1-3. a) ¿Mbaʼérepa umi tuakuéra oipota ifamília ipotĩ? b) ¿Mbaʼérepa Jehová oipota isiervokuéra ipotĩ?

EÑEIMAHINAMÍNA peteĩ sy opreparaha hína imembýpe oho hag̃ua eskuélape. Haʼe ojasegura pe imembýpa ojahu ha oreko ao iporãva ha ipotĩva. Upéicha ojapóramo pe mitã ikatu hesãive ha entéro ohechakuaáta ituakuéra okuida porãha hese.

² Jehová ningo ñande Ru yvagapegua, ha haʼe oipota ñanepotĩ ha ñanderekoporã (Levítico 11:44, 45).  Jehová oikuaa upéva ideprovechoha ñandéve. Avei ñanepotĩramo ñambotuicha hína Ñandejárape (Ezequiel 36:22; elee 1 Pedro 2:12).

³ ¿Mbaʼépa heʼise ñanepotĩ? ¿Ha mbaʼéichapa upéva ideprovécho ñandéve? Ñambohováiramo koʼã mokõi porandu ikatu jahechakuaa hína mbaʼépepa tekotevẽ gueteri ñakambia.

4, 5. a) ¿Mbaʼérepa ñanepotĩ vaʼerã? b) ¿Mbaʼéichapa ohechauka umi mbaʼe oĩva ñande jerére Ñandejára oipotaha opa mbaʼe ipotĩ?

⁴ Jehová haʼe pe persóna ipotĩvéva ha ndaipóri haʼeichagua (Levítico 19:2). Ha ñande ñañehaʼã ñanepotĩ ñahaʼangaségui Ñandejárape (Efesios 5:1).

⁵ Opa mbaʼe oĩva ñande jerére ohechauka Jehová oipotaha entéro mbaʼe ipotĩ. Haʼe ojapo voi ko yvy ikatu hag̃uáicha pe yvytu ha y oñemopotĩ ijehegui rei (Jeremías 10:12). Umi hénte okontamináramo jepe ko yvy, ijehegui rei ikatu oñemopotĩ jey. Por ehémplo, Jehová ojapo vaʼekue heta vichoʼi michĩetereíva ikatúva jahecha mikroskópiope añónte. Umi yty ipeligrósovagui koʼã vichoʼi ojapo peteĩ mbaʼe ndaikatuvéimava ñandeperhudika, ha ko mbaʼe hetápe osorprendeterei. Umi sientífiko jepe oipuru koʼãichagua vichoʼi omopotĩ jey hag̃ua umi lugár oñekontamina vaʼekue (Romanos 1:20).

6, 7. ¿Mbaʼéichapa pe léi oñemeʼẽ vaʼekue Moiséspe ohechauka Jehová oipotaha isiervokuéra ipotĩ?

⁶ Pe léi Jehová omeʼẽ vaʼekue ipuévlope Moisés rupive ohechauka iñimportanteha ñanepotĩ. Por ehémplo, Jehová oasepta hag̃ua umi israelítagui isakrifísio, haʼekuéra ipotĩ vaʼerã kuri. Pe saserdóte prinsipál oiketaha  díape pe Santísimope ojahu vaʼerã dos vése voi (Levítico 16:4, 23, 24). Ha umi ótro saserdóte ojohéi vaʼerã ipo ha ipy oikuaveʼẽ mboyve peteĩ sakrifísio (Éxodo 30:17-21; 2 Crónicas 4:6). Oĩ vaʼekue avei léi heʼíva ojejuka vaʼerãha umi nopenáiva koʼã léi heʼívare ñanepotĩ vaʼerãha (Levítico 15:31; Números 19:17-20).

⁷ Ha koʼag̃aite peve Jehová oipota ñanepotĩ. Pe léi haʼe omeʼẽ vaʼekue Moiséspe ohechauka mbaʼépa Jehová opensa (Malaquías 3:6). Jahecha porã upéicharõ isiervokuéra yma guare ipotĩ vaʼerãha, ha haʼe nokambiái la opensa lája. Jehová oipota koʼag̃aite peve isiervokuéra ipotĩ avei (Santiago 1:27).

8. ¿Mbaʼe mbaʼépepa ñanepotĩ vaʼerã?

⁸ Jehová heʼi hag̃ua ñanderehe ñanepotĩha, tekotevẽ ipotĩ ñande rete, ñande ao ha ñande róga. Ha ndahaʼéi upévante, ipotĩ vaʼerã avei ñande rekove, ñane adorasión, ñane kondúkta ha ñane pensamiénto. Upéicharõ, Jehová oipota hína ñanepotĩ opaite mbaʼépe.

9, 10. ¿Mbaʼépa jajapo vaʼerã ipotĩ hag̃ua ñane adorasión?

