1, 2. a) ¿Mbaʼeichagua rregálopa nde remombaʼeve? b) ¿Mbaʼéichapa Jehová ohechauka ñanderayhuetereiha?

¿MBAʼÉPA pe rregálo iporãvéva rerresivi vaʼekue? Peteĩ rregálo ningo natekotevẽi katuete hepy jaguerohory hag̃ua. Javyʼaiterei voi jarresivíramo peteĩ rregálo ha koʼýte jaagradese oñemeʼẽ jave ñandéve peteĩ mbaʼe ñaikotevẽva hína upe moméntope.

² Jehová ningo omeʼẽ ñandéve pe rregálo ñaikotevẽvéva ha ndaipóri mbaʼeve ikatúva ñambojoja upévare. Ko kapítulope jahecháta haʼe ombou hague Itaʼýra Jesucrístope omano hag̃ua ñanderehehápe ikatu hag̃uáicha jaikove pára siémpre (elee Mateo 20:28). Péicha Jehová ohechauka ñandéve mbaʼeichaitépa ñanderayhu.

3. ¿Mbaʼérepa yvyporakuéra omano?

³ Jehová omboúvo Jesúspe omano hag̃ua ñanderehehápe, ñandesalva pekádo ha ñemanógui (Efesios 1:7). Ñantende hag̃ua mbaʼérepa ñaikotevẽ peteĩ ñandesalva vaʼerã, jaikuaa vaʼerã mbaʼépa oiko vaʼekue pe hardín de Edénpe. Adán ha Eva opeka vaʼekue ha upéva káusare omano. Haʼekuéra ningo ñande ru ha ñande sy ypykue, ha entéro ñande jajúva chuguikuéra ñanaséma pekadór ha upéva káusare ñamano (ehecha nóta 9).

4. ¿Mbaʼépa Jehová omeʼẽ vaʼekue Adánpe?

 ⁴ Jehová ojapórõ guare Adánpe, omeʼẽ chupe peteĩ mbaʼe ijojahaʼỹva, omeʼẽ chupe peteĩ vída perfékta. Adán oreko vaʼekue peteĩ kuérpo ha ménte perfékto. Upéicha rupi haʼe ndahasymoʼãi, ndaitujamoʼãi ni nomanomoʼãi kuri arakaʼeve. Jehová ojapo rupi Adánpe, haʼe vaʼekue peteĩ túa chupe g̃uarã (Lucas 3:38). Haʼe pyʼỹinte oñeʼẽ vaʼekue Adánpe, omeʼẽ chupe peteĩ traváho iporãitereíva ha omombeʼu porã chupe mbaʼépa ohaʼarõ chugui (Génesis 1:28-30; 2:16, 17).

5. ¿Mbaʼérepa la Biblia heʼi Ñandejára ojapo hague Adánpe ijoguahárõ?

⁵ La Biblia heʼi Jehová ojapo hague Adánpe “ijoguaháramo” (Génesis 1:27). Upéva heʼise Adán oreko hague umi kualida Jehová orekóva. Por ehémplo, haʼe ikatu vaʼekue ohechauka oporohayhuha, iñarandu ha ihustoha. Jehová ndojapói Adánpe peteĩ rrovóicha, síno omeʼẽ chupe pe liverta odesidi hag̃ua ojapótapa pe iporãva térã ivaíva. Adán odesidírire iñeʼẽrendu Ñandejárape, oikove vaʼerãmoʼã pára siémpre pe hardín iporãitévape.

6. ¿Mbaʼépa operde Adán odesovedese haguére Ñandejárape?

⁶ Adán odesovedesérõ guare Ñandejárape, haʼe voi oñekondena omano hag̃ua. Haʼe operde pe amista oreko vaʼekue Jehovándi, operde avei pe vída perfékta ha pe hardín porãite oiko hague (Génesis 3:17-19). Adán ha Eva naiñeʼẽrendúi Ñandejárape, upévare ndaiporivéima esperánsa chupekuéra g̃uarã.

