Isaac oreko vaʼekue 40 áño omendárõ guare Rebécare. Isaac ohayhueterei vaʼekue hembirekópe. Haʼekuéra oreko vaʼekue mokõi mitãkuimbaʼe mellíso.

Pe onase raẽ vaʼekue héra Esaú ha pe ótro katu Jacob. Esaú omarikakuaa vaʼekue upévare ovyʼa umi kaʼaguýre. Jacob katu opytave hógape.

Upe tiémpope, pe taʼýra ypykuépe opyta vaʼekue hetave yvy ha pláta itúa omano rire. Upévape oñehenói erénsia. Péro ndahaʼéi upéva añónte pe erénsia Isaac oreko vaʼekue ifamíliape g̃uarã. Síno itaʼýra ypykue rupive oñekumplíta avei umi promésa Ñandejára ojapo vaʼekue Abrahánpe. Esaúpe nointeresái vaʼekue Ñandejára promesakuéra. Péro Jacóbpe g̃uarã iñimportanteterei vaʼekue umíva.

Peteĩ día Esaú ikaneʼõiterei og̃uahẽvo hógape pórke omarika hína kuri tódo el día. Upéi ohetũ pe tembiʼu Jacob ojapóva hína ha heʼi chupe: “¡Amanoʼíntema vareʼágui! ¡Chekonvidána ikatúramo pe gíso pytã asy rejapóva!”. Jacob heʼi chupe: “Akambiáta ndéve pe erénsia otokávare ndéve enase haguére primero”. Ha Esaú heʼi chupe: “¡Chéngo ndaikuaaséi mbaʼeve upévagui! Opyta ndéve la che erénsia. Chéngo pe ne rembiʼúntema la haʼuséva”. ¿Ndépa ere oĩ porã hague la Esaú ojapóva? Peteĩ pláto tembiʼúre haʼe okambia kuri pe erénsia porãite otokáva chupe.

 Peteĩ día, Isaac ituja riréma, ohenoika itaʼýra ypykuépe ovendesi hag̃ua chupe omano mboyve. Péro Rebeca oipytyvõ Jacóbpe ikatu hag̃uáicha itúa ovendesi chupe Esaúpe rangue. Esaú oikuaávo la oikóva, ipochyeterei ha oñepyrũ okalkula mbaʼéichapa ikatu ojuka iñermánope. Isaac ha Rebeca ojepyʼapy Jacob rehe, upévare haʼekuéra heʼi chupe: “Eho ekañy nde tio Labán rógape ha epyta eiko hendive peteĩ tiémpore oñetrankilisa peve ne ermáno”. Jacob ojapo la isy ha itúa heʼíva chupe ha oho hógagui pono iñermáno ojuka chupe.