1, 2. ¿Mbaʼérepa avavete ndaikatúi oñemoag̃ui Ñandejárare ijehegui rei? ¿Mbaʼéichapa ñanepytyvõ Jesús?

 EPENSAMÍNA resẽha reho peteĩ ne amígo térã ne hénte rógape ha rekañy. Rehórõnte rehove umi kálle reikuaaʼỹvare ha ipahápe reporandúmante. Péro peteĩ tapicha omombeʼúnte rangue ndéve moõpa opyta, osẽ heʼi: “Jaha sapyʼaite tahechauka ndéve moõpa”. ¡Ajépa tuichaite ndepyʼaguapýta!

² Upeichaite avei Jesús ojapo ñanderehehápe. Yvyporakuéra apytépe avavete ndaikatúi ijehegui reínte oñemoag̃ui Ñandejárare. Enterove ñaneimperfékto ha jajavy, haʼete ku ñakañýva ha ‘ñañemomombyrýva pe jeikove oúvagui Ñandejáragui’ (Efesios 4:17, 18). Upévare ñaikotevẽ peteĩ ohechaukáva ñandéve ñande raperã. Ha Jesús imbaʼeporãgui ohechauka ñandéve moõrupipa jaha vaʼerã, péro ndojapói upéva añónte. Jahecha haguéicha kapítulo 1-pe, haʼe heʼi ñandéve: “Eju chemoirũ” (Marcos 10:21). Avei omombeʼu ñandéve mbaʼérepa iporã ñamoirũ chupe. Peteĩ jey Jesús heʼi vaʼekue: “Che hína pe tape, pe añetegua ha pe oporomoingovéva. Che rupive añoite ikatu oñeg̃uahẽ pe Túa rendápe” (Juan 14:6). Ñepyrũrã jahechamíta mbaʼérepa Jesucristo añoite ikatu ñanepytyvõ ñañemoag̃ui hag̃ua Ñandejárare. Ha upéi jahecháta mbaʼérepa ojeʼe Jesús haʼeha “pe tape, pe añetegua ha pe oporomoingovéva”.

3. ¿Mbaʼérepa Jesús rupivémante ikatu ñañemoag̃ui Jehováre?

³ Jehová ningo omeʼẽ Jesúspe peteĩ tembiapo tuicháva. a Haʼe ojapóva iñimportanteterei oiko hag̃ua Itúa rembipota. Upévare Jesús rupivémante ñañemoag̃ui Ñandejárare (2 Corintios 1:20; Colosenses 1:18-20). Ñantende porã hag̃ua pe mbaʼe guasuete Jesús ojapóva, ñanemanduʼami oiko vaʼekuére hardín de Edénpe. Upépe ñande ypykue Adán ha Eva omoirũ vaʼekue Satanáspe opuʼã hag̃ua Jehováre (Génesis 2:16, 17; 3:1-6).

4. ¿Mbaʼe provlémapa oñepyrũ vaʼekue Edénpe, ha mbaʼépa ojapo Jehová osolusiona hag̃ua upéva?

⁴ Edénpe oñepyrũ vaʼekue peteĩ provléma enterovéva ñambohovái vaʼerã: “¿Ohechaukápa Jehová ogoverna lája haʼe ihústo, ivuéno, isánto ha ohayhuha enterovépe?”. Oñekontesta hag̃ua ko porandu Ñandejára ombou vaʼekue ko yvy ape ári peteĩ itaʼýra yvagapegua perféktova. Ha itaʼýra ojapo peteĩ mbaʼe tuichaitereíva omopotĩ hag̃ua Itúa réra. Haʼe omeʼẽ hekove ñanderehehápe ha péicha ñandepeʼa ñemano poguýgui. Iñeʼẽrendúvo omano meve, oipytyvõ oñemyatyrõmbaite hag̃ua umi provléma oúva Satanás opuʼã rire Jehováre (Hebreos 2:14, 15; 1 Juan 3:8). Jaikuaaháicha Jehová oreko hetaiterei ánhel perfékto ikatúva ombou (Daniel 7:9, 10). Upéicharõ, ¿mávapepa oiporavóne ojapo hag̃ua ko mbaʼe guasuete? “Itaʼýra peteĩete” Jesucrístope (Juan 3:16).

