Jesús oiporavo rire umi 12 apóstolpe, oguejy oúvo pe sérrogui ha otopa upépe ijatyha hína hetaiterei hénte. Umi hénte ou Galiléagui, Judea, Tiro, Sidón, Siria ha avei umi lugár oĩvagui jakrusávo rrío Jordán. Upépe ojegueru Jesúspe umi hasýva ha umi endemoniádo ha haʼe omonguera chupekuéra. Upéi Jesús oguapy pe sérrope ha oñepyrũ oñeʼẽ umi héntepe. Haʼe oexplika chupekuéra mbaʼépa jajapo vaʼerã jaikoséramo Ñandejára amígoramo. Heʼi chupekuéra iñimportanteha jahechakuaa ñaikotevẽha Ñandejárare ha jahayhu chupe. Jesús heʼi avei chupekuéra ndajahayhúiramo ñande rapichakuérape ndaikatumoʼãiha jahayhu Ñandejárape, ha ñandevuéno ha ñandehústo vaʼerãha enterovévandi, ñane enemigokuérandi jepe.

Jesús heʼi vaʼekue: “Ani rehayhu umi ne amígopente, síno rehayhu vaʼerã avei umi ne enemígope ha eperdona nde rapichakuérape nde pyʼaite guive. Ha oĩramo ipochýva nendive, ensegída eho vaʼerã ejerure chupe taneperdona. Etrata vaʼerã nde rapichakuérape reipotaháicha haʼekuéra ndetrata ndéve”.

 Jesús heʼi avei umi héntepe mbaʼéichapa ohecha vaʼerã pe pláta ha umi mbaʼerepy. Haʼe heʼi vaʼekue: “Iñimportanteve reiko Ñandejára amígoramo, rereko rangue heta mbaʼerepy. Pórke peteĩ mondaha ikatu orahapa ndehegui pe pláta, péro avave ndaikatúi oipeʼa ndehegui ne amista Jehovándi. Upévare anive rejepyʼapy reikuaaségui mbaʼépa rekarúta, mbaʼépa remboyʼúta térã mbaʼépa remondéta. Emañamíntena umi guyraʼíre, mbaʼéichapa Ñandejára siémpre okuida hesekuéra ani hag̃ua ofalta chupekuéra hoʼu vaʼerã. Rejepyʼapy haguérente ndereikovemoʼãi hetave tiémpo. Siémpre nemanduʼa vaʼerã Jehová oikuaaha voi mbaʼépa reikotevẽ”.

Umi hénte oponderaiterei pórke núnka nohendúiva peteĩ persóna oñeʼẽva Jesús oñeʼẽháicha. Umi fariséo ha umi mboʼehára leipegua nomboʼéi chupekuéra umi mbaʼe Jesús omboʼéva. ¿Mbaʼéicha rupípa Jesús ikatupyryete vaʼekue oporomboʼe hag̃ua? Pórke entéro umi mbaʼe haʼe omboʼéva oaprende vaʼekue Jehovágui.