KAPÍTULO 35

Ikatúnepa apoi umi drógagui?

NDÉPA rejedroga jepi? Repensápa ndaikatuveimaha repoi chugui? Oiméne reikuaa tuichaiterei rejeperhudikaha, upévare reñehaʼãma reheja, péro koʼág̃a peve ndaikatúi. Oiméramo upéicha, ani nekangy. Oĩ heta opoivaʼekue ko vísiogui, ha nde ikatúta avei. Jahechamína mbaʼépa oipytyvõvaʼekue mbohapy tapichápe oheja hag̃ua umi dróga.

HÉRA Marta

CHEREMBIASAKUE Anasérõ guare che sy oikovaʼekue haʼeño. Upévare che ha che ermána ndaoretúvai. Doce áño guive aháma fiestahápe peteĩ che tia ofarreasetereívandi. Chéngo nacheprovlemaiete voi añemongeta hag̃ua oimeraẽvandi, upéicha rupi pyaʼeterei chejúnta vai. Arekópe 13 áño ajedroga ha atanteáma avei pe cocaína. Ñepyrũrã chegustaitereíkuri, péro upe rire ojehu chéve heta mbaʼe vai. Pór ehémplo aiko aikónte ha ahecha ku oikoramoguáicha umi mbaʼe ivaipa jepéva, akyhyjeterei ha chetarovaite jepi apytávo. Ha ojehasávo chehegui umi dróga efékto, oikéma chéve che akãme ajesuisida. Heta vése ningo añehaʼã aheja, péro ndachepuʼakái hese.

MBAʼÉPA AJAPO AHEJA HAG̃UA Añemoag̃uiségui Ñandejárare aha tupaópe, péro ára ha ára añedeprimive. Ahupytýrõ guare 18 áño aha aiko che chíkondi, upéi aju cheryeguasu péro tiémpo rire rojopoi jey. Chéngo ndaipotáikuri che memby oiko  asy ha upévare akambiase aiko lája. Upe riremínte ou chevisita peteĩ che amíga oikóva che róga rovái, ha che resay che rováre amombeʼu chupe mbaʼéichapa añeñandu. Haʼe heʼi chéve oiko hague chugui testígo de Jehová ha oporandu chéve ndastudiaséipa hendive la Biblia.

Umi mbaʼe aaprendévare ahechakuaa Ñandejárape ndogustaiha aiko lája ha tekotevẽha apoiete dróga ha sigarríllogui. Ijetuʼuetereíkuri chéve, péro che aĩ porãse Jehová renondépe, upévare ajerure joʼa joʼa chupe chepytyvõ hag̃ua (Proverbios 27:11). Astudia meme la Biblia ha aha rreunionhápe, ha seis mése haguépe aheja umi dróga. Koʼág̃a ningo avyʼa ha ndaikovéima añembyasyháre. Amenda peteĩ kuimbaʼe iguenoitereívare haʼéva avei testígo de Jehová, ha oñondive romongakuaa che membýpe. Che pyʼaite guive aagradese Jehovápe cherendu ha chepytyvõ haguére.

HÉRA Marcio

CHEREMBIASAKUE Aikovaʼekue Santo Andrépe, peteĩ táva opytáva Brasílpe. Chemitã guive amonda, apita ha ajedroga, ha mbaʼe voi piko, che sosiokuérango rrovakóche ha nárko meme. Peteĩva pór ehémplo omeʼẽ reínte dróga umi mitãrusúpe, ha oñenvisia rire katu ovende chupekuéra.

Ore várriore manterei okorrémi peteĩ patrulléra. Heta vése aha préso, ha peteĩ vuéltape chegueraha hikuái ojeʼe haguére cherehe avendeha dróga. Pyʼỹinte voi aheja umi mondaha oñongatu che rógape árma ha umi mbaʼe omondavaʼekue.

 Umi héntengo okyhyjepámi vaʼerã chehegui. Ha mbaʼéicha voi piko ndokyhyjemoʼãi; tódo el día aiko cherova arhél, ndachegustái mbaʼeve, ndapukái voi, che resa pytã soʼo ha ahahápente sarambi ajapo. Hiʼarive chekaʼu ha cherekokyʼa. Péro ndavyʼaietevaʼekue, ha che amigokuéra upéichante avei: hetápe ojejuka ha oĩ ohóva préso avei. Chénte voi añedeprimi vaieterei ha úna vuéltape ajejuvymoʼã, añapytĩ peteĩ pióla che ajúrare ha haimete ajesuisida.

MBAʼÉPA AJAPO AHEJA HAG̃UA Ajerure Ñandejárape tachepytyvõ. Upéi aju aikuaa umi testígo de Jehovápe ha añepyrũ astudia hendivekuéra. Aaprende Ñandejára heraha Jehová ha ojepyʼapyha umi iñeʼẽrendúvare chupe (Salmo 83:18; 1 Pedro 5:6, 7). Ahecha avei tekotevẽha akambia hetaiterei mbaʼépe. Pór ehémplo, añehaʼãmbaitevaʼerã cherory ha apukamieve che rapichakuérandi, ha upéva la ijetuʼuvevaʼekue chéve.

