1-4. a) ¿Mbaʼe mbaʼe rehepa ojevale Jesús opredika hag̃ua peteĩ kuña Samariaguápe, ha mbaʼépa ohupyty upe haguére? b) ¿Mbaʼépa ojapo umi apóstol ohendúvo chupe?

 JESÚS ha ijapostolkuéra osẽ oho Judéagui opredika hag̃ua Galiléape, nórte gotyo. Haʼekuéra oho pe ipyaʼevehárupi, upéicharamo jepe oguata vaʼerã 3 día. Órare oguata rire, pe asaje potávo og̃uahẽ hikuái peteĩ siudápe hérava Sicar, oĩva Samáriape. Ha upépe opyta opytuʼu.

² Ijapostolkuéra oho aja ojogua tembiʼurã Jesús opyta opytuʼu peteĩ póso ypýpe oĩva oñesẽnguévo pe siudágui. Upe jave ou avei peteĩ kuña oguenohẽ hag̃ua y. Jesús ikaneʼõiterei ha oime vaʼerã noñeʼẽséi, péro oñembotavýnte rangue chugui oñepyrũ oñemongeta hendive (Juan 4:6). Kapítulo 4-pe jahecha haguéicha, pe kuña Samariagua opensáne raʼe Jesús oapoʼitaha chupe umi ótro judío ojapoháicha.

³ Jesús oñemongeta hendive ha oipuru peteĩ ehémplo pe kuña oikuaa porãva ojapo rupi ára ha ára. Heʼi chupe oĩha y oporomoingovéva ha hoyʼúramo chugui ndaijuhemoʼãveimaha. Oñemongeta aja pukukue pe kuña heʼi jepi Jesúspe heta mbaʼe ojodiskuti hag̃uáicha hikuái. a Péro Jesús ndoikovaíri hendive, upéva rangue  omombeʼu chupe mbaʼéichapa oñemombaʼeguasu vaʼerã Jehovápe. Pe kuña ohechakuaa iporãitereiha koʼã mbaʼe ohendúva, ha omombeʼu avei umi kuimbaʼe ivalleguápe, upéicha rupi haʼekuéra ohenduse avei Jesúspe (Juan 4:3-42).

⁴ Jesús opredika porãiterei pe kuñáme. ¿Mbaʼépa ojapo umi apóstol ohendúvo chupe? Ndoúi ni ndohói chupekuéra. Oikuaase voi katu mbaʼéicha rupípa Jesús oñeʼẽ hína hendive, ha hiʼarive ni noñeʼẽi hikuái pe kuñáme. Oho rire pe kuña haʼekuéra heʼi Jesúspe okarúma hag̃ua. Péro haʼe heʼi: “Che areko voi la haʼu vaʼerã, péro peẽ ndapeikuaái mbaʼépa upéva”. Opyta nontendéi hikuái, upévare heʼi jey chupekuéra: “Che rembiʼu hína kóva: ajapo upe chembou vaʼekue volunta, ha atermina pe traváho haʼe omeʼẽ vaʼekue chéve” (Juan 4:32, 34). Upéicha Jesús omboʼe chupekuéra itraváho iñimportanteveha hiʼupýgui, ha oipota avei haʼekuéra opensa upéicha. ¿Mbaʼe traváhopa upéva?

5. ¿Mbaʼe traváhopa Jesús heʼi ojapo vaʼerãha, ha mbaʼépa ñahesaʼỹijóta ko kapítulope?

⁵ Peteĩ jey Jesús heʼi: “Aha vaʼerã ótro siudápe apredika hag̃ua umi notísia porã oñeʼẽva Ñandejára Rréinore, pórke upearã Ñandejára chembou vaʼekue” (Lucas 4:43). Jesús ou opredika ha omboʼe hag̃ua umi notísia porã. b Upévare ñande ñamoirũva chupe jajapo vaʼerã upe traváho. Ha tuicha ñanepytyvõta jaikuaáramo mbaʼépa omomýi chupe, mbaʼépa opredika ha mbaʼéichapa haʼe ojapo upe traváho. Koʼã mbaʼe ñahesaʼỹijóta ko kapítulope.

