Ermanokuéra pohayhuetéva:

Áño 2008 guive, Ñemañaháme osẽ pe artíkulo hérava “Jajeroviave hag̃ua”. Upe guive, pyʼỹinte osẽ ko artíkulo porãite.

¿Mbaʼépa ojeʼe koʼã artíkulore? Peteĩ kuñakarai olee vaʼekue upe oñeʼẽva Marta rehe, heʼi: “Apuka rei jey chejehe, ajoguaiterei Mártape, che siémpre atrahina avei ápe ha pépe añangareko porã hag̃ua che invitadokuérare. Sapyʼánte ni nachetiémpoi apytuʼu ha ahasa porã hag̃ua hendivekuéra”. Peteĩ mitãkuña olee vaʼekue pe artíkulo oñeʼẽva Ester rehe katu heʼi: “Sapyʼánte jajoguaseterei umi ao, nañaikotevẽiramo jepe térã jaipota umi osẽ ramovévante. Ha añetehápe ningo ñañemonde porã vaʼerã voi, péro ndovaléi jahasa la rrája. [...] Jehovápe g̃uarã iñimportanteve hína ñande pyʼapýpe oĩva”. Ha peteĩ ermána olee vaʼekue pe artíkulo oñeʼẽva apóstol Pedro rehe, heʼi: “Igustoiterei chéve, haʼetévaicha voi aime mbaʼéva upépe. Aleévo Pedro rembiasakue, haʼete ahecha, añandu ha ahendupáva umi mbaʼe oikóva”.

Koʼã ermána ha hetave tapicha oagradeseterei koʼã artíkulo porãite osẽ vaʼekuére. Umíva ohechauka añeteha apóstol Pablo heʼi vaʼekue: “Opa mbaʼe ojehai vaʼekue yma Ñandejára Ñeʼẽme, ojehai ñanerekomboʼe hag̃ua” (Rom. 15:4). Jehová ohaika la Bíbliape koʼã kuimbaʼe ha kuña rembiasakue, ikatu hag̃uáicha ñanemboʼe heta mbaʼe iñimportánteva. Upévare, jaservímaramo jepe Jehovápe heta áñore, ikatu gueteri ñaaprende hetaiterei mbaʼe chuguikuéra.

Romokyreʼỹ enterovépe oleéma hag̃ua ko lívro. Ikatu pehesaʼỹijo pejapo jave pe Aty Jastudia Hag̃ua Ñande Rogayguándi, umi mitãme katuete ogustaitereíta pejapóramo upéicha. Ha ojestudia vove kongregasiónpe katu, pomokyreʼỹ ani hag̃ua pefalta rreunionhápe. Peleévo ko lívro, peñehaʼã peñatende porã, peñeimahina peimerõguáicha upépe ha pepensa mbaʼépa peẽ pejapo vaʼerãmoʼã peimérire upe situasiónpe. Upéicha pejapóramo, haʼetéta voi peñandúva umi mbaʼe ohasa vaʼekue hikuái.

Rovyʼaiterei ropresentávo peẽme ko lívro. Hiʼãite oréve penepytyvõ peẽme ha pene famíliape. Ore maitei ha mborayhu peẽme g̃uarã.

Testígo de Jehová Kuérpo Governánte