Ore ermáno rohayhuetéva:

La Biblia omombeʼu heta kuimbaʼe ha kuña oñehaʼã hague ojapo Ñandejára ojeruréva. Haʼekuéra ningo “ñandeichaguánte avei” ha ohasa vaʼekue heta mbaʼe ijetuʼúva (Santiago 5:17). Por ehémplo, oĩ vaʼekue iprovléma hetáva ha ojepyʼapyetereíva. Ótro katu ipochy vaʼekue ha oheja Jehová puévlo oĩgui ofalla vaietereíva hendive. Ha oĩ vaʼekue avei opekáva, ha opensa naipohãveimaha.

Péro, ¿ohejaitépa hikuái Jehovápe ohasa rupi koʼãichagua situasiónre? Nahániri. Haʼekuéra oñeñandu vaʼekue pe salmísta oñeñandu haguéicha, haʼe heʼi vaʼekue Ñandejárape: “Aiko cheaño rei peteĩ ovecha okañy vaʼekuéicha. ¡Ejúna che piári! Che ningo namboykéi ne mandamientokuéra” (Salmo 119:176). ¿Ndépa reñeñandúmava avei upéicha?

Jehová núnka ndahesaráiri umi ovecha oñemomombyry vaʼekuégui, síno haʼe voi oho oheka chupekuéra. ¿Mbaʼéichapa ojapo upéva? Heta vése ojevale isiervokuérare. Ñapensamína Job ehémplore, haʼe ningo heta osufri vaʼekue, omano chugui ifamiliakuéra, operdepa umi mbaʼe orekomíva ha upéi ou hasyete. Avei iñamigokuéra oapoja rangue chupe, omona chupe yvýre. Añetehápe ningo Job noñemomombyrýi vaʼekue Jehovágui, péro peteĩ tiémpore ndahaʼéi kuri la opensa porãmbáva (Job 1:22; 2:10).

¿Mbaʼéichapa Jehová oipytyvõ Jóbpe? Haʼe ojevale isiérvo Elihú rehe. Job omombeʼúrõ guare umi mbaʼe ijetuʼúva ohasa vaʼekue, Elihú ohendu porãnte chupe ha upéi ae oñeʼẽ. ¿Mbaʼépa heʼi raʼe? ¿Okorrehípa Jóbpe omotĩ térã omoñeñandu vai hag̃uáicha chupe? ¿Oapoʼípa raʼe chupe? Nahaniriete, Ñandejára espíritu omomýi Elihúpe heʼi hag̃ua Jóbpe: “Che ningo ndeichaiténte avei Ñandejára renondépe, yvýgui avei ajejapo vaʼekue. Upévare, ndaipotái rekyhyje chehegui Job, la che haʼétava ndéve nanderejamoʼãi yvýre” (Job 33:6, 7). Elihú nomoñeñanduvaíri Jóbpe ojapo haguéicha umi ótro, síno omeʼẽ chupe umi konsého oikotevẽva ha omokyreʼỹ chupe.

Ore ningo roipotaite avei nde nekyreʼỹ jey, upévare roprepara ko folléto nembaʼerã. Elihú ojapo haguéicha, ore rohendu raẽ umi ermáno oñemomombyry vaʼekuépe kongregasióngui ha rojepyʼamongeta isituasionkuérare (Proverbios 18:13). Upéi roñemboʼe ha roanalisa porã umi rreláto oĩva la Bíbliape, ohechaukáva mbaʼéichapa Jehová oipytyvõ vaʼekue isiervokuérape ohasárõ guare umi situasión ijetuʼúva. Upe rire rokompara umi rreláto oĩva la Bíbliape ha umi ermáno koʼag̃agua istória, ha rojapo ko folléto. Roinvita releemi hag̃ua, hiʼãite ningo nepytyvõ reñemoag̃ui jey hag̃ua Jehováre. Ore maitei rory ha mborayhu ndéve g̃uarã.

Kuérpo Governánte de los Testigos de Jehová