5, 6. ¿Mbaʼéichapa Jehová ohechauka ojeroviaha Itaʼýrare, ha mbaʼéicha rupípa ojeroviaite hese?

⁵ ¿Mbaʼéicha rupípa Jehová oiporavo Jesúspe? Haʼe ojeroviaiterei  Itaʼýra peteĩetére. Heta tiémpo Jesús ou mboyve ko yvy ape ári, Jehová heʼíma vaʼekue Itaʼýra iñeʼẽrendutaha ohasáramo jepe heta mbaʼe vaíre. Upéicha ohechauka ojeroviaha hese (Isaías 53:3-7, 10-12; Hechos 8:32-35). Ñapensamíntena mbaʼépa heʼise upéva. Jesús ningo ikatu vaʼekue odesidi mbaʼépa ojapóta, ikatuháicha ojapo entéro yvypóra ha ánhel. Upéicharamo jepe, Jehová ojeroviaiterei Itaʼýrare ha upévare heʼíma voi kuri iñeʼẽrendutaha chupe. ¿Mbaʼéicha rupípa ojeroviaite hese? Ñandejára oikuaa porãiterei Itaʼýrape, oikuaa Jesús ombovyʼaseha chupe (Juan 8:29; 14:31). Avei Jesús ha Jehová ojoayhueterei (Juan 3:35). Upéicha rupi haʼekuéra oñoamigoite ha ojerovia ojuehe (Colosenses 3:14).

⁶ Jahecha upéicharõ Jesús ojapo hague peteĩ mbaʼe tuichaitereíva oiko hag̃ua Jehová rembipota, avei Itúa ojeroviaha hese ha mokõivéva ojoayhuetereiha. Péicha ñantende mbaʼérepa Jesús rupivémante ikatu ñañemoag̃ui Ñandejárare. Péro oĩve heta mbaʼe ohechaukáva pe Taʼýra añoite ikatuha ñanepytyvõ upearã.

7, 8. ¿Mbaʼérepa Jesús añoite oikuaa porã Itúape?

⁷ Oĩ heta mbaʼe jareko vaʼerã enkuénta ñañemoag̃uiséramo Jehováre (Salmo 15:1-5). Ha katuete Jesús oikuaa porãiteve enterovégui mbaʼe mbaʼépa tekotevẽ jajapo ñaime porã hag̃ua Itúandi. Haʼe heʼi: “Che Ru ningo omoĩ che poguýpe opa mbaʼe. Che Túa añoite chekuaa porã, ha che añoite aikuaa porã che Túape. Ha che amombeʼuséramo peteĩ persónape mávapa che Túa, upéva oikuaa porãta avei chupe” (Mateo 11:27). Jahechami mbaʼérepa Jesús heʼi haʼe añoite oikuaaha Itúape.

⁸ Jesucristo ningo “pe Taʼýra ypykue ojejapo vaʼekue opaite mbaʼe mboyve”, upévare oikuaa porãiteve  Jehovápe oimeraẽvagui (Colosenses 1:15). Ñandejára ojapo rire Jesúspe ohaʼarõ heta tiémpo ojapo hag̃ua umi ótro ánhelpe. Jahechakuaa upéicharõ heta áñore pe Túa ha Itaʼýra oĩ hague oñondive, ojokuaa porãve ha oñemoag̃uive ojuehe (Juan 1:3; Colosenses 1:16, 17). ¡Oiménengo hetaite mbaʼe oaprende Jesús! Oikuaáne raʼe Jehová rembipota, iléi, mbaʼéichapa opensa ha mbaʼépa ojapo. Upévare jaʼekuaa avave ndoikuaaiha Ñandejárape Jesucristo oikuaaháicha. Ha upéicha rupi ikatu oikuaauka ñandéve mbaʼeichaguápa Itúa. Ndaipóri ótro ikatu vaʼerã ojapo upéva.

9, 10. a) ¿Mbaʼéichapa Jesús oikuaauka ñandéve Itúape? b) ¿Mbaʼépa jajapo vaʼerã Jehová ñandeguerohory hag̃ua?

