1, 2. ¿Mbaʼéichapa peteĩ superintendénte ohecha Ñandejára siervokuéra yma guarépe, ha mbaʼérepa igustoite vaʼerã jaguerekóramo avei chupekuéra ñane amígoramo?

 PETEĨ ermána, ohendu rire peteĩ superintendénte ijedámava diskúrso, heʼi: “Ko ermáno oñeʼẽ jave Ñandejára siervokuéra yma guarére, haʼete voi oñeʼẽva iñamigokuérare mbaʼe”. Ko ermáno ningo heta áñorema ohesaʼỹijo ha omboʼe la Biblia hapichakuérape. Upéicha rupi oikuaa porãiterei umi kuimbaʼe ha kuña iñeʼẽrenduetévape oñeʼẽha la Biblia, ha haʼete voi iñamígo hikuái.

² ¡Ajépa igustoite vaʼerã jaguerekóramo avei umi kuimbaʼe ha kuña iñeʼẽrenduetévape ñane amígoramo! ¿Ndépa rehecha chupekuéra upéicha? Epensamíntena reikoha Ñandejára siervokuéra iñeʼẽrenduetéva tiémpope ha ikatuha resẽ reguata ha reñemongeta hendivekuéra. Katuete ningo upéicha reikuaa porãvéta chupekuéra. Epensamíntena mbaʼeichaitépa nemokyreʼỹ ha nepytyvõta reñeʼẽ mbaʼéramo Noé, Abrahán, Rut, Elías térã Ester ndive. ¡Ajépa hetaite konsého porã ikatu omeʼẽ ndéve hikuái! (Elee Proverbios 13:20.)

 3. a) ¿Mbaʼéichapa ikatu ñanepytyvõ umi kuimbaʼe ha kuña ojeroviaitéva ehémplo? b) ¿Mbaʼe porandúpa ñambohováita?

³ Oñemoingove jey vove umi hekojojávape, heta javyʼa ha jahasa porãta hendivekuéra (Hech. 24:15). Péro koʼág̃ama voi ikatu ñanepytyvõ umi kuimbaʼe ha kuña ojeroviaitéva ehémplo oĩva la Bíbliape. ¿Mbaʼéichapa ñanepytyvõta? Pablo omombeʼu mbaʼépa jajapo vaʼerã: “Pehaʼanga umi ojerovia ha ipasiénsiavape, umíva orresivíta umi mbaʼe porã oñepromete vaʼekue” (Heb. 6:12). Jalee mboyve umi istória porãite, ñambohovaimi koʼã porandu: ¿Mbaʼépa heʼise jerovia ha mbaʼérepa iñimportánte? ¿Mbaʼéichapa ikatu ñahaʼanga umi kuimbaʼe ha kuña ojeroviate vaʼekuépe?

 4. ¿Mbaʼépa opensa umi hénte pe jeroviáre, ha mbaʼérepa jaʼe tuicha ojavyha hikuái?

⁴ Iñimportanteterei ningo jajerovia, ha Ñandejára siervokuéra yma guare ojapo  haguéicha, ñamombaʼe vaʼerã upéva. Ko lívrope ñahesaʼỹijóta umíva rembiasakue. Péro ñambyasýramo jepe, ñane tiémpope oĩ heta tapicha opensáva jajerovia reiha. Heʼi hikuái umi ojeroviáva ivyroitereiha ogueroviávo umi mbaʼe ndojehecháiva ni ndoikóiva gueteri. Péro, ¿añete piko upéicha? Nahániri. Jajerovia añete ndeʼiséi ñañandunteha peteĩ mbaʼe térã jaguerovia reinteha Ñandejára oexistiha. Umi mbaʼe ñañandúva ningo ikatu ñanembotavy térã okambiáma ótro día g̃uarã. Avei ndahaʼéi vaʼerã jaguerovia reínteva Ñandejára oexistiha. La Biblia heʼi ‘umi demónio jepe ogueroviaha avei upéva ha oryryipa okyhyjégui’ (Sant. 2:19).

5, 6. a) ¿Mbaʼéichapa omyesakã Pablo mbaʼépa heʼise jerovia? b) ¿Mbaʼe ehémplopa ohechauka oñemopyenda porãha ñande jerovia?

⁵ Jajerovia añete ndeʼiséi ñandevýroguinte jagueroviaha peteĩ mbaʼe. Jahechamína mbaʼépa heʼi la Biblia (elee Hebreos 11:1). Pablo omyesakãvo mbaʼépa heʼise jerovia, heʼi mokõi mbaʼe iñimportánteva. Ñepyrũrã heʼi jagueroviaha heta mbaʼe “ndajahecháiramo jepe”. Por ehémplo, ñande ndaikatúi jahecha Jehovápe, Itaʼýrape ni pe Irréino oĩva yvágape, péro jaikuaa porã oexistiha. Pablo heʼi avei jagueroviaha “oikotaha katuete umi mbaʼe ñahaʼarõva”. Por ehémplo, ñande ndaikatúi jahecha pe múndo pyahu koʼẽrõitéma omoĩtava Ñandejára Rréino. Péro ¿heʼisépa upéva jajerovia reinteha umi mbaʼére?

