1. ¿Mbaʼépa ikatu reñeporandu restudiapávo rehóvo ko lívro?

KO LÍVRO rupive reaprendéma heta mbaʼe la Bíbliagui, por ehémplo, ikatuha jaikove pára siémpre, umi omano vaʼekue ndosegiriha oikove mamove ha oñemoingove jeytaha umi omano vaʼekuépe (Eclesiastés 9:5; Lucas 23:43; Juan 5:28, 29; Apocalipsis 21:3, 4). Oiméne reñepyrũma avei reho testígo de Jehová rreunionhápe ha rehechakuaáma haʼekuéra oadoraha Jehovápe haʼe oipotaháicha (Juan 13:35). Oiméne avei rehecháma Jehovápe ne amígo teéicha ha redesidíma reserviseha chupe.  Upévare, ikatu oime reñeporandu: “¿Mbaʼépa tekotevẽ ajapo aservi hag̃ua Ñandejárape?”.

2. ¿Mbaʼérepa ojevautisase vaʼekue peteĩ kuimbaʼe Etiopiagua?

² Unos kuánto tiémpo Jesús oho rire yvágape, peteĩ kuimbaʼe Etiopiagua oikuaase vaʼekue avei mbaʼépa tekotevẽ ojapo oservi hag̃ua Ñandejárape. Peteĩ disípulo hérava Felipe opredika ko kuimbaʼépe ha ohechauka chupe Ñandejára Ñeʼẽ rupive Jesús haʼeha pe Mesías. Oikuaa rire upéva, pe kuimbaʼe Etiopiagua heʼi: “¡Emañami! Ápe ningo oĩ y, ¿mbaʼéiko chejoko ajevautisa hag̃ua?” (Hechos 8:26-36).

3. a) ¿Mbaʼépa omanda vaʼekue Jesús idisipulokuérape? b) ¿Mbaʼéichapa ojejapo vaʼerã pe vautísmo?

³ La Biblia ohechauka porã jaservi hag̃ua Jehovápe jajevautisámante vaʼerãha. Jesús heʼi vaʼekue idisipulokuérape: “Tapeho pemboʼe umi hénte entéro paisguápe oiko hag̃ua chuguikuéra che disípulo, ha pevautisa chupekuéra” (Mateo 28:19). Jesús avei ojevautisa vaʼekue, upéicha haʼe voi omoĩ ñandéve ehémplo jajapo hag̃ua upéva. Jesús ojevautisárõ guare oñemoingepaite vaʼekue chupe pe y guýpe, ndahaʼéi iñakãnte ojehypýiva chupe pe ýpe (Mateo 3:16). Koʼág̃arupi avei, peteĩ persóna ojevautisa hag̃ua, oñemoingepaite vaʼerã avei chupe pe y guýpe.

4. ¿Mbaʼépa rehechauka hína enterovépe rejevautisávo?

⁴ Rejevautisávo rehechauka hína enterovépe reikoseha Jehová amígoramo ha reserviseha chupe (Salmo 40:7, 8). Péro ikatu oime reñeporandu: “¿Mbaʼépa tekotevẽ ajapo ajevautisa hag̃ua?”.

5. a) ¿Mbaʼépa tekotevẽ rejapo rejevautisa hag̃ua? b) ¿Mbaʼérepa iñimportánte reho meme rreunionhápe?

⁵ Rejevautisa hag̃ua ningo tekotevẽ reikuaa Jehová ha Jesúspe, ha nde reikuaáma chupekuéra restudia rupi la  Biblia (elee Juan 17:3). Péro la Biblia heʼi tekotevẽha avei reikuaa porã Jehová rembipota (Colosenses 1:9). Umi rreunión ojapóva testígo de Jehová nepytyvõta reñemoag̃uive hag̃ua Jehováre. Upévare iñimportánte reho meme rreunionhápe (Hebreos 10:24, 25).

