HETA áño Jesús ou mboyve Jehová heʼi vaʼekue Abrahánpe: “Opa tetã ko yvy arigua oñevendesíta ne família rupive” (Gén. 22:18). Upéi ijespíritu rupive oskrivika Salomónpe mbaʼépa oñehaʼarõ entéro yvypóragui: “Ekyhyje Ñandejáragui ha ekumpli iléi. Péva hína entéro persóna ovligasión” (Ecl. 12:13). ¿Mbaʼéichapa ikatúta oikuaa koʼã mbaʼe entéro umi hénte?

Oĩramo jepe ymaite guive ojeroviáva Ñandejárare, la Biblia ohechauka pe marandu porã ojekuaaukataha opaite hendárupi prinsipálmente “ñande Ruvicha árape”, oñepyrũ vaʼekue áño 1914-pe (Apoc. 1:10). Avei oñemyesakã umi ánhel ñandedirihitaha jaikuaauka hag̃ua ‘ko marandu umi oikóvape ko yvy ape ári, entéro tetã, trívu, puévlo ha umi oñeʼẽvape opaichagua idióma’. ¿Mbaʼe mensáhepa oñemombeʼu vaʼerã? “Pekyhyje Ñandejáragui ha pembotuicha chupe, cháke og̃uahẽma pe óra haʼe oporohusga hag̃ua. Upévare, pemombaʼeguasúke Ñandejárape, upe ojapo vaʼekue yvága, yvy, mar ha yvukuéra” (Apoc. 14:6, 7). Ñandejára oipota oñemombeʼu ko mensáhe oparupiete, ha omeʼẽ ñandéve pe priviléhio ñaipytyvõ hag̃ua ko tembiapópe.

“Ñandejára teete.” Jehová heʼírõ guare umi isrraelítape ‘peẽ hína che testígo’, Jehová odesafia umi ñandejára guaʼúpe opresenta hag̃ua la itestígo ha upéicha ojehechaukáta mávapa Ñandejára tee (Is. 43:10). Upévare ñande ndahaʼéi jaʼénteva umi héntepe oreko vaʼerãha peteĩ rrelihión térã oguerovia vaʼerãha oexistiha peteĩ diós. Upéva rangue umi hénte tekotevẽ oikuaa mávapa hína Ñandejára teete, upe ojapo vaʼekue yvága ha yvy (Is. 45:5, 18, 21, 22; Juan 17:3). Haʼe añoite ikatu oikuaauka mbaʼépa oikóta amo gotyove, ha ñande ikatu jahechauka umi héntepe mbaʼéichapa Jehová okumplíma vaʼekue umi mbaʼe oprometéva, upéva ohechauka ikatuha jajerovia haʼe heʼíva oikotaha katuete (Jos. 23:14; Is. 55:10, 11).

 Péro heta hénte jatopáva predikasiónpe oadora heta sántope, ha oĩ avei umi ndorekóiva rrelihión. ¿Mbaʼéichapa ikatu japredika chupekuéra? Ikatu jasegi apóstol Pablo ehémplo ha ñañeʼẽ umi mbaʼe ointeresátavare chupekuéra. Haʼe pyʼaguapýpe oike umi héntepe, péro oexplika porã avei entéro yvypóra jajechataha Ñande Apoharéndi opa mbaʼe jajapo vaʼekuére (Hech. 17:22-31).

Emombeʼu Ñandejára réra. Jehová ningo ohayhueterei héra, upévare ñande ñamombeʼu vaʼerã umi héntepe Ñandejára réra haʼeha Jehová (Éx. 3:15; Is. 42:8). Haʼe voi oñenkarga vaʼekue oñemoĩ hag̃ua héra la Bíbliape mas de siete mil vése. Upéva ohechauka oipotaha la hénte oikuaa mbaʼéichapa haʼe héra, ha ñande rresponsavilida hína ñamboʼe umi héntepe upéva (Deut. 4:35).

Umi hénte ojesalva hag̃ua oikuaa vaʼerã Jehovápe ha ojerovia hese (Joel 2:32; Mal. 3:16; 2 Tes. 1:8). Péro oĩ persóna oleéva la Biblia ha heʼíva oadoraha Ñandejárape, ha upéicharõ jepe ndoikuaái ni mbaʼéichapa haʼe héra, ¿mbaʼérepa? Pórke ivívliape noĩri Ñandejára réra. Oĩ ohendúva Jehová réra umi paʼi heʼi rupi chupekuéra ndovaleiha oiporu upe téra.

