1. ¿Mbaʼépa jajapo vaʼerã, ha mbaʼérepa?

JESÚS heʼi vaʼekue “Ñandejára siérvo teete oadorataha chupe haʼe oipotaháicha. Haʼekuéra ohejáta pe espíritu sánto ogia chupekuéra ha osegíta umi enseñánsa verdadéra. Añetehápe Ñandejára voi oheka umichagua persónape oadora hag̃ua chupe” (Juan 4:23; 6:44). Umi oservíva Ñandejárape ohecha vaʼerã umi mbaʼe ojapóva “oĩ porãpa térãpa oĩ vai ñande Ruvichápe g̃uarã” (Efesios 5:10). Heta vése ijetuʼu jajapo hag̃ua upéva, pórke Satanás ñanembotavyse jajapo hag̃ua umi mbaʼe ndogustáiva Jehovápe (Apocalipsis 12:9).

2. Emombeʼu mbaʼépa oiko pe Sérro Sinaí ypýpe.

² ¿Mbaʼéichapa Satanás ñanembotavyse? Haʼe oipota ñapensa umi mbaʼe ivaíva iporãha. Jahechamína mbaʼépa ojapo umi israelita oĩrõ guare pe Sérro Sinaí ypýpe. Moisés ojupi kuri pe sérrope ha pe puévlo opyta ikampaméntope. Upéi haʼekuéra ikueráima ohaʼarõ hague Moiséspe, ha ojerure Aarónpe ojapo hag̃ua chupekuéra peteĩ dios, ha haʼe ojapo peteĩ vaka raʼy raʼanga. Umi israelita ojapo peteĩ fiésta, ha oñepyrũ ojeroky ha oñesũ hikuái pe vaka raʼy renondépe. Haʼekuéra opensa kuri ojapoha “peteĩ fiésta Jehovápe g̃uarã”, péro upéva ndeʼiséi oĩ porãha  la ojapóva hikuái. Jehovápe upéva haʼe kuri peteĩ pekádo pórke oadora hikuái ótro dióspe, ha upéva káusare hetaiterei israelita omano (Éxodo 32:1-6, 10, 28). ¿Mbaʼépa ñanemboʼe ko oiko vaʼekue? Ndajahejái vaʼerãha Satanás ñanembotavy. Jehová heʼi voi: “Ani pepoko mbaʼeve ikyʼávare”. Upéva heʼise ni michĩmi ndajajeheʼái vaʼerãha umi rrelihión japúre. Upéva rangue, jaheja vaʼerã Jehová ñanemboʼe mbaʼépa oĩ porã ha mbaʼépa oĩ vai (Isaías 52:11; Ezequiel 44:23; Gálatas 5:9).

3, 4. ¿Mbaʼérepa iporã jaikuaa mbaʼéichapa oñepyrũ umi arete ha fiésta?

³ Jesús oĩrõ guare ko yvy ape ári omboʼe ijapostolkuérape omoĩ hag̃ua ehémplo mbaʼéichapa jaadora vaʼerã Jehovápe haʼe oipotaháicha. Upéi Jesús omano rire, umi apóstol osegi omboʼe umi disípulo pyahúpe mbaʼépa Jehová opensa. Péro umi apóstol omano rire, umi mboʼehára japu oñepyrũ omoinge pe kongregasiónpe idéa, kostúmbre ha fiésta oúva rrelihión japúgui. Hiʼarive okambia voi hikuái umi fiésta réra oñepensa hag̃ua ojejapoha upéva Ñandejárape g̃uarã (2 Tesalonicenses 2:7, 10; 2 Juan 6, 7). Ha koʼag̃aite peve ojejapo meme koʼã fiésta ha arete, ha umívape ojesegi umi kostúmbre oúva rrelihión japúgui ha umi demóniogui (Apocalipsis 18:2-4, 23). *

⁴ Ko múndo tuichakuére umi hénte oreko heta arete ha ojapo heta fiésta. Péro amáske reaprende Jehovágui ikatu tuicha rekambia hína la repensáva peteĩ fiéstare. Ikatu ijetuʼu ndéve rekambia hag̃ua, péro Jehová nepytyvõta. Jahechamína koʼág̃a mbaʼéichapa oñepyrũ umi fiésta ha arete ha mbaʼépa Ñandejára opensa umívare.

