AJÉPA ojogua peteĩ mboietépe pe mbói ojepokáva yvyráre? Péro ndahaʼéi. Ojejapovaʼekue kóvregui. Jehová heʼi Moiséspe omoĩ hag̃ua pe yvyráre ikatu hag̃uáicha umi hénte omaña hese ha oikove. Péro umi oĩva yvýpe katu mboiete. Oisuʼu umi héntepe ha ombohasy chupekuéra. Ndépa reikuaa mbaʼérepa?

Umi isrraelíta oñeʼẽ vai haguére Ñandejára ha Moisés rehe. Heʼi hikuái: ‘Mbaʼére piko orerenohẽ Egíptogui romano hag̃ua ko desiértope? Koʼápe ndaipóri y ni tembiʼu. Ha ndoroʼusevéima ko maná’.

Péro pe manáningo tembiʼu porã. Jehová omeʼẽ chupekuéra peteĩ milágro rupi. Ha peteĩ milágro rupi omeʼẽ avei chupekuéra y. Péro umi hénte ndoagradeséi Ñandejárape oñangarekohaguére hesekuéra. Upévare Jehová ombou koʼã mbói ikatúva oporojuka okastiga hag̃ua umi isrraelítape. Umi mbói oisuʼu chupekuéra, ha oĩ heta omanóva.

Hasy peve umi hénte ou Moisés rendápe ha heʼi: ‘Ropeka, roñeʼẽ vai haguére Jehováre ha nderehe. Eñemboʼemína koʼág̃a Jehovápe oipeʼa hag̃ua koʼã mbói’.

Upévare Moisés oñemboʼe hesekuéra. Ha Jehová heʼi Moiséspe ojapo hag̃ua ko mbói kovreguigua. Heʼi chupe omoĩ hag̃ua peteĩ yvyráre, ha entéro umi oisuʼuvaʼekue chupe mbói, omañavaʼerã hese. Moisés ojapo Ñandejára heʼihaguéicha. Ha umi ojesuʼuvaʼekue omaña pe mbói kovreguiguáre ha okuera.

Kóvagui ñaaprende peteĩ mbaʼe. Enterove jajogua umi isrraelítape, umi oisuʼuvaʼekuépe mbói. Enterove hénte ituja, hasy ha omano. Upéva oiko pe primer kuimbaʼe ha kuña, Adán ha Eva, omboykehaguére Jehovápe, ha ñande enterove haʼe itaʼyrakuéra. Péro Jehová omoĩ peteĩ tape jaikove hag̃ua opa ára g̃uarã.

Jehová ombou ko Yvy ape ári Itaʼýra Jesucristo. Jesúspe ojejukavaʼekue peteĩ yvyráre, pórke heta oimoʼãvaʼekue haʼe iñañaha. Péro Jehová omeʼẽvaʼekue Jesúspe ñandesalva hag̃ua. Ñamañárõ hese ha jasegi chupe ikatúta jaiko opa ára g̃uarã. Péro upe rire jaikuaavéta upévagui.