KAPÍTULO 10

¿Mbaʼére che amígo ojapo cherehe péicha?

“Kerry ningo che amigaite vaʼekue, ha che káda día ahámi itravahohápe aheka chupe che áutope. Péro upéi añandu haʼetévaicha ojaprovechasénteva cherehe.

Ojupíre pe áutope haʼe oñeʼẽ por teléfono térã omensahea. Núnka ndoagradeséiva chéve agueraha haguére chupe ha ni nachepytyvõvéima apaga hag̃ua la kombustívlere. Hiʼarive ivaívare memeténte oñeʼẽ. Upévare arrenegaiterei chejehe ha apensa chénte chevyraiterei hague aaguanta hag̃ua koʼã mbaʼe.

Peteĩ díape, haʼe porãnte chupe ndaikatumoʼãveimaha aha ipiári. Upe guive haʼe nacherenoivéima ha upépe ahechakuaa siertoha la apensáva hese: oñeamiga cherehe okonveníguinte chupe. ¡Upéva chemoñeñandu vaieterei kuri!” (Nicole).

UMI oñoamigoitévare jepe ikatu oiko upéva. Peteĩ día ndaikatúi oiko ojueheʼỹ, ha al ótro día g̃uarã katu ni noñeʼẽi ojupe. ¿Mbaʼérepa péicha ikatu opa rei peteĩ amista?

 ● Jeremy omombeʼu mbaʼépa oiko peteĩ iñamigoite ovárõ guare 1.600 kilometrohápe chugui: “Oho guive, neʼĩra gueteri ni una ves cherenói, ha upéva hasyeterei chéve”.

● Doris oreko vaʼekue peteĩ iñamigaite 5 áñore, péro upéi ohechakuaa iñamíga idiferenteha. Haʼe heʼi: “Oñeʼẽ lájare ha umi mbaʼe ojapóvare ahechakuaa tuicha okambiaha, ha chepyʼapy upéva. Oñepyrũ oñembohory umi mbaʼe chéve g̃uarã iñimportántevare. Upéi roñemongetárõ guare upe témare, haʼéma katu la ipochýva ha heʼi che chejehénte apensaha ha aperhudikaha chupe”.

● Glóriape katu iñamíga oheja rei ha ni ndeʼíri chupe mbaʼérepa. Haʼe imanduʼa: “Siémpre rojogueraha porãmi, ha heʼi voi chéve che haʼeha peteĩ ermánaicha chupe g̃uarã. Péro upeichaháguinte oñepyrũ oñembotavy chehegui ha oinventa oimeraẽ mbaʼe ponove oñeʼẽ chéve”.

● Laura ha Daniela katu iprovléma peteĩva oipeʼárõ guare pe ótragui inóvio. Laura omombeʼu: “Daniela oikuaa kuri haʼeha che nóvio, upéicharõ jepe órare oñeʼẽ hendive por teléfono. Apyta vaietereíngo, che amigaite chetraisiona ha aperde avei peteĩ persóna ikatúvare kuri amenda”.

 ¿Mbaʼéicha oñepyrũ pe provléma?

Enterovénte ningo jajavy, upévare ikatu ne amígo heʼi térã ojapo álgo nembopochýva. Ha jaʼe porãsérõ g̃uarã, oiméne nde avei rejapóma raʼe peteĩ mbaʼe ombopochýva térã omoñeñandu vaíva ótrope (Eclesiastés 7:22). Lisa heʼi: “Enterovévante voi jajavy. Ha sapyʼánte ñamoñeñandu vai ñane amigokuérape, ndajajaposéiramo jepe upéva”. Oiméramo reguereko algún provlemaʼi ne amígondi, normálmente upéva ikatúta oñesolusiona reñemongetáramo hendive.