6. ¿Tekotevẽpa reikuaapaite raẽ la Biblia heʼíva rejevautisa hag̃ua?

⁶ Jehová ningo ndojeruréi ndéve reikuaapaite hag̃ua la Biblia heʼíva rejevautisa hag̃ua. Haʼe nohaʼarõi voi kuri pe kuimbaʼe Etiopiagua oikuaa raẽ opaite mbaʼe oĩva Iñeʼẽme ikatu hag̃uáicha ojevautisa (Hechos 8:30, 31). Enterove oservíva Jehovápe ningo osegíta oaprende chugui opa árare (Eclesiastés 3:11). Péro rejevautisa hag̃ua tekotevẽ reikuaa umi mbaʼe iñimportantevéva omboʼéva la Biblia (Hebreos 5:12).

7. ¿Mbaʼépepa ñanepytyvõ jastudiáramo la Biblia?

⁷ La Biblia heʼi: “Ndajajeroviáirõ, Ñandejára ni mbaʼevéicharõ nañandeguerohorymoʼãi” (Hebreos 11:6). Upévare rejevautisa hag̃ua tekotevẽ avei rejerovia Ñandejárare. La Biblia omombeʼu Coríntope oĩ hague ohendu porãva Jesús disipulokuéra omboʼéva, ha upéicha rupi “heta hénte Corintogua ohendu vaʼekue umi notísia porã ojerovia avei ha ojevautisa” (Hechos 18:8). Upéicha avei koʼág̃arupi, jastudia rupi la Biblia jajerovia Ñandejára promesakuérare ha avei Jesús sakrifísio rupive ikatuha jajesalva pekádo ha ñemanógui (Josué 23:14; Hechos 4:12; 2 Timoteo 3:16, 17).

8. ¿Mbaʼépa nemomýita reñeʼẽse hag̃ua nde rapichakuérandi umi mbaʼe reaprendévare?

⁸ Reaprendevévo rehóvo la Bíbliagui ha rehechávo mbaʼéichapa nepytyvõ nde rekovépe, rejeroviavéta Ñandejárare. Upévare reñeʼẽséta voi nde rapichakuérandi  umi mbaʼe reaprendévare (Jeremías 20:9; 2 Corintios 4:13). ¿Mávapepa ikatu remombeʼu umi mbaʼe reaprendéva?

9, 10. a) ¿Mávapepa ikatu remombeʼu umi mbaʼe reaprendéva? b) ¿Mbaʼépa rejapo vaʼerã resẽséramo repredika pe kongregasióndi?

⁹ Oiméne remombeʼusetereíma ne hentekuérape, ne amígo, ne vesíno térã umi ne kompañéro de traváhope umi mbaʼe reaprendéva. Upéva ningo iporãiterei, péro nemanduʼa vaʼerã siémpre reñeʼẽ vaʼerãha mborayhúpe ha pyʼaguapýpe porãnte. Mbeguekatúpe reimétama avei preparádo repredika hag̃ua umi ermáno kongregasionpeguándi. Rehechakuaa vove reimemaha preparádo upearã, ikatu reñeʼẽ pe nemboʼévandi la Biblia ha emombeʼu chupe resẽsemaha repredika. Haʼe ohechakuaáramo reimemaha preparádo ha reikomaha hína la Biblia heʼiháicha, mokõi ansiáno kongregasionpegua oñerreuníta penendive.

¹⁰ Umi ansiáno oñeʼẽta nendive ohecha hag̃ua rentende porãpa hína umi mbaʼe iñimportantevéva oĩva la Bíbliape, ha rejapópa umi mbaʼe reaprendéva. Oporandúta avei ndéve reipotápa oiko ndehegui testígo de Jehová. Umi ansiáno ningo ohayhu ha oñangareko umi oĩvare kongregasiónpe, ha koʼág̃a oñangarekótama avei hikuái nderehe, upévare ani rekyhyje reñeʼẽ hag̃ua hendivekuéra (Hechos 20:28; 1 Pedro 5:2, 3). Oñemongetapa rire nendive, umi ansiáno heʼíta ndéve ikatútamapa resẽ repredika.

