Pe tuguy ningo iñimportanteterei, pórke heseʼỹ ndaikatúi jaikove. Ha Ñandejára haʼe rupi ñande Kreadór, oreko derécho heʼívo ñandéve mbaʼéichapa ojepuru vaʼerã pe tuguy. ¿Mbaʼépa heʼi Ñandejára pe tuguýre? ¿Ikatúpa ojeʼu, térã ojepuru ojejapo hag̃ua transfusión? ¿Ha mbaʼépa ereko vaʼerã enkuénta edesidi porã hag̃ua koʼã mbaʼépe?

1. ¿Mbaʼépa Jehová opensa pe tuguýre?

Jehová heʼi vaʼekue isiervokuéra yma guarépe: “Umi mbaʼe oikovéva rekove oĩ hína huguýpe” (Levítico 17:14). Jehovápe g̃uarã pe tuguy orrepresenta hína la vída. Ha ñande rekove haʼe rupi peteĩ rregálo sagrádo oúva Ñandejáragui, ikatu jaʼe pe tuguy haʼeha avei álgo sagrádo.

2. ¿Mbaʼépa oproivi Ñandejára?

Pe dilúvio riremi Jehová oproivi vaʼekue isiervokuéragui hoʼu tuguy ha orrepeti jey ko mandáto umi israelítape (elee Génesis 9:4 ha Levítico 17:10). Tiémpo rire heʼi avei upéva umi kristiánope pe kuérpo governánte rupive: “Pesegíkena […] pemboykete pe tuguy” (elee Hechos 15:28, 29).

¿Mbaʼépa heʼise ñamboykete vaʼerãha pe tuguy? Ñantende hag̃ua upéva ikatu ñamoĩmi peteĩ ehémplo: epensamína peteĩ doktór heʼiha ndéve ndovaleiha reʼu vevída. ¿Heʼisépa upéva ikatuha heʼu umi tembiʼu orekóva alkoól, térã ejagarrátapa emoĩka ne vénarupi? Ni mbaʼevéicharõ, upéva ningo naisentidomoʼãi. Upéicha avei Ñandejára omandávo ñandéve ndovaleiha jaʼu tuguy, heʼise avei ndovaleiha jaʼu umi animál ndojehuguyʼói vaʼekue roʼokue, térã peteĩ tembiʼu orekóva tuguy.

Oĩ avei heta tratamiénto tuichaiterei ojoavýva la Biblia heʼívandi. Umíva apytépe ojepurúramo tuguy ojejapo hag̃ua transfusión, térã ojepurúramo peteĩva umi 4 párte iñimportantevéva orekóva pe tuguy, hérava glóbulo rojo, glóbulo blanco, plaqueta ha plasma. Péro oĩ avei tratamiénto noñemoĩriva katuete Ñandejára heʼívare. Por ehémplo, ojejapo hag̃ua algúno pohã ikatu ojepuru umi fracciones sanguíneas, haʼéva párte michĩetereíva oñeguenohẽva umi glóbulo rojo, glóbulo blanco, plaqueta térã plásmagui. Ha oĩ avei ótro tratamiénto ojepuruhápe pe persóna ruguyete voi. ¿Ikatúpa jaasepta koʼã tratamiénto? Upéva káda únomante jadesidi vaʼerã (Gálatas 6:5). a

 EJEPYʼAMONGETAMÍNA

3. Eiporavókena umi tratamiénto ombovyʼátava Jehovápe

¿Mbaʼéichapa ikatu reikuaa Ñandejára oguerohorýpa peteĩ tratamiénto? Ehecha pe VIDÉO, ha upéi eanalisa mbaʼérepa iñimportánte ejapo koʼã mbaʼe edesidi mboyve:

• Ejerure Jehovápe tanemoarandu (Santiago 1:5).

• Einvestiga mbaʼépa heʼi la Biblia ha mbaʼéichapa ikatu ejapo la heʼíva (Proverbios 13:16).

• Ehecha mbaʼeichagua tratamiéntopa oĩ disponívle pe nde reikohárupi.

• Eime vaʼerã segúro mbaʼeichagua tratamiéntopa ni mbaʼevéicharõ ndereaseptamoʼãi.

• Ejeasegura ne konsiénsia nanemolestamoʼãiha reaseptáramo pe tratamiénto (Hechos 24:16). b

• Ereko vaʼerã enkuénta avave ndaikatuiha odesidi nde vése ko témape, tahaʼe jepe raʼe ne ména, ne rembireko, peteĩ ansiáno térã ne instruktór (Romanos 14:12).

• Eanotapaite umi mbaʼe edesidíva.

4. Umi testígo de Jehová oheka umi tratamiénto médiko iporãvéva

Ikatu jasegi Ñandejára léi heʼíva pe tuguýre ha avei jaasepta umi tratamiénto médiko iporãva ndojepuruihápe tuguy. Ehecha pe VIDÉO.

Elee Tito 3:2, ha upéi erresponde ko porandu:

• ¿Mbaʼérepa iñimportánte ñaime trankílo ha ñanderrespetuóso ñañemongeta jave umi doktórndi?

 5. Tratamiénto ojepuruhápe umi párte michĩvéva

Umi 4 párte iñimportantevéva orekóva pe tuguy haʼe glóbulo rojo, glóbulo blanco, plaqueta ha plasma, ha umívagui ikatu jey hína ojepeʼa umi párte michĩvéva térã fracciones sanguíneas. c Koʼãva ikatu ojepuru ojejapo hag̃ua pohã omongueráva heta mbaʼasy, ha avei ojejoko hag̃ua umi emorráhia.

Káda kristiáno ningo ohekomboʼe vaʼerã ikonsiénsia la Biblia rupive. Ha upéi oreko vaʼerã enkuénta mbaʼépa heʼi ikonsiénsia, ha haʼete odesidi oaseptátapa umi pohã térã tratamiénto orekóva umi párte michĩvéva. Oĩ kristiáno ndoaseptáiva ni peteĩva umi párte michĩvéva jepe, péro ótro kristiánope katu ikonsiénsia opermiti oasepta.

Eñeporandumína ko mbaʼe edesidi mboyve:

• ¿Mbaʼéichapa ikatu aexplika umi doktórpe mbaʼérepa aasepta térã arrechasa umi párte michĩvéva orekóva pe tuguy?

 RRESÚMEN

Jehová oipota ñarrekonose pe tuguy haʼeha álgo sagrádo.

Rrepáso

• ¿Mbaʼérepa Jehová heʼi pe tuguy sagradoha?

• ¿Mbaʼérepa jaʼekuaa Ñandejára ndoipotaiha ñamoĩka tuguy?

• ¿Mbaʼéichapa ikatu edesidi porã mbaʼe tratamiéntopa esegíta?