REIKUAÁPA nde mávapa pe kuña iporãitéva oúva David rendápe? Héra Abigail. Haʼe peteĩ kuña iñakã porãva, ha ojoko Davídpe ani hag̃ua ojapo peteĩ mbaʼe vai. Péro jaikuaa mboyve mbaʼépa rakaʼe upéva, jahechami mbaʼépa oikóraʼe David rehe.

David okañy rire Saúlgui, oho oiko peteĩ itakuápe. Upépe ou hendápe iñermanokuéra ha umi ótro ifamiliakuéra avei. Ou hendápe 400 kuimbaʼe rupi, ha David oñemoĩ odirihi chupekuéra. Upe rire David oho Moábpe pe rréi rendápe ha heʼi chupe: ‘Ehejamína che ru ha che sy topyta nendive, aikuaa peve mbaʼépa oikóta chehegui’. Upéi, David ha umi oĩva hendive okañy umi sérro oĩhápe.

Upe riréma David oikuaa Abigáilpe. Abigail ména héra Nabal, peteĩ karai ipláta ha ijyvy hetáva. Oguereko 3.000 ovecha ha 1.000 kavara. Nabal haʼe peteĩ karai ipyʼahatãva. Péro hembireko Abigail iporãiterei ha ojapo avei pe iporãva. Peteĩ árape osalva ifamíliape voi. Jahechami mbaʼéichapa ojapo upéva.

David ha umi oĩva hendive ipyʼaporã Nabal ndive. Oipytyvõ hikuái chupe oñangareko hag̃ua ijovechakuérare. Peteĩ árape, David omondo umi kuimbaʼe oĩva hendive ojeruremi hag̃ua peteĩ favór Nabálpe. Og̃uahẽ hikuái Nabal rendápe haʼe ha umi oipytyvõva chupe oñapĩ jave ijovechakuéra. Upe jave arete, ha Nabal oguereko heta mbaʼe iporãva ojeʼu hag̃ua. Umi kuimbaʼe David omondovaʼekue heʼi chupe: ‘Ore orevuéno nendive. Noromondái ndehegui ni peteĩ ovecha, roipytyvõ katu oñeñangareko hag̃ua hesekuéra. Ha emeʼẽmína oréve koʼág̃a roʼumivaʼerã’.

‘Nameʼẽmoʼãi tembiʼu peẽichagua kuimbaʼépe’, heʼi Nabal. Iñeʼẽ pohýi chupekuéra ha oñeʼẽ vai David rehe. Umi kuimbaʼe omombeʼúvo Davídpe upe oikovaʼekue, haʼe ipochyeterei. ‘Pejagarra pende espáda!’, heʼi chupekuéra David. Ha oho hikuái ojuka hag̃ua Nabal ha umi kuimbaʼekuéra hendive oĩvape.

Peteĩ kuimbaʼe oservíva Nabálpe, ohendúvo iñeʼẽ pohyiha chupekuéra, omombeʼu Abigáilpe pe oikovaʼekue. Pyaʼe Abigail oprepara hiʼupy, ha ohupi hymba vurrokuéra ári ha oho. Ojotopávo David ndive, oguejy hymba vúrro árigui, oñakãity henondépe ha heʼi: ‘Nde karai, aníkena repena che ména Nabal heʼívare. Haʼéningo ivýro, ha ojapo vyrorei. Koʼápe agueru ndéve peteĩ rregálo. Ejagarrána, ha oreperdonami pe ojehuvaʼekuére’.

‘Nde nearandu’, okontesta David. ‘Nde chejoko ani hag̃ua ajuka Nabálpe iñeʼẽ pohyihaguére. Tereho jey katu pyʼaguapýpe nde rógape.’ Upéi, Nabal omano rire, Abigail haʼe avei David rembireko.