⁹ Umi mbaʼe Jesús omboʼe vaʼekue ohechauka oikuaaha Jehová opensáva, oñandúva ha mbaʼépa ohaʼarõ isiervokuéragui. b Jesús ojapo avei peteĩ mbaʼe tuichavéva upévagui. Haʼe heʼi: “Upe chéve cherecháva ohecháma avei pe Túape” (Juan 14:9). Ha upeichaite ningo, opaite mbaʼe Jesús heʼi ha ojapóvape ohaʼanga hekoitépe Jehovápe. Upéicha rupi jaleévo la Bíbliape Jesús rekovekue haʼete ku jahecháva Jehová ojaporamoguáicha umi mbaʼe. Por ehémplo haʼe oñemoñeʼẽkuaa, hory, oiporiahuvereko umi hasývape, oporomonguera, ontende umi ohasa asývape ha hasẽ jepe hendivekuéra (Mateo 7:28, 29; Marcos 1:40-42; Juan 11:32-36). Pe Taʼýra heʼi ha ojapo vaʼekue ohechauka porãiterei mbaʼépa Itúa rembipota ha mbaʼéichapa ojapo opa mbaʼe (Juan 5:19; 8:28; 12:49, 50). Upéicharõ, jaipotáramo Jehová ñandeguerohory, ñaneñeʼẽrendu vaʼerã Jesúspe ha jasegi iñehémplo (Juan 14:23).

 ¹⁰ Jahechaháicha Jesús oikuaa porãiterei Jehovápe ha ohaʼanga chupe hekoitépe. Upévare Ñandejára oipota ñañemoag̃ui hese Itaʼýra rupive. Péicha hesakãma ñandéve mbaʼérepa Jesús rupive añoite ikatu ñañemboja Jehováre. Ha koʼág̃a jahecháta mbaʼépa heʼise Jesucristo heʼírõ guare: “Che hína pe tape, pe añetegua ha pe oporomoingovéva. Che rupive añoite ikatu oñeg̃uahẽ pe Túa rendápe” (Juan 14:6).

11. a) ¿Mbaʼérepa jaʼekuaa Jesúsmante ikatuha ñanepytyvõ ñaime porã hag̃ua Ñandejárandi? b) ¿Mbaʼéichapa Juan 14:6 ohechauka Jesús ojapóva tuichaiterei mbaʼeha? (Ehecha pe nóta).

¹¹ Jahecháma Jesús rupivémante ikatuha ñañemoag̃ui Ñandejárare. Koʼág̃a ñahesaʼỹijo porãmíta mbaʼépa heʼise upéva ñandéve g̃uarã. Jesús ningo “pe tape” haʼe añoite ñanepytyvõgui ñaime porã hag̃ua Ñandejárandi. ¿Mbaʼérepa jaʼekuaa upéva? Jesucristo iñeʼẽrendu vaʼekue omano meve, ha péicha omeʼẽ hekove ñanderehehápe (Mateo 20:28). Ndojapóirire upéva ndaikatúi vaʼerãmoʼã ñañemoag̃ui Ñandejárare. Jehová ningo ipotĩ térã isánto ha ndaikatúi omoporã mbaʼeveichagua tembiapo vai. Ñande yvypóra katu manterei jajavy ha upéva haʼete omoĩva peteĩ pare ñandejokóva ani hag̃ua ñaime porã hendive (Isaías 6:3; 59:2). Péro Jesús omanóvo haʼete ku oitýva upe pare ha omopotĩ ñane rembiapo vaikue (Hebreos 10:12; 1 Juan 1:7). Upévare ñaime porã hag̃ua Jehovándi ñamombaʼe vaʼerã Cristo ojapo vaʼekue ha jajerovia hese. Péicha añoite ikatúta “jaiko porã jey Ñandejárandi” (Romanos 5:6-11). c

12. ¿Mbaʼérepa jaʼekuaa Jesús haʼeha “pe tape”?