11. ¿Mbaʼérepa iñimportánte rekambia tekotevẽhápe ikatu hag̃uáicha resẽ repredika?

¹¹ Umi ansiáno ikatu avei heʼi ndéve tekotevẽha rekambiamie algúna kósape ikatu hag̃uáicha resẽ repredika pe kongregasióndi. ¿Mbaʼérepa iñimportánte upéva? Pórke reñeʼẽvo umi héntepe Ñandejárare, reñeʼẽ hína hérape,  térã rerrepresenta hína chupe. Upévare ani hag̃ua oñeñeʼẽ vai hese, reiko lájare ojekuaa vaʼerã reserviha Jehovápe (1 Corintios 6:9, 10; Gálatas 5:19-21).

12. ¿Mbaʼérepa tekotevẽ enterove ñañarrepenti?

¹² Oĩ ótra kósa tekotevẽva rejapo ikatu hag̃uáicha rejevautisa. Apóstol Pedro heʼi vaʼekue: “Peñarrepentíke ha pejevy pende rape vaígui, ikatu hag̃uáicha Jehová operdona pende pekádo” (Hechos 3:19). ¿Mbaʼépa heʼise eñarrepenti? Upéva heʼise embyasyha umi mbaʼe vai rejapo vaʼekue. Por ehémplo, ikatu oime nderekovai raʼe ymave, upéicharõ tekotevẽ reñarrepenti rejapo haguére upe mbaʼe vai. Ha oiméramo jepe siémpre reñehaʼãva rejapo iporãva, lomímonte tekotevẽ reñarrepenti, pórke jaikuaaháicha enterove ñande ñanaséma voi pekadór ha ñaikotevẽ Ñandejára ñaneperdona (Romanos 3:23; 5:12).

13. ¿Mbaʼépa heʼise ejevy ne rembiapo vaikuégui?

¹³ ¿Ikatútamapa resẽ repredika reñarrepenti haguérente umi mbaʼe vai rejapo vaʼekuére? Nahániri. Apóstol Pedro heʼi avei tekotevẽha rejevy ne rembiapo vaikuégui. Upéva heʼise tekotevẽha rehejaite umi mbaʼe vai rejapo vaʼekue yma ha reñehaʼã rejapo iporãva. Ñantende porãve hag̃ua, ñamoĩmi peteĩ ehémplo. Epensamína reviahaha hína nde veíkulope reho hag̃ua peteĩ lugár opytávape mombyry, upéi rehechakuaa sapyʼa rejavy hague pe tape ha rehoha hína ótro ladoite. ¿Mbaʼépa rejapóta? Katuete rejevy jeýta ikatu hag̃uáicha reho pe tape ndeguerahátavape upe lugár rehosehápe. Upéicha avei oiméne oiko raʼe nderehe restudiávo la Biblia, oiméne rehechakuaa raʼe rehoha hína tape vaíre ha tekotevẽha rekambia unas kuánta kósa. Aníkena reduda rejevy hag̃ua ne rembiapo vaikuégui, upéicharõmante ikatúta reiko Jehová oipotaháicha.

14. ¿Mbaʼépa rejapo vaʼerã reñemeʼẽ hag̃ua Jehovápe?

¹⁴ Rejevautisa mboyve, rejapo vaʼerã peteĩ mbaʼe iñimportánteva: reñemeʼẽ vaʼerã Jehovápe. ¿Mbaʼéichapa rejapo vaʼerã upéva? Ejapo vaʼerã peteĩ orasión ha epromete Jehovápe readorataha chupe añoite ha remotenondetaha ivolunta opaite mbaʼépe (Deuteronomio 6:15).

15, 16. ¿Mbaʼépa nemomýi vaʼerã reñemeʼẽ hag̃ua Jehovápe?

