¿IJETUʼÚPA ndéve reñemongeta hag̃ua nde rapichándi? Heta oĩ ndoikuaáiva mbaʼéichapa ojapóta upéva, koʼýte inerviosoiterei oñeʼẽtaramo peteĩ deskonosídondi. Ikatu voi hiʼotĩetereígui oñeporandu: “¿Mbaʼérehepa añeʼẽta? ¿Mbaʼéicha añepyrũta? ¿Ha mbaʼe la haʼevéta upe rire?”. Péro oĩ heta hénte iñeʼẽngatu ha ndokyhyjéiva voi oñemongeta hag̃ua ótrondi. Umichagua katu la iprovléma nokirirĩkuaavéi térã ojagarrapa, upévare oaprende vaʼerã ohendukuaa hag̃ua hapichápe ha oheja umi ótro oñeʼẽ. Tahaʼe haʼéva ñane situasión tekotevẽ ñaaprende mbaʼéichapa ikatu ñañemongeta ñande rapichándi.

Ojevyʼa hag̃ua ogapýpe tekotevẽ enterove oñeʼẽ meme umi mbaʼe oporomokyreʼỹ ha oporomombaretévare. Upévare iporãta rejepokuaa reñemongeta meme umi nde rogayguándi.

Tekotevẽ reñeinteresa nde pyʼaite guive nde rogayguáre (Deut. 6:6, 7; Prov. 4:1-4). Péicha ndereikomoʼãi ndénte reñeʼẽse, síno rehejáta avei umi ótro omombeʼu la opensáva. ¿Mbaʼérepa ikatu reñeʼẽ? Relee meme ha restudiáramo la Biblia katuete rerekóta heta mbaʼe iñimportánteva reñeʼẽ hag̃ua. Nepytyvõta avei releéramo pe folléto Ñahesaʼỹijo Ñandejára Ñeʼẽ ára ha ára. Ikatu oime rereko avei peteĩ experiénsia iporãva predikasiónpe, relee peteĩ notísia térã oñemombeʼu ndéve peteĩ chíste. Rejepokuaáramo reñemongeta koʼã mbaʼére nde rogapýpe voi, upéva nepytyvõta reñemongeta hag̃ua avei ótrondi.

Heta hénte noñemongetaseiete voi umi deskonosídondi, péro ñande testígo de Jehová jahayhúgui Ñandejárape ha ñande rapichápe, ñañehaʼã jajapo upéva ikatu hag̃uáicha ñamboʼe chupekuéra la Biblia heʼíva. ¿Mbaʼépa nepytyvõta reñemongetakuaa hag̃ua nde rapichándi?

Peteĩ konsého iporãitereíva jatopa Filipenses 2:4-pe, upépe heʼi: “Aníkena pejapo peẽmente ou porãva, síno pejepyʼapy vaʼerã avei pende rapicháre”. Epensami ko mbaʼére, pe ogajára ningo nandekuaái, upévare nde peteĩ deskonosído chupe g̃uarã. ¿Mbaʼépa ikatu rejapo ani hag̃ua odeskonfia? Reñepyrũ hag̃ua ikatu resaluda chupe torypápe, péro ndahaʼéi upévante la rejapo vaʼerã.

 Ikatu oime pe ogajára opensa raʼe peteĩ mbaʼére, ha ñag̃uahẽvo ñande ñasẽ ñañeʼẽ chupe ótra kosaitére. ¿Ohendusétapa la jaʼéva chupe? Tekoteṽe ningo jaikuaa raẽ mbaʼépa opensa hína raʼe pe ogajára. Por ehémplo, ¿mbaʼépa ojapo vaʼekue Jesús ojotopárõ guare pe kuña samaritánandi pe póso mátape? Pe kuña opensa hína kuri onohẽtaha y pósogui, ha Jesús oñeʼẽ chupe upéva rehe. Upéicha rupi Jesús kyreʼỹme oñemongeta hendive ha opredika chupe (Juan 4:7-26).

Jajesarekóramo pe ogajárare ha pe óga jerére ikatúta jaikuaa mbaʼépa oiméne opensa hína. ¿Ojekuaápa hese ovyʼa térã oñembyasyha hína? ¿Ijedápa térã hasykatu? ¿Ojekuaápa oĩha mitã pe ógape? ¿Haʼetépa la imboriahúva hikuái térãpa noikotevẽi mbaʼeve? ¿Ojekuaápa hese térã pe ógare irrelihiosoha hikuái? Rehechakuaáramo koʼã mbaʼe ikatu hína reiporu umíva resaluda ha reñepyrũvo reñeʼẽ hendive.

