Oleévape g̃uarã:

“Eju chemoirũ” (Marcos 10:21). Péicha Jesús ojerure entéro yvypórape omoirũ hag̃ua chupe. ¿Reñehaʼãpa hína rejapo upéva? Oimérõ upéicha, katuete rehupytýta heta mbaʼe porã. ¿Mbaʼérepa ikatu jaʼe upéva?

Jehová ningo ombou vaʼekue ko yvy ape ári Itaʼýra peteĩete omano hag̃ua ñanderehehápe (Juan 3:16). Péro Jesús ndojapói upévante, haʼe ñanemboʼe avei mbaʼéichapa jaiko vaʼerã. Umi mbaʼe ojapóvare ohechauka iñeʼẽrenduha Ñandejárape ha ombovyʼaseha chupe. Jesús ñanemboʼe avei ñahaʼanga hag̃ua Itúape. Opa mbaʼe heʼíva ha ojapóvare ohechauka mbaʼeichaguápa Jehová ha mbaʼépa hembipota ñandéve g̃uarã (Juan 14:9).

La Biblia heʼi Jesús haʼeha ñane ehémplo ha ‘jaguata vaʼerãha ipyporére’ (1 Pedro 2:21, nóta). Oiméramo jaiko porãse Jehovándi, javyʼase ha jaikose opa ára g̃uarã, ñañehaʼãmbaite vaʼerã jaguata Jesús pyporére.

Upearã tekotevẽ jaikuaa porã mbaʼépa ojapo vaʼekue oĩrõ guare ko yvy ape ári. Ñandejára Ñeʼẽ omombeʼu porãiterei Jesús rekovekue. Iporãta upéicharõ ñahesaʼỹijo ha jajepyʼamongetáramo umi mbaʼére jahecha hag̃ua mbaʼéichapa ikatu ñahaʼanga chupe. Péicha jaikuaáta mbaʼéichapa ñamoirũ vaʼerã Jesucrístope.

Roipotaite ningo ko lívro nepytyvõ rehayhuve hag̃ua Jesús ha Jehovápe. Upéicha kyreʼỹme reguatáta Cristo pyporére ha rembovyʼáta Jehovápe koʼág̃a voi ha pára siémpre.