JAJEVÝTA koʼág̃a unos kuántos áño Esdras oho mboyve Jerusalénpe. Mardoqueo ha Ester haʼe umi isrraelíta iñimportantevéva oĩva Persia rréinope. Ester haʼe rréina ha iprímo Mardoqueo haʼe pe segundo ipoderosovéva pe rréi rire. Jahechami mbaʼéichapa oikorakaʼe koʼã mbaʼe.

Ester tuvakuéra omanovaʼekue haʼe imichĩme gueteri, ha upévare Mardoqueo omongakuaa chupe. Pe rréi Persiaygua héra Asuero, ha oguereko peteĩ palásio Súsape, ha Mardoqueo haʼe peteĩ hembiguái. Peteĩ árape, Vasti, pe rréi rembireko, naiñeʼẽrendúi iménape, ha pe rréi oiporavo hembireko pyahurã oiko hag̃ua chugui rréina. Ndépa reikuaa mávapepa oiporavo? Pe kuñataĩ porãite hérava Estérpe.

Rehechápa ko kuimbaʼe ojejapoitéva ha oñeñakãitýva chupe umi hénte? Héra Hamán, peteĩ kuimbaʼe iñimportánteva Pérsiape. Haʼe oipota Mardoqueo, oguapyvahína upépe, oñeñakãity avei chupe. Péro Mardoqueo ndojapói upéva. Chupe g̃uarã noĩporãi oñeñakãity peteĩ kuimbaʼe iñañávape. Hamán ipochyeterei. Ha koʼág̃a rehecháta mbaʼépa ojapo.

Hamán ijapu pe rréipe umi isrraelitakuérare. ‘Haʼekuéra iñaña ha ndojapói nde léi ojeruréva’, heʼi. ‘Ojejukavaʼerã chupekuéra.’ Asuero ndoikuaái hembireko haʼeha isrraelíta. Upévare ohendu Hamánpe, ha ojapo peteĩ léi heʼíva ojejukavaʼerãha peteĩ árape enterove isrraelitakuérape.

Mardoqueo ojepyʼapyeterei ohendúvo pe léi oñeguenohẽva. Heʼiuka Estérpe: ‘Eñeʼẽ pe rréi ndive, ha ejerure chupe tañandesalva’. Pe léi oĩva Pérsiape heʼi ndaikatuiha ojeike pe rréi rendápe haʼe voi noporoinvitáiramo. Péro Ester oho oñeinvitaʼỹre. Pe rréi ohupi haʼe oĩha gotyo ivára oroguigua. Upéva heʼise ndojejukaivaʼerãha Estérpe. Ester oinvita pe rréi ha Hamánpe peteĩ karu guasurã. Upépe oĩ jave pe rréi oporandu Estérpe mbaʼépa oipota ojapo chupe. Ester heʼi omombeʼutaha chupe haʼe ha Hamán ou jeýrõ koʼẽrõ ótro karu guasurã.

Upépe, Ester heʼi pe rréipe: ‘ojejukapáta che puévlope ha chéve avei’. Pe rréi ipochy. ‘Máva piko oñanima ojapo upéva?’, oporandu.

‘Pe kuimbaʼe, pe enemígo, haʼe ko Hamán ñaña!’, heʼi Ester.

Koʼág̃a katu pe rréi ipochy añete. Ojukauka Hamánpe. Upe rire, pe rréi ojapo Mardoquéogui pe segundo ipoderosovéva haʼe rire. Upémaramo Mardoqueo ojapouka peteĩ léi pyahu heʼíva isrraelitakuéra ikatuha oñedefende upe ára ojeʼehaguépe ojejukataha chupekuéra. Koʼág̃a Mardoqueo peteĩ kuimbaʼe iñimportánteva, upévare heta oĩ oipytyvõva isrraelitakuérape, ha koʼãva ojesalva iñenemigokuéragui.