 ¹² Jesús haʼe avei “pe tape” ñanepytyvõ rupi ñañemboʼe hag̃ua. Hérape ñañemboʼekuaa Jehovápe ñande pyʼaite guive ha haʼe ñanerendúta (1 Juan 5:13, 14). Jesús voi ohechauka vaʼekue upeichaha heʼírõ guare: “Pe Túa omeʼẽta peẽme oimeraẽ mbaʼe pejeruréva chupe che rérape. [...] Pejerure ha oñemeʼẽta peẽme, péicha pevyʼaitereíta” (Juan 16:23, 24). Ñañemboʼe jave Jesús rérape jaʼekuaa avei Jehovápe che “Ru” (Mateo 6:9). Jesús haʼe avei “pe tape” ohechaukágui ñandéve mbaʼéichapa jaiko vaʼerã. Jahecháma kuri haʼe ohaʼangaha hekoitépe Itúape. Upévare iporã jasegi iñehémplo ha jaguata ipyporére. Upéicharõmante Jehová ñandeguerohorýta (1 Pedro 2:21).

13, 14. a) ¿Mbaʼéichapa Jesús ohechauka omombaʼeha pe añetegua umi mbaʼe heʼívare? b) ¿Mbaʼépa okumpli vaʼerã kuri Jesús, ha mbaʼérepa tekotevẽ raʼe ojapo upéva?

¹³ Jesús oñeʼẽrõ guare Ñandejára Ñeʼẽre siémpre heʼi pe añetegua (Juan 8:40, 45, 46). Arakaʼeve ndaijapúi (1 Pedro 2:22). Umi ndaijaʼéiva hese jepe ohechakuaa ndaijapuiha ha ‘omboʼeha Ñandejára volunta hendaitépe’ (Marcos 12:13, 14). Péro Jesús heʼívo haʼeha “pe añetegua” ohechaukase vaʼekue hetave mbaʼe. ¿Mbaʼe mbaʼépa umíva?

¹⁴ Heta tiémpo Jesús ou mboyve Jehová oskrivika vaʼekue hetaiterei profesía heʼíva mbaʼéichapa oikóta pe Mesías térã Cristo, mbaʼépa heʼíta ha ojapóta, ha mbaʼéichapa omanóta. Avei Moisés léipe oĩ vaʼekue heta mbaʼe orrepresentáva pe Mesíaspe (Hebreos 10:1). ¿Okumplínepa Jesús opa mbaʼe ojeʼe vaʼekue hese? Upearã iñeʼẽrendu vaʼerã omano meve. ¿Ha ojapónepa upéva? Ojapóramo  añoite ojehecháta Jehová heʼíva oikoha katuete. ¡Ajépa tuichaite pe tembiapo oñemeʼẽ vaʼekue Jesúspe! Ha opaite mbaʼe heʼíva ha ojapóvare ohechauka añete hague entéro mbaʼe Jehová heʼi vaʼekue hese (2 Corintios 1:20). Upévare Jesús heʼikuaa ijehe haʼeha “pe añetegua”. Haʼe rupive oñekumplipa umi profesía Jehová omeʼẽ vaʼekue (Juan 1:17; Colosenses 2:16, 17).

15. ¿Mbaʼéichapa jahechauka jajeroviaha Ñandejára Raʼýre, ha mbaʼépa ikatúta jahupyty?

¹⁵ Jesús haʼe avei “pe oporomoingovéva” haʼe añoite ohupytykágui ñandéve ‘jeikove añetetéva’ (1 Timoteo 6:19). La Biblia heʼi: “Pe persóna ohechaukáva ojeroviaha pe Taʼýrare oikovéta pára siémpre, pe naiñeʼẽrendúiva pe Taʼýrape katu ndohupytymoʼãi jeikove opaveʼỹva, ha Ñandejára ipochýta hendive” (Juan 3:36). ¿Mbaʼéichapa ikatu jahechauka jajeroviaha Ñandejára Raʼýre? Ñepyrũrã jahechakuaa vaʼerã heseʼỹ ndaikatumoʼãiha jaikove pára siémpre. Ha tekotevẽ avei jahechauka jajeroviaha hese umi mbaʼe jajapóva rupive, ñañehaʼã jaikuaave Jesúspe ha jajapo haʼe omboʼe vaʼekue (Santiago 2:26). Upéicha ikatúta jaikove pára siémpre tahaʼe yvágape, térã ko yvy ape ári peteĩ lugár iporãitereívape (Lucas 12:32; 23:43; Apocalipsis 7:9-17; Juan 10:16).

