EMAʼẼMI pe palóma oguejy oúvo pe kuimbaʼe akã ári. Pe kuimbaʼe haʼe Jesús. Oguerekóma 30 áño rupi. Ha hendive oĩ Juan. Ñaaprendémakuri chugui michĩmi. Nemanduʼápa María ohórõ guare ovisita ipariénte Elisabétpe, ha pe mitã oĩvaʼekue Elisabet ryépe opohague vyʼágui? Upe mitã neʼĩrãva onase haʼevaʼekue Juan. Péro, mbaʼépa ojapohína koʼág̃a Juan ha Jesús?

Juan omoñapymiramoite Jesúspe rrío Jordánpe. Péicha ojejapo pe vautísmo. Oñemoñapymi raẽ peteĩme ýpe ha upe rire oñeguenohẽ. Juan ojapo upéicha umi héntere; upévare oñehenói chupe Juan el Bautista. Péro, mbaʼérepa ovautisa Jesúspe?

Juan ovautisa Jesúspe oúgui hendápe ha ojerure chupe. Juan ovautisa umi ohechaukasévape oñembyasyha umi tembiapo vai ojapovaʼekuére. Péro, Jesús piko ojapóraʼe peteĩ mbaʼe vai ombyasy hag̃ua? Nahániri, haʼe núnka ndojapoivaʼekue ivaíva, haʼégui Ñandejára Raʼy ouvaʼekue yvágagui. Upévare, ndahaʼéi ombyasýgui hembiapo vaikue oúva Juan rendápe ovautisa hag̃ua chupe. Jahechamína mbaʼérepa.

Ou mboyve Juan rendápe, Jesús haʼevaʼekue karpintéro. Peteĩ karpintéro ojapo heta mbaʼe yvyrágui, tahaʼe mesa, apyka térã vánko. José, María ména, haʼevaʼekue karpintéro, ha omboʼe Jesúspe oiko hag̃ua avei chugui karpintéro. Péro Ñandejára nombouivaʼekue Itaʼýrape Yvy ape ári oiko hag̃ua chugui karpintéro. Oguereko peteĩ tembiapo iñimportánteva chupe g̃uarã, ha og̃uahẽma pe tiémpo oñepyrũ hag̃ua ojapo. Upévare, ohechauka hag̃ua ojapotamaha itúva volunta, Jesús ojerure Juánpe ovautisa hag̃ua chupe. Ombovyʼápa ko mbaʼe Ñandejárape?

Ombovyʼa chupe, pórke Jesús osẽ rire ýgui, peteĩ ñeʼẽ yvága guive heʼi: ‘Kóva haʼe che raʼy, che aguerohorýva’. Avei, haʼetévaicha pe yvága ojeavríva ha oguejy hiʼári peteĩ palóma. Péro ndahaʼéi peteĩ palóma. Ojoguánte chupe. Añetehápe haʼe Ñandejára espíritu sánto.

Koʼág̃a Jesús opensavaʼerã heta mbaʼére, upévare oho peteĩ lugár oĩ hag̃uáme haʼeño 40 día aja. Upépe Satanás ou hendápe. Tres vése Satanás oñehaʼã ojapouka Jesúspe ivaíva Ñandejára léi kóntrape. Péro Jesús ndojapói upéva.

Upe rire, Jesús ou jey ha oikuaa umi kuimbaʼe haʼétavape isegidór térã idisípulo ypykue. Umíva apytépe oĩ: Andrés, Pedro (oñehenóiva avei Simón), Felipe ha Natanael (oñehenóiva avei Bartolomé). Jesús ha koʼã idisípulo oho Galilea distríto gotyo. Upépe opyta hikuái Natanael puévlope, hérava Caná, ha upépe Jesús oho peteĩ kasamientohápe ha ojapo ñepyrũ milágro. Ndépa reikuaa mbaʼépa rakaʼe upéva? Ýgui ojapo víno.