NDAIPÓRI oikóva provlemaʼỹre. Upévare Ñandejára siervokuéra jepe sapyʼánte ojepyʼapy. Por ehémplo, peteĩ salmísta heʼi vaʼekue: ‘Añekevrantaiterei ha ndaikuaavéi mbaʼépa ajapóta’ (Salmo 94:19). Ha Jesús heʼíma vaʼekue voi ijetuʼutaha jaservi hag̃ua Ñandejárape ko tiémpope, oĩ rupi heta mbaʼe ikatúva ñandepyʼapy (Lucas 21:34). Ha nde, ¿rehasápa hína peteĩ provléma ijetuʼúva nde rogapýpe? ¿Ndesoguépa térã nderasykatu? Koʼã mbaʼe ikatu nekevrantaiterei. Péro, ¿mbaʼéichapa Jehová ikatu nepytyvõ?

Ijetuʼúta ningo jagueropuʼaka hag̃ua ñaneaño umi provléma. Péro “pe podér ijojahaʼỹva” oúva Jehovágui ñanepytyvõ ñaaguanta hag̃ua. Apóstol Pablo heʼi vaʼekue: “Umi jehasa asy oremongora opáguio, péro ndaorejopýi ikatuʼỹ hag̃uáicha rokuʼe; ndoroikuaái jepi mbaʼépa rojapóta, péro katuete oĩ peteĩ tape rosẽ hag̃ua. [...] Oĩ orepetéva yvýre, péro noroñehundíri” (2 Corintios 4:7-9). Upéicharõ, Jehová añoite ikatu ñanepytyvõ ñaaguanta hag̃ua opaichagua provléma.

Epensamína, ¿oĩpa raʼe peteĩ diskúrso nemokyreʼỹ ha nepytyvõ vaʼekue rehechakuaa hag̃ua Jehová nderayhuha? ¿Nemanduʼápa mbaʼéichapa imbareteve vaʼekue nde jerovia reñeʼẽ jave nde rapichakuérandi pe esperánsa jarekóvare? Umícha jave oiméne rehechakuaa vaʼekue Jehová nemombareteha “pe podér ijojahaʼỹva” rupive. Pe predikasión ha umi rreunión ningo tuicha ñanembopyʼaguapy ha ñanemombarete ñaaguanta hag̃ua umi mbaʼe ñandepyʼapýva, ha ñanepytyvõ jaservi hag̃ua Jehovápe vyʼápe.

Jehová ningo oipota remotenonde Irréino ha reservi porã chupe (Mateo 6:33; Lucas 13:24). Péro ikatu oime rembaʼapoiterei ha upévare ijetuʼu ndéve reho hag̃ua rreunionhápe. Ikatu avei neprovléma heta nde rogapýpe, nderasykatu térã oĩ oñemoĩva nderehe reservi haguére Ñandejárape, ha upévare reñandu neremeʼẽveimaha. Oiméne repensa ojoʼapamaha ndehegui umi tembiapo ha ndaikatuveimaha rekumplipa, ha ikatu voi repensa Jehová ohaʼarõitereimaha ndehegui.

Péro Jehová ningo nentende ha ndojeruremoʼãi ndehegui peteĩ mbaʼe ikatuʼỹva rejapo. Haʼe oikuaa reikotevẽha tiémpo rejerrekupera porã hag̃ua rehasa jave peteĩ situasión ijetuʼúva ha nemokaneʼõitereíva (Salmo 103:13, 14).

Epensamíntena mbaʼéichapa Jehová okuida vaʼekue Elías rehe. Peteĩ vuéltape, haʼe tuicha oñedesanima vaʼekue ha osẽ oho pe desiértore okyhyjégui ojejukárõ g̃uarã chupe. ¿Mbaʼépa ojapo Jehová? ¿Ojaʼópa chupe ha omanda pyaʼe oho hag̃ua okumpli iñasignasión? Nahániri. Dos vése Jehová omondo peteĩ ánhel omombáy ha omeʼẽ hag̃ua chupe tembiʼu hoʼu vaʼerã. Upéicharõ jepe, 40 día haguépe Elías neʼĩra gueteri ojerrekupera. ¿Mbaʼépa ojapove Jehová hesehápe? Primero, ohechauka orekoha podér oprotehe hag̃ua chupe.  Segundo, oñeʼẽ “pyʼaguapýpe ha mbeguekatu asy” okonsola hag̃ua Elíaspe. Ha tercero, oasegura chupe noĩriha haʼeño, síno oĩha hetaiterei oadoráva avei Ñandejárape hekoitépe. Péicha Elías ikyreʼỹ jey osegi hag̃ua oservi kómo proféta (1 Reyes 19:1-19). ¿Mbaʼépa ikatu reaprende ko ehémplogui? Elías oñandúrõ guare nomeʼẽveimaha, Jehová ipasiénsia ha oiporiahuvereko chupe. Ha Jehová nokambiái, haʼe ningo ojepyʼapy avei nderehe, ojepyʼapy haguéicha Elías rehe.

Aníkena rehaʼarõiterei ndejehegui. Ndaikatumoʼãi voínteko una vépe rejerrekuperaitéma ha reservi jeýma Jehovápe yma guaréicha. Ñamoĩ chupe peteĩ ehémplo, peteĩ ohaʼãva karréra noñentrenavéiramo heta mése térã áñore, ndaikatumoʼãi sapyʼaitépe hete vevýi jeýma yma guaréicha. Upéva rangue mbeguekatúpe ojapo mimi vaʼerã ohóvo umi ehersísio omombarete ha oipytyvõtava chupe pono ikaneʼõmba rei. Ñande avei jajogua umi ohaʼãvape karréra, ñañentrena jahupyty hag̃ua peteĩ prémio (1 Corintios 9:24-27). Upéicharõ, ¿mbaʼépa nde ikatu rejapo koʼág̃a remombarete jey hag̃ua nde jerovia? Por ehémplo, ikatu reho peteĩ rreuniónpe. Ejerurékena Jehovápe tanepytyvõ upearã. Amáske nembarete jey rehóvo, rehechakuaáta “mbaʼeichaitépa Jehová ivuéno” (Salmo 34:8). Nemanduʼa vaʼerã Jehová omombaʼetereiha oimeraẽ mbaʼe rejapóva rehechauka hag̃ua rehayhuha chupe (Lucas 21:1-4).

¿Mbaʼéichapa Jehová oipytyvõ Júnepe, pe ermána oñemensionáva oñepyrũvo ko artíkulo? Haʼe heʼi: “Añemboʼe meme Jehovápe ha ajerure chupe tachepytyvõ. Upéi, che nuéra omombeʼu chéve oikotaha peteĩ asambléa pe lugár aikohápe. Upémarõ adesidi ahataha. ¡Igustoiterei chéve aime jey Jehová puévlondi! Haʼetépe ningo aha, upépe arresivi pe aikotevẽ vaʼekue aservi jey hag̃ua Jehovápe. Koʼág̃a avyʼaiteve. Aaprende ndaikatumoʼãiha agueropuʼaka cheaño umi provléma ha ndovaleiha añemomombyry ermanokuéragui. Avyʼaiterei aju jey haguére Jehová organisasiónpe, tardeterei mboyve”.