¹⁵ ¿Mbaʼépa nemomýita reñemeʼẽ hag̃ua Jehovápe? Ñantende hag̃ua ikatu ñamoĩ peteĩ ehémplo. Ñamoĩ chupe peteĩ kariaʼy ojegustaha hína peteĩ kuñataĩre. Upe kariaʼy mbeguekatúpe oikuaa porãve ohóvo pe kuñataĩme, upéicha rupi ohayhuve chupe ha upéi omendaséma hese. Oikuaáramo jepe pe matrimónio haʼeha peteĩ rresponsavilida tuichaitereíva, haʼe ndokyhyjéi ojagarra hag̃ua upe rresponsavilida pórke ohayhu chupe ipyʼaite guive. Upéicha avei, jahayhúramo Jehovápe ñande pyʼaite guive, upéva ñanemomýita ñañemeʼẽ hag̃ua chupe jajapo hag̃ua ivolunta.

¹⁶ Amáske reikuaa Jehovápe, rehayhuvéta chupe ha reserviséta chupe haʼe oipotaháicha. Upéva nemomýita redesidi hag̃ua reñemeʼẽ Jehovápe rejapo hag̃ua hembipota. La Biblia heʼi voi entéro omoirũséva Jesúspe oñembyesarái vaʼerãha ijehegui (Marcos 8:34). ¿Mbaʼépa heʼise upéva? Upéva heʼise neñeʼẽrendutaha Jehovápe opaite mbaʼépe, rembotapykuetaha umi mbaʼe ndéve ndegustáva ha remotenondetaha chupe (elee 1 Pedro 4:2).

17. ¿Mbaʼérepa algúno noñanimái oñemeʼẽ Jehovápe?

¹⁷ Oĩ noñanimáiva oñemeʼẽ Jehovápe ndaikatuvéirõ g̃uarã upe rire okumpli Jehová ohaʼarõva chugui. Térã  okyhyje upeichahágui ojapórõ g̃uarã peteĩ mbaʼe ombopochýtava Jehovápe. Oĩ avei noñemeʼẽiva Jehovápe openságui upéicha natekotevẽmoʼãiha orrendi kuénta umi mbaʼe ojapóvare.

18. ¿Mbaʼépa nepytyvõta ani hag̃ua rekyhyje rejapórõ g̃uarã peteĩ mbaʼe ombopochýtava Jehovápe?

¹⁸ Rehayhúramo Jehovápe nderekyhyjemoʼãi rejapórõ g̃uarã peteĩ mbaʼe ombopochýtava chupe, síno reñehaʼãmbaitéta voi rejapo opa ikatúva rekumpli hag̃ua pe reprometéva chupe (Eclesiastés 5:4; Colosenses 1:10). Aníkena repensa ijetuʼuetereiha ñakumplipaite hag̃ua umi mbaʼe Jehová ojeruréva ñandéve. Apóstol Juan heʼi vaʼekue voi: “Jahayhu Ñandejárape heʼise ñakumpli imandamientokuéra, ha imandamientokuéra ndahaʼéi la hasyetereíva ñakumpli hag̃ua” (1 Juan 5:3).

19. ¿Mbaʼérepa nderekyhyjéi vaʼerã reñemeʼẽ hag̃ua Jehovápe rejapo hag̃ua ivolunta?

¹⁹ Natekotevẽi ningo ndeperfékto reñemeʼẽ hag̃ua Jehovápe rejapo hag̃ua ivolunta. Haʼe ndojeruremoʼãi voi ndéve umi mbaʼe ndaikatumoʼãiva rejapo (Salmo 103:14). Haʼe nepytyvõta rejapo hag̃ua pe oĩ porãva (Isaías 41:10). Ejerovia Jehováre nde pyʼaite guive, ha “haʼe ndegiáta reho hag̃ua tape porãre” (Proverbios 3:5, 6).

20. ¿Mbaʼépa rejapo vaʼerã reñemeʼẽ rire Jehovápe rejapo hag̃ua hembipota?