6, 7. ¿Mbaʼépepa heʼi Jesús ojoguaha peteĩ “mboʼehára oaprendéva mbaʼépa pe Rréino yvagapegua”? ¿Mbaʼe ehémplopa omyesakãve upéva?

⁶ Ñepyrũrã ñahesaʼỹijóta mbaʼépa Jesús opensa umi mbaʼe omboʼévare, ha upe rire mbaʼéichapa otrata umi hénte omboʼévape. Haʼe omombeʼu peteĩ ehémplo ohechauka hag̃ua mbaʼeichaitépa omombaʼe hembiapo ha opa mbaʼe Itúa omboʼe vaʼekue chupe. Upévare heʼi: “Entéro mboʼehára oaprendéva mbaʼépa pe Rréino yvagapegua, ojogua peteĩ ogajárape, onohẽva itesóro apytégui umi mbaʼe ipyahúva ha itujáva” (Mateo 13:52).

⁷ Pe ogajára noguenohẽi itesóro ojechauka hag̃ua. Rréi Ezequías ojapo vaʼekue upéicha ha upe rire mombyry operde (2 Reyes 20:13-20). ¿Maʼerã piko upéicharõ oguenohẽ raʼe? Ñapensamína peteĩ ehémplore hesakã porãve hag̃ua ñandéve. Ñamoĩ chupe rehoha revisita peteĩ ne mboʼehára rehayhúvape, ha haʼe ohechauka ndéve mokõi kárta oñongatúva ijeskritóriope. Peteĩva saʼyjupáma tujágui ha pe ótro ipyahumie gueteri, mokõive ombou chupe itúa. Pe itujavéva aretereíma oskrivi hague chupe, haʼe imitãʼi tiémpope, ha pe ótro ndaʼaredemái. Hesa ningo omimbipa omombeʼu jave ndéve mbaʼeichaitépa ohayhu umi kárta ha mbaʼeichaitépa oipytyvõ chupe okambia hag̃ua umi konsého oĩva ipype. Chupe g̃uarã ningo iñimportanteterei umi kárta (Lucas 6:45). Ha ohechauka ndéve ikatu hag̃uáicha remombaʼe ha nepytyvõ, ndahaʼéi ojechaukaségui reínte.

8. ¿Mbaʼéichapa ñande jahecha umi mbaʼe ñaaprendéva Ñandejára Ñeʼẽgui?

⁸ Pe Mboʼehára Guasu omombaʼeterei avei umi mbaʼe omboʼe vaʼekue, ombojoja voi tesórore. Ohayhu ha omombeʼuseterei  voi opavavépe, avei oipota idisipulokuéra, térã umi “mboʼehára oaprendéva mbaʼépa pe Rréino yvagapegua”, oñeñandu haʼéicha. Ha ñande, ¿ñañeñandúpa avei upéicha? Tove jepe aréma térã ramónte ñaaprende hague umi mbaʼe porãite, ñandéve g̃uarã haʼete peteĩ tesóro ha ñamombaʼeterei. Jesús ojapo haguéicha, akóinte jahayhu vaʼerã umi mbaʼe porãite asy Jehová ñanemboʼe vaʼekue ha ñamombeʼu ñande rapichakuérape ikatu hag̃uáicha omombaʼe avei hikuái.

9. a) ¿Mbaʼéichapa Jesús otrata umi hénte omboʼévape? b) ¿Mbaʼéichapa ñande ikatu jasegi iñehémplo?

⁹ Jesús ohayhu avei umi hénte omboʼévape. Upéva ñahesaʼỹijo porãvéta párte 3-pe. La Biblia heʼíma vaʼekue pe Mesías ‘oiporiahuverekotaha umi hénte umíldepe ha umi imboriahúvape’ (Salmo 72:13). Haʼe ojepyʼapy añete hesekuéra, ontende umi mbaʼe opensáva ha oikuaa mbaʼépa ojopy chupekuéra, avei mbaʼéicha rupípa noñemoag̃uíri hikuái Ñandejárare (Mateo 11:28; 16:13; 23:13, 15). Ñañeʼẽmi jeýna pe kuña Samariaguáre. Oiméne ningo opoko raʼe ikorasõre ohechávo mbaʼéichapa Jesús ontende chupe. Upévare heʼi hese profetaha ha omombeʼu ótrope umi mbaʼe heʼi vaʼekue chupe (Juan 4:16-19, 39). Ñande ningo ndajaikuaái mbaʼépa oĩ ñande rapicha korasõme japredika jave chupekuéra. Upéicharamo jepe ikatu jasegi Jesús ehémplo jahechaukávo jajepyʼapyha hesekuéra ha jaʼévo umi mbaʼe ombopyʼaguapýtava chupekuéra ha oipytyvõtava ogueropuʼaka hag̃ua hemimbyasy.

