OPA mbaʼe porã jaguerekóva ou Ñandejáragui. Haʼe ojapovaʼekue Kuarahy ñanderesape hag̃ua arakuépe, ha Jasy ha estrellakuéra ohesape hag̃ua pyharekue. Ha ojapo ko Yvy jaiko hag̃ua ipype.

Péro Kuarahy, Jasy, estrellakuéra ha avei ko Yvy ndahaʼéi umi mbaʼe Ñandejára ojapo ñepyrũ vaʼekue. Reikuaápa nde mbaʼépa pe ojapo ñepyrũ vaʼekue? Ojapo umi persóna ojoguáva chupe. Umívape ndaikatúi jahecha, ndaikatuiháicha jahecha Ñandejárape. La Biblia ombohéra ánhel umi persónape. Ñandejára ojapo umi ánhel oiko hag̃ua hendive yvágape.

Pe primer ánhel Ñandejára ojapovaʼekue ndaijojahái. Upéva haʼe Ñandejára Raʼy ypykue, ha ombaʼapovaʼekue Itúva ndive. Oipytyvõ Ñandejárape ojapo hag̃ua opa mbaʼe. Oipytyvõ chupe ojapo hag̃ua Kuarahy, Jasy ha estrellakuéra, ha avei ñande Yvy.

Mbaʼéichapa rakaʼe ko Yvy upérõ? Iñepyrũme avave ndaikatúi oiko ipype. Ýmante ojagarrapa opárupi. Péro Ñandejára oipotavaʼekue ko Yvy ape ári oiko hénte. Upévare, oñepyrũ oprepara ñandéve g̃uarã. Ha mbaʼépa ojapo upérõ?

Primero, ko Yvy oikotevẽvaʼekue ojehesape. Upévare Ñandejára ombohesape kuarahy ko Yvy ape ári. Ojapo upéva ikatu hag̃uáicha oĩ ára ha pyhare. Upe rire, Ñandejára omopuʼã pe yvy osẽ hag̃ua pe y ape ári.

Ñepyrũrã ndaiporivaʼekue mbaʼeve ko Yvy ape ári. Ojoguavaʼekue ko taʼanga rehechávape. Ndaipóri yvoty ni yvyra máta ni animalkuéra. Ndaipóri avei pira umi oséanope. Ñandejára oguereko gueteri heta hembiaporã ikatu hag̃uáicha animál ha hentekuéra oiko porã ko Yvy ape ári.