¿Ha pe ogajára ndoavríriramo pe okẽ ha oñeʼẽnte ndéve hyepy guivénte? Ikatu oime okyhyje térã odeskonfia hína. Upéicharõ ikatu reaprovecha ha upe guivénte reñeʼẽ chupe pe inseguridáre.

¿Mbaʼépa ikatu rejapo oñemongetase hag̃ua nendive pe ogajára? Heta lugárpe oñemongeta mboyve oĩ omombeʼúva moõguipa ou hína, mbaʼérepa ovisita chupe, mbaʼérepa ojerovia Ñandejárare, mbaʼérepa ostudia la Biblia térã mbaʼéicha upéva oipytyvõ chupe. Ijáramo ndéve ikatu rejapo upéva (Hech. 26:4-23). Ikatu upe rire pe ogajára oñanima avei oñeʼẽ nendive ha omombeʼu mbaʼépa opensa. Péro reñatende vaʼerã ani remeʼẽ informasión natekotevẽiva oikuaa. Ani avei reñeʼẽ ótra kosaitére ha ipahápe nderepredikái jey chupe.

Heta tetãrupi umi hénte ojepokuaa hory ha orresivi porã umi deskonosídope og̃uahẽ jave hógape. Oinvita chupe og̃uahẽ ha oguapy hag̃ua avei. Upéicha jave reporandúramo mbaʼéichapa oĩ ifamília ha reñatende porãramo umi mbaʼe heʼívare, pe ogajára katuete nerendu porãta avei reñeʼẽ vove chupe. Ótro hendárupi katu umi hénte ojepokuaa are voi oñemongeta ojosaludávo. Umícha jave ikatu repilla mbaʼépa ogusta pe ogajárape ha reaprovechakuaa upéva reñepyrũ hag̃ua repredika chupe.

¿Mbaʼépa ikatu rejapo oĩramo nde territóriope umi hénte oñeʼẽva ótro idióma? Reaprendéramo peteĩ salúdo jepe pe idiómape, umi hénte ohechakuaáta reñeinteresaha hesekuéra ha ikatu nerenduseve.

Resegi hag̃ua reñemongeta pe ogajárandi rehendukuaa vaʼerã chupe. Ndénte reñeʼẽ rangue remokyreʼỹ vaʼerã pe persónape omombeʼu hag̃ua mbaʼépa opensa. Upearã ikatu reiporu umi porandu omomýitava pe ogajárape heʼi hag̃ua ndéve mbaʼépa haʼe okalkula. Reiporavo porã vaʼerã umi porandu rejapótava. Por ehémplo, reñeʼẽ rire peteĩ provléma oikóvare upe lugárpe reporandukuaa chupe: “¿Mbaʼépa nde ere? ¿Mbaʼérepa oiméne oiko koʼã mbaʼe?”, térã: “¿Mbaʼéichapa ikatu oñesolusiona?”.

Ejapysaka porã pe ogajárare ombohováivo ndéve pe porandu. Umi mbaʼe erévare térã rejapóvare ehechauka chupe reguerohoryha ikomentário. Ani reñeʼẽjoko chupe, upéva rangue eñehaʼã eñemoĩ ilugárpe ha entende mbaʼérepa ombohovái upéicha. Heʼiháicha la Biblia ‘tekotevẽ ndepyaʼe rehendukuaa hag̃ua ha nembegue reñeʼẽ hag̃ua’ (Sant. 1:19). Ha ndéve otoka vove reñeʼẽ jey, ereko enkuénta upe heʼi vaʼekue, péicha ohechakuaáta rehendu hague chupe.

Nemanduʼa vaʼerã avei naentéroi ombohovaitaha la reporandúva. Ikatu oĩ okirirĩnteva ndehegui, ha ótro katu nerendútanteva térã heʼítante ndéve: “Heẽ... upéicha”. Umícha jave nepasiénsia vaʼerã ha ani rejopy chupe oñeʼẽ hag̃ua. Oimérõ nerenduse, reaprovecha vaʼerã reñeʼẽ hag̃ua pe ogajárape peteĩ téxto omokyreʼỹtavare chupe. Mbeguekatúpe upe persóna ikatu ojeroviave nderehe ha omombeʼu ndéve mbaʼépa opensa.