¿Mbaʼéichapa ikatu remboʼe umi héntepe Ñandejára réra? Erénte rangue direktoite, iporãvéta rehechaukáramo chupe ivívliape voi ikatúma guive. Oĩ traduksión oĩhápe hetaiterei vése Ñandejára réra, péro ótro katu koʼã téxtopente: Salmo 83:18 ha Éxodo 6:3-6, térã umi nóta oĩvape koʼã téxtope: Éxodo 3:14, 15, ha 6:3-pe. Oĩ traduksión omoĩnteva hekovia “Señór”, “Ñande Ruete” térã “Ñandejára”, ha ojerresalta jepi létra majúskulape. ¿Mbaʼépa ikatu rejapo pe ogajára Biblia ndorekoietéramo voi Ñandejára réra? Ikatu reiporu peteĩ traduksión itujavéva rehechauka hag̃ua Ñandejára réra ojepeʼa hague umi traduksión ipyahuvévagui. Sapyʼánte oĩ avei Jehová réra umi músika rrelihiósape térã umi monuméntore, ha ikatu remomanduʼa chupe umívare.

Ikatu avei relee pe ogajárape Jeremías 10:10-13, Traducción del Nuevo Múndogui. Pe téxto ikatu avei oipytyvõ pe persónape oimérõ oadora umi santokuérape, pórke upépe ndahaʼéi oñemombeʼúnteva Ñandejára réra, síno ohechauka avei mávapa hína haʼe.

Reñeʼẽ jave umi héntendi ani erénte “Señór” térã “Ñandejára” rekyhyje térã retĩguinte reiporu hag̃ua Jehová réra. Péro péva ndeʼiséi avei reiporu vaʼerãha reñepyrũ guive reñemongeta pe persónandi, heta héntepe ningo ndogustái Ñandejára réra ha ikatu noñemongetasevéi nendive. Upéicharõ jepe, reñemongeta porã vove pe ogajárandi natekotevẽi rehaʼarõiterei reiporu hag̃ua.

La Bíbliape oñemoĩramo jepe umi título “Señór” ha “Ñandejára”, Jehová réra oĩ hetave vése. Péro umi oskrivi vaʼekue la Biblia orrespeta Ñandejára réra ha ndahaʼéi omoĩnteva káda  frásepe, síno omoĩ opyta porãhápe ha haʼekuéra oiporuháicha jepi normálmente oñemongeta jave. Ñande jasegi vaʼerã iñehémplo.

Mávapa hína Jehová. Iñimportánteramo jepe jaikuaa Jehová réra, oĩ hetave mbaʼe tekotevẽva avei jaikuaa.

Ikatu hag̃uáicha jahayhu Jehovápe ha jajerovia hese tekotevẽ jaikuaa porã chupe. Oñeʼẽrõ guare Moiséspe mónte Sinaípe haʼe ndahaʼéi ku omombeʼúnteva chupe mbaʼéichapa haʼe héra. Síno omyesakã chupe umi mbaʼe porã ohechaukáva otrata jave yvyporakuérandi (Éx. 34:6, 7). Upéicha Jehová ohechauka mbaʼépa heʼise hína jaikuaauka héra.

Reñeʼẽ jave umi mbaʼe porã oguerútavare Ñandejára Rréino repredika térã rejapo jave diskúrso, remyesakã vaʼerã mbaʼéichapa umíva ohechauka Ñandejára imbaʼeporãha ñanendive. Tekotevẽramo reñeʼẽ Ñandejára léire, reaprovecha vaʼerã rehechauka hag̃ua Jehová iñarandu ha ñanderayhúgui oipotaha ñakumpli umíva. Eñehaʼãkena emyesakã umi léi ndahaʼeiha peteĩ kárga, ideprovécho guei ñandéve (Is. 48:17, 18; Miq. 6:8). Emombeʼu ipodér rupive Ñandejára ojapo hague opa mbaʼe, ha hembiapokuére jahechakuaa mbaʼeichagua persónapa haʼe, mbaʼépa ogusta chupe ha mbaʼépa ivolunta. Emyesakã avei Jehová siémpre oiporuha hekopete ipodér ha ndohasái la rrája oporohusga jave. Reñeʼẽ jave Jehováre remombeʼu vaʼerã mbaʼe mbaʼépa nde reñandu hese, pórke umi nerendúva ohechakuaárõ mbaʼeichaitépa nde rehayhu chupe, omomýita avei chupekuéra ohayhu hag̃ua Jehovápe.

Ñande jaikuaauka vaʼerã avei umi héntepe okyhyje vaʼerãha Jehovágui ani hag̃ua ojapo mbaʼeve ombopochýtava chupe. Upévare umi mbaʼe jaʼéva japredika jave ohechauka vaʼerã mbaʼeichaitépa ñande ñamombaʼe ha jarrespeta chupe (Sal. 89:7). Jakyhyjérõ Jehovágui ñanemanduʼáta haʼe ñandehusgataha ha tekotevẽha ñaime porã hendive jaikove hag̃ua opa árare (Luc. 12:5; Rom. 14:12). Jahayhu rupi chupe ñande pyʼaite guive, ñañehaʼã ñaime porã henondépe ha jajapo opa mbaʼe haʼe oguerohorýva (Deut. 10:12, 13). Jakyhyje rupi Ñandejáragui ñaneñeʼẽrendu chupe, ñanembojeguaru umi tembiapo vai ha jaservi chupe ñande pyʼaite guive (Deut. 5:29; 1 Crón. 28:9; Prov. 8:13). Péicha ndajaikomoʼãi ñanderovamokõi ha jaservise guaʼu chupe ha jahayhu avei umi mbaʼe oĩva ko múndope (1 Juan 2:15-17).