7, 8. ¿Mbaʼépa ñanderupyty Adán opeka haguére?

⁷ Adán káusare “pe pekádo oike ko múndope, ha pe ñemano oike pekádo rupive. Upéicha pe ñemano ohupyty entéro persónape pórke enterovéva opeka” (Romanos 5:12). Adán opekárõ guare ñanekondena avei  hendive pe pekádo ha ñemanóme (Romanos 7:14). ¿Péro jarekópa esperánsa?

⁸ Ndaipóri ningo yvypóra ikatúva opaga orrekupera jey hag̃ua pe Adán operde vaʼekue. Péro Jehová ojapo peteĩ mbaʼe iñimportantetereíva ñandesalva hag̃ua pekádo ha ñemanógui. Jahechamína mbaʼe iporãvapa ikatu jahupyty Jesús omano rupi ñanderehehápe ha mbaʼépa jajapo vaʼerã jahupyty hag̃ua upéva.

9. ¿Mbaʼépa oñekotevẽ vaʼekue ojerrekupera jey hag̃ua pe Adán operde vaʼekue?

⁹ ¿Mbaʼérepa ñande ndaikatúi jarrekupera ñandejehegui pe vída perfékta Adán operde vaʼekue? Pórke ñande enterove ñaneimperfékto (Salmo 49:7, 8). Ha ojerrekupera hag̃ua pe Adán operde vaʼekue oñekotevẽ peteĩ persóna perfékta (1 Timoteo 2:6).

10. ¿Mbaʼépa ojapo Jehová ñandesalva hag̃ua pekádo ha ñemanógui?

¹⁰ Ikatu hag̃uáicha ñandesalva pekádo ha ñemanógui, Jehová ombou vaʼekue ko múndope pe Itaʼýra ohayhuvéva. Upéva hína Jesús, chupe raẽvete ningo Ñandejára ojapo vaʼekue (1 Juan 4:9, 10). Jesús naiprovlemaiete vaʼekue oheja hag̃ua ipuésto yvágape (Filipenses 2:7). Jehová ojapo peteĩ milágro ikatu hag̃uáicha Jesús onase peteĩ mitãicha. Upéicha rupi oĩ jey vaʼekue peteĩ umáno perfékto (Lucas 1:35).

11. ¿Mbaʼéichapa peteĩ kuimbaʼe rupive ikatu jajesalva pekádo ha ñemanógui?

¹¹ Adán odesovedese rupi Ñandejárape, enterove japerde pe vída perfékta. ¿Ikatúne piko ótro kuimbaʼe ñandesalva enterovépe pe pekádo ha ñemanógui? Si  ikatu (elee Romanos 5:19). Jesús arakaʼeve ndopekái, ha upéicha rupi ikatu vaʼekue omeʼẽ hekove perfékto opaga hag̃ua ñande pekádore (1 Corintios 15:45). Hekove perfékto rupive haʼe ikatu osalva entéro Adán familiarépe pe pekádo ha ñemanógui (1 Corintios 15:21, 22).

12. ¿Mbaʼépa ohechauka Jesús oaguantárõ guare umi mbaʼe ohasáva?

¹² La Biblia omombeʼu mbaʼeichaitépa Jesús osufri vaʼekue omano mboyve. Hetaiterei oñemaltrata vaʼekue chupe, ha upéi ojeklava chupe peteĩ yvyráre. Haʼe ningo omano asyeterei vaʼekue (Juan 19:1, 16-18, 30). ¿Mbaʼérepa tekotevẽ vaʼekue peichaite peve osufri? Pórke Satanás heʼi ni peteĩ yvypóra naiñeʼẽrendumoʼãiha Ñandejárape ohasáramo peteĩ situasión ijetuʼúva. Péro Jesús ohechauka porã vaʼekue peteĩ persóna ikatuha ifiél Ñandejárape ohasáramo jepe heta mbaʼe ijetuʼúva. ¡Epensamíntena mbaʼeichaitépa oiméne ovyʼa raʼe Jehová ohechávo Itaʼýra iñeʼẽrenduha chupe ohasa asýramo jepe! (Proverbios 27:11; ehecha nóta 15).

