KO TAʼANGÁPE jahecha peteĩ paraíso. Oiméne koichagua rakaʼe pe ohechaukavaʼekue Ñandejára iproféta Isaíaspe. Isaías oikovaʼekue Jonás riremi.

Paraíso heʼise “hardín” térã “párke”. Nanemomanduʼáipa peteĩ mbaʼe rehechamavaʼekuére ko lívrope? Pe hardín iporãitéva ojapovaʼekue Ñandejára Adán ha Évape g̃uarã, ajépa? Péro, oikónepa ko Yvy tuichakuégui peteĩ paraíso?

Jehová heʼi iproféta Isaíaspe oskrivi hag̃ua pe paraíso pyahúgui, ojapótava ipuévlope g̃uarã. Heʼi: ‘Umi lóvo ha ovecha oiko porãta oñondive. Vakaraʼy ha león raʼy okarúta oñondive, ha mitãmimi oñangarekóta hesekuéra. Ha pe mitãraʼy ohugáta peteĩ mbói ypýpe ha pe mbói ndojapomoʼãi hese mbaʼeve’.

‘Upéva núnka ndoikomoʼãi’, ikatu oĩ heʼíva. ‘Ymaite guivéma oĩ mbaʼe vai ko Yvy ape ári, ha núnka ndopamoʼãi.’ Péro epensamína, mbaʼéichapa rakaʼe pe lugár omeʼẽvaʼekue Ñandejára Adán ha Évape hogarã?

Ñandejára omoĩvaʼekue Adán ha Évape peteĩ paraísope. Haʼekuéra naiñeʼẽrendúigui Ñandejárape operde hóga porãite, ha oñepyrũ ituja ha omano. Ñandejára opromete umi chupe ohayhúvape omeʼẽtaha avei umi mbaʼe porã operdevaʼekue Adán ha Eva.

Pe paraíso pyahu oútavape ndaiporimoʼãi mbaʼeve oporombyai ha oporohundíva. Ojeguerekóta pyʼaguapy añetetéva. Enterove hesãita ha oikóta vyʼápe Ñandejára oipotahaguéicha iñepyrũme. Upe rire jahecháta mbaʼéichapa ojapóta Ñandejára upéva.