ÑANDEJÁRA JEHOVÁ ñandeapo porãiterei, ha omeʼẽ ñandéve peteĩ rregálo iporãitereíva, upéva hína ñande cerebro. Upéva rupive ikatu ñanemanduʼa heta mbaʼére. Ñande cerebro haʼete voi peteĩ depósito ijahápe hetaiterei informasión. Jehová ñandeapo upéicha oipotágui yvyporakuéra oikove opa ára g̃uarã, péicha umi mbaʼe oĩva ñane akãme ideprovéchota ha jaiporúta opa árare (Sal. 139:14; Juan 17:3).

Upéicharõ jepe pyʼỹinte ndoúi ñane akãme umi mbaʼe ñanemanduʼaséva. ¿Mbaʼépa ikatu jajapo opyta hag̃ua ñane akãme umi mbaʼe jaleéva jepi?

Umi idesaténtova pyʼỹinte hesarái oimeraẽ mbaʼégui. Upéicharõ tekotevẽ ñañeinteresa umi mbaʼe oikóvare ñande jerére ha ñande rapichakuérare. Jajepokuaáramo jajapo upéicha ñañatende porãta jalee ha ñahendúvare ha ndahasymoʼãi ñandéve ñanemanduʼa hag̃ua peteĩ mbaʼére ñaikotevẽ jave.

Ñande kristianokuéra jaikuaa iñimportanteha ñanemanduʼa umi hénte rérare, tahaʼe ñane ermanokuéra, umi hénte jatopáva predikasiónpe ha avei enterove jaikuaáva. Péro añetehápe upéva ijetuʼu jepi, ¿mbaʼépa ñanepytyvõta ani hag̃ua ñanderesarái umi hénte réragui? Ikatu jasegi apóstol Pablo ehémplo, haʼe oskrivírõ guare peteĩ kongregasiónpe imanduʼa 26 ermáno rérare, péro ndahaʼéi upévante, imanduʼa avei umi ermáno rembiapokuére. Upéva ohechauka haʼe oñeinteresa hague hesekuéra (Rom. 16:3-16). Koʼág̃arupi heta superintendénte ovisita káda semána peteĩ kongregasión, upéicharõ jepe imanduʼa umi ermáno rérare. ¿Mbaʼépa oipytyvõ chupekuéra? Oñeʼẽ ypývo peteĩ persónandi oiporu heta vése la héra ha oñehaʼã imanduʼa hováre. Avei ohasa heta tiempo umi ermánondi, tahaʼe predikasiónpe térã ohóvo okaru hogapekuéra. Upéicharõ, nemanduʼasérõ peteĩ persóna rérare repensa vaʼerã mbaʼérepa iñimportánte nemanduʼa hese, ha esegi umi konsého oĩva koʼápe.

 Iñimportánte avei ñanemanduʼa jalee vaʼekuére. ¿Mbaʼépa ñanepytyvõta upearã? Tekotevẽterei avei ñañeinteresa pe jaleévare ha ñantende porã pe informasión. Umi mbaʼe jaleéva ningo ñandegusta vaʼerã, osino ótro ladoite ñapensáta jalee aja. Ha rentende porãve hag̃ua, relee jave repensa vaʼerã mbaʼéichapa upe informasión omyesakãve umi mbaʼe reikuaámava voi. Ikatu reñeporandu: “¿Mbaʼéicha javépa aiporukuaa ko informasión? ¿Mbaʼéichapa ikatu aiporu aipytyvõ hag̃ua ótrope?”. Relee rangue palávra por palávra eñehaʼã elee por fráse, péicha rentendevéta umi idéa prinsipál ha nemanduʼa porãvéta hese.

Umi omeʼẽva konsého ñaporomboʼekuaa hag̃ua heʼi iñimportanteha jarrepasa jey upe jalee vaʼekue. Peteĩ profesór universidapegua ojapo peteĩ estúdio, ha upéva ohechauka sapyʼaitemi jepe jarrepasa jeýramo pe jalee vaʼekue, hetaitereive mbaʼe opyta ñane akãme. Upéicharõ releepa rire peteĩ párte, epensa jey umi mbaʼe iñimportantevévare ha eñehaʼã ememorisa umíva. Epensa avei mbaʼéichapa ikatúta remyesakã ótrope pe reaprendéva. Rejapóramo koʼã mbaʼe areve nemanduʼáta upe relee vaʼekuére.

Ohasa rire unos kuánto día emombeʼu ótrope pe reaprende vaʼekue, tahaʼe nde rogaygua, peteĩ ermánope, ne kompañéro de traváho, koléhio, peteĩ ne vesíno térã repredika jave. Ani nemanduʼánte umi idéa iñimportantevévare, síno mbaʼe téxtopa omopyenda upéva. Péicha nemanduʼáta umi púnto prinsipál rehe ha reipytyvõta avei nde rapichakuérape.

Rejapopa rire koʼã mbaʼe jahecha vaʼekue ideprovéchota avei rejepyʼamongetáramo umi mbaʼe iñimportantevévare, ojapo haguéicha Asaf ha David. Por ehémplo Asaf heʼi vaʼekue: “Che katu Jehová chemanduʼáta nde rejapo vaʼekuére, ha ne milagrokuéra yma guare rehe. Ajepyʼamongetáta opa rejapo vaʼekuére ha ajesarekóta ne rembiapokuére” (Sal. 77:11, 12). Upéicha avei David heʼi Jehovápe: “Pyhare rei ajepyʼamongeta nderehe”. “Chemanduʼa yma guare rehe; ajepyʼamongeta opa umi ne rembiapokuére” (Sal. 63:6; 143:5). ¿Rejapópa nde avei upéicha?