Reñemongetávo rehóvo repensáma vaʼerã mbaʼépa ikatu ere rembohape hag̃ua revisita jey hag̃ua chupe. Por ehémplo oporandúramo ndéve heta mbaʼe, ani rembohovaipaite, síno eheja peteĩ térã mokõi porandu, ha ere rehekataha informasión ha revisita jeytaha chupe rembohovái hag̃ua. Péro noporandúiramo ndéve mbaʼeve, nde voi ikatu rejapo chupe peteĩ porandu ointeresátava chupe ha epyta hendive rembohovaitaha ótro rejúpe. Retopáta heta suherénsia lívro Razonamiéntope ha umi rrevísta ¡Despertad!, ha Ñemañaháme.

¿Mbaʼépa rejapo retopa jave peteĩ ermáno ndereikuaáivape? ¿Reñemokirirĩntepa térãpa reñehaʼã reñemongeta hendive? Pe mborayhu nemomýi vaʼerã reikuaaseve hag̃ua hetave ermanokuérape (Juan 13:35). ¿Mbaʼépa ikatu ere reñepyrũ hag̃ua? Ikatu ere: “Che cheréra fuláno, ¿ha nde?”. Upéi reporandukuaa mbaʼéichapa oikuaa pe añetegua ha  péicha sapyʼaitépe peñemongeta kyreʼỹ ha pejokuaavétama. Jepe ñepyrũrã ikatu nenervióso térã repaʼã paʼã, ani reheja upéva ndejoko, lomímonte reñehaʼã vaʼerã. Upéicha pe ermáno ohechakuaáta reñeinteresaha hese, ha upéva la iñimportantevéva.

¿Mbaʼépa ikatu rejapo reñemongeta hag̃ua umi ermáno ne kongregasionpeguándi? Iporãta peñeʼẽramo umi téma ideprovéchotavare. Ikatu rehechauka reñeinteresaha hese reporandúramo mbaʼéichapa oiko haʼe térã ifamília. Ha oimérõ peñemongeta rreunión rire remombeʼukuaa chupe mbaʼe púntopa ndegusta raʼe upe rreunióngui. Térã reñeʼẽ chupe peteĩ informasión pyahu retopa vaʼekuére umi rrevísta ¡Despertad!, ha Ñemañaháme. Péro ndovaléi rejapo upéva reñembovale ni retantea hag̃ua oleépa raʼe pe rrevísta. Ha oimérõ otokáta ndéve peteĩ asignasión, ikatu peñemongeta upévare, térã reporandu chupe orekótapa asignasión. Ikatu pemombeʼu mbaʼéichapa pepensa pejapo pende párte. Térã ikatu remombeʼu chupe peteĩ experiénsia rereko vaʼekue predikasiónpe.

Jajepyʼapýgui ñande rapicháre sapyʼánte iporãta ñañeʼẽ umi mbaʼe ohasáva térã ojapóvare hikuái. Ha jaikuaaháicha igústo avei jachisteamimi. ¿Mbaʼépa ikatu rejapo akóinte remokyreʼỹ hag̃ua nde rapichápe ne ñeʼẽ rupive? Rehayhu vaʼerã chupekuéra ha esegi umi konsého oĩva la Bíbliape (Prov. 16:27, 28; Efes. 4:25, 29; 5:3, 4; Sant. 1:26).

Japredika hag̃ua hekoitépe katuete jajeprepara vaʼerã. Upéicha avei reñemongeta hag̃ua ne amigokuérandi, tekotevẽ repensáma voi mbaʼérehepa ikatu reñeʼẽ. Oiméne rehendúma ojeʼeha: “Pévango otopa voi la heʼi vaʼerã”. Péicha ojeʼe jepi umi persóna oikuaáva heta mbaʼe ha katuete igústo la heʼíva. Saʼi saʼípe nde avei reguerekokuaa heta mbaʼe iñimportánteva ere hag̃ua. Por ehémplo, ikatu reanota peteĩ mbaʼe igústova, tahaʼe relee térã rehendu vaʼekue rekomparti hag̃ua ótrondi, ha péicha ndereikomoʼãi reñeʼẽ oimeraẽ mbaʼérente. Péro nemanduʼákena siémpre rehechauka vaʼerãha remombaʼeha Ñandejára Ñeʼẽ heʼíva (Sal. 139:17).