13. ¿Mbaʼéichapa Jesús opaga ñande pekádore ha arakaʼépa ojapo upéva?

¹³ ¿Mbaʼéichapa Jesús opaga ñande pekádore ha arakaʼépa ojapo upéva? Áño 33-pe, Jehová oheja kuri umi iñenemigokuéra ojuka Jesúspe (Hebreos 10:10). Upéi 3 día omano haguépe, Jehová omoingove jey Jesúspe peteĩ espírituicha, ndahaʼevéima peteĩ yvypóraicha. Upéi, Jesús oho jey Itúa rendápe yvágape, ha upérõ haʼe omeʼẽ chupe hekove perfékto repykue opaga hag̃ua ñande pekádore (Hebreos 9:24). Upéicha rupi, ñande jareko pe oportunida jajesalvávo pekádo ha ñemanógui (elee Romanos 3:23, 24).

14, 15. ¿Mbaʼépa jajapo vaʼerã Ñandejára ñaneperdona hag̃ua?

¹⁴ Heta mbaʼe porã jahupyty Jesús omano rupi ñanderehehápe. Jahechamína mbaʼe mbaʼépa jahupyty koʼág̃ama voi ha mbaʼépa jahupytýta amo gotyove.

¹⁵ Oñeperdona ñandéve ñande pekádo. Ñaneimperfékto rupi, pyʼỹinte jaʼe térã jajapo peteĩ mbaʼe noĩporãiva (Colosenses 1:13, 14). ¿Mbaʼépa jajapo vaʼerã Ñandejára ñaneperdona hag̃ua? Ñañarrepenti vaʼerã ñande pyʼaite guive ha jajerure Jehovápe ñaneperdonami hag̃ua. Jajapóramo péicha, Jehová katuete ñaneperdonáta (1 Juan 1:8, 9).

16. ¿Mbaʼépa jajapo vaʼerã ñane konsiénsia ipotĩ hag̃ua?

¹⁶ Ikatu ñanekonsiénsia potĩ. Ñane konsiénsia ñanemolesta jepi jajapo jave peteĩ mbaʼe noĩporãiva, ha upévare ñañeñandu vai, ndajavyʼapái ha sapyʼánte ñapensa voi nañanepohãveimaha. Péro aníkena ñañentrega. Jajerure asýramo Jehovápe ñaneperdonami hag̃ua, haʼe katuete ñanerendúta ha ñaneperdonáta (Hebreos 9:13, 14). Jehová oipota ñamombeʼu chupe oimeraẽ provléma jarekóva ha mbaʼépepa ijetuʼu ñandéve ñaneñeʼẽrendu hag̃ua chupe (Hebreos 4:14-16). Jajapóramo péicha, ñane konsiénsia ipotĩta ha ñaime porãta Ñandejárandi.

17. ¿Mbaʼépa ikatu jahupyty Jesús omano rupi ñanderehehápe?

¹⁷ Ikatu jaikove pára siémpre. “Pe pekádo káusare ñamano, péicha pe pekádo opaga ñandéve. Péro Ñandejára orregala vída etérna, ñande Ruvicha Cristo Jesús rupive” (Romanos 6:23). Jesús omano rupi ñanderehehápe, ñande ikatu jaikove opa árare ha nañanderasymoʼãvéima arakaʼeve (Apocalipsis 21:3, 4). Péro, ¿mbaʼépa jajapo vaʼerã jahupyty hag̃ua koʼã mbaʼe?

18. ¿Mbaʼérepa jaʼekuaa Jehová ñanderayhuetereiha?