⁹ Ipotĩ vaʼerã ñane adorasión. Ñande ni michĩmi ndajajeheʼái vaʼerã umi rrelihión japúre. Umi israelita oĩrõ guare Babilóniape ojerepa vaʼekue hesekuéra umi hénte oadoráva umi dios guaʼúpe, ha koʼã hénte hekokyʼa vaʼekue oadora jave idióspe. Isaías oprofetisa vaʼekue umi israelita oho jeytaha ipuévlope oadora hag̃ua Jehovápe haʼe oipotaháicha. Upévare Jehová omanda ipuévlope: “Pesẽke upégui. Pejei chugui ha ani pepoko mbaʼeve ikyʼávare. Pejeíke ijapyteguikuéra, peẽ pesegi vaʼerã penepotĩ”. Haʼekuéra ndovaléi vaʼekue ombojeheʼa  pe adorasión omeʼẽva Jehovápe umi kostúmbre ha umi mbaʼe omboʼévare umi rrelihión japu oĩva Babilóniape (Isaías 52:11).

¹⁰ Koʼág̃a umi kristiáno omboykete avei opa mbaʼe oúva pe rrelihión japúgui (elee 1 Corintios 10:21). Ko yvy tuichakuére oĩ ogueroviáva heta mbaʼe ha orekóva heta kostúmbre oúva umi rrelihión japúgui. Por ehémplo, heta hénte opensa jarekoha peteĩ álma nomanóiva, ha osegi voi heta kostúmbre oapojáva upéva (Eclesiastés 9:5, 6, 10). Péro ñande kristianokuéra ñamboykete vaʼerã koʼã kostúmbre. Ikatu ningo ñane hentekuéra ñandejopy japartisipa hag̃ua hendivekuéra, péro ñande ñaiméma desidído ndajajapomoʼãiha umíva, pórke jaipota Jehová heʼi ñanderehe ñanepotĩha (Hechos 5:29).

11. ¿Mbaʼépa jajapo vaʼerã ipotĩ hag̃ua ñane kondúkta?

¹¹ Ipotĩ vaʼerã ñane kondúkta. Ñanepotĩ hag̃ua Jehová renondépe ñamboykete vaʼerã pe tekokyʼa (elee Efesios 5:5). Jehová heʼi ñandéve Iñeʼẽ rupive: “Pediparáke oimeraẽ mbaʼe ikatúvagui pendegueraha tekovaípe”. Ha heʼi porã umi persóna hekokyʼáva ha nokambiaséiva “ndoikemoʼãiha Ñandejára Rréinope” (1 Corintios 6:9, 10, 18; ehecha nóta 22 entende porãve hag̃ua).

12, 13. ¿Mbaʼérepa ipotĩ vaʼerã ñane pensamiénto?

¹² Ipotĩ vaʼerã ñane pensamiénto. Heta vése jajapo umi mbaʼe ñapensa vaʼekuére (Mateo 5:28; 15:18, 19). Ñapensáramo umi mbaʼe ipotĩvare jajapóta avei umi mbaʼe ipotĩva. Ñande ningo imperfékto, upéva káusare ikatu ou ñane akãme umi mbaʼe ikyʼáva. Oikóramo ñanderehe upéva pyaʼe ñamboyke vaʼerã, pórke  ndajajapóiramo upéicha kon el tiémpo ikyʼáta ñane korasõ ha ikatu voi jajaposéma umi mbaʼe ñapensa vaʼekue. Ani hag̃ua oiko ñanderehe koʼã mbaʼe, ñapensa meme vaʼerã umi mbaʼe ipotĩvare (elee Filipenses 4:8). Upévare ñamboykete vaʼerã umi vyʼarã ikyʼa ha ivioléntova. Avei jaiporavo porã vaʼerã mbaʼépa jaleéta, jahecháta ha mbaʼe rehepa ñañeʼẽta ñaime jave ótrondi (Salmo 19:8, 9).

¹³ Jasegi hag̃ua jahayhu Jehovápe ipotĩ vaʼerã ñane adorasión, ñane kondúkta ha ñane pensamiénto. Péro koʼág̃a jahecháta Jehová oipotaha avei ipotĩ ñande rete.

14. ¿Mbaʼérepa iñimportánte ñanepotĩ?

¹⁴ Ñanepotĩramo ha ipotĩramo ñande róga ojapo porã ñanderehe ha umi oĩvare ñande jerére. Avei ñañeñandu porã ha entéronte oĩséta ñanendive. Péro iñimportanteveha, ñanepotĩramo ñamombaʼeguasu hína Jehovápe. Epensamína ko mbaʼére: peteĩ mitãʼi ikyʼaháre oikóramo, katuete oñeñeʼẽ vaíta ituakuérare. Upéicha avei, ñandekyʼáramo ha nañañemondeporãiramo ikatu hína oñeñeʼẽ vai Jehováre. Upévare apóstol Pablo heʼi vaʼekue: “Ni mbaʼevéicharõ ndorojapói mbaʼeve oofendétava ótrope, ani hag̃ua ojetopa mbaʼeve ivaíva ore servísiope. Upéva rangue, entéro mbaʼe rojapóvape rohechauka roserviha Ñandejárape” (2 Corintios 6:3, 4).

