1, 2. ¿Mbaʼérepa nde rehayhu Ñandejára Jehovápe?

¿NDÉPA rehayhu Ñandejárape? Ikatu oime rehayhueterei Jehovápe ha upévare reñemeʼẽma kuri chupe. Oiméne reñandu voi Ñandejára haʼeha ne amigoite. Péro nde rehayhu mboyve Ñandejárape, haʼe ja nderayhúma vaʼekue ndéve. La Biblia heʼi: “Ñande katu japorohayhu, Ñandejára raẽve ñanderayhu rupi” (1 Juan 4:19).

² Epensamína entéro mbaʼe Jehová ojapóma vaʼekuére ohechauka hag̃ua ñanderayhuha. Haʼe omeʼẽ ñandéve ko yvy porãite jaiko hag̃ua pype ha avei opa mbaʼe ñaikotevẽva guive jadisfruta hag̃ua la ñande rekove (Mateo 5:43-48; Apocalipsis 4:11). Haʼe oipota jaiko iñamígoramo ha omeʼẽ ñandéve ñaikotevẽva guive ñaaprende hag̃ua chugui. Jalee jave la Biblia ñahendu hína Jehovápe, ha ñañemboʼe jave haʼe ñanerendu ñandéve (Salmo 65:2). Haʼe ñandegia ha ñanemombarete ijespíritu sánto ipoderosoitéva rupive (Lucas 11:13). Ñandejára ombou vaʼekue Itaʼýra ohayhuetéva jepe ko múndope ñandepeʼa hag̃ua pekádo ha ñemano poguýgui (elee Juan 3:16; Romanos 5:8).

3. ¿Mbaʼépa jajapo vaʼerã ñamombarete hag̃ua ñane amista Jehovándi?

 ³ Epensamína peteĩ ne amigoitére, peteĩ oĩva nde ykére ivai ha iporã jave la situasión. Reguereko hag̃ua peichagua amígo reñehaʼãmante vaʼerã. Upéicha avei ñande ikatu hag̃uáicha ñamombarete ñane amista Jehovándi tekotevẽ avei ñañehaʼã. Haʼe ningo pe amígo iporãvéva ikatúva jaguereko ha ñane amista hendive ikatu odura pára siémpre. Upévare la Biblia heʼi ñandéve: “Peiko Ñandejára mborayhúpe” (Judas 21). ¿Mbaʼéichapa ikatu jajapo upéva? La Biblia jey ombohovái: “Jahayhu Ñandejárape heʼise ñakumpli imandamientokuéra, ha imandamientokuéra ndahaʼéi la hasyetereíva ñakumpli hag̃ua” (1 Juan 5:3).

4, 5. ¿Mbaʼéichapa reñepyrũ vaʼekue rehayhu Jehovápe?

⁴ Tekotevẽ ningo siémpre jahechauka jahayhuha Ñandejárape ñande pyʼaite guive. ¿Nemanduʼápa mbaʼéichapa nde reñepyrũ vaʼekue rehayhu Jehovápe?

⁵ Epensamína mbaʼéichapa reñeñandu vaʼekue reaprendérõ guare Jehová oipotaha reiko pára siémpre pe múndo pyahúpe. Restudiávo reaprende avei mbaʼépa haʼe ojapo vaʼekue ikatu hag̃uáicha jahupyty upéva, ha reñemeʼẽ enkuénta mbaʼeichaitépa iñimportánte pe rregálo porãite Jehová omeʼẽ vaʼekue omboúrõ guare Itaʼýrape ko yvy ape ári (Mateo 20:28; Juan 8:29; Romanos 5:12, 18). Rehechakuaárõ guare mbaʼeichaitépa Jehová nderayhu, nde avei reñepyrũ rehayhu chupe nde pyʼaite guive (elee 1 Juan 4:9, 10).

6. ¿Mbaʼépa jajapóta jahayhúramo peteĩ persónape, ha mbaʼépa nde rejapo rehayhu rupi Ñandejárape?

