EMAÑAMI Jesús oñañuãhína peteĩ mitãʼípe. Ikatu rehecha haʼe ohayhuha mitãnguérape. Koʼã kuimbaʼe omañáva haʼe ijapostolkuéra. Reikuaa piko mbaʼépa heʼi chupekuéra Jesús?

Jesús ha umi apostolkuéra ouramoite peteĩ viáhe pukúgui. Pe tapére umi apóstol ojodiskutíkuri. Upe rire, Jesús oporandu chupekuéra: ‘Mbaʼérepa pejodiskutíraʼe tapére?’. Añetehápe Jesús oikuaa mbaʼérepa ojodiskutíkuri hikuái. Péro haʼe oporandu ohecha hag̃ua mbaʼépa heʼi chupe hikuái.

Umi apóstol ndeʼíri mbaʼeve, pórke pe tapére ojodiskuti oúvo hikuái mávapa pe tuichavéva ijapytepekuéra. Oĩ umi apostolkuéra apytépe oñembotuichasevéva hapichágui. Mbaʼéichapa heʼíta chupekuéra Jesús naiporãiha upéva?

Haʼe ohenói peteĩ mitã, ha omoĩ henondepekuéra. Upémaramo heʼi umi idisípulope: ‘Aipota peikuaa porã ko mbaʼe: Napekambiáiramo ha peiko mitãicha, núnka ndapeikemoʼãi Ñandejára rréinope. Pe rréinope tuichavéva haʼe pe oikóva ko mitãicha’. Ndépa reikuaa mbaʼérepa heʼi upéicha?

Pórke umi mitã michĩva noñehaʼãi oñemombaʼeguasuve hapichágui. Upévare umi apóstol oaprendevaʼerã koʼã mitãgui anive hag̃ua oñorairõ oñemombaʼeguasuségui.

Ndahaʼéi upérõ añónte Jesús ohechaukavaʼekue ohayhuha mitãnguérape. Ohasa riremi unos méses, oĩ umi oguerúva imembykuéra Jesús rendápe. Ha umi apóstol ojokose chupekuéra. Péro Jesús heʼi: ‘Peheja umi mitãnguéra tou che rendápe, ani pejoko, pórke Ñandejára rréino opertenese upeichaguápe’. Upémaramo oñañuã umi mitãme, ha ovendesi chupekuéra. Ajépa iporãite jaikuaa Jesús ohayhuha mitãnguérape!