Ñandejára “réra haʼe peteĩ tórre imbaretéva”. Jehová oñangareko umi oikuaa porãvape chupe. Péro ndahaʼéi pe persóna oiporu rupínte héra ni oikuaa haguére chugui algúna kósa haʼe oprotehétava chupe, síno ojeroviágui hese ipyʼaite guive. Proverbios 18:10 heʼi voi: “Jehová réra haʼe peteĩ tórre imbaretéva, upépe oho pe hekojojáva ojesalva hag̃ua”.

 Remokyreʼỹ vaʼerã umi nerendúvape okonfia hag̃ua Jehováre, pórke upéicha ohechaukáta hína ojeroviaha hese ha ipromesakuérare (Sal. 37:3; Prov. 3:5, 6; Heb. 11:6). La Biblia heʼi ojesalvataha umi oiporúva Jehová réra. Péro upéva ndeʼiséi jaiporúnte vaʼerãha héra ha opáma, síno jahechakuaa vaʼerã haʼe añoite orekoha derécho ñanegoverna hag̃ua, ñamombaʼe umi konsého omeʼẽva ñandéve ha ñande pyʼaite guive jaguerovia haʼe añoite ikatuha ñandesalva (Rom. 10:13, 14). Remboʼe vaʼerã ne estudiántepe opa mbaʼe odesidívape ohechauka vaʼerãha ojeroviaha Jehováre.

Oĩ persóna ohasáva umi provléma ijetuʼúva ha ndoikuaái mbaʼépa ojapóta osolusiona hag̃ua. Eipytyvõ chupe oaprende hag̃ua mbaʼépa Jehová ohaʼarõ ñandehegui, ikatu hag̃uáicha ojerovia hese ha osegi umi konsého omeʼẽva la Biblia (Sal. 25:5). Emokyreʼỹ avei chupe toñemboʼe Jehovápe. Oñemboʼe jave ikatu ojerure Ñandejárape toipytyvõ chupe ha avei oagradesekuaa umi mbaʼe porã omeʼẽvare (Filip. 4:6, 7). Haʼe oñandúvo mbaʼéichapa Jehová imbaʼeporã hendive ikatúta oñemoag̃uive hese, ndahaʼéi olee haguérente la Biblia, síno ohechakuaágui Jehová oipytyvõha chupe. Péicha ontende porãta Ñandejára réra haʼeha hína ‘peteĩ tórre imbaretéva’ (Sal. 34:8; Jer. 17:7, 8).

Jaaprovechákena opa oportunida jarekóva ñaipytyvõ hag̃ua ñande rapichápe ohechakuaa hag̃ua iñimportanteha jakyhyje Ñandejára Jehovágui ha ñakumpli iléi.

JESUCRISTO oho mboyve yvágape oheja vaʼekue idisipulokuéra kárgope peteĩ tembiapo iñimportánteva, haʼe heʼi chupekuéra: “Peikuaaukáta che réra ko yvy tuichakuére” (Hech. 1:8). Upéicha avei la Bíbliape oñemombeʼu mbaʼépa oñemanda entéro Ñandejára siervokuérape: “Oñenkarga chupekuéra oñeʼẽ vaʼerãha Jesús rehe” (Apoc. 12:17). ¿Reñeʼẽpa nde kyreʼỹme Jesucrístore?

Heta persóna ipyʼaporã ha isinsérova heʼi ojeroviaha Jesús rehe, péro añetehápe ndoikuaái heta mbaʼe chugui. Por ehémplo ndoikuaái haʼe oexistíma hague ou mboyve ko yvy ape ári ni mbaʼépa ojapo koʼág̃a. Térã oĩ opensáva haʼe añetehápe ndoúi hague oiko peteĩ persónaicha ko yvy ape ári ha ndoikuaái avei mbaʼépa Jesús ojapóta koʼẽrõite ñanderehehápe. Ha oĩ voi oimoʼãva testigokuéra ndojeroviaiha Jesucrístore. Upéicharõ, tekotevẽterei oikuaa hikuái mbaʼépa omboʼe la Biblia Jesús rehe, ha upéva hína ñane rresponsavilida.

Oĩ avei opensáva japuha umi mbaʼe la Biblia omboʼéva Jesús rehe. Ha oĩ katu heʼíva haʼénte hague peteĩ kuimbaʼe ivuénova ha ndogueroviaiete voi haʼe hague Ñandejára Raʼy. Upéicha rupi ñañehaʼã vaʼerã jaikekuaa ha ñanepasiénsia ñañeʼẽ hag̃ua Jesús rehe koʼãichagua persónape.

