REIKUAÁPA pe kuña oĩva ko taʼangápe? Héra Rebeca. Ha pe kuimbaʼe ohug̃uaitĩva chupe héra Isaac. Rebeca haʼe hembirekorã. Mbaʼéichapa oikorakaʼe upéva?

Isaac túva, Abrahán, oipotavaʼekue itaʼýrape g̃uarã peteĩ tembireko iporãva. Ndoipotái Isaac omenda umi kuña Canaánpe oĩvare, pórke umi hénte oadora heta ñandejára guaʼúpe. Upévare Abrahán ohenói isiérvope ha heʼi chupe: ‘Aipota reho jey Haránpe, che hentekuéra oikohápe, ha egueru che raʼy Isaácpe hembirekorã’.

Upévare Abrahán siérvo ogueru diez kaméllo ha ojapo pe viáhe puku. Og̃uahẽmbotávo Abrahán hentekuéra oikohápe, opyta peteĩ ykuápe. Pytũmbotáma, ha upe jave umi kuña oikóva pe siudápe oho jepi oguenohẽ y pe ykuágui. Upévare pe Abrahán siérvo oñemboʼe Jehovápe ha heʼi: ‘Pe kuña oguenohẽva y chéve ha che kamellokuérape tahaʼe pe nde reiporavóva Isaac rembirekorã’.

Upe riremínte ou Rebeca oguenohẽ hag̃ua y. Ha ojerurévo chupe Abrahán siérvo hoyʼu hag̃ua, haʼe omeʼẽ chupe. Upéi oho oguenohẽ y heta porã ha omeʼẽ umi kamellokuéra ijyʼuheietévape. Heta ombaʼapo, pórke umi kaméllo hoyʼu hetaiterei.

Ojapopa rire Rebeca upéva, pe Abrahán siérvo oporandu chupe mbaʼéichapa héra itúva. Avei oporandu chupe ikatúpa haʼe opyta upe pyharépe hogakuérape. Rebeca heʼi chupe: ‘Che túva héra Betuel, ha ógape oĩ repyta hag̃ua’. Abrahán siérvo oikuaa Betuel haʼeha Nacor raʼy, Abrahán ermáno. Upévare oñesũ ha oagradese Jehovápe oguerahahaguére chupe Abrahán hentekuéra oikohápe.

Upe pyharépe Abrahán siérvo heʼi Betuel ha Rebeca ermáno, Labánpe, mbaʼerãpa oúraʼe. Mokõivéva heʼi Rebeca ikatuha oho hendive omenda hag̃ua Isaac rehe. Ha mbaʼépa heʼi Rebeca oñeporandúvo chupe? Heʼi ohoseha. Upévare, koʼẽ riremínte ojupi hikuái umi kaméllo ári ha oñepyrũ pe viáhe puku oho jey hag̃ua Canaánpe.

Kaʼaruetéma og̃uahẽrõ guare hikuái. Rebeca ohecha peteĩ kuimbaʼe oguatáva oikóvo pe ñúre. Upéva Isaac. Haʼe ovyʼa ohechávo Rebécape. Ojaporamo tres áño omanohague Sara, Isaac sy, ha haʼe ombyasy gueteri upéva. Péro koʼág̃a Isaac oñepyrũ ohayhueterei Rebécape, ha ovyʼa jey.