UMI ogueroviáva pe Trinidad, heʼi Ñandejára haʼeha mbohapy persóna: Túva, Taʼýra ha Espíritu Sánto. Heʼi avei koʼã mbohapy persóna haʼeha peteĩcha, ipuʼakapaha ha ndoguerekoihague ñepyrũ. Pe doktrína Trinidad rehegua omboʼe pe Túva haʼeha Ñandejára, pe Taʼýra haʼeha Ñandejára ha pe Espíritu Sánto haʼeha Ñandejára, ha upéicharõ jepe Ñandejára haʼeha peteĩnte.

 Heta umi ogueroviáva pe Trinidad ohechakuaa haʼekuéra ndaikatuiha omyesakã porã ko mbaʼe. Upéicharamo jepe, ikatu oimoʼã hikuái la Biblia omboʼeha. Péro iporã jaʼe pe ñeʼẽ Trinidad ndaiporiha ni peteĩ hendápe la Bíbliape. Upéicharamo jepe, ikatúpa jatopa la Bíbliape peteĩ versíkulo oñeʼẽva pe Trinidad rehe? Ñambohovái hag̃ua ko porandu, jahechamíta peteĩ versíkulo oiporu meméva umi ogueroviáva pe Trinidad.

Juan 1:1-pe heʼi: “Iñepyrũmbýpe upe Ñeʼẽ oĩma vaʼekue ha pe Ñeʼẽ oĩ Ñandejára ndive ha pe Ñeʼẽ Ñandejára voi” (Versión Jesucristo Marandu Porã [JMP]). Upe rire pe kapítulope, pe apóstol Juan ohechauka porã “pe Ñeʼẽ” haʼeha Jesús (Juan 1:14). Heʼihaguére pe teýstope “pe Ñeʼẽ Ñandejára voi”, oĩ heʼíva pe Taʼýra ha Itúva peteĩnteha.

Ñanemanduʼavaʼerã ko pártepe la Biblia ojehaihague griégope ha upe rire oñembohasa ambue ñeʼẽme. Oĩramo jepe umi traduktór omoĩva “pe Ñeʼẽ Ñandejára voi”, oĩ avei umi nomoĩriva upéicha. Mbaʼérepa upéva? Ostudia rupi pe griégo ojeporuvaʼekue, ohechakuaa hikuái pe párte ojetradusíva “pe Ñeʼẽ Ñandejára voi” noĩriha hendápe porã. Jahechami umi ehémplo oĩva: “Pe [Ñeʼẽ] haʼevaʼekue ñandejára rehegua”; “Pe ñeʼẽ haʼevaʼekue peteĩ ñandejára”; “Pe Ñeʼẽ oĩvaʼekue Ñandejára ndive ha haʼevaʼekue ojuehegua” (A New Translation of the Bible; The New Testament in an Improved Version; The Translatorʼs New Testament). Koʼã traduksiónpe jahecha, pe Ñeʼẽ ndahaʼeiha Ñandejára. * Upéva rangue, pe versíkulo ohechauka pe Ñeʼẽ oguerekoha peteĩ posisión ijyvatevéva Jehová raʼykuéra apytépe, ha upévare ojeʼe hese haʼeha peteĩ “ñandejára”. Koʼápe pe título “ñandejára”, ojehai létra michĩvévape, ha heʼise “peteĩ ipoderósova”.

Haimete avave ndoikuaái pe griégo ñeʼẽ ojeporuvaʼekue la Biblia ojehai hag̃ua. Upéicharõ, mbaʼéichapa ikatu jaikuaa  mbaʼépa añetehápe heʼisevaʼekue pe apóstol Juan? Ñapensami ko mbaʼére: peteĩ maéstro omboʼe peteĩ mbaʼe iñalumnokuérape. Upe rire, umi alúmno ontende joavypa pe omboʼéva chupekuéra. Mbaʼépa ikatu ojapo hikuái ontende porã hag̃ua ko mbaʼe? Ikatu ojerure imaéstrope omyesakãve hag̃ua chupekuéra. Upéicharõ ontendevéta hikuái. Upéicha avei, ñantende porã hag̃ua mbaʼépa heʼise Juan 1:1, ikatu jaheka la Bíbliape pe lívro hérava Juan, jaikuaa hag̃ua mbaʼe posisiónpa oguereko Jesús. Jajapóramo upéicha, ñantende porãvéta.