 Tahaʼe haʼéva upe opensáva umi hénte Jesús rehe, tekotevẽ oikuaa porã chupe ikatu hag̃uáicha ohupyty jeikove opaveʼỹva (Juan 17:3). Ñandejára oipota opavave persóna ohechakuaa Jesucristo haʼeha ñande Ruvicha ha toñemoĩ ipoguýpe (Filip. 2:9-11). Péro, ¿mbaʼépa rejapóta retopáramo predikasiónpe ndojeroviáiva Jesúsre ha oñemohatãva haʼe opensávape? Ndajahejái vaʼerã upéva ñandejoko ñañeʼẽ hag̃ua Jesús rehe. Jaikuaa ningo sapyʼánte ndaikatumoʼãiha ñañemongeta enterovéndi ko témare lívremente, péro ikatu mbeguekatúpe ñambohape jahávo ñamombeʼu hag̃ua la Biblia omboʼéva Jesucrístore. Térã ikatu jarrevisitávo pe persónape ñañeʼẽ ótro témare ha jahecha mbaʼéichapa saʼi saʼípe ikatu ñañeʼẽ Jesús rehe. Péro ikatu hag̃uáicha ñamyesakã porãve opa koʼã mbaʼe, ñañehaʼãmante vaʼerã ñamoñepyrũ peteĩ estúdio vívliko (1 Tim. 2:3-7).

Jehová oiporu Jesúspe okumpli hag̃ua hembipota. Umi hénte ohechakuaa vaʼerã tekotevẽha ojerovia Jesús rehe ikatu hag̃uáicha oñemoag̃ui Jehováre. ¿Mbaʼérepa? Pórke Jesucristo hína pe tape, ha haʼe heʼi vaʼekue: “Che rupive añoite ikatu oñeg̃uahẽ pe Túva rendápe” (Juan 14:6). Umi hénte ndaikatumoʼãi avei ontende la Biblia ndohechakuaáiramo mbaʼéichapa Jehová ojevale Jesús rehe okumpli hag̃ua hembipota (Col. 1:17-20). Umi profesía oĩva Ñandejára Ñeʼẽme oñekumpli Jesús rupive (Apoc. 19:10). Jehová avei oiporu Jesucrístope osolusiona hag̃ua umi provléma oiko vaʼekue Satanás ha Adán káusare (Heb. 2:5-9, 14, 15).

Enterove ningo ñaneimperfékto ha jajavy heta vése, avei upéva káusare ñanderasykatu ha ñamano. Ko mbaʼe ndaikatumoʼãi ñasolusiona ñandejehegui reínte, ha ñarrekonosévo upéva ñamombaʼeve Jesús sakrifísio (Rom. 3:23; 5:12). Repredika jave reipytyvõ vaʼerã umi héntepe ohechakuaa hag̃ua ko mbaʼe, ha upe rire emyesakã Jehová ñanderayhu rupi omeʼẽha oportunida jajei hag̃ua pekádo ha ñemano poguýgui, péro upearã jajeroviámante vaʼerã Jesús sakrifísiore (Mar. 10:45; Heb. 2:9). Umi hénte ojapóramo upéva ikatúta ohupyty perfeksión ha oikovéta opa árare (Juan 3:16, 36). La Biblia heʼi voi “ndaiporiha ótro ikatúva ñandesalva” (Hech. 4:12). Reporomboʼe jave kongregasiónpe térã predikasiónpe, ani erénte derechoite koʼã mbaʼe. Eñehaʼã guei nepasiénsia ha eñeʼẽ mborayhúpe, péicha remomýita umi nerendúvape oagradese hag̃ua Jesús ojapo vaʼekue ñanderehehápe. Upéva tuichaiterei ikatu oipytyvõ chupekuéra  omoldea hag̃ua opensáva ha oiko lája (2 Cor. 5:14, 15).

Añetehápe ningo Jesucristo ‘oñemeʼẽ una ves ha opa ára g̃uarã ogueraha hag̃ua ñande pekadokuéra’ (Heb. 9:28). Péro koʼág̃a haʼe oservi Saserdóte Guasúramo. ¿Mbaʼéichapa reipytyvõkuaa umi nerendúvape ontende hag̃ua upéva? Ñane tiémpope heta hénte oñekevrantaháre oiko orekógui heta provléma, ikueráima oĩ haguére ombotavýva chupekuéra ha avave nopenái hesekuéra. Jesús avei heta osufri vaʼekue oĩ aja ko yvy ári, upévare ontende umi péicha oñeñandúvape. Jaikuaágui ñaneimperfektoha, ¿ñañemeʼẽpa enkuénta tekotevẽha jajerure Jehovápe tañaneperdona? Jajeruréramo tañandeporiahuvereko Jesús sakrifísio rérape, haʼe ikatu ñaneperdona, pórke Jesucristo hína ‘peteĩ ajudánte pe Túva renondépe ojeruréva ñanderehehápe’ (1 Juan 2:1, 2; Rom. 8:34). Jesús omeʼẽgui hekove ha oservi rupi saserdóteramo, ñande ikatu ‘ñañemoag̃ui Ñandejára trónore, ikatu hag̃uáicha haʼe ñandeporiahuvereko ha ñanepytyvõ ñaikotevẽ jave’ (Heb. 4:15, 16). Ha ñaneimperféktoramo jepe, Jesucristo rupive ikatu jaservi Ñandejárape konsiénsia potĩ reheve (Heb. 9:13, 14).

