LOT ha ifamília oikovaʼekue Abrahán ndive Canaánpe. Peteĩ árape Abrahán heʼi Lótpe: ‘Koʼápe saʼíma yvy jaguerekopa hag̃ua ñane rymbakuéra. Jajeína ojuehegui. Nde rehóramo koʼágotyo che aháta amógotyo’.

Lot omaʼẽ pe yvy oĩvare. Ohecha pe yvy porã oguerekóva y ha kapiʼipe iporãva hymbakuérape g̃uarã. Ohecha pe Distrito del Jordán. Upévare, Lot oguerova upépe ifamília ha hymbakuéra. Upéi ojogapo hikuái Sodómape.

Umi hénte oĩva Sodómape iñañaiterei. Kóva oipyʼapyvaʼekue Lótpe, pórke haʼe hekoporã. Ñandejárape avei oipyʼapyvaʼekue ko mbaʼe. Ipahápe, Ñandejára omondo mokõi ánhel oikuaauka hag̃ua Lótpe ohunditaha Sodoma ha pe siuda hiʼag̃uíva upégui, hérava Gomorra, pórke iñañaiterei hikuái.

Umi ánhel heʼi Lótpe: ‘Pyaʼéke! Ejagarra ne rembireko ha umi mokõi nde rajýpe ha esẽ koʼágui!’. Lot ha ifamília oñemombegue, ha upévare umi ánhel ojagarra chupekuéra ipógui ha oguenohẽ pe siudágui. Upémaramo peteĩ ánhel heʼi: ‘Pedisparáke pende rekove rehehápe! Aníke pemaña pende rapykuépe. Pedispara umi montáña gotyo, ani hag̃ua pemano’.

Lot ha itajyrakuéra iñeʼẽrendu ha pyaʼe osẽ Sodómagui. Ndopytái ni sapyʼaitemi ha nomañái hapykue gotyo. Péro Lot rembireko naiñeʼẽrendúi. Mombyrymi oho rire Sodómagui, opyta ha omaña hapykuépe. Upe jave Lot rembirekógui oiko peteĩ póste jukyguigua. Rehechápa chupe ko taʼangápe?

Kóva ohechauka porã ñandéve peteĩ mbaʼe: Ñandejára osalvaha umi iñeʼẽrendúvape, péro umi naiñeʼẽrendúiva omanotaha.