LA BIBLIA nomombeʼúi arakaʼetépa onasevaʼekue Jesús. Péro, umi mbaʼe omombeʼúvare ikatu jaʼe porã haʼe nonaseihague diciémbrepe.

Jahechami mbaʼeichagua tiémpopa ojeguereko diciembre jave Belénpe, Jesús onasehague. Umi hudío oguereko peteĩ més hérava kislev, hoʼáva noviembre ha diciémbrepe. Upe jave roʼy ha oky mante. Upéi ou pe més hérava tebet, diciembre ha enérope. Ko més hína pe roʼyveha ha sapyʼánte hoʼa niéve umi lugár ijyvateha rupi. Jahechami mbaʼépa omombeʼu la Biblia pe tiémpo ojeguerekóvagui upérupi.

Peteĩ ohaivaʼekue la Biblia, hérava Esdras, ohechauka kislev haʼehague peteĩ més roʼy ha oky mantéva. Heʼi ‘pe més nuevehápe [kislev], veinte día haguépe’, oñembyaty Jerusalénpe peteĩ aty guasu ha ‘oryrýi hikuái [...] okyetereígui’. Umi oñembyatyvaʼekue heʼi pe tiémpore: ‘kóva hína pe tiémpo okyetereiha, ha ndaikatúi ñaime okápe’ (Esdras 10:9, 13; Jeremías 36:22). Upévare, oñemoag̃ui vove diciembre, umi pastór  oikóva upérupi ombyaty ijovechakuéra ani hag̃ua ohasa pyharekue okápe.

Péro la Biblia heʼi pe pyhare Jesús onasérõ guare umi pastór oĩhague ijovechakuéra reheve pe ñúre. Ha Lucas, peteĩ ohaivaʼekue la Biblia, omombeʼu Belén ypýpe oĩhague umi ovecha rerekua ‘oikóva ñúre ha oñangarekóva pyharekue ijovechakuérare’ (Lucas 2:8-12). Koʼápe jahecha umi pastór ndahaʼéi ohónteva arakuépe pe ñúre, síno oiko voi upépe. Oguereko ijovechakuéra pe ñúre pyharekue. Oiméramo Belénpe roʼy ha oky mante diciembre aja, opytátapa oiko hikuái pe ñúme? Katuete ndopytamoʼãi. Upéicharõ, umi mbaʼe oikovaʼekue Jesús onasérõ guare ohechauka haʼe nonaseihague diciémbrepe. *

Ñandejára Ñeʼẽ omombeʼu porã arakaʼetépa Jesús omanovaʼekue, péro ndeʼiguasúi mbaʼeve onasehague áragui. Ko mbaʼe ñanemomanduʼa pe rréi Salomón heʼivaʼekuére: ‘Iporãve peteĩ téra pe aséite porãgui, ha oñemanoha ára oñenaseha áragui’ (Eclesiastés 7:1). Upévare, jahechakuaa mbaʼérepa la Biblia omombeʼu hetaite mbaʼe Jesús ojapovaʼekuégui ha avei iñemanógui, péro saʼieterei omombeʼu inasimiéntogui.