Ñandejára omoĩ avei Jesúspe omoakã hag̃ua pe kongregasión (Mat. 28:18; Efes. 1:22, 23). Upéicha rupi haʼe odirihi opa mbaʼe ojejapóva kongregasiónpe oñekumpli hag̃ua Jehová rembipota. Ne estudiánte ontende vaʼerã ndahaʼeiha peteĩ yvypóra la ñanemoakãva, síno Jesús (Mat. 23:10). Reho vove revisita jey peteĩ oñeinteresa vaʼekuépe, remokyreʼỹ vaʼerã chupe oho hag̃ua rreunionhápe ha explika chupe upépe jastudiaha umi puvlikasión oúva ‘tembiguái jeroviahágui’. Emombeʼu avei ne estudiántepe mávapa pe “tembiguái” ha Jesús haʼeha pe tembiguái patrón, péicha ikatúta ohechakuaa mbaʼéichapa Jesucristo odirihi opa mbaʼe (Mat. 24:45-47). Epresenta ne estudiántepe umi ansiáno ha emombeʼu chupe mbaʼépa ojereko enkuénta oñenombra hag̃ua chupekuéra (1 Tim. 3:1-7; Tito 1:5-9). Emyesakã avei chupe umi ansiáno ndahaʼeiha pe kongregasión jára, síno ñanepytyvõ jasegi hag̃ua Jesús ehémplo (Hech. 20:28; Efes. 4:16; 1 Ped. 5:2, 3). Eipytyvõ chupe ohechakuaa hag̃ua ko múndo tuichakuére oĩha hetaiterei ermáno ombaʼapóva Cristo poguýpe.

La Bíbliape oñemombeʼu Jesús oikérõ guare Jerusalénpe upe semána omano mboyve, idisipulokuéra hatã heʼi hague: “¡Tojehovasa pe Rréi oúva Jehová rérape!” (Luc. 19:38). Ne estudiánte ontende porãvévo la Biblia omboʼéva ohechakuaáta Jesúspe oñemeʼẽ hague autorida ogoverna hag̃ua entéro persóna oĩvape opa tetãrupi (Dan. 7:13, 14). Rejapo jave estúdio térã diskúrso, eipytyvõ umi nerendúvape ontende ha ohechakuaa hag̃ua mbaʼépa heʼise ñañemoĩ Cristo poguýpe.

Entendeka umi nerendúvape jaiko lájare jahechaukaha hína ñarrekonosépa Jesús haʼeha ñande Ruvicha ha añetehápepa jaipota haʼe ñandedirihi. Erresalta mbaʼe tembiapópa Jesús oheja idisipulokuérape (Mat. 24:14; 28:18-20). Emombeʼu mbaʼépa heʼi vaʼekue Jesús ñamotenonde vaʼerãha ñande rekovépe (Is. 9:6, 7; Mat. 6:19-34). Jesús ningo haʼe hína pe Prínsipe omeʼẽva  pyʼaguapy, upévare emyesakã mbaʼéichapa oñekomporta vaʼerã entéro isegidorkuéra (Mat. 20:25-27; Juan 13:35). Péro eñatende ani rehusga umi nerendúvape ni entendeka haʼekuéra ndojapoiha oñehaʼarõva chuguikuéra, upéva rangue eipytyvõ chupekuéra ijeheguiete ohechakuaa hag̃ua oimépa ojapo hína opa ikatumíva. Rejapóvo koʼã mbaʼe errekonose avei nde tekotevẽha rejapo upéicha.

Osegi vaʼerã Crístope ndahaʼéi ñandéve. Ñaipytyvõ jave ñande rapichápe oikuaa hag̃ua pe añetegua haʼete ñamopuʼãva peteĩ óga, ha Cristo haʼe hína pe simiénto omopyendáva pe óga (1 Cor. 3:10-15). Upévare reipytyvõ vaʼerã ne estudiántepe oikuaa porã hag̃ua Jesúspe, upéicha ndahaʼemoʼãi nde segidór, síno Jesucristo segidór (1 Cor. 3:4-7).

