NDÉPA reikuaa mbaʼérepa ko kuimbaʼe oñemboʼehína Jehovápe? Mbaʼérepa omoĩ koʼã kárta Jehová altár renondépe? Kóva haʼe pe rréi Ezequías. Haʼe ogoverna umi mokõi trívu oĩva súr gotyo Israélpe. Ha koʼág̃a heta iprovléma. Mbaʼérepa?

Pórke umi ehérsito asírio ohundíma umi 10 trívu oĩva nórtepe. Jehová oheja oiko upéva iñañaitereígui umi hénte. Ha koʼág̃a umi ehérsito asírio ou pe rréino oguerekóva umi mokõi trívu kóntrape.

Pe rréi Asiriaygua oguerukaramoite umi kárta rréi Ezequíaspe. Koʼãva haʼe umi kárta pe rréi Ezequías omoĩva Ñandejára renondépe. Umi kártape oñembohory Jehováre, ha heʼi Ezequíaspe oñentrega hag̃ua. Upévare Ezequías oñemboʼe: ‘Jehová, oresalvamína pe Asiriaygua rréigui. Upéicha opa tetãnguéra oikuaáta nde añoite haʼeha Ñandejára’. Ohendúnepa chupe Jehová?

Ezequías ogoverna porã. Ndojoguái umi rréi iñañávape, ogovernavaʼekue umi 10 trívu, ni itúva Acázpe, peteĩ rréi iñañavaʼekue. Haʼe oñehaʼãmbaite ojapo Jehová léipe heʼíva. Upévare, oñemboʼepa rire, pe proféta Isaías oguerahauka chupe ko mensáhe Jehovágui: ‘Pe rréi Asiriaygua ndoikemoʼãi Jerusalénpe. Ni peteĩ isoldádo noñemoag̃uimoʼãi hese. Ndopoimoʼãi hikuái ni peteĩ flécha ko siudáre’.

Emaʼẽmi pe taʼanga ko páhinape oĩvare. Ndépa reikuaa mávapa umi soldádo omanovaʼekue? Umi soldádo asírio. Jehová ombou hiʼánhel, ha peteĩ pyharépe pe ánhel ojuka 185.000 soldádo asírio. Upévare, pe Asiriaygua rréi oho jey hógape.

Pe rréino oguerekóva mokõi trívu ojesalva, ha umi hénte oiko jey pyʼaguapýpe. Péro omano rire Ezequías, itaʼýra Manasésgui oiko rréi. Manasés, ha upe rire itaʼýra Amón, ogoverna vaieterei. Upévare henyhẽ ko Yvy mbaʼe vai ha violénsiagui. Pe rréi Amónpe ojuka rire isiervokuéra, itaʼýra Josíasgui oiko rréi pe rréino oguerekóvape mokõi trívu.