehémplo oĩpa ótro téxto oñeʼẽva upe témare térã reikuaa hag̃ua mbaʼérepa  ojeskrivi peteĩ sálmo térã peteĩ kárta. Perspicacia para comprender las Escrituras volumen uno ha dos oreko hetaiterei informasión omombeʼúva mbaʼéichapa rakaʼe umi hénte yma guare, umi lugár, ha omyesakã heta palávra ojeporúva la Bíbliape. Oreko avei rrekuádro ohechaukáva mbaʼéichapa oñekumpli umi profesía, mbaʼe rréi ogoverna aja ha mbaʼe profétapa oiko rakaʼe upe tiémpope, ha ohechauka avei mbaʼe féchape oñekumpli upe párte.

Rejepyʼamongetávo pe reaprende vaʼekuére rentendéta mbaʼérepa Ñandejára puévlo ohasa umi situasión oñemombeʼúva la Bíbliape, ikatúta rentende porãve mbaʼépa Jehová oñandu isiervokuérare ha mbaʼére odesidi ojapo peteĩ mbaʼe. Hesakã porãvéta ndéve mbaʼéichapa Jehová ohecha umi goviérnope, tetãnguérape ha káda persónape. Reipyguaráramo la Biblia, rentende porãvéta Jehová opensa lája.

Reñehaʼãramo reñeimahina umi mbaʼe releéva iñinteresantevéta ndéve la releéva. Umi mápa vívliko ideprovechoiterei, ñanepytyvõ jaikuaa hag̃ua mbaʼéichapa yma pe yvy, oĩpa rrío, sérro, térã ñu, nepytyvõta avei rekalkula hag̃ua mboy kilómetropa opyta ojuehegui umi lugár. Por ehémplo ñapensami umi isrraelíta ohasárõ guare pe mar Rojo, ¿moõitépa ohasa rakaʼe hikuái? ¿Mbaʼeichaitépa tuicha pe yvy oñepromete vaʼekue umi isrraelítape? ¿Moõite pevépa opredika rakaʼe Jesús? ¿Mbaʼe paisáhe ohecháne rakaʼe apóstol Pablo oviahárõ guare opredika hag̃ua? Koʼã detálle ñanepytyvõ jadisfruta hag̃ua pe jaleéva, haʼetéta voi ñaiméva hína upépe. ¿Moõpa ikatu jatopa koʼã mápa? Jareko pe folléto “Veamos la buena tierra”, ha Ñandejára Ñeʼẽ Mateo - Apocalipsis oreko avei. Pe lívro Perspicacia oreko seténtarupi, ha pe primer tómo opakuévo jajuhúta peteĩ índice omombeʼúva moõpa jatopakuaa umi mápa. Jareko avei pe Índice de las publicaciones, upéva nepytyvõta retopa hag̃ua avei umi mápa. Ha oiméramo ndajaguerekói koʼã lívro ikatu jaiporu pe rrevísta Ñemañaha, kóvape osẽ jepi avei.

Rréi David ogueropurahéi vaʼekue Jehovápe kóicha: “Ne pensamientokuéra ningo tuichaiterei mbaʼe chéve g̃uarã. Ndaikatúi ñambyatypa jaipotáramo jepe” (Sal. 139:17, Ñande Ruete Ñeʼẽ Bíblia). Ha apóstol Pablo ombotuicha vaʼekue avei chupe heʼívo: “Ñandejára voi ohesape ore korasõme Cristo rupive, roikuaa porã hag̃ua Ñandejára rekomimbipa” (2 Cor. 4:6). Heta áño ohasa David tiémpo guive apóstol Pablo tiémpo peve, péro mokõivévante oguerohory Ñandejára Ñeʼẽ. Nde avei remboykéramo ne tiémpo ikatúta redisfruta releévo opa mbaʼe Jehová omeʼẽva ñandéve Iñeʼẽ rupive.