⁶ Nahániri. Apóstol Pablo ohechauka ñandéve ñande jerovia oñemopyenda porãha. Heʼírõ guare “jaikuaa porãha añeteha umi mbaʼe jagueroviáva”, oiporu peteĩ ñeʼẽ ikatúva avei ojetradusi “título de propieda”. Ñamoĩ chupe peteĩ nde rapicha orregalaha ndéve nde rogarã ha omeʼẽ ndéve upe óga título, ha heʼi: “Ko óga nembaʼéma”. Upéva ndeʼiséi reikotaha pe título guýpe, nderehecháiramo jepe upe óga, upe dokuménto ohechaukáma ndéve oĩha peteĩ óga nembaʼerã. Upéicha avei ñande jerovia oñemopyenda porã, ha oĩ heta mbaʼe ohechaukáva añeteha umi mbaʼe jagueroviáva.

 7. ¿Mbaʼépa heʼise jajerovia añete?

⁷ Upéicharõ, jajerovia añete heʼise jajeroviaha ñande pyʼaite guive Jehováre añoite, jaikuaa porã rupi chupe. Upéva ñanepytyvõ jahecha hag̃ua chupe ñande Túvaicha ha jaguerovia okumplitaha katuete opa mbaʼe oprometéva. Péro,  ¿mbaʼéichapa ikatu ñamombareteve ñande jerovia? Tekotevẽháicha jakaru porã ñaneresãi ha ñanembarete hag̃ua, tekotevẽ avei jajapo iporãva ñamombarete hag̃ua ñande jerovia. Ndajajapóiramo upéicha, ñande jerovia ikangýta ha ikatu voi omano (Sant. 2:26).

 8. ¿Mbaʼérepa iñimportánte pe jerovia?

⁸ ¿Mbaʼérepa iñimportánte pe jerovia? Apóstol Pablo omombeʼu mbaʼérepa (elee Hebreos 11:6). Ndajajeroviáiramo ndaikatumoʼãi ñañemoag̃ui Jehováre ha haʼe nañandeguerohorymoʼãi. Upéicharõ, iñimportanteterei jajerovia mbarete ñande Ru yvagapeguáre, ikatu hag̃uáicha ñañemoag̃ui hese ha ñamombaʼeguasu chupe.

 9. ¿Mbaʼépa ojapo Jehová oikuaa rupi tekotevẽha jajerovia?

⁹ Jehová oikuaa tekotevẽha ñamombarete ñande jerovia, upévare omoĩ ñandéve umi kuimbaʼe ha kuña ojeroviaitéva ehémplo. Ñane kongregasiónpe voi, umi ermáno omoakãva omoĩ ñandéve ehémplo porã. Upévare la Biblia heʼi: “Peñehaʼã pejerovia haʼekuéraicha” (Heb. 13:7). Avei Pablo ohai: “Jaguereko ñande jerére hetaiterei testígo, haʼetéva peteĩ arai guasu ñanemongoráva”. Koʼápe Pablo imanduʼa Ñandejára siervokuéra yma guare rehe, ohechauka vaʼekue ojerovia mbareteha Jehováre (Heb. 12:1). Ha Hebreos kapítulo 11-pe, Pablo imanduʼa umívare. Péro la Bíbliape oĩ hetaitereive kuimbaʼe ha kuña rembiasakue, orekóva diferénte eda ha ohasa vaʼekue heta mbaʼe. Ko múndope oĩ hetaiterei ndojeroviáiva Ñandejárare, upévare tuicha ñanepytyvõta ñahesaʼỹijo porãramo umi kuimbaʼe ha kuña ojeroviaitéva ehémplo.

10. ¿Mbaʼéichapa ñanepytyvõta jastudia porãramo ñaneañoháme umi kuimbaʼe ha kuña ojeroviaitéva ehémplo?

¹⁰ Hasy ningo jasegi hag̃ua peteĩ jaikuaa porãʼỹva ehémplo. Upéicha rupi, ko lívro ojepreparárõ guare heta oñeinvestiga, ikatu hag̃uáicha reikuaa porã umi kuimbaʼe ha kuña iñeʼẽrenduetévape. Restudiávo neañoháme, iporãitereíta avei reñehaʼãrõ rehekave informasión oñeʼẽva hesekuéra. Upéi ejepyʼamongeta umi istória releévare ha eñeimahina reimeha upe lugár ha upe situasiónpe. Eñehaʼã epensa ha eñandu haʼekuéra ohasáva. Rejapóramo upéicha, haʼetéta rehecha, rehendu ha reñandúva umi mbaʼe oikóva.  Reñemoĩramo ilugarpekuéra, haʼetéta voi oikovéva ndéve g̃uarã, reikuaa porãta chupekuéra ha reikóta iñamígoramo.