Ikatu sapyʼánte peñemomombyry ojuehegui, péro ndahaʼéi katuete peneprovléma rupi. Ikatu oime pepensa kuri pejojoguaitereiha, péro upéi pehechakuaa ndahaʼeiha upéicha. Nemanduʼa vaʼerã nde rekambiaha rehóvo amáske ohasa la tiémpo, ha ne amigokuéra upéichante avei. Péro, ¿mbaʼépa ikatu rejapo rehechakuaáramo ndapejoguerahaporãveiha yma guaréicha?

¿Ikatúpa pejogueraha porã jey?

¿Mbaʼépa rejapóta osoróramo pe ao rehayhuvéva? ¿Remombótapa térã rearregla jey? Odepende, orekóitirõ solusión ha añetehápe rehayhúramo upe nde ao, reñehaʼãta rearregla oimeháicha rei. Upéicha avei ikatu  rejapo neprovléma jave ne amígondi. Sapyʼánte oñembyai ohóvo pe amista, péro rehechakuaáramo vyroreírente peiko vai hague ha añetehápe rehayhúramo upe ne amígope, oimeháicha rei reñehaʼãta resolusiona upe provléma. a

Ñamoĩ chupe ne amígo heʼi térã ojapoha álgo nembopochýva. ¿Mbaʼépa rejapokuaa? Ikatu resolusiona upe provléma resegíramo ko konsého oĩva Salmo 4:4-pe: “Pekirirĩnte vaʼerã, ha peime vove pende rupápe trankílo porã, pejepyʼamongeta la oikóvare”. Upéicharõ, repensa rangue upe persóna ndoikoiha ne amigorã, tekotevẽ reñeporandu: “¿Ojapópa upéva apropósito?”. Oiméramo ndereikuaaporãi ojaposépa raʼe añete upéva, ¿mbaʼérepa nderehejareírinte ha nderesarái la oikóvagui? Ikatu ningo reperdonánte ne amígope rehayhúgui chupe, “pe oporohayhúva siémpre oĩ operdona hag̃uáicha hapichápe” (1 Pedro 4:8).

Péro repensa vaʼerã avei noiméipa nde káusare voi oiko raʼe upe provléma. Por ehémplo, ne amígo omombeʼúrõ ótrope álgo ndereipotáiva ojekuaa, ¿tekotevẽ piko raʼe remombeʼu chupe upéva? Térã ne amígo opukáramo nderehe, ¿ndoikóipa upéva reñeʼẽterei rupi térã ere haguére algún vyrorei? (Proverbios 15:2).  Eñeporandumína: “¿Mbaʼépa ikatu akambia che amígo cherrespetave hag̃ua?”.

“¿Ikatu piko ñañeʼẽmi?”

Péro, ¿mbaʼépa ikatu rejapo ndaikatúiramo rembohasa reínte la oiko vaʼekue? Iporãta reñeʼẽramo ne amígondi pesolusiona hag̃ua upe provléma, péro ani rejapo upéva pochy reheve. La Biblia heʼi porã: “Pe kuimbaʼe ipochy reíva sapyʼaitépe omoñepyrũ umi ñorairõ, péro pe ndaipochyreíriva oipytyvõ oñekalma hag̃ua umi oiko vaíva” (Proverbios 15:18). Upéicharõ, ikuentavéta reñetrankilisa porãnte reñemongeta mboyve ne amígondi.

Reho vove resolusiona hag̃ua upe provléma, nemanduʼa vaʼerã Romanos 12:17-pe heʼívare: “Oĩramo ojapóva ivaíva penderehe ani pejapo hese la mísma kósa”. Upévare reñehaʼã vaʼerã resolusiona upe provléma peiko porã jey hag̃ua (Salmo 34:14). Nesinséro vaʼerã hendive. Reñepyrũ hag̃ua ikatu ere: “Ñande ningo heta tiémporema oñoamígo, ha  ndaigústoi jaiko péicha. ¿Ikatu piko ñañeʼẽmi upe oiko vaʼekuére?”. Reikuaa rire mbaʼérepa oñepyrũ la provléma, ifasilvétama ndéve resolusiona hag̃ua. Ha ne amígo nomombeʼuséiramo jepe ndéve mbaʼépa la oikóva, lomímonte nde reñeñandu porãvéta pórke reñehaʼãma resolusiona hag̃ua la oiko vaʼekue.

