LÍNDAPE omoñeñandu vaieterei vaʼekue pe ermána ojapóva hese. ¿Ndépa reñeñandúmava avei upéicha? Ñambyasýramo jepe, oĩ heta oñemomombyrýva Jehovágui oafektaiterei rupi chupe peteĩ ermáno ojapóva. Ha ikatu voi oime upéva hína la oiko vaʼekue nderehe.

La Biblia ningo heʼi jajoayhu vaʼerãha, upévare hasy de ótro voi peteĩ ermáno ofalláramo ñanendive ha ijetuʼu jepi ñaperdona hag̃ua chupe (Juan 13:34, 35). Ikatu voi japyta ñandepyʼaro, pórke nañahaʼarõiete peteĩ ermáno ojapo péicha ñanderehe (Salmo 55:12).

Ñande jaikuaa porã la Biblia voi heʼiha peteĩ ermáno ikatuha sapyʼánte ñanembopochy (Colosenses 3:13). Upéicharamo jepe ijetuʼu jasupera hag̃ua ñaime jave umichagua situasiónpe. Péro jahechamína mbohapy konsého oĩva la Bíbliape ikatúva ñanepytyvõ.

Ñande Ru yvagapegua ohechapaite umi mbaʼe oikóva. Jahasa jave peteĩ inhustísia ha jasufri upéva káusare, ñanemanduʼa vaʼerã Jehovágui nokañyiha mbaʼeve (Hebreos 4:13). Haʼe ningo oñemoĩ ñande lugárpe ha ñanentende jasufri jave (Isaías 63:9). Jehová nopermitimoʼãi umi provléma ha vyʼaʼỹ ni umi ermáno kongregasionpegua ‘ndepeʼa imborayhúgui’ (Romanos 8:35, 38, 39). Upéicharõ, aníkena avei nde reheja mbaʼeve ni avave ndepeʼa Ñandejára mborayhúgui.

Ñaperdona ñane ermánope ndeʼiséi jaaprovaha pe mbaʼe vai ojapóva. Ñaperdonáramo ñande rapichápe ndeʼiséi vyroreiha la ojapo vaʼekue ni jahustifikaha chupe. Jehová núnka ndeʼimoʼãi ojapo porãha peteĩ opeka vaʼekue, péro haʼe operdona isiérvo oñarrepentívape (Salmo 103:12, 13; Habacuc 1:13). Haʼe ningo ndaipochyʼaréi, ha oipota ñande avei jasegi iñehémplo ha ñaperdona ñane ermanokuérape (Salmo 103:9; Mateo 6:14).

Javyʼavéta nañandepyʼaróiramo. ¿Mbaʼérepa jaʼe upéva? Epensamína ko ehémplore, ñamoĩ chupe reipysoha nde jyva ha rejoko nde pópe peteĩ ita ipohýiva 1 kílo. Reiméramo péicha sapyʼaiténte ndaipohyimoʼãi ndéve, ¿ajépa? Péro, ¿mbaʼépa oikóta rejokóramo 15 minúto, 1 óra térã hetave? Katuete ningo ikaneʼõta ndehegui nde jyva. Pe ita ningo osegi opesa 1 kílo, péro amáske ohasa la tiémpo haʼete ipohyivéva. Upeichaite avei oiko ñandepochy aréramo ñande rapichándi, ñepyrũrã ikatu vyroreínte la ñanembopochýva, péro amáske ohasa la tiémpo ha nañanderesaráiri chugui, haʼete hasyvéva ñandéve. Amo ipahápe ñandénte la jajeperhudikátava, upévare Jehová heʼi ñandéve ani hag̃ua ñandepyʼaro (Proverbios 11:17).

¿Mbaʼépa oipytyvõ raʼe Líndape ani hag̃ua opyta ipyʼaro? Haʼe ojepyʼamongeta umi téxto heʼívare mbaʼérepa ñañoperdona vaʼerã (Salmo 130:3, 4). Ha umíva omomanduʼa chupe Jehová ñaneperdonataha ñande voi ñaporoperdonáramo, upéva opokoiterei hese (Efesios 4:32–5:2). Ha upévare heʼi: “Haʼete voi ningo Jehová mbaʼe la oñeʼẽva chéve”.

Kon el tiémpo Linda ipochyjera ha operdona pe ermánape ipyʼaite guive. Koʼág̃a oñoamigaite hikuái. Linda ndaipyʼarói rupi ikatu oservi porã jey Jehovápe. Ha Jehová oipotaiterei avei nde reservi porã jey chupe.