Jehová oiporavo Jeremíaspe oservi hag̃ua chupe kómo proféta Judápe. Jehová heʼi chupe opredika hag̃ua umi hénte oikóvape upépe ha oavisa hag̃ua chupekuéra oheja vaʼerãha umi mbaʼe vai ojapóva. Péro Jeremías heʼi Jehovápe: “Che ningo chemitãiterei gueteri ha nañeʼẽkuaái heta hénte renondépe”. Jehová katu heʼi chupe: “Ani rekyhyje, che roipytyvõta ha haʼéta ndéve umi mbaʼe erétava chupekuéra”.

Jehová heʼi Jeremíaspe ombyatypaite hag̃ua umi kuimbaʼe omanda guasúvape Judápe ha ojoka hag̃ua henondepekuéra peteĩ kambuchi ha heʼi hag̃ua chupekuéra: “Peichaite oikóta Jerusalén rehe”. Umi kuimbaʼépe ndogustaieterei la Jeremías ojapóva. Peteĩ saserdóte hérava Pasjur ombyepoti Jeremíaspe ha upéi ojopy chugui ipy ha ipo peteĩ távla kuápe ha tóda la nóche Jeremías ndaikatúi ni okuʼe upépe. Al día sigiénte, pyhareve Pasjur opoi jey chugui. Upéi Jeremías heʼi: “Naaguantavéima, ndapredikavéima koʼã héntepe”. ¿Péro ojapópa raʼe upéva? Nahániri. Jeremías ojepyʼamongeta porã ha upéi heʼi: “Pe mensáhe Jehová omeʼẽ vaʼekue chéve haʼete peteĩ tatarendy oĩva che retepýpe. Mbaʼéicha piko namombeʼumoʼãvéi umi héntepe upe mensáhe”. Upémarõ Jeremías osẽ jey opredika.

Ohasa rire heta tiémpo, ojupi ótro rréi ogoverna hag̃ua Judá. Umi saserdóte ha umi proféta japúpe ndogustaieterei la Jeremías opredikáva, upévare heʼi umi prínsipe oĩvape Judápe: “Ko kuimbaʼe ojejuka vaʼerã”. Jeremías heʼi: “Chejukáramo, pejukáta hína peteĩ kuimbaʼe inoséntepe. Che ningo amombeʼúnte Jehová heʼíva chéve, ndahaʼéi chéve oñantohávante”. Umi prínsipe ohendu rire Jeremíaspe, heʼi: “Ndovaléi ojejuka ko kuimbaʼépe”.

Jeremías osegi opredika, péro ko vuéltape ndogustái umi prínsipepe la  heʼíva, upévare ojerure hikuái pe rréipe ojejuka hag̃ua Jeremíaspe. Pe rréi heʼi chupekuéra ojapo hag̃ua ojaposéva Jeremíasgui. Upémarõ ojagarra hikuái Jeremíaspe ha opoi chupe peteĩ póso pypukúpe omano hag̃ua, pe póso tujúnte oreko, ha mbeguekatúpe Jeremías oike ohóvo pe tujúpe.

Upéi peteĩ ofisiál palasiopegua hérava Ébed-Mélec heʼi pe rréipe: “Umi prínsipe opoi Jeremíaspe peteĩ pósope ha omanóta hína jahejáramo chupe upépe”. Upémarõ pe rréi heʼi Ébed-Mélecpe ogueraha hag̃ua hendive 30 kuimbaʼépe onohẽ hag̃ua hikuái Jeremíaspe pe pósogui. Jeremías ohasáramo jepe koʼã mbaʼe, osegi opredika. ¿Nderejoguaséipa chupe?