5. ¿Mbaʼérepa ñaĩ segúro Jesús nonaséi hague 25 de diciembre?

⁵ Heta lugárpe ojefesteha la Navidad el 25 de diciembre, ha la majoría opensa Jesús onase hague upe féchape. La Biblia ndeʼíri mbaʼe díapa ni mbaʼe méspepa onase kuri Jesús. Péro oñeʼẽʼimi mbaʼe épokapepa haʼe onase raʼe. Lucas oskrivi Jesús onasérõ guare Belénpe oĩ hague “umi pastór oikóva pe ñúre” okuidáva umi ovecháre (Lucas 2:8-11). Diciémbrepe Belénpe roʼy, oky ha hoʼa niéve, upévare ijetuʼúta kuri umi pastór ohasa hag̃ua tóda la nóche pe ñúme. Upévare ikatu ñaime segúro Jesús nonaséi hague diciémbrepe, síno peteĩ mes ndahaʼéivape la hoʼysãitereíva. La Biblia ha avei umi istória ohechauka Jesús onase hague septiembre térã octúbrepe.

6, 7. a) ¿Moõguipa ou umi kostúmbre ojesegíva Navidápe? b) ¿Mbaʼérepa ñande kristiáno ñanembaʼeporã?

⁶ ¿Mbaʼéichapa oñepyrũ pe Navidad? Ou umi rrelihión japúgui, umi rrománo ojapo vaʼekue fiésta Satúrnope g̃uarã, haʼekuéra heʼi Saturno haʼeha umi agrikultorkuéra dios. Peteĩ lívro heʼi ko fiésta ojejapo hague diciembre mbytérupi, ha ojepuru hague “tataindy ha antórcha, ojejapo karu guasu, oĩ heta vevída ha oñemeʼẽ rregálo”. Heʼi avei “tiémpo rire koʼã kostúmbre oñepyrũmaha ojejapo ojefesteha jave Navidad” (Gran Referencia Anaya). Avei el 25 de diciembre ojefesteha vaʼekue Mitra kumpleáño, umi persa heʼi Mitra haʼeha kuarahy jára.

⁷ La majoría umi ofesteháva Navidad ndoikuaái ko fiésta ouha rrelihión japúgui. Haʼekuéra heʼi oaprovechanteha upe arete ohasa hag̃ua tiémpo ifamíliandi, okaru porã hag̃ua ha omeʼẽ hag̃ua rregálo. Ñande Jehová siervokuéra ningo jahayhueterei ñane hénte ha ñane amigokuérape, ha haʼe oipota voi ñanembaʼeporã enterovévandi.  La Biblia heʼi voi 2 Corintios 9:7-pe: “Ñandejára ohayhu pe persóna vyʼápe omeʼẽvape”. Jehová ningo ndoipotái ñanembaʼeporã peteĩ féchapente. Jehová siervokuérape ogustaiterei ohasa tiémpo iñamígo ha ihentekuérandi. Avei jarregala ñande rapichakuérape oimeha tiémpope, ha nañahaʼarõi oñemyengovia ñandéve upe haguére. Ñande ningo siémpre ñanembaʼeporã pórke jahayhu ñande rapichakuérape (Lucas 14:12-14).

8. ¿Oguerahápa raʼe umi astrólogo rregálo Jesúspe haʼe onase ramóme? Emyesakã.

 ⁸ Umi hénte oexplika hag̃ua mbaʼérepa omeʼẽ rregálo Navidápe, heʼi hikuái umi “tres reyes magos” ogueraha hague rregálo Jesúspe onase ramoitépe ha oĩtiramo guare peteĩ pesévrepe. Añetehápe unos kuánto kuimbaʼe oho kuri Jesús rendápe ha ogueraha kuri chupe rregálo. Upe tiémpope ojejepokuaámi ojegueraha rregálo umi persóna iñimportántevape (1 Reyes 10:1, 2, 10, 13). Péro, ¿ndépa reikuaa la Biblia heʼiha haʼekuéra haʼe hague astrólogo ha oipuru hague máhia? ¿Ndépa reikuaa avei haʼekuéra ndoadorái hague Ñandejárape? Avei umi astrólogo ningo oho kuri ovisita Jesúspe oĩ riréma hógape, ndahaʼéi oĩrõ guare peteĩ pesévrepe ni onase ramóme. Oiméne oviaha raʼe unos kuánto mésere og̃uahẽ hag̃ua Jesús rendápe. Upe tiémpope, Jesús ndahaʼevéima kuri mitãraʼy síno ja tuichaʼíma kuri (Mateo 2:1, 2, 11).