10, 11. a) ¿Mbaʼeichagua notísiapa omombeʼu vaʼekue Jesús? b) ¿Mbaʼe mbaʼépa omyatyrõta Jehová Irréino rupive?

¹⁰ ¿Mbaʼeichagua notísiapa omombeʼu vaʼekue Jesús?  Heta rrelihión heʼíva osegiha Jesúspe, omboʼe haʼe oipytyvõ hague umi héntepe osolusiona hag̃ua iprovlemakuéra, okambia hag̃ua polítika térã ohechaukánte hag̃ua mbaʼéichapa káda uno ikatu jajesalva. Péro jahecháma haguéicha haʼe opredika “umi notísia porã oñeʼẽva Ñandejára Rréinore”. ¿Mbaʼépa heʼise upéva?

¹¹ Jesús oĩ vaʼekue yvágape Satanás otaky ñepyrũrõ guare Jehová goviérnore ha omongyʼárõ guare héra porãite. Hasýne raʼe chupe ojeʼe Itúare nogovernaporãiha ni ndoipotaiha umi oĩva ipoguýpe ovyʼa. Avei ombyasyeténe raʼe Adán ha Eva opena haguére Satanás rehe. Jesús ohecha umi mbaʼe oiko vaʼekue ogueraha vai hague yvyporakuérape, upéicha rupi opeka ha omano hikuái (Romanos 5:12). Péro ombovyʼa jey chupe oikuaávo Itúa omyatyrõmbaitetaha umi mbaʼe Irréino rupive.

12, 13. ¿Mbaʼe mbaʼépa tekotevẽ omyatyrõ Ñandejára Rréino? ¿Mbaʼéichapa Jesús ohechauka omotenonde hague Ñandejára Rréino?

¹² ¿Mbaʼe raẽpa tekotevẽ omyatyrõ Ñandejára Rréino? Satanás ha iñirũnguéra heta ijapu omongyʼa hag̃ua Jehová réra heʼívo nogovernaporãiha ha ndorekoiha voi upe derécho. Upéicha rupi tekotevẽ oñemopotĩ ha opavave ohecha vaʼerã Jehová ogoverna porãha. Jesús ontende porãiteve koʼã mbaʼe opavave yvypóragui ha upéicha rupi ohechauka idisipulokuérape mbaʼéichapa oñemboʼe vaʼerã. Haʼe heʼi ojerure vaʼerãha primero toñembotuicha térã toñesantifika Itúa réra, segundo togueru Irréino ha tercero tojejapo ivolunta ko yvy ape ári (Mateo 6:9, 10). Cristo ningo omoakã Ñandejára Rréino, ha koʼẽrõitéma ohundíta Satanás múndo aña ha ohechaukáta opa ára g̃uarã Jehová ogoverna porãha (Daniel 2:44).

¹³ Jesús oĩ aja ko yvy ape ári opredika vaʼekue Ñandejára Rréino. Opa mbaʼe heʼíva ha ojapóva ohechauka mbaʼéichapa  oñekumplíta Jehová volunta. Haʼe ndohejái mbaʼeve ohesarea chupe ko tembiapógui. Upe tiémpope oĩ vaʼekue heta provléma ha inhustísia, upéicharamo jepe Jesús ndohejái umíva ojoko chupe. Avei ndahaʼéi upe haguére ifanátikova térã omboʼe kaigue vaíva umi héntepe.

14, 15. a) ¿Mbaʼéichapa Jesús ohechauka ‘iñimportanteveha Salomóngui’? b) ¿Mbaʼéichapa ikatu jasegi Jesús ehémplo?