Oñemopyenda porãramo ijerovia, haʼe ohechakuaáta Cristo oheja hague iñehémplo oguata hag̃ua hekoitépe ipyporére (1 Ped. 2:21). Ikatu hag̃uáicha osegi okakuaa ijerovia, emokyreʼỹ chupe olee hag̃ua la Bíbliape umi lívro oñemombeʼuhápe Jesús rekovekue, ha tojepyʼamongeta mbaʼéichapa ikatu osegi iñehémplo. Eipytyvõ chupe oreko hag̃ua enkuénta mbaʼéichapa Jesús oñekomporta, mbaʼépa oñandu Itúvare, mbaʼéichapa ombohovái umi provléma, siémpre iñeʼẽrendu hague Ñandejárape ha mbaʼéichapa otrata porã vaʼekue enterove persónape. Erresalta porã chupe mbaʼe tembiapópa omotenonde meme vaʼekue Jesús. Oikuaávo opa koʼã mbaʼe ne estudiánte odesidíta vove peteĩ mbaʼe térã ojejopy vai jave, oñeporandúta: “¿Mbaʼépa ojapo vaʼerãmoʼã Jesús ko situasiónpe? ¿Mbaʼéichapa ikatu ahechauka aagradeseha Jesús ojapo vaʼekue cherehehápe?”.

Rejapo jave diskúrso ani repensa umi ermáno oikuaa porãmaha voi Jesúspe ha upévare natekotevẽmoʼãiha reñeʼẽterei hese. Umi mbaʼe eréva ningo katuete ideprovechovéta umi ermánope omombaretevéramo chupekuéra ijerovia. Upévare reñeʼẽramo ñane rreunionkuérare, emyesakã mbaʼéichapa umíva ohechauka Jesús omoakãha pe kongregasión. Térã reñeʼẽta jave pe predikasiónre erresalta mbaʼéichapa Jesús kyreʼỹme ojapo vaʼekue upe tembiapo, ha mbaʼéichapa koʼag̃aite peve haʼe osegi odirihi pe predikasión ikatu hag̃uáicha umi hénte ojesalva.

Jaikuaa ndovaleiha ñañekontenta jaikuaa haguérente algúna kósa Jesúsgui. Oiko hag̃ua ñandehegui peteĩ kristiáno tee jajerovia vaʼerã hese ha jahayhu chupe ñande pyʼaite guive. Ha péicha ñaneñeʼẽrendúta chupe (Juan 14:15, 21). Avei péva ñanemombaretéta jajepytaso hag̃ua Jehová ykére ha jasegíta Cristo pypore toiko la oikóva. Ha jahechaukáta ñande jerovia imbareteha oñemopyenda porã rupi pe simiénto ári (Efes. 3:17). Péicha ñambotuicháta Jehovápe, ñande Ruvicha Jesucristo Túva.

JESÚS omombeʼu vaʼekue mbaʼe mbaʼépa oikóta japilla hag̃ua haʼe og̃uahẽmaha ha hiʼag̃uimaha pe fin del múndo. Ha heʼi avei: “Koʼã marandu porã oñeʼẽva Ñandejára Rréinore oñemombeʼúta oparupiete ko yvy ape ári, ojekuaa hag̃ua opa tetãrupi, ha upéi og̃uahẽta pe ára pahaite” (Mat. 24:14).

Koʼã marandu porã oñeʼẽ Ñandejára goviérnore, upévare Jesús heʼi vaʼekue jajerure vaʼerãha: “Tou ne Rréino” (Mat. 6:10). Ko goviérnope oñehenói avei “Ñandejára ha Cristo Rréino”, pórke Jehová omeʼẽ autorida Jesúspe ogoverna hag̃ua (Apoc. 11:15). Jesús disipulokuéra opredika vaʼekue: “Ñandejára Rréino hiʼag̃uimbaitéma” (Luc. 10:9). Péro haʼe heʼi vaʼekue ñane tiémpope ñande jaikuaaukataha hetave mbaʼe, ¿mbaʼérepa? Jesús oprofetisa vaʼekue oñemog̃uahẽtaha oparupiete umi marandu porã oikuaaukáva oikotaha peteĩ mbaʼe iñimportánteva oñekumpli hag̃ua Jehová rembipota.

Peteĩ visiónpe proféta Daniel ohecha vaʼekue mbaʼe mbaʼépa oiko vaʼerã. Haʼe ohecha “peteĩ ojoguáva yvypórape”, upéva hína Jesucristo, ha Jehová ‘omeʼẽ chupe autorida ogoverna hag̃ua, tekomimbipa, ha rréino, ikatu hag̃uáicha oservi chupe umi puévlo ha umi hénte oikóva opa tetãme ha oñeʼẽva diferénte idióma’ (Dan. 7:13, 14). Koʼã mbaʼe iñimportánteva oiko áño 1914-pe, upe rire Jesucristo ha hiʼanhelkuéra omosẽ yvágagui Satanás ha idemoniokuérape (Apoc. 12:7-10). Ha upe tiémpo guive oñepyrũ umi ára paha. Péro oñehundi mboyve ko múndo aña, oñemombeʼu hína Jesucristo oñepyrũmaha ogoverna Ñandejára Rréinope yvága guive. Ko mensáhe ojekuaauka oparupiete entéro persónape. Umi hénte oaseptáramo koʼã notísia, ohechaukáta orrekonoseha Jehová haʼeha hína pe ‘Governánte Ijojahaʼỹva yvyporakuéra rréino apytépe’ (Dan. 4:32).