9. ¿Máva kumpleáñorepa oñeʼẽ la Biblia?

⁹ Entéro ningo ovyʼaiterei onase vove peteĩ mitã (Salmo 127:3). Péro upéva ndeʼiséi jafesteha vaʼerãha umi kumpleáño. Epensamína ko mbaʼére: la Biblia ningo oñeʼẽ mokõi kumpleáñore, pe primero haʼe vaʼekue peteĩ faraón kumpleáño ha pe ótro haʼe vaʼekue pe rréi Herodes Antipas kumpleáño (elee Génesis 40:20-22; Marcos 6:21-29). Ni peteĩva koʼã governánte ndahaʼéi vaʼekue Jehová siérvo. La Biblia ningo ndeʼíri voi oĩ hague ni peteĩ Jehová siérvo ofesteha vaʼekue ikumpleáño.

10. ¿Mbaʼépa opensa vaʼekue umi kristiáno ypykue umi kumpleáñore?

¹⁰ Peteĩ lívro hérava Las cosas nuestras de cada día heʼi umi kristiáno opensa hague umi kumpleáño “haʼeha kostúmbre  oguereko vaʼekue yma umi rrelihión japu”. Koʼã kostúmbre oñemopyenda umi japu omboʼe vaʼekuére koʼã rrelihión. Por ehémplo, Gréciape oĩ vaʼekue heta opensáva káda uno oguerekoha peteĩ espíritu oĩva káda persónandi onase vove. Haʼekuéra opensa vaʼekue oĩha avei peteĩ dios onaséva upe persóna onaseha féchape ha pe espíritu oĩha upe dios poguýpe, upévare haʼekuéra heʼi ofesteha vaʼerãha ikumpleáño koʼãva okuida hag̃ua hese oikove aja pukukue. Avei jareko vaʼerã enkuénta umi fécha de kumpleáño ojepuruha ojejapo hag̃ua pe oróskopo ha oñemopyenda hag̃ua avei pe astrolohía.

11. ¿Mbaʼéicha javépa Jehová oipota ñandekalida ha ñandepojera?

¹¹ Oĩ heta opensáva ikumpleáño iñimportantetereiha, ha upe díape enterovéva ohechauka vaʼerãha ohayhu ha omombaʼeha chupe. Péro ñande ningo ikatu jahechauka jahayhuha ñane hénte ha ñane amigokuérape tódo el áño, ndahaʼéi peteĩ díante. Jehová oipota voi siémpre ñandekalida ha ñandepojera enterovéndi (elee Hechos 20:35). Ha ñande jaagradese voi chupe káda día omeʼẽ haguére ñandéve ñande rekove, ndahaʼéi ñane kumpleáñopente (Salmo 8:3, 4; 36:9).

12. ¿Mbaʼérepa la Biblia heʼi iporãveha pe ñamanoha día?

¹² Eclesiastés 7:1-pe heʼi: “Ikuentave ningo la hénte imanduʼa porã nderehe, ereko rangue aséite iporãitereíva. Remanoha día iporãve pe renaseha díagui”. ¿Mbaʼérepa la Biblia heʼi upéva? Ñanase vove ningo neʼĩra gueteri jajapo mbaʼeve iporãva ni ivaíva. Péro jaipurúramo ñande rekove jaservi hag̃ua Jehovápe ha ñaipytyvõ hag̃ua ñande rapichakuérape, ñanererakuã porãta, ha ñamanóramo jepe, Jehová osegíta imanduʼa opa mbaʼe jajapo vaʼekuére (Job 14:14, 15). Jehová siervokuéra ndofestehái ikumpleáño ni Jesús kumpleáño. Ha Jesús omanda vaʼekue ñandéve  jagueromanduʼa hag̃ua pe omano hague ára añoite (Lucas 22:17-20; Hebreos 1:3, 4).