Pór ehémplo, jahechami mbaʼépa Juan ohai avei pe kapítulo 1, versíkulo 18-pe: “Arakaʼeve avave ndohechái [Ñandejárape]”. Péro heta oĩ ohechavaʼekue Jesúspe, pe Ñandejára Raʼy. Upévare Juan heʼi: “Pe Ñeʼẽgui [Jesús] oiko yvypóra, ou vaʼekue ha oiko ñande apytépe” (Juan 1:14, JMP). Upéicharõ, mbaʼéichapa pe Taʼýra haʼe avei peteĩ párte Ñandejára Ipuʼakapávagui? Juan heʼi avei pe Ñeʼẽ oĩhague “Ñandejára ndive”. Péro, mbaʼéichapa ikatúta jaʼe peteĩ persóna oĩha ótro ndive, oiméramo haʼe voi pe ótro? Avei, Juan 17:3-pe, Jesús ohechauka porã vaʼekue mávapa haʼe, ha mávapa Itúva yvagapegua. Haʼe ohenói Itúvape “Ñandejára añetegua peteĩetéva”. Opa mboyvemi pe lívro ohaivaʼekue, Juan omyesakãve ko mbaʼe heʼívo: ‘Koʼãva ojehaivaʼekue peguerovia hag̃ua Jesús haʼeha pe Cristo Ñandejára Raʼy’ (Juan 20:31). Koʼápe jahecha Jesúspe noñehenoiriha Ñandejára, síno Ñandejára Raʼy. Koʼã mbaʼe Juan ohaivaʼekue avei ohechauka mbaʼéichapa oñentendevaʼerã Juan 1:1. Jesús, pe Ñeʼẽ, haʼe peteĩ “ñandejára” oguerekógui peteĩ posisión ijyvatéva, péro ndahaʼéi peteĩcha Ñandejára Ipuʼakapáva ndive.

Ñapensami jey pe maéstro ha umi alúmnore. Ikatu oĩ umi alúmno apytépe nontendepaivaʼekue pe maéstro omyesakãvevaʼekue. Mbaʼépa ikatu ojapove hikuái? Haʼekuéra ikatu oporandu avei ótro maéstrope. Kóva ohechaukáramo chupekuéra pe maéstro omboʼéva oĩ porãha, hetavépema hesakãta pe mbaʼe. Upéicha avei, nañantendeporãiramo pe apóstol Juan ohaivaʼekue Jesús ha Ñandejára Ipuʼakapávagui, ikatu jahecha  mbaʼépa heʼi avei ótro ohaivaʼekue la Biblia. Jahechami mbaʼépa heʼivaʼekue Mateo. Haʼe ohai ko ñeʼẽ Jesús heʼivaʼekue: ‘Upe ára ha upe óragui [ko sistéma jaikoha ñehundígui] avave ndoikuaái, ni umi ánhel oĩva yvágape ni pe Taʼýra, síno pe Túva añónte’ (Mateo 24:36). Mbaʼéichapa koʼápe jahecha porã Jesús ndahaʼeiha pe Ñandejára Ipuʼakapáva?

Jesús heʼi pe Túva oikuaaha hetave mbaʼe pe Taʼýragui. Péro oiméramo Jesús haʼe peteĩ párte Ñandejára Ipuʼakapávagui, oikuaavaʼerã Itúva oikuaáva. Upéicharõ, jahecha pe Taʼýra ha pe Túva ndahaʼeiha peteĩcha. Upéicharõ jepe, ikatu oĩ heʼíva: ‘Jesús haʼevaʼekue: Ñandejára ha yvypóra, ha koʼápe haʼe oñeʼẽ peteĩ yvypóraicha’. Ha upéva añetéramo, mbaʼépa ikatu jaʼe pe espíritu sántogui? Oiméramo pe espíritu haʼe avei párte Ñandejáragui, mbaʼérepa Jesús ndeʼíri pe espíritu oikuaaha pe Túva oikuaáva?

Restudiavévo la Biblia, rehecháta heta hendápe oñeʼẽha ko mbaʼégui. Koʼãva ohechauka porã pe añetegua ñaikotevẽva jaikuaa Túva, Taʼýra, ha espíritu sántogui (Salmo 90:2; Hechos 7:55; Colosenses 1:15).