Heta añemboʼe Jehovápe ha añehaʼã aiko haʼe oipotaháicha. Upévare ndahavéi afarrea ha ahejaite voi umi che júnta vai. Koʼág̃a ajeheʼa umi ojapóvare Ñandejára heʼíva. Legálmente ijetuʼúkuri chéve akambia, péro nañentregái. Koʼág̃a namondavéi ha ndajapovéima sarambi. Ha ojapóma diez áño rasa ahejaite hague umi dróga.

HÉRA Craig

CHEREMBIASAKUE Chemitãme aikovaʼekue peteĩ estánsiape opytáva Australia Meridionálpe (Súr gotyo). Papa ikaʼuetereivaʼekue,  ha mama ojedeha chugui arekópe ocho áño. Tiémpo rire che sy omenda jey ha aha aiko hendive amboty peve 17 áño. Upéi añepyrũ añapĩ ovecha una partída kuimbaʼéndi ojededikáva upévape, ha opárupi rokorre traváho rekávo. Upérõ añepyrũ ajedroga ha amokõ. Aheja ipuku che akãrague ha amotrensitaʼipa. Enterove chekuaa chearhél, chetieʼỹ ha ndachaʼéigui avavére. Ha ndahaʼéi upévante, heta vése aha kárselpe.

Upe rire che chíkandi rova Australia Occidentálpe (Oéste gotyo). Haʼe ombaʼapo peteĩ hotélpe. Mokõivéva rojedroga, ropita ha roñoty marihuana.

MBAʼÉPA AJAPO AHEJA HAG̃UA Peteĩ árape romonoʼõmba rire ore marihuana, og̃uahẽ mokõi testígo de Jehová ore rógape. Añatende hesekuéra ha  ahendu upe heʼíva, péro ndahaʼéi ku upepete agueroviámava chupekuéra. Che ahechase chejehegui añetépa la Biblia heʼíva, ha ajapo rire upéva ajerovia umi mbaʼe oĩvare ipype. Upémarõ ajedesidi akambia, péro upearã heta añehaʼãvaʼerã, ndahaʼéi ku péicha péichante ahupytýtava upéva.

Ñepyrũrã ahejavaʼerã umi dróga ha ahundivaʼerã pe marihuana añotỹvaʼekue. Hetángo ambaʼapo hese, upévare ahejasemoʼãkuri ótrope, péro upéi ahechakuaa iporãvetaha ahundi. Pyʼỹinte añemboʼe Jehovápe ha ajerure chupe chemombarete hag̃ua. Ha upéva chepytyvõ apoi hag̃ua vevída ha drógagui. Avei ahejapa umi che júnta vai. Ha ajapóvo la Biblia heʼíva, okambia ohóvo che lája. Che chíka avei oñepyrũ ostudia la Biblia ha tuicha okambia. Upe rire romenda, ha upévagui ojapóma 21 áño. Koʼág̃a oreresãive ha rovyʼaiterei romongakuaávo mokõi mitã. Heta vése apensa ha haʼe: “Mbaʼéiko oikovaʼerãmoʼã chehegui Jehová nachepytyvõirire!”.

TÉYSTO OĨVA LA BÍBLIAPE

“[Jehová] chemoʼã ha chemombarete.” (Isaías 12:2)

PETEĨ KONSÉHO

Umi estúdio heʼi jahecha haguénte pe dróga ikatuha oñantoha jey ñandéve. Upévare reñatendevaʼerã ne júntare ha umi lugár rehohápe jepi, ani ág̃a umíva nemomýi rejedroga jey hag̃ua.

REIKUAÁPARAʼE?

Umi dróga tuicha ndeperhudika ne akãme.

UMI MBAʼE AJAPÓTAVA!

Mbaʼépa ajapóta upeichahágui ajedroga jeýrõ? ․․․․․

Mbaʼépa aporanduse che ru térã che sýpe ko témare? ․․․․․

NDÉPA MBAʼE ERE?

● Mbaʼérepa okambiaitevaʼerã oiko lája peteĩ opoiséva drógagui?

● Mbaʼéichapa oipytyvõta chupe ostudiáramo la Biblia ha oñemoag̃uíramo Ñandejárare?

[Komentário oĩva páhina 253-pe]

“Avyʼa aservígui Ñandejárape ha ajapo rupi la Biblia heʼíva”. (Marta)

[Taʼanga oĩva páhina 256-pe]

Reheja jave peteĩ vísio haʼete resẽva rediparahápe peteĩ óga okáivagui: ijetuʼu, péro péicharõmante neremanomoʼãi