²⁰ ¿Reimémapa preparádo reñemeʼẽ hag̃ua Jehovápe rejapo hag̃ua hembipota? Reñemeʼẽ rire Jehovápe, rejapo vaʼerã ótra kósa iñimportantetereíva, rejevautisa vaʼerã.

21, 22. ¿Mbaʼéichapa rehechaukáta enterove renondépe reñemeʼẽma hague Jehovápe rejapo hag̃ua hembipota?

²¹ Rejevautisase vove, emombeʼu vaʼerã pe koordinadór ne kongregasionpeguápe reñemeʼẽma hague Jehovápe  ha rejevautisasemaha. Upéi haʼe ha umi ótro ansiáno orrepasáta nendive umi mbaʼe iñimportantevéva omboʼéva la Biblia. Haʼekuéra ohechakuaáramo reimemaha preparádo rejevautisa hag̃ua, heʼíta ndéve hikuái ikatuha rejevautisa pe asambléa oúvape. Upe asambléape ojejapóta peteĩ diskúrso omyesakãva mbaʼérepa iñimportánte jajevautisa. Upéi pe diskursánte ojapóta mokõi  pregúnta umi ojevautisátavape, ha rerrespondévo umi pregúnta rehechaukáta hína reñemeʼẽma hague Jehovápe rejapo hag̃ua hembipota (Mateo 10:32).

²² Upe rire ikatútama rejevautisa. Ha rejevautisa hag̃ua nemoingéta hikuái pe ýpe, upéi nemoñapymíta ha  neguenohẽ jey. Péicha enterove ohecháta reñemeʼẽma hague Jehovápe ha oikomaha ndehegui testígo de Jehová.

23. ¿Mbaʼépa heʼise jajevautisa “pe Túa, pe Taʼýra ha pe espíritu sánto rérape”?

²³ Jesús heʼi vaʼekue idisipulokuéra ojevautisa vaʼerãha “pe Túa, pe Taʼýra ha pe espíritu sánto rérape” (elee Mateo 28:19). ¿Mbaʼépa heʼise upéva? Upéva heʼise rerrekonoseha Jehová haʼeha pe Todopoderóso, Jesús rupive oñekumplitaha Ñandejára rembipota ha pe espíritu sánto haʼeha pe fuérsa Ñandejára oipurúva ojapo hag̃ua hembipota (Salmo 83:18; Mateo 28:18; Gálatas 5:22, 23; 2 Pedro 1:21).

24, 25. a) ¿Mbaʼépa orrepresenta pe vautísmo? b) ¿Mbaʼépa jahecháta pe kapítulo oúvape?

²⁴ Pe vautísmo ningo orrepresenta peteĩ mbaʼe iñimportantetereíva. Reñapymívo pe ýpe rehechauka hína rehejapaitemaha umi mbaʼe ndogustáiva Ñandejárape, ha esẽvo pe ýgui rehechauka hína upe guive reservitamaha Jehovápe ha rejapotaha haʼe oipotáva. Aníkena nderesarái nde reñemeʼẽha Jehovápe, ndahaʼéi peteĩ organisasiónpe ni rejapo hag̃ua yvypóra oipotáva.

²⁵ Reñemeʼẽ rire Jehovápe, katuete reñemoag̃uivéta hese ha erekóta chupe ne amígoramo (Salmo 25:14). Péro ndahaʼéi rejevautisa haguérente rejesalvátava. Apóstol Pablo heʼi vaʼekue: “Pesegi vaʼerã pembaʼapo péicha, rrespéto ha kyhyjepópe, pehupyty hag̃ua pe salvasión” (Filipenses 2:12). Rejevautisávo, reñepyrũ ramo hína reservi Jehovápe. ¿Mbaʼépa ikatu rejapo reñemoag̃uive hag̃ua Jehováre? Pe último kapítulo oĩva ko lívrope orrespondéta upe pregúnta.