⁶ Ñañepyrũ rire jahayhu Ñandejárape tekotevẽ jajapo  avei hetave mbaʼe. Por ehémplo, jahayhúramo peteĩ persónape ndahaʼemoʼãi jaʼénteva chupe “rohayhu”, síno ñañehaʼãmbaitéta jajapo umi mbaʼe ombovyʼáva chupe. Upéicha avei, reñepyrũ guive rehayhu Ñandejárape reñehaʼã reiko haʼe oipotaháicha ha rejapo umi mbaʼe chupe ogustáva. Upéi reñemeʼẽ chupe ha rejevautisa. Reñemeʼẽrõ guare Jehovápe, repromete reservitaha chupe pára siémpre (elee Romanos 14:7, 8). ¿Mbaʼéichapa ikatu resegi rekumpli pe promésa?

7. ¿Mbaʼépa jajapóta jahayhúramo Jehovápe, ha mbaʼépa imandamientokuéra?

⁷ Ñande jahayhu rupi Jehovápe ñakumpli umi imandamientokuéra. ¿Mbaʼéichapa jajapo upéva? Ñaneñeʼẽrendúvo chupe. La Bíbliape jatopa mbaʼéichapa Jehová oipota jaiko. Por ehémplo, upépe heʼi ñandéve ivaiha jakaʼu, ñamonda, ñandejapu, jareko rrelasión sexuál peteĩ persóna ndahaʼéivandi ñane ména térã ñane rembireko, térã jaadora oimeraẽ mbaʼe ndahaʼéiva Jehovápe (1 Corintios 5:11; 6:18; 10:14; Efesios 4:28; Colosenses 3:9).

8, 9. ¿Mbaʼéichapa jaikuaáta Jehová oipotáva jajapo oiméramo la Bíbliape noĩri peteĩ léi oñeʼẽva upe mbaʼére? Emoĩ peteĩ ehémplo.

⁸ Péro Jehová ñandeguerohory hag̃ua ndahaʼéi ñakumplínte vaʼerã imandamientokuéra. Haʼe nomeʼẽi ñandéve peteĩ lístape umi léi heʼíva ñandéve mbaʼe mbaʼépa jajapo vaʼerã káda situasiónpe. Upéicha rupi sapyʼánte la Biblia ndeʼíri ñandéve espesífikamente mbaʼépa jajapo vaʼerã. ¿Mbaʼépa ñanepytyvõta jadesidi porã hag̃ua upéicha jave? (Efesios 5:17). La Bíbliape jatopa umi konsého ohechaukáva ñandéve mbaʼéichapa  Jehová ohecha entéro mbaʼe. Jaleévo la Biblia jaikuaa porãve Jehovápe, ñantende porãve mbaʼéichapa haʼe opensa ha jaikuaa porãve mbaʼépa ogusta térã ndogustái chupe (elee Salmo 97:10; Proverbios 6:16-19; ehecha nóta 1 entende porãve hag̃ua).

⁹ Por ehémplo, ¿mbaʼépa jareko vaʼerã enkuénta jadesidíta jave mbaʼépa jahecháta télepe térã Internétpe? Jehová ndeʼíri ñandéve espesífikamente mbaʼépa jajapo vaʼerã umícha jave, péro umi konsého bíblico ñanepytyvõta jadesidi porã hag̃ua. Heta vyʼarãme oĩva koʼág̃arupi ojehechauka umi hénte iviolénto ha hekovaíva, ha la Biblia heʼi Jehová ndaijaʼeieteha pe violénsiare ha okondenataha umi hekovaívape (Salmo 11:5; Hebreos 13:4). ¿Mbaʼéichapa koʼã konsého ñanepytyvõ jadesidi porã hag̃ua? Jaikuaávo Jehovápe ombojeguaruha peteĩ mbaʼe, ñamboykete vaʼerã upéva.

10, 11. ¿Mbaʼérepa ñaneñeʼẽrendu vaʼerã Jehovápe?

¹⁰ ¿Mbaʼérepa ñaneñeʼẽrendu Jehovápe? Ndahaʼéi ani hag̃uánte haʼe ñandekastiga, ni jakyhyjéguinte umi mbaʼe ikatúvagui ojehu ñandéve jadesidi vai rupi (Gálatas 6:7). Upéva rangue, ñande ñaneñeʼẽrendu Jehovápe jahayhúgui chupe. Peteĩ mitã oipotaháicha itúa ovyʼa, ñande avei jaipota ñande Ru yvagapegua ovyʼa. ¡Ñañeñandu porãiterei ningo jaikuaávo Jehová ñandeguerohoryha! (Salmo 5:12; Proverbios 12:2; ehecha nóta 2 entende porãve hag̃ua).