¹⁴ Jesús oporomboʼe porãiterei vaʼekue ha opavavénte ohenduse chupe, omboʼe lája opoko umi hénte korasõre. Salomón avei omboʼe vaʼekue upéicha, oñehaʼã oheka umi ñeʼẽ iporãvéva oskrivi hag̃ua umi mbaʼe Ñandejára omyesakãva chupe (Eclesiastés 12:10). Jehová omoarandu ko kuimbaʼe imperféktope oñemoñeʼẽkuaa hag̃ua heta mbaʼére, por ehémplo plánta ha mymbáre. Umi hénte ningo mombyrýgui ou ohendu hag̃ua chupe (1 Reyes 4:29-34). Upéicharamo jepe ñanemanduʼa vaʼerã Jesús ‘iñimportanteveha Salomóngui’ (Mateo 12:42). Oporomboʼe jave oipuru hetaiterei mbaʼe oikuaáva Ñandejára Ñeʼẽgui, avei oñeʼẽ mymbáre, pe árare, kógare, umi mbaʼe iñimportánteva oikóvare upe tiémpope, oikóvare ymave ha yvypóra oiko lájare. Péro haʼe ndaijejapói oikuaaiterei haguére ni ndoipurúi upéva ojechauka hag̃ua. Umi mbaʼe omboʼe vaʼekue hesakã porãiterei ha ndahasýi oñentende hag̃ua. Ndareíri ningo umi hénte ohenduseterei voi chupe (Marcos 12:37; Lucas 19:48).

¹⁵ Koʼã tiémpope ñande Jesús disípulo ñañehaʼã avei jasegi iñehémplo. Ha jepe nañanearandúi haʼéicha ikatu jaipuru umi mbaʼe jahasáva ñaporomboʼe hag̃ua Ñandejára Ñeʼẽ. Por ehémplo tuakuéra ojevalekuaa ohasa vaʼekuére omongakuaávo ifamíliape omboʼe hag̃ua mbaʼeichaitépa Jehová ohayhu itaʼyrakuérape. Avei ikatu jaipuru kómo ehémplo umi mbaʼe jahasáva ñande travahohápe térã eskuélape, umi hénte oiko lája térã oikóva ñande  jerére. Péro upéicha avei ndovaléi ñañeʼẽterei koʼã mbaʼére ani hag̃ua opyta tapykuépe umi notísia porã (1 Timoteo 4:16).

16, 17. a) ¿Mbaʼéichapa Jesús ohecha vaʼekue hembiapo? b) ¿Mbaʼéichapa ohechauka omotenondeveha hembiapo opa mbaʼégui?

¹⁶ Jesús omombaʼeterei vaʼekue hembiapo, ombojoja voi tesórore. Ombopyʼarory chupe omboʼévo umi héntepe mbaʼeichaguápa Itúa, ha ndoikói ijapu térã heʼi hapichakuéra ohendusévante, umi ótro ojapoháicha. Ovyʼa oipytyvõ haguére umi héntepe oñemoag̃ui hag̃ua Ñandejárare ha ojerovia mbarete hag̃ua pe jeikove opaveʼỹvare. Avei ovyʼa omombeʼúvo umi notísia porã omokyreʼỹ ha ombopyʼaguapýva hetápe. Jahechamína mbohapy mbaʼe ohechaukáva Jesús omombaʼeterei hague hembiapo.

¹⁷ Primero, omotenonde pe tembiapo Ñandejára omeʼẽ vaʼekue chupe. Jesús omombeʼu vaʼekue umi mbaʼe ojapótava Ñandejára Rréino, haʼe omombaʼeterei upe tembiapo. Upéicha rupi ovyʼa vaʼekue oguerekomívare, jahecháma haguéicha kapítulo 5-pe. Haʼe ojapo opa mbaʼe omboʼéva ha ojesareko umi mbaʼe iñimportantevévare, ndoikói ojogua mbaʼeve upe rire tekotevẽtava omantene, omyatyrõ térã okambia. Oiko oguerekomívarente ani hag̃ua mbaʼeve ohesarea chupe hembiapógui (Mateo 6:22; 8:20).

18. ¿Mbaʼéichapa Jesús ohechauka ojapo hague ikatúva guive ojapo porã hag̃ua hembiapo?