13, 14. ¿Mbaʼéichapa oñepyrũ vaʼekue pe Domingo de Páskua?

¹³ Oĩ opensáva pe Domingo de Páskua ojegueromanduʼaha Jesús orresusitaha día. Péro heta mbaʼe ojejapóva  upe díape añetehápe haʼe kostúmbre oguereko vaʼekue yma umi rrelihión japu, ha umi oĩva umi rrelihiónpe osegi vaʼekue koʼã kostúmbre openságui oipytyvõha chupekuéra ifamília hag̃ua. Ñapensamína por ehémplo umi koného ha uévo de Páskuare. Pe Enciclopedia Católica heʼi “heta oĩva rrelihión japúpe ymaite guive oipuru vaʼekue pe koného orrepresenta hag̃ua umi ikatúvape ifamília reta”. Avei pe lívro hérava Las cosas nuestras de cada día heʼi: “Ymaite guive heta paíspe ojepuru pe uévo oñerrepresenta hag̃ua umi nasimiénto ha rresurreksión”. Jahecha porã upéicharõ pe Domingo de Páskua ndahaʼeiha ojegueromanduʼa hag̃ua Jesús orresusitaha día.

¹⁴ ¿Ogustánepa Jehovápe jasegíramo umi kostúmbre oúva rrelihión japúgui jagueromanduʼa hag̃ua Jesús orresusita hague? Nahaniriete voi (2 Corintios 6:17, 18). Añetehápe Jehová arakaʼeve nomandái vaʼekue ñandéve jafesteha hag̃ua Jesús orresusita hague.

15. ¿Mbaʼéichapa oñepyrũ vaʼekue pe Halloween?

¹⁵ Ingléspe ojepuru avei ótra palávra ojeʼe hag̃ua Halloween, ha upe palávra heʼise “pe pyhare og̃uahẽ mboyve Día de Todos los Santos”. Pe Halloween ojejapo el 31 de octubre, ha ko fiéstape umi hénte ogueromanduʼa jepi umi vrúha, duénde ha póra. Kóva ningo ndahaʼéi peteĩ fiésta ipyahúva. Gran Bretaña ha Irlándape oĩ vaʼekue peteĩ grúpo oñehenóiva “celtas”, ha haʼekuéra oguereko vaʼekue peteĩ fiésta hérava Samhain. Ko fiésta ojejapo vaʼekue pyharekue pe última lúna lléna aja og̃uahẽ mboyve el 1 de noviembre. Umi “celtas” opensa vaʼekue upe fiéstape ou jeyha ko yvy ape ári umi omano vaʼekue espíritu. Ha umi hénte oikuaveʼẽ umi espíritupe tembiʼu ha vevída ani hag̃ua operhudika chupekuéra. Koʼág̃arupi, umi  hénte oho hag̃ua umi fiésta de Hálloweenpe oñemonde jepi haʼeramoguáicha vrúha, vampíro, póra ha umícha, heta oĩ ndoikuaáiva péicha osegiha hína hikuái kostúmbre oúva umi demóniogui.

16, 17. ¿Mbaʼépa oreko vaʼerã enkuénta umi omenda potaitéva?

¹⁶ Entéro ohóva umi kasamientohápe ningo ovyʼaiterei, ha ko múndo tuichakuére ojeguereko heta kostúmbre ojesegíva umícha jave. La majoría nopensái mbaʼéichapa oiméne oñepyrũ raʼe umi kostúmbre, upévare oĩ ndoikuaáiva heta koʼãva apytégui ouha rrelihión japúgui. Péro iñimportanteterei umi kristiáno omenda potaitéva oikuaa mbaʼéichapa oñepyrũ vaʼekue umíva, upéicha ikatúta ojasegura oimépa Jehová oguerohory umi mbaʼe ojejapótava ikasamientohápe (Marcos 10:6-9).