¹¹ Ñande ningo ndahaʼéi ñaneñeʼẽrendúva Jehovápe ifásil javénte térã ndajarekói rupi ótra opsión. Ndahaʼéi avei jaikóva jaiporavo mavaitévapa umi iléi ñakumplítava ha mávapa nahániri (Deuteronomio 12:32). Upéva rangue, ñaneñeʼẽrendu chupe opa mbaʼépe, ojapo  haguéicha pe salmísta heʼi vaʼekue: “Che amombaʼeterei umi ne mandamiénto, ahayhu voi umíva” (Salmo 119:47; Romanos 6:17). Ñande jasegise Noé ehémplo, haʼe ningo ohechauka vaʼekue ohayhuha Jehovápe ojapóvo entéro mbaʼe haʼe omanda vaʼekue chupe. La Biblia heʼi voi Noé ojapo hague opa mbaʼe Ñandejára “heʼi hagueichaite chupe” (Génesis 6:22). ¿Ndévepa hiʼã avei Jehová heʼi nderehe péicha?

12. ¿Mbaʼéichapa ikatu ñambovyʼa Jehovápe?

¹² ¿Mbaʼéichapa oñeñandu Jehová ohechávo ñaneñeʼẽrenduha chupe? La Biblia heʼi upéicha jave ñambovyʼaha ikorasõ (Proverbios 11:20; 27:11). ¡Epensamíntena, ñande ikatu ñambovyʼa ko univérso Apoharépe ñaneñeʼẽrendúvo chupe! Péro haʼe arakaʼeve nañandeovligái jajapo hag̃ua upéva. Upéva rangue, omeʼẽ ñandéve pe liverta jadesidi hag̃ua mbaʼépa jajapóta. Upéicharõ ñande ikatu hína jadesidi jajapótapa iporãva térã ivaíva. Jehová ningo oipota jadesidi porã jahayhúgui chupe, ha upéicha jajapóramo ikatúta hína jaiko porãve (Deuteronomio 30:15, 16, 19, 20; ehecha nóta 3 entende porãve hag̃ua).

13, 14. ¿Mbaʼérepa ikatu jaʼe ndahaʼeiha la hasyetereíva ñakumpli Ñandejára mandamientokuéra? Emoĩ peteĩ ehémplo.

¹³ ¿Ha ñapensáramo hasyetereiha ñakumpli hag̃ua Jehová mandamientokuéra, térã umíva oipeʼaha ñandehegui ñande liverta? La Biblia heʼi porã ñandéve: “Imandamientokuéra ndahaʼéi la hasyetereíva ñakumpli hag̃ua” (1 Juan 5:3). La Bíbliape ojeʼe jave “hasyetereíva ñakumpli hag̃ua” oñeñeʼẽ jepi umi léi ndaikatúivare ñakumpli  térã peteĩ persóna oikosévare odomina ha operhudika ótrope (Mateo 23:4; Hechos 20:29, 30). Jehová mandamientokuéra ndahaʼéi la hasyetereíva ñakumpli hag̃ua, pórke haʼe núnka ndojeruremoʼãi ñandéve álgo ndaikatumoʼãiva jajapo.

¹⁴ Por ehémplo, eñeimahinamína reipytyvõha peteĩ ne amígope ojapo hag̃ua peteĩ mudánsa. Haʼe omoĩmbaite ikosakuéra heta káhape. Oĩ umi ivevýiva ha ndahasýiva ojegueraha hag̃ua, péro oĩ avei umi káha ipohyietereíva ha éntre dósmante ikatúva ojegueraha. ¿Ojerurénepa ndéve ne amígo regueraha hag̃ua umi káha ipohyivéva neaño? ¡Nahániri! Haʼe ndojapomoʼãi upéva, pórke ndoipotamoʼãi reñelastima. Upéicha avei, ñane amígo Jehová núnka ndojeruremoʼãi ñandéve peteĩ mbaʼe ijetuʼuetereíva jajapo hag̃ua (Deuteronomio 30:11-14). Jehová ningo ñanentende porãiterei, pórke haʼe “oikuaa porã mbaʼéichapa ñandeapo vaʼekue, ha ndahesaráiri ñande yvynteha” (Salmo 103:14).