11, 12. a) ¿Mbaʼe situasiónpepa ikatu ñanepytyvõ Abrahán ha Sara ehémplo? b) ¿Mbaʼéichapa ikatu ñanepytyvõ Ana, Elías ha Samuel rembiasakue?

¹¹ Jaikuaavévo Ñandejára siervokuéra rembiasakue, ñanemomýita jasegi hag̃ua iñehémplo. Ñamoĩ chupe Jehová organisasión ojerureha ndéve reva hag̃ua peteĩ lugár oñekotevẽvehápe maranduhárare, térã heʼi ndéve repredika hag̃ua ambue hendáicha, ndahaʼéi ogahárupi añónte ha ijetuʼu ndéve upéva. Katuete tuicha nepytyvõta repensa porãramo upe rresponsavilida rehe, reñemboʼe Jehovápe ha rejepyʼamongeta Abrahán ehémplore. Haʼe ha Sara ningo nombyasýi vaʼekue oheja hag̃ua umi komodida orekóva Úrpe, upéicha rupi ohupyty heta mbaʼe porã Jehovágui. Resegíramo Abrahán ha Sara ehémplo, katuete reikuaa porãvéta chupekuéra ha ikatúta reiko iñamígoramo.

¹² Koʼág̃a epensami peteĩ nde rapicha remombaʼevéva ndetrata vai hague, ha upévare nderehosevéi ni rreunionhápe. Upéicha jave tuicha nepytyvõta Ana ehémplo, haʼe ndohejái vaʼekue umi provléma orekóva Peniná ndive ojoko chupe omombaʼeguasu hag̃ua Jehovápe. Hembiasakue nepytyvõta redesidi porã hag̃ua, ha rehecháta Ánape ne amígaicha. Ha oiméramo repensa nandekatupyryiha térã reñehaʼã reiha, katuete nepytyvõta Elías ehémplo. Haʼe ohasa vaʼekue heta mbaʼe ijetuʼúva ha Jehová oñangareko hese ha okonsola chupe. ¿Ha máva ehémplopa ikatu oipytyvõ umi mitãrusúpe, ikompañerokuéra omboligáramo chupe itieʼỹ hag̃ua? Samuel ehémplo. Haʼe ohechárõ guare mbaʼéichapa Elí raʼykuéra hekokyʼa pe témplope, ndohejái umíva ogueraha vai chupe.

13. ¿Heʼisépa ñande jerovia ikangyha jasegívo Ñandejára siervokuéra ojeroviaitéva ehémplo? Emyesakã mbaʼérepa rembohovái upéicha.

¹³ Ñañehaʼãvo ñahaʼanga Ñandejára siervokuéra ojeroviaite vaʼekuépe, ndeʼiséi ñande jerovia kangyveha chuguikuéra. La Biblia voi ñanemokyreʼỹ jasegi hag̃ua umi kuimbaʼe ha kuña ojeroviaitéva ehémplo (1 Cor. 4:16; 11:1; 2 Tes. 3:7, 9). Ko lívrope, kapítulo 17-pe, jahecháta María rembiasakue. Haʼe osegi vaʼekue Ana ehémplo ha iñemboʼépe jepe oiporu umi mbaʼe Ana heʼi vaʼekue. Péro, ¿heʼisépa  upéva María ijerovia kangy hague? Nahániri. Ana ehémplo oipytyvõnte chupe ojerovia mbareteve hag̃ua Jehováre ha oñehaʼã hag̃ua avei oĩ porã henondépe.

14, 15. ¿Mbaʼépa oreko ko lívro, ha mbaʼépa ikatu jajapo ideprovécho hag̃ua ñandéve?

¹⁴ Ko lívro ñanepytyvõta ñamombareteve hag̃ua ñande jerovia. Oñemoĩ pype umi artíkulo “Jajeroviave hag̃ua” osẽ vaʼekue Ñemañaháme 2008 guive, 2013 peve. Péro oñemoĩve pype ambue informasión, por ehémplo, káda kapítulope oñemoĩ umi porandu ikatu hag̃uáicha ñahesaʼỹijo ha jahecha mbaʼéichapa ikatu ñanepytyvõ. Avei ojejapo divúho ko lívrope g̃uarãite, térã oñekambiaʼimi ha oñembotuichave umi taʼanga osẽma vaʼekue voi. Oguereko avei umi línea de tiémpo ha mokõi mápa. Ideprovécho hag̃ua ñandéve ko lívro, Jajeroviave hag̃ua, ikatu jastudia ñaneañoháme, kongregasiónpe ha avei ñande rogayguakuéra ndive. Jalee haguénte voi koʼã istória tuichaiterei ñanemokyreʼỹta.

¹⁵ Añetehápe ko lívro tuicha ñanepytyvõta jasegi hag̃ua umi ehémplo porãita ohejáva ñandéve Ñandejára siervokuéra yma guare. Ñahesaʼỹijo porãramo jajeroviavéta ñande Ru Jehováre ha ñañemoag̃uivéta hese.