Moisés oiko vaʼekue Madiánpe 40 áñore. Upépe haʼe omenda ha ifamília. Peteĩ día, okuida jave ijovechakuérare mónte Sinaí ypýpe, ohecha peteĩ mbaʼe osorprendéva chupe. Peteĩ jukeri máta hendy péro ndokáiri. Moisés oñemoag̃ui upépe ohecha hag̃ua mbaʼépa la oikóva ha ohendu sapyʼa peteĩ vos heʼíva chupe: “¡Moisés! Pepevéntema eñemboja. Eipeʼa ne sandália, pórke sagrádo hína ko lugár repyrũha”. ¿Mávapa pe oñeʼẽva chupe? Jehová hína pe oñeʼẽva chupe peteĩ ánhel rupive.

Moisés okyhyjeterei ha omoʼã la hova. Upéi pe vos heʼi jey chupe: “Ahecha mbaʼeichaite pevépa ohasa asy che puévlo oĩva Egíptope. Che asalváta chupekuéra umi egipcio poguýgui ha araháta chupekuéra peteĩ yvy iporãvape. Ha aipota nde reguenohẽ chupekuéra upégui”. ¿Mbaʼéichapa nde ere oñeñandúne hague Moisés ohendúvo upéva?

Moisés oporandu: “¿Ha mbaʼe haʼéta chupekuéra oporandúramo chéve hikuái mávapa chemondo?”. Ñandejára heʼi chupe: “Ere chupekuéra Jehová, haʼéva Abrahán, Isaac ha Jacob Jára nemondoha hendapekuéra”. Ha Moisés oporandu jey chupe: “¿Ha ndacheroviáiramo hikuái?”. Upémarõ Jehová omeʼẽ chupe peteĩ pruéva oasegura hag̃ua chupe oĩtaha hendive. Heʼi Moiséspe oity hag̃ua yvýpe ivastón ha Moisés ojapóvo upéva, pe vastóngui oiko peteĩ mbói. Upéi Moisés ojagarra pe mbóipe huguáigui ha oiko jey chugui peteĩ vastón. Ha Jehová heʼi chupe: “Rejapo vove ko milágro, enterove ohechakuaáta che romondo hague”.

Péro Moisés heʼi: “Chéngo ndahaʼéi la añeʼẽkuaaitereíva heta hénte renondépe”. Upémarõ Jehová opromete chupe: “Che haʼéta ndéve mbaʼépa ere vaʼerã ha avei amondóta ne ermáno Aarónpe nepytyvõ hag̃ua”. Oikuaámarõ Jehová oipytyvõtaha chupe, Moisés oho jey Egíptope ha oraha hendive hembireko ha ifamiliakuérape.