15, 16. ¿Mbaʼépa jajapo vaʼerã jahechauka hag̃ua ñanepotĩha?

¹⁵ Ñande rete ha ñande ao. Jajepokuaa vaʼerã káda día ñañemopotĩ. Por ehémplo, ikatúma guive káda día jajahu vaʼerã. Avei jajepohéi havõme, koʼýte ñañekosina  ha jakaru mboyve, jaha rire váñope térã japokóramo mbaʼe kyʼáre. Ikatu ñapensa hína naiñimportanteguasuiha jajepohéi, péro iñimportánte jajapo, pórke upéicharõmante nañañekontaminamoʼãi ha nañambohasymoʼãi ótrope. Jajepohéiramo ikatu voi jasalva ñande rapicha rekove. Ha ndajarekóiramo váño modérno ikatu jajapo umi israelita ojapo haguéicha yma, haʼekuéra oĩ hag̃ua váñope oho vaʼekue mombyrymi hógagui ha umi y oĩhágui, ha upéi ojaty hikuái upéva (Deuteronomio 23:12, 13).

¹⁶ Natekotevẽi ningo jajogua ao hepyetereíva ha osẽ ramovéva. Péro ñande ao ipotĩ ha idesénte vaʼerã (elee 1 Timoteo 2:9, 10). Ñandéve hiʼãiterei ñane pínta omombaʼeguasu Jehovápe (Tito 2:10).

17. ¿Mbaʼérepa siémpre ipotĩ vaʼerã ñande róga ha ñande korapy?

 ¹⁷ Ñande róga ha ñande korapy. Jaiko jaikohápe siémpre ipotĩ vaʼerã ñande róga. Avei ipotĩ vaʼerã ñande veíkulo, ñane móto ha ñande visikléta, koʼýte umi jaipurúva jaha hag̃ua rreunionhápe térã predikasiónpe. Ñande ningo japredika jave jaʼe voi umi héntepe jaikotaha peteĩ paraísope ha peteĩ yvy ipotĩvape (Lucas 23:43; Apocalipsis 11:18). Ñande róga ha ñande korapýre ojekuaáma vaʼerã jajepreparamaha hína jaiko hag̃ua pe múndo pyahúpe.

18. ¿Mbaʼérepa ñamopotĩ vaʼerã umi lugár jaipurúva jaadora hag̃ua Jehovápe?

¹⁸ Umi lugár jaipurúva jaadora hag̃ua Jehovápe. Siémpre ñamopotĩramo umi lugár jaipurúva jaadora hag̃ua Jehovápe, umíva apytépe umi Salón del Reino ha umi lokál jajapohápe asambléa jahechauka ñanepotĩseha. Heta persóna oúvape primera ves rreunionhápe osorprendeterei mbaʼeichaitépa ipotĩ pe Salón, koʼã mbaʼe ningo omombaʼeguasu Jehovápe. Ha entéro jareko pe priviléhio ñamopotĩ ha ñamoporãvo ñane Salón (2 Crónicas 34:10).

19. ¿Mbaʼe mbaʼépa umi vísio vai ñamboyke vaʼerã?

¹⁹ La Bíbliape ndaipóri peteĩ lísta oĩháme entéro umi vísio vai, péro omeʼẽ ñandéve heta konsého ñanepytyvõva jaikuaa hag̃ua mbaʼépa Jehová opensa koʼã mbaʼére. Haʼe ndoipotái japita, ñamokõ rasa, jajedroga, térã ñanakea. Ñande haʼéramo Ñandejára amígo ñamombaʼéta ñande rekove ha ndajajapomoʼãi koʼã mbaʼe. Umi vísio vai ningo ikatu ñanembohasy, operhudika  umi oĩvape ñande jerére ha ikatu voi pyaʼeterei ñandejuka. Heta persóna ohejase koʼã vísio ndahasyséigui, péro Jehová amigokuéra oheja koʼã vísio vai ohayhúgui chupe. Peteĩ kuñataĩ heʼi voi: “Jehová chepytyvõ rupi amopotĩ che rekove ha aheja umi vísio vai. [...] Chejehegui reínte ni mbaʼevéicharõ ndaikatumoʼãi kuri aheja che visiokuéra”. Koʼág̃a jahechamíta 5 konsého oĩva la Bíbliape ñanepytyvõtava jaheja hag̃ua umi vísio vai.

20, 21. ¿Mbaʼépa Jehová oipota jahejaite?