Ñande jaikuaa ofaltaha gueteri heta mbaʼe oñekumpli, upévare jasegi jajerure ou hag̃ua Ñandejára Rréino. Péro jaʼévo upéva ndeʼiséi ñande ñapensaha Jesús neʼĩraha ogoverna, síno jajapo upéva jaipotágui oñekumpli umi profesía oĩva Daniel 2:44 ha Apocalipsis 21:2-4-pe. Pe goviérno rupive ojejapóta ko yvýgui peteĩ hardín neporãva oĩtahápe hénte ohayhúva hapichápe ha iñeʼẽrendúva Ñandejárape. Japredika jave ñande jaikuaauka koʼã “marandu porã oñeʼẽva  Ñandejára Rréinore”. Péro avei ñamombeʼu Jehová omoĩma hague Itaʼýrape ogoverna hag̃ua Irréinope. ¿Remyesakãpa koʼã mbaʼe repredika jave?

Emyesakã mbaʼépa hína pe Rréino. ¿Mbaʼéichapa ikatu hekoitépe reikuaauka Ñandejára Rréino? Predikasiónpe añete ikatu jaiporu heta téma ñañepyrũ hag̃ua ñañemongeta umi héntendi, péro ensegída ñañehaʼã vaʼerã ñambohape ñañeʼẽ hag̃ua Ñandejára Goviérnore.

Ikatu relee umi téxto oñeʼẽva Ñandejára Rréinore ha eñehaʼã umi nerendúva tontende porã mbaʼérehepa reñeʼẽ hína. Sapyʼánte ningo umi héntepe ijetuʼu ontende hag̃ua mbaʼéichapa ikatu oexisti peteĩ goviérno ndaikatúiva ojehecha. ¿Mbaʼépa ikatu ere remyesakã hag̃ua chupekuéra upéva? Por ehémplo ñande ndaikatúi jahecha pe yvytu, péro peteĩ torménta jave ñañemeʼẽ enkuénta mbaʼeichaitépa ipoderóso. Upéicha avei ndajahecháiramo jepe Ñandejárape, hembiapokuére jahechakuaa ipoderosoitereiha. Ndareíri la Bíbliape oñehenói chupe: “Rréi opa ára g̃uarã” (1 Tim. 1:17). Térã ikatu reiporu ótro ehémplo: umi tetã tuichávape naentéroi ohecha pe presidéntepe en persóna, ha heta umi oikóva kampáñare ndohóiva gueteri kapitálpe. Upéicharõ jepe, oikuaa oexistiha umíva pórke ohecha umi diáriope térã télepe. Upéicha avei la Bíbliape oñeñeʼẽ Ñandejára Rréinore, mávapa hína pe ogovernáva ha mbaʼépa ojapo koʼág̃a ko goviérno. Hiʼarive la Biblia ojetradusíma mas de dos mil doscientos idiómape. Ha rrevísta Ñemañaha, oikuaaukáva Jehová ogovernamaha, osẽ káda mes ha ojetradusíma hetaiterei idiómape.

Ontende porãve hag̃ua ko púnto ikatu reporandu pe persónape mbaʼépa haʼe ohaʼarõ ojapo umi goviérno koʼag̃agua. Katuete oiméne oipota opa pe insegurida, toĩ hustísia opavavépe g̃uarã, toñeñatende porã umi ospitálpe, opavave toreko oportunida ostudia hag̃ua ha topa mboriahu. Ehechauka chupe Ñandejára Goviérno añoite ikatutaha osolusiona koʼã provléma ha omeʼẽtaha enterovépe opa mbaʼe oikotevẽva (Sal. 145:16).

Reñehaʼã vaʼerã remokyreʼỹ umi héntepe oñemoĩse hag̃ua Jesucristo poguýpe, ¿mbaʼéicha ikatu rejapo upéva? Emyesakã umi milágro rupive Jesús ohechauka hague umi mbaʼe porã ojapótava ogoverna vove ko yvy ári. Avei remombeʼukuaa mbaʼéichapa haʼe siémpre otrata porã vaʼekue umi héntepe (Mat. 8:2, 3; 11:28-30). Ere chupe Jesús omeʼẽ hague hekove ñanderayhupápe, ha upéi Ñandejára omoingove jey chupe oiko hag̃ua yvágape. Ha koʼág̃a haʼe ogoverna hína upe guive (Hech. 2:29-35).