16, 17. a) ¿Mbaʼéichapa oikóta Jesúsgui “pe oporomoingovéva” umi omano vaʼekuépe g̃uarã? b) ¿Mbaʼépa jahupytýta ñamoirũramo Jesúspe?

¹⁶ ¿Ha mbaʼépa oikóta umi omanóma vaʼekuégui? ¿Oikove jeýnepa hikuái? Katuete oikóta upéva, Jesús ningo “pe oporomoingovéva” avei chupekuéra g̃uarã. Omopuʼã mboyvemi iñamígo Lázarope umi omanóva apytégui, Jesús heʼi vaʼekue iñermána Mártape: “Che hína pe omoingove jeýva umi héntepe ha pe omeʼẽva vída  chupekuéra. Pe ohechaukáva ojeroviaha cherehe, omanóramo jepe oikove jeýta” (Juan 11:25). Jehová omeʼẽ Itaʼýrape umi ‘lláve oavri hag̃ua pe ñemano ha Sepultúra’ (Apocalipsis 1:17, 18). Ha Jesucristo oipurúta koʼã lláve omoingove jey hag̃ua umi omano vaʼekuépe (Juan 5:28, 29).

¹⁷ “Che hína pe tape, pe añetegua ha pe oporomoingovéva”. Péicha Jesús omombeʼupaitéma maʼerãpa ou ko yvy ape ári. ¡Ajépa iñimportantete ñandéve g̃uarã upéva! Upe rire heʼi: “Che rupive añoite ikatu oñeg̃uahẽ pe Túa rendápe” (Juan 14:6). Upeichaite, ñamoirũramo Jesúspe jajeroviakuaa haʼe katuete ohechaukataha ñandéve mbaʼéichapa ñañemoag̃uíta ‘Itúare’.

18. ¿Mbaʼéichapa jahechauka ñamoirũha Jesucrístope?

¹⁸ Jahecha kuri Jesús ojapóva iñimportantetereiha ha haʼe añoite oikuaa porãha Itúape. Upévare tekotevẽ ñamoirũ chupe. Péro ñahesaʼỹijo haguéicha kapítulo 1-pe, ndahaʼéi jaʼénte vaʼerã ñamoirũha Jesucrístope, jahechauka vaʼerã jajapoha upéva. Jaguata hag̃ua ipyporére, jasegi vaʼerã iñehémplo ha jajapo la ñanemboʼe vaʼekue (Juan 13:15). Ko lívro ñanepytyvõta upearã.

19, 20. ¿Mbaʼéichapa ko lívro ñanepytyvõta ñamoirũ hag̃ua Jesúspe?

¹⁹ Umi kapítulo oúvape jahecháta Jesús ojapo vaʼekue oĩrõ guare ko yvy ape ári. Ko lívro oreko 3 párte. Peteĩvape ñahesaʼỹijóta mbaʼéichapa Jesús lája ha mbaʼépa ojapo. Mokõihápe jahecháta mbaʼéichapa ikyreʼỹ omombeʼu hag̃ua pe notísia porã ha omboʼe hag̃ua umi héntepe. Ha mbohapyhápe katu jahecháta mbaʼéichapa ohechauka oporohayhuha. Avei kapítulo 3 guive oĩta peteĩ párte heʼíva “¿Mbaʼéichapa ikatu ñamoirũ Jesúspe?”. Ipype oĩ porandu ha téxto jajepyʼamongeta hag̃ua,  ha omyesakãva ñandéve mbaʼéichapa ikatu jasegi Jesús ehémplo.

²⁰ Jehová imbaʼeporãgui ohechauka ñandéve ñande raperã ha péicha oheja ñañemoag̃ui hese. Ñandejára ñanderayhúgui hepyeterei opaga ñanderehe omboúvo Itaʼýrape ohechauka hag̃ua ñandéve mbaʼéichapa ikatu jaiko porã hendive (1 Juan 4:9, 10). Ñamombaʼékena upe ojapóva ñanderehehápe ha kyreʼỹme jajapo Jesús ojeruréva ñandéve: “Eju chemoirũ” (Juan 1:43).