EMAʼẼMI, pe mitã hasẽ ha ojagarrahína pe kuñataĩ kuã. Kóva haʼe Moisés. Reikuaápa nde mávapa ko kuñataĩ porãite? Peteĩ prinsésa ehípsia, pe Faraón rajy.

Moiséspe oñomi isy oguereko peve tres mése, ndoipotáigui umi ehipsiokuéra ojuka chugui imemby. Péro haʼe oikuaa ikatuha otopa hikuái Moiséspe. Upévare jahecháta mbaʼépa ojapo osalva hag̃ua chupe.

Ojapo peteĩ ajaka ikatuʼỹ hag̃uáicha oike pype y. Upe rire omoĩ Moiséspe pe ajakápe ha oheja peteĩ kapiʼity yvatépe, rrío Nilo rembeʼýpe. Heʼi Míriampe, Moisés ermána, ag̃uínte opyta hag̃ua ha ohecha mbaʼépa oiko chugui.

Upe riremínte ou Faraón rajy ojahu hag̃ua rrío Nílope. Upe jave ohecha sapyʼa pe ajaka oĩva kapiʼity yvatépe. Heʼi peteĩ isirviéntape: ‘Egueru chéve amo ajaka’. Pe prinsésa oavrívo pe ajaka, otopa peteĩ mitã iporãitereíva! Moisés hasẽhína, ha pe prinsésa ombyasy chupe. Haʼe ndoipotái ojejuka pe mitãme.

Upe jave ou hendápe Míriam. Ikatúpa rehecha chupe ko taʼangápe? Míriam oporandu pe Faraón rajýpe: ‘Ndereipotáipa aha ahenói peteĩ isrraelítape omongakuaa hag̃ua ndéve ko mitã?’.

‘Ejapomína chéve upéva’, heʼi chupe pe prinsésa.

Upémaramo Míriam pyaʼe oho omombeʼu isýpe. Moisés sy ou pe prinsésa rendápe, ha pe prinsésa heʼi chupe: ‘Egueraha ko mitã emongakuaa chéve, ha apagáta ndéve upévare’.

Upéicha isy tee omongakuaa Moiséspe. Upe rire omeʼẽ Faraón rajýpe oguereko hag̃ua chupe imemby teéramo. Upévare Moisés okakuaa pe Faraón rógape.