²⁰ “Che ermáno ha che ermanakuéra ahayhuetéva, oñepromete rupi ñandéve koʼã mbaʼe, ñamopotĩ vaʼerã ñande rete ha ñane korasõ. Jahechaukákena jarrespetaha Ñandejárape ha péicha káda día ñanepotĩvéta henondépe” (2 Corintios 7:1). Jehová oipota jahejaite umi vísio ikyʼáva ombyaíva ñande rete ha ñane korasõ.

²¹ Peteĩ mbaʼe ñanepytyvõtava ñanepotĩ hag̃ua haʼe jatopáva 2 Corintios 6:17, 18-pe, upépe Jehová heʼi ñandéve: “Anivéke pepoko pe mbaʼe kyʼa rehe”. Upéi haʼe opromete ñandéve: “Che haʼéta pende Ru, ha peẽ haʼéta che raʼy ha che rajykuéra”. Peteĩ túa ohayhuháicha ifamiliakuérape, Jehová ñanderayhúta avei ñamboykéramo umi mbaʼe ikatúva ñanemongyʼa henondépe.

22-25. ¿Mbaʼe konsého oĩva la Bíbliapepa ñanepytyvõta jahejaite hag̃ua umi vísio vai?

²² “Rehayhu vaʼerã Jehová nde Járape nde pyʼaite guive, nde rekove kompletoite reheve, ha entéro ne pensamiénto reheve” (Mateo 22:37). Kóva hína pe mandamiénto iñimportantevéva (Mateo 22:38).  Jehová omerese jahayhu chupe ñande pyʼaite guive, ñande rekove kompletoite reheve, entéro ñane pensamiénto ha ñañandúva reheve. Ajépa ndaikatúi jaʼe jahayhuha chupe ñande pyʼaite guive jajapóramo umi mbaʼe omongyʼátava ñande rekove térã ombyaítava ñane apytuʼũ. Upéva rangue jajapo vaʼerã ikatúva guive jahechauka hag̃ua ñamombaʼeha ñande rekove Jehová omeʼẽ vaʼekue ñandéve.

²³ Jehová omeʼẽ “enterovépe hekove, pe áire jarrespira hag̃ua ha entéro mbaʼe” (Hechos 17:24, 25). Peteĩ ne amígo omeʼẽramo ndéve peteĩ rregálo, ¿mbaʼépa rejapóta chugui? ¿Rejagarrátapa rembyaipa térã remombo? Ñande rekove ningo haʼe avei peteĩ rregálo iporãitereíva Jehová omeʼẽva ñandéve. Ha ñamombaʼeterei rupi upe rregálo, jaipuruse ñamombaʼeguasu hag̃ua chupe (Salmo 36:9).

²⁴ “Rehayhu vaʼerã nde rapichápe nde voi rejehayhuháicha” (Mateo 22:39). Umi vísio vai ndahaʼéi ñandévente ñandeperhudikáva, síno ikatu avei operhudika umi jahayhúva oĩvape ñande jerére. Por ehémplo, peteĩ persóna oikóva peteĩ opitávandi ikatu ou hasyete ohetũ rupi pe sigarríllo ratatĩngue. Jahejáramo umi vísio vai jahechauka hína jahayhuha ñande rapichakuérape (1 Juan 4:20, 21).

²⁵ “Esegíkena emomanduʼa umi ermánope iñeʼẽrendu ha oñemoĩ vaʼerãha umi goviérno ha autoridakuéra poguýpe” (Tito 3:1). Heta tetãme oĩ umi léi oproivíva jareko térã jaipuru umi dróga. Jehová ningo omanda ñandéve ñañemoĩ vaʼerãha umi autoridakuéra poguýpe, upévare ñande jajapo umi léi heʼíva (Romanos 13:1).

26. a) ¿Mbaʼépa ikatu jahechakuaa tekotevẽha jajapo oiko hag̃ua ñandehegui Jehová amígo? b) ¿Mbaʼérepa ñañehaʼãmbaite vaʼerã ñanepotĩ hag̃ua?

 ²⁶ Ikatu jahechakuaa tekotevẽha ñakambia oiko hag̃ua ñandehegui Jehová amígo. Oiméramo upéicha, jajapo vaʼerã ikatúva entéro pyaʼemi ñakambia hag̃ua. Ndahaʼéi la ifasilpáva jaheja hag̃ua peteĩ vísio, péro ikatu hína ñakonsegi upéva. Jehová voi opromete ñandéve ñanepytyvõtaha, haʼe heʼi: “Che hína nde Jára Jehová. Umi mbaʼe che romboʼéva ningo ideprovéchota ndéve, che rogia reho hag̃ua tape porãre” (Isaías 48:17). Ñañehaʼãmbaitéramo ñanepotĩ hag̃ua, ñamombaʼeguasúta hína Jehovápe.