¹⁸ Segundo, ojapo ikatúva guive osẽ porã hag̃ua chupe hembiapo. Jesús oipurupaite imbaretekue ha oguata Palestina tuichakuére ohekávo umi ohendu porãvape umi notísia porã. Oñeʼẽ umi héntepe hogakuérape, plasaháre,  merkádope ha ambue hendápe, jepe ikaneʼõ, iñembyahýi, ijuhéi térã oĩse sapyʼaite iñamigokuéra ndive. Ni omano mbotárõ guare ndohejái vaʼekue ko tembiapo, haʼe omombeʼu umi notísia porã ipahaite peve (Lucas 23:39-43).

19, 20. ¿Mbaʼe ehémplopa omoĩ Jesús ohechauka hag̃ua tekotevẽtereiha ojepredika?

¹⁹ Tercero, ohechakuaa vaʼekue tekotevẽtereiha opredika. Jesús opredika rire pe kuña Samariaguápe heʼi ijapostolkuérape: “Peẽ ningo peje ofaltaha gueteri 4 mése og̃uahẽ hag̃ua pe kosécha tiémpo. Péro che haʼe peẽme, pemañamína umi kokuére, mbaʼéichapa morotĩmbáma, oĩma oñemonoʼõ hag̃uáicha” (Juan 4:35). Jesús oikuaa umi apóstol opensa hague natekotevẽiha opredika pe kuñáme ha upéicha rupi omoĩ chupekuéra ko ehémplo.

²⁰ Upérõ oiméne raʼe mes de Kislev, noviembre térã diciémbrerupi, ha ofalta gueteri 4 mése oñemonoʼõ hag̃ua pe seváda. Upéva ojejapo Pascua tiémpope, 14 de Nisánrupi. Jesús omoĩrõ guare ko ehémplo ofalta gueteri heta tiémpo oñemonoʼõ hag̃ua, upévare umi chokokue ndojapurái asy. Péro, ¿mbaʼépa omboʼese chupekuéra? Haʼe heʼise hína og̃uahẽmaha pe ára “oñemonoʼõ hag̃ua” umi héntepe. Upérõ guaréma voi hetaiterei tapicha ohenduse ha oaprendese umi notísia porãgui, ikatu hag̃uáicha omoirũ Jesucrístope ha oikove opa ára g̃uarã. Haʼete ku Jesús omañáva umi kógare ha ohecha otyarõmbamaha, oĩmbaitéma oñemonoʼõ hag̃uáicha. c Upéicha rupi tekotevẽma vaʼekue ojepredika umi héntepe, noñehaʼarõvéima vaʼerã. Upévare oĩrõ guare oipotáva Jesús opytave peteĩ siudápe, haʼe heʼi: “Aha vaʼerã ótro siudápe  apredika hag̃ua umi notísia porã oñeʼẽva Ñandejára Rréinore, pórke upearã Ñandejára chembou vaʼekue” (Lucas 4:43).

21. ¿Mbaʼéichapa ikatu jasegi Jesús ehémplo?

²¹ Jahecha haguéicha, ñande avei ikatu jasegi Jesús ehémplo mbohapy hendáicha. Primero, ñamotenondévo pe tembiapo Ñandejára omeʼẽ vaʼekue ñandéve ha ñanekyreʼỹ ñamombeʼúvo umi notísia porã, jepe ñanefamília térã ñanerembiapo heta (Mateo 6:33; 1 Timoteo 5:8). Segundo, jajapo ikatúva guive ñameʼẽ hag̃ua Jehovápe ñane tiémpo, ñane mbaretekue ha ñane mbaʼerepy (Lucas 13:24). Ha tercero, ñanemanduʼa memévo tekotevẽtereiha japredika (2 Timoteo 4:2). Upéicharõ, aníkena jaheja ohasa rei ni peteĩ oportunida japredika hag̃ua.

22. ¿Mbaʼépa jahecháta pe kapítulo oúvape?

²² Jesús omombaʼeterei pe predikasión, upéicha rupi heʼi idisipulokuérape akóinte omombeʼu hag̃ua umi notísia porã. Pe kapítulo oúva oñeʼẽta upévare.