15. ¿Mbaʼérepa ikatu ñaime segúro Jehová mandamientokuéra siémpre ou porãha ñandéve?

¹⁵ Moisés heʼi vaʼekue umi israelítape Jehová mandamientokuéra oipytyvõtaha chupekuéra “siémpre osẽ porã” hag̃ua ha osegi hag̃ua oikove (Deuteronomio 5:28-33; 6:24). Koʼág̃arupi upeichaiténte avei, opa mbaʼe Jehová ojeruréva ñandéve jajapo hag̃ua ñanepytyvõ jaiko porãve hag̃ua (elee Isaías 48:17). Ñande Ru Jehová ningo siémpre oikuaa mbaʼépa la iporãvéva ñandéve g̃uarã (Romanos 11:33). La Biblia heʼi: “Ñandejára ningo mborayhu” (1 Juan 4:8). Upéva heʼise entéro mbaʼe haʼe heʼíva ha ojapóva, ojapoha ñanderayhu rupi.

16. ¿Mbaʼépa ñanepytyvõta ñaneñeʼẽrendu hag̃ua Jehovápe ñaneimperfékto ha jaikóramo jepe ko múndo añáme?

 ¹⁶ Sapyʼánte ningo ijetuʼu ñaneñeʼẽrendu hag̃ua Ñandejárape. Jaiko ko múndo aña oĩvape Satanás poguýpe, ha haʼe oiko omboliga la héntepe ojapo hag̃ua ivaíva (1 Juan 5:19). Avei ñaneimperfékto, ha umi mbaʼe ñañandu ha ñapensáva káusare ikatu hína nañaneñeʼẽrenduvéi Ñandejárape (Romanos 7:21-25). Péro jahayhu rupi Jehovápe ñanembarete jajapo hag̃ua iporãva. Haʼe ohecha mbaʼeichaitépa ñañehaʼã ñaneñeʼẽrendu hag̃ua chupe ha ñanepytyvõ omeʼẽvo ñandéve ijespíritu sánto (1 Samuel 15:22, 23; Hechos 5:32). Upéva rupive ikatu jaguereko umi kualida ñanepytyvõva ifasilve hag̃ua ñandéve ñaneñeʼẽrendu Ñandejárape (Gálatas 5:22, 23).

17, 18. a) ¿Mbaʼépa ñaaprendéta ko lívrope? b) ¿Mbaʼépa jahecháta pe ótro kapítulope?

¹⁷ Ko lívrope ñaaprendéta mbaʼéichapa jaiko vaʼerã Jehová ñandeguerohory hag̃ua. Ñaaprendéta avei mbaʼéichapa ikatu ñamoĩ en práktika ñande rekovépe umi konsého ha umi mbaʼe Jehová heʼíva oĩ porãha. Ñanemanduʼa vaʼerã Jehová arakaʼeve nañandeovligaiha ñaneñeʼẽrendu hag̃ua chupe. Jajedesidíramo ñaneñeʼẽrendutaha chupe, jaiko porãvéta koʼág̃ama voi ha koʼẽrõite jahupytýta hetaitereive mbaʼe porã. Ha iñimportanteveha, ñaneñeʼẽrendúvo Ñandejárape jahechaukáta jahayhuha chupe (ehecha nóta 4 entende porãve hag̃ua).

¹⁸ Ikatu hag̃uáicha jaikuaa mbaʼépa iporã ha mbaʼépa ivai, Jehová omeʼẽ káda únope ñane konsiensiarã. Jaipuru porãramo ñane konsiénsia ikatúta “ñakumpli imandamientokuéra”. Péro, ¿mbaʼépa hína ñane konsiénsia, ha mbaʼéichapa ikatúta jaipuru porã? Upéva jahecháta pe ótro kapítulope.