¹⁷ Oĩ osegíva diferénte kostúmbre openságui umíva oipytyvõtaha umi omenda ramóvape isuérte hag̃ua (Isaías 65:11). Por ehémplo, unos kuánto lugárpe umi hénte opoi jepi arrós térã ótra kósa umi omenda ramóvare. Haʼekuéra opensa ojapóramo péicha pe matrimónio oiko porãtaha oñondive, ovyʼataha, ifamília retataha ha ndojehumoʼãiha chupekuéra mbaʼeve ivaíva. Péro ñande kristianokuéra ñamboyke oimehaichagua kostúmbre oúva rrelihión japúgui (elee 2 Corintios 6:14-18).

18. ¿Mbaʼe konsého bíblico oreko vaʼerã enkuénta umi omendátava?

¹⁸ Umi kristiáno oĩva de nóvio oipotaiterei osẽ porã ikasamiénto ha oipota avei ovyʼa entéro ohóva upépe. Umi oñeinvitáva omombeʼútaramo peteĩ mbaʼe enterovéva rovake, oñatende vaʼerã ani hag̃ua heʼi mbaʼeve oheja vaítava ótrope, térã heʼi peteĩ mbaʼe itieʼỹva. Avei naiporãmoʼãi  heʼíramo álgo ohechaukáva ndorrespetaiha umi nóvio térã umi invitadokuérape (Proverbios 26:18, 19; Lucas 6:31; 10:27). Umi kristianokuéra omendátava, ndoikói vaʼerã avei ‘ojechaukase umi mbaʼe orekóvare’ (1 Juan 2:16). Oiméramo nde remenda potaite hína, eplanea porãkena opa mbaʼe ikatu hag̃uáicha nemanduʼa porã la ne kasamiéntore (ehecha nóta 28 entende porãve hag̃ua).

19, 20. ¿Mbaʼéichapa oñepyrũ vaʼekue pe vríndis?

¹⁹ Heta persóna ojepokuaa ovrinda oĩ jave umi kasamientohápe térã ofesteha jave peteĩ mbaʼe. Ojejapo aja pe vríndis, peteĩ persóna heʼi jepi álgo iporãva oipotáva oiko, ha umi ohendúva chupe ohupi yvate umi kópa orekóva ipópe. Péro, ¿mbaʼépa opensa vaʼerã kristianokuéra pe vríndis rehe?

²⁰ Peteĩ lívro heʼi pe vríndis ikatuha hína ou peteĩ kostúmbre oguereko vaʼekuégui heta rrelihión japu, pórke umívape oĩ vaʼekue ojepokuaáva “oikuaveʼẽ víno ha tuguy idioskuérape g̃uarã”. Umi hénte ojapo vaʼekue upéva oipotágui umi dios omeʼẽ chupekuéra peteĩ mbaʼe, ha upe rire ojapo rangue peteĩ orasión kompletoite heʼíntema hikuái: “¡Jasegi jaiko péicha!” térã “¡Salu!” (International Handbook on Alcohol and Culture). Yma oĩ vaʼekue avei heta hénte ojepokuaáva ohupi iváso ojerure hag̃ua vendisión idioskuérape. Péro Jehová ndoipotái jajapo upéicha jajerure hag̃ua chupe ivendisión (Juan 14:6; 16:23).

21. ¿Mbaʼeichagua fiésta ha aretépa ñamboyke vaʼerã avei?

²¹ Redesidíta jave rehótapa peteĩ fiésta térã aretépe, ehecha raẽ vaʼerã mbaʼe rehepa opensa ha mbaʼépa ojapo  jepi la hénte umi fiéstape. Por ehémplo, umi karnaválpe itieʼỹeterei ojejeroky lája, avei oĩ okaʼu vaipáva ha hekovaíva. Oĩ avei fiésta ha arete oapojáva umi omosexuálpe térã omokyreʼỹva la héntepe omombaʼeguasu hag̃ua hetã. Ñañeporandumína, japartisipáramo koʼãichagua fiéstape, ¿ikatúpa jaʼe ‘ndajachaʼeiha umi mbaʼe ivaívare’? (Salmo 1:1, 2; 97:10; 119:37).