Erresalta porã vaʼerã Ñandejára Rréino oñepyrũmaha ogoverna yvága guive. Péro heta héntepe ikatu ijetuʼu hína oguerovia hag̃ua ko mbaʼe, pórke ñamañáramo umi mbaʼe vai oikóvare ko múndope ndojekuaaiete Jesucristo ogovernamaha. Upévare iporãta eréramo rentendeha pe opensa lája ha emyesakã Jesús heʼi hague oikotaha koʼã mbaʼe vai haʼe oñepyrũ vove ogoverna, heʼiháicha Mateo kap. 24, Marcos kap. 13, ha Lucas kap. 21. Upe rire reexplika vaʼerã mbaʼéicha rupípa oiko koʼã mbaʼe Jesús oñepyrũ rire ogoverna, ikatu relee Apocalipsis 12:7-10, 12.

 ¿Mbaʼéicha ikatu rehechauka pe ogajárape umi mbaʼe porã ojapómava Ñandejára Rréino? Eleekuaa Mateo 24:14 ha emyesakã mbaʼéichapa opa tetãrupi testígo de Jehová oipytyvõ la héntepe ontende hag̃ua la Biblia (Is. 54:13). Emombeʼu chupe oĩha diferénte eskuéla ojejapóva ñane organisasiónpe, enterovéva oñemopyendaha la Bíbliape ha ndojekovraiha mbaʼevete. Erekuaa avei ndahaʼéi japredikánteva ogahárupi, síno ñaikuaveʼẽ estúdio vívliko umi hénte ostudia hag̃ua la Biblia hogaitépe opagaʼỹre mbaʼevete. Ko tembiapo ojejapóma hína mas de doscientos treinta tetãme. ¿Oĩpa ótro goviérno ko múndope ojapóva koʼãichagua tembiapo? Einvita chupe oho hag̃ua ñane rreunionhápe ha umi aty guasúpe, péicha haʼekueraite voi ohechakuaáta ñañekomporta lájare mbaʼeichaitépa ñanepytyvõ umi mbaʼe ñaaprendéva Jehová organisasión rupive (Is. 2:2-4; 32:1, 17; Juan 13:35).

¿Mbaʼéichapa ikatu rehechauka pe ogajárape iñimportanteha oikuaa koʼã mbaʼe? Ikatu remombeʼu chupe revisitávo umi héntepe reikuaaukaha hína pe oportunida Ñandejára omeʼẽva opavavépe odesidi hag̃ua oikosépa Igoviérno poguýpe. ¿Mbaʼéichapa ikatu ohechauka oñemoĩha igoviérno poguýpe? Upearã oaprende vaʼerã mbaʼépa Ñandejára ohaʼarõ chugui koʼág̃ama voi ha iñeʼẽrendu chupe (Deut. 30:19, 20; Apoc. 22:17).

Eipytyvõ umi nerendúvape omotenonde hag̃ua Ñandejára Rréino. Ne estudiánte oasepta rire umi marandu porã, oĩ gueteri heta mbaʼe odesidi vaʼerã ohechauka hag̃ua iñimportanteha chupe g̃uarã Ñandejára Rréino. Jesús heʼi vaʼekue idisipulokuéra ‘omotenonde meme vaʼerãha Ñandejára Rréino’ (Mat. 6:33). ¿Mbaʼéichapa reipytyvõkuaa ermanokuérape osegi hag̃ua pe konsého? Nde voi remoĩ vaʼerã ehémplo ha emombeʼu mbaʼe mbaʼépa ikatu jajapove Ñandejára servísiope. Reporandukuaa chupekuéra opensámapa hikuái mbaʼéichapa ikatu omotenondeve Ñandejára Rréino hekovépe, ha emombeʼu peteĩ experiénsia ohechaukáva mbaʼéichapa ojapo upéva heta ermáno. Emokyreʼỹ umi nerendúvape ohayhuve hag̃ua Jehovápe, upearã ikatu rejevale Ñandejára siervokuéra rembiasakuére oĩva la Bíbliape. Avei erresalta Ñandejára Rréino ogovernamaha ha tekotevẽha jaikuaauka upéva. Erénte rangue mbaʼépa ojapo vaʼerã hikuái, iporãvéta remokyreʼỹramo chupekuéra haʼekueraite voi ojedesidi hag̃ua.

Umi marandu porã ñande jaikuaaukáva oñeʼẽ prinsipálmente Jehová, Jesucristo ha Ñandejára Rréinore. Upéicharõ japredika jave, jajapóvo diskúrso térã jaiko lájare ojekuaa vaʼerã ñamombaʼeha upe mensáhe. Péicha jahechaukáta jaaprovechaha pe enseñánsa jarresivíva ko Eskuéla Jaiporukuaa Hag̃ua la Bíbliape.