Pyʼaguapýpe porã rejepyʼamongetáramo rehecha hag̃ua mbaʼépa nemboʼe Jehovágui upe releéva, ndahaʼemoʼãi nemanduʼátanteva pe  informasiónre, síno opokóta ne korasõre ha nepytyvõta repensa hag̃ua Jehová oipotaháicha. Umi mbaʼe reaprendéva opytátama ne akãme ha ne korasõ ruguápe (Sal. 119:16).

Ñandejára espíritu ikatu ñanepytyvõ avei ñanemanduʼa hag̃ua pe añetegua oúva Jehovágui ha umi mbaʼe Jesucristo omboʼe vaʼekuére. Pe pyhare omano mboyve, Jesús heʼi idisipulokuérape: “Aime aja penendive amombeʼu peẽme koʼã mbaʼe. Pe Túva omboúta che rérape, pe ajudánte, pe espíritu sánto, upéva penemboʼéta opa mbaʼe ha penemomanduʼáta opaite mbaʼe haʼe vaʼekue peẽme” (Juan 14:25, 26). Umi disípulo apytépe oĩ vaʼekue Mateo ha Juan. ¿Mbaʼéichapa oipytyvõ rakaʼe chupekuéra espíritu sánto? Por ehémplo Mateo oskrivipa Jesús rekovekue ocho áño Jesús omano rire. Umi mbaʼe oskrivíva apytépe oĩ pe diskúrso porãite hérava Sermón del Mónte, mbaʼépa oikóta Jesús ou jey vove, ha oñeʼẽ avei pe ára paháre. Apóstol Juan katu oskrivi ilívro 65 áño Jesús omano rire, ha omombeʼu heta mbaʼe iñimportantetereíva heʼi vaʼekue Jesús pe pyhare omano mboyve. Mateo ha Juan katuete imanduʼa porãne voi heta mbaʼe Jesús heʼi ha ojapo vaʼekuére, péro pe espíritu sánto oipytyvõ chupekuéra imanduʼa hag̃ua umi mbaʼe iñimportantevévare Jehová oipotáva oñemoĩ Iñeʼẽme.

¿Oipytyvõpa avei koʼág̃a pe espíritu sánto Jehová siervokuérape? Katuete oipytyvõ. Upéva ndeʼiséi peteĩ milágro rupive ñanemomanduʼataha umi mbaʼe ndajaleéi vaʼekuére, péro ñanepytyvõ ñanemanduʼa hag̃ua umi mbaʼe iñimportánteva jastudia vaʼekue (Luc. 11:13; 1 Juan 5:14). Ñaikotevẽ jave, espíritu sánto ñanepytyvõ ou hag̃ua ñane akãme jalee vaʼekue ha ñanemanduʼa “umi proféta marangatu heʼi vaʼekuére yma, ha pe mandamiénto ñande Ruvicha ha Salvadór omeʼẽ vaʼekuére” (2 Ped. 3:1, 2).

Jehová heʼi vaʼekue heta vése umi isrraelítape ani hag̃ua hesarái haʼe ojapo vaʼekuégui hesehapekuéra. Upéva ndeʼiséi imanduʼataha de memória opaite mbaʼére, síno heʼise Jehová ndoipotaiha hesarái chugui oikógui omotenonde haʼekuéra oipotáva. Haʼekuéra ndahesaráiri vaʼerã Jehová oguenohẽ hague chupekuéra Egíptogui, upérõ pe ánhel ojukapa umi ehípsio taʼýra ypykuépe, oavri pe mar Rojo  ohasa hag̃ua hikuái, ha upéi ohundipa Faraón ha ijehérsitope. Imanduʼa vaʼerã avei Ñandejára omeʼẽ hague chupekuéra Iléi sérro Sinaípe, oñangareko hague hesekuéra oĩrõ guare pe desiértope ha omeʼẽ chupekuéra pe yvy haʼe opromete vaʼekue. Haʼekuéra imanduʼa vaʼerã koʼã mbaʼére, upéicharõ osegíta okyhyje Jehovágui ha iñeʼẽrendu chupe (Deut. 4:9, 10; 8:10-18; Éx. 12:24-27; Sal. 136:15).

Ñande avei nañanderesaráiri vaʼerã Jehová rembipotágui. Jepe sapyʼánte heta ñane rembiapo, ñanemanduʼa vaʼerã Jehová ñanderayhueterei rupi ombou hague itaʼýra omano hag̃ua ñanderehehápe, ha péicha ñaneguenohẽ pekádo poguýgui ha omeʼẽ ñandéve esperánsa jaikovetaha opa ára g̃uarã (Sal. 103:2, 8; 106:7, 13; Juan 3:16; Rom. 6:23). Jalee memérõ la Biblia, ndajafaltái rreunión ni predikasiónpe akóinte ñanemanduʼáta koʼã mbaʼe iñimportantetévare.

Nemanduʼa vaʼerã koʼã mbaʼére redesidíta jave opa mbaʼe, ha eñehaʼã epensa Jehová oipotaháicha. Ejeruréke Jehovápe tanepytyvõ. Ani rejapo nde rejaposéva térã ndévente ou porãva, eñeporandu guei mbaʼépa heʼi la Biblia upe mbaʼére (Prov. 3:5-7; 28:26). Añetehápe ndaikatumoʼãi nemanduʼa upe ndereleéi térã nerehendúi vaʼekuére. Péro rehayhúramo Jehovápe ha reipotáramo haʼe ndeguerohory, reñehaʼãta rekumpli imandamientokuéra ha pe espíritu sánto nepytyvõta nemanduʼa hag̃ua umívare. Reikuaavévo ha rehayhuvévo Jehovápe katuete nearanduvéta avei.