22. ¿Mbaʼépa ñanepytyvõta jadesidi hag̃ua japartisipátapa peteĩ fiésta térã aretépe?

²² Ñande kristianokuéra ñamboyke vaʼerã entéro umi fiésta ha arete ndogustáiva Ñandejárape. Apóstol Pablo heʼi vaʼekue: “Pekaru jave, peʼu jave vevída térã pejapóramo oimeraẽ mbaʼe, siémpre pejapo vaʼerã entéro mbaʼe pembotuicha hag̃ua Ñandejárape” (1 Corintios 10:31; ehecha nóta 29 entende porãve hag̃ua). Jahechaháicha, oĩ heta fiésta ha arete omokyreʼỹva umi héntepe hekovai hag̃ua, omombaʼeguasu hag̃ua hetãme, ha orekóva umi kostúmbre oúva umi rrelihión japúgui. Péro naentéroi ningo upéicha. Jahechakuaáramo peteĩ fiésta ndojoavyiha la Biblia omboʼévandi, káda uno ikatu odesidi opartisipátapa térãpa nahániri. Péro iñimportanteterei avei jareko enkuénta mbaʼépa opensáta umi ótro upe jadesidívare.

23, 24. ¿Mbaʼéichapa jaexplika vaʼerã ñane hentekuérape mbaʼérepa ndajapartisipavéi umi fiésta ha aretépe?

²³ Ikatu ningo nderepartisipavéima umi fiésta ha arete Jehová ndoguerohorýivape. Upévare ikatu ne hentekuéra ndahaʼéiva Testígo opensa nderehayhuveimaha chupekuéra térã nderehasaseveimaha tiémpo hendivekuéra. Ikatu voi ne hentekuéra opensa umi fiésta javémante ikatuha  ñaimemba oñondivepa. Péro heta hendáicha rehechaukakuaa rehayhu ha reñeinteresaha hesekuéra. Por ehémplo ikatu reinvita chupekuéra rehasa hag̃ua tiémpo hendivekuéra ótro moméntope (Proverbios 11:25; Eclesiastés 3:12, 13).

²⁴ ¿Mbaʼépa ikatu rejapo ne hentekuéra oikuaaséramo mbaʼérepa nderepartisipavéi umi fiésta ha aretépe? Ikatu reheka informasión ñane puvlikasionkuérape térã eike jw.org-pe. Ani rehechauka rejediskutiseha hendivekuéra térã reovligaseha chupekuéra opensa hag̃ua ndéicha. Ehechauka porãnte chupekuéra mbaʼe mbaʼépa nde ereko raʼe enkuénta redesidi mboyve nderepartisipamoʼãveimaha umi fiésta ha aretépe. Péro trankílo porãnte reexplika vaʼerã chupekuéra, nemanduʼákena avei umi mbaʼe eréva “siémpre iporã ha ijuky vaʼerã” (Colosenses 4:6).

25, 26. ¿Mbaʼéichapa umi túa ha sy ikatu oipytyvõ ifamíliape ohayhu hag̃ua umi konsého oĩva la Bíbliape?

²⁵ Iñimportanteterei ñantende porã mbaʼérepa ndajapartisipái umi fiésta ha arete Ñandejára ndoguerohorýivape (Hebreos 5:14). Opa mbaʼe ári ñande ñambovyʼase Jehovápe. Ha oiméramo ñanefamília, ñañemotiémpo vaʼerã ha ñamboʼe chupekuéra ikatu hag̃uáicha ontende porã hikuái umi konsého oĩva la Bíbliape. Ne família oĩramo segúro Jehová oexistiha ha ikatuha oiko iñamígoramo, katuete ombovyʼaséta avei chupe (Isaías 48:17, 18; 1 Pedro 3:15).

²⁶ Jehová ovyʼaiterei ñañehaʼãramo jaadora chupe haʼe oipotaháicha ha ohecháramo ñaneonrradoha (Juan 4:23). Heta hénte opensa hasyetereiha ñaneonrrádo hag̃ua ko múndope. Péro, ¿siértopa upéva? Jahecháta upéva pe ótro kapítulope.