¹⁸ ¿Mbaʼéichapa reñeñandu oñemeʼẽramo ndéve peteĩ rregálo iporãitereíva? Oiméne revyʼaiterei. Ha ikatu jaʼe Jesús sakrifísio haʼeha pe rregálo iporãvéva oñemeʼẽ vaʼekue ñandéve, ha jaagradese vaʼerã Jehovápe upévare. Juan 3:16 heʼi voi: “Ñandejára ningo ohayhueterei umi héntepe, upévare ontrega Itaʼýra peteĩete orekóva”. Jehová ñanderayhueterei ha upévare ombou pe Itaʼýra ohayhuvéva omano hag̃ua ñanderehehápe. Jesús avei ñanderayhueterei, upévare oĩ vaʼekue dispuésto omanóvo ñanderehehápe (Juan 15:13). Pe sakrifísio Jesús ojapo vaʼekue ohechauka porã ñandéve mbaʼeichaitépa Jehová ha Jesús ñanderayhu (Gálatas 2:20).

19, 20. a) ¿Mbaʼépa rejapo vaʼerã reiko hag̃ua Jehová amígoramo? b) ¿Mbaʼéichapa ikatu rehechauka rejeroviaha Jesús sakrifísiore?

¹⁹ Koʼág̃a nde reikuaáma mbaʼeichaite pevépa Jehová nderayhu. Péro, ¿mbaʼépa ikatu rejapo reiko hag̃ua Jehová amígoramo? Hasy ningo jahayhu hag̃ua peteĩ persónape ndajaikuaaporãiramo chupe. Upévare Juan 17:3-pe ñanemokyreʼỹ jaikuaa hag̃ua Jehovápe. Rejapóramo upéva, rehayhuvéta chupe, rejaposéta umi mbaʼe ombovyʼáva chupe ha reikóta iñamígoramo. Upévare, esegíkena estudia la Biblia reikuaa porãve hag̃ua Jehovápe (1 Juan 5:3).

²⁰ Rejerovia vaʼerã Jesús sakrifísiore. La Biblia heʼi: “Pe persóna ohechaukáva ojeroviaha pe Taʼýrare oikovéta pára siémpre” (Juan 3:36). ¿Mbaʼéichapa ikatu jahechauka jajeroviaha Jesúsre? Jajapóvo haʼe ñanemboʼéva (Juan 13:15). Ndahaʼéi vaʼerã jaʼénteva “che ajerovia Jesúsre”, síno jahechauka vaʼerã upéva umi mbaʼe jajapóvare.  Santiago 2:26 heʼi: “Ñande jerovia omano ndajajapóiramo umi mbaʼe iporãva”.

21, 22. a) ¿Mbaʼérepa reho vaʼerã káda áño Konmemorasionhápe? b) ¿Mbaʼépa jahecháta kapítulo 6 ha 7-pe?

²¹ Reho vaʼerã Konmemorasionhápe. Pe kaʼarupytũ Jesús omano mboyve, haʼe omanda jagueromanduʼa hag̃ua imuérte. Káda áño ningo ojejapo pe Konmemorasión térã pe “Séna del Señór” (1 Corintios 11:20, nóta; Mateo 26:26-28). Jesús oipota ñanemanduʼa haʼe omano hague opaga hag̃ua ñande pekádore. Haʼe heʼi vaʼekue: “Pesegíkena pejapo ko mbaʼe penemanduʼa hag̃ua cherehe” (elee Lucas 22:19). Rehóramo Konmemorasionhápe, rehechaukáta hína remombaʼeha pe sakrifísio Jesús ojapo vaʼekue, ha reagradeseha Jehová ha Jesúspe ñanderayhuete haguére (ehecha nóta 16).

²² Jesús sakrifísio haʼe pe rregálo iporãvéva oñemeʼẽ vaʼekue ñandéve (2 Corintios 9:14, 15). Kapítulo 6 ha 7-pe jahecháta mbaʼéichapa umi omano vaʼekue jepe oñevenefisiáta upe rregálogui.