La Biblia heʼi voi oĩha “amígo ojapóva ivaíva ojoperhudika hag̃ua”, péro oĩha avei “amígo nderayhuvéva ne ermánogui” (Proverbios 18:24). Añetehápe, umi oñoamigoitéva jepe ikatu sapyʼánte ojoavy. Péro péicha jave reñehaʼãmbaite vaʼerã resolusiona hag̃ua upe provléma ha pesegi hag̃ua peiko oñoamígoramo. Rejapóramo upéicha, rehechaukáta nearandu ha neakãguapyha rehóvo.

RETOPAVÉTA INFORMASIÓN VOLÚMEN 1, KAPÍTULO 8-PE

MBAʼÉPA JAHECHÁTA PE ÓTRO KAPÍTULOPE

Oĩ mitãrusu ha mitãkuña ohasáva hetaiterei tiémpo oipuruhápe Internet omensahea ha oñekomunika hag̃ua. ¿Mbaʼére ogustaite chupekuéra upéva?

[Nóta]

TÉXTO OĨVA LA BÍBLIAPE

“Pejapókena entéro mbaʼe ikatúva peiko hag̃ua pyʼaguapýpe pende rapichakuérandi” (Romanos 12:18).

PETEĨ KONSÉHO

Repensa vai rangue ne amígore, iporãvéta rehendu raẽramo chupe oexplika jave ndéve peteĩ mbaʼe oiko vaʼekue (Proverbios 18:13).

¿REIKUAÁPA RAʼE?

Umi amígo ojorrespeta ha omeʼẽrõ ojupe ilugár, ojogueraha porãta hikuái (Proverbios 25:17). Péro peteĩ persóna ikatu hína ikuerái iñamígo oikóramo ijapére tódo el tiémpo ha ndohejáiramo chupe trankílo.

UMI MBAʼE AJAPÓTAVA

¿Mbaʼépa ikatu haʼe che amígope añemongeta hag̃ua hendive oiméramo ojapo raʼe peteĩ mbaʼe chembopochýva térã chemoñeñandu vaíva? ․․․․․

¿Mbaʼépa ikatu ajapo ajogueraha porã jey hag̃ua che amígondi oiméramo jepe chepochyeterei hendive? ․․․․․

¿Mbaʼépa aporanduse che túa térã che sýpe ko témare? ․․․․․

¿NDÉPA MBAʼE ERE?

● ¿Mbaʼérepa sapyʼánte opa rei peteĩ amista?

● Ñamoĩ chupe peteĩ ne amígo ojapoha peteĩ mbaʼe nemoñeñandu vaíva, ¿mbaʼéicha javépa ikatu rembohasánte la oiko vaʼekue? ¿Ha mbaʼéicha javépa iporãvéta reñemongetáramo hendive?

● Oiméramo neprovléma rakaʼe peteĩ ne amígondi, ¿mbaʼépa ikatu reaprende la oiko vaʼekuégui?

● ¿Mbaʼe mbaʼépa ikatu ereko enkuénta ani hag̃ua peteĩ ne amígo heʼi térã ojapo peteĩ mbaʼe nemoñeñandu vaíva?

[Komentário oĩva páhina 95-pe]

“Ahaʼarõ kuri perfeksión peteĩ che amígogui. Péro koʼág̃a antende jajogueraha porã hag̃ua tekotevẽha ñasolusionakuaa umi provléma oñepresentáva. Ikatúramo añepyrũ jey che amista hendive, nañekonsentramoʼãvéima ideféktore, ajapysaka porãta hese ha aiméta ijykére” (Keenon).

[Taʼanga oĩva páhina 94-pe]

Osorórõ nde ao rehayhuvéva reñehaʼãta resolusiona oimeháicha, upéicha vaʼerã avei neprovléma jave ne amígondi