Jesús omeʼẽ umi disípulope konsého oipuru porã hag̃ua umi mbaʼerepy. Péro ndahaʼéi haʼekuérante la ohendúva chupe. Umi fariséo oĩ avei upépe ha pe konsého Jesús omeʼẽva ikatu avei ovenefisia chupekuéra. ¿Mbaʼérepa jaʼe upéva? Pórke “umi fariséo iplatarayhueterei”. Péro haʼekuéra ohendu rangue Jesúspe, oñemoĩ “oñembohory hese” (Lucas 15:2; 16:13, 14).

Jesús ni michĩmi ndokyhyjéi ha heʼi chupekuéra: “Peẽ peiko peje pendejehe penderekojojaha kuimbaʼekuéra renondépe. Péro Ñandejára oikuaa pende pyʼapy. Umi kuimbaʼekuéra apytépe oñembotuicháva, umíva Ñandejárape ombojeguaru” (Lucas 16:15).

Umi fariséope ningo oñembotuicha “umi kuimbaʼekuéra apytépe”. Péro koʼág̃a okambiáta isituasionkuéra. Oñembotuicháta umi hénte ohechakuaávape oikotevẽha Ñandejárare, péro oñemboykéta umi ipláta hetávape, umi omanda guasúvape ha umi omoakãvape rrelihionkuéra. Jesús oñeʼẽ ko kámbiore heʼívo:

“Pe Léi ha umi Profetakuéra ojekuaauka Juan peve. Upe guive oñemombeʼu umi marandu porã oñeʼẽva Ñandejára Rréinore, ha opaichagua tapicha oñehaʼãmbaite ohupyty hag̃ua upéva. Añetehápe, pe yvága ha yvy ikatu ohasa, péro ndopytareimoʼãi oñekumpliʼỹre ni pe párte michĩvéva oĩva pe Léipe” (Lucas 3:18; 16:16, 17). ¿Mbaʼérepa jaʼe Jesús oñeʼẽ hague peteĩ kámbiore heʼívo koʼã mbaʼe?

Umi líder rrelihióso oñemombaʼeguasu openságui haʼekuéra okumplipaiteha Moisés Léi. Oiméne ñanemanduʼa Jesús omonguerárõ guare pe siégope, haʼekuéra heʼi hague: “Ore Moisés disípulo hína. Ore roikuaa Ñandejára oñeʼẽ hague Moiséspe” (Juan 9:13, 28, 29). Ñandejára omeʼẽ vaʼekue Iléi Moiséspe, ikatu hag̃uáicha umi iñumíldeva ojerovia pe Mesíasre, haʼéva hína Jesús. Ha Juan el Bautista orrekonose vaʼekue Jesús haʼeha Ñandejára Ovecharaʼy (Juan 1:29-34). Upéicha rupi, Juan oñepyrũ guive opredika, umi hudío iñumíldeva, koʼýte umi imboriahúva, ohendu pe mensáhe oñeʼẽva ‘Ñandejára Rréinogui’. Péicha oñemombeʼu notísia porã entéro umi oñemoĩsévape pe Rréino poguýpe ha ohupytyséva umi mbaʼe porã oguerútava upe goviérno.

Añetehápe ningo Moisés Léi ndopytareíri, síno oprepara pe tape pe Mesíaspe g̃uarã. Péro og̃uahẽ guive pe Mesías, natekotevẽvéima oñekumplipaite pe Léi. Por ehémplo, pe Léi opermiti vaʼekue umi kuimbaʼépe ojedivorsia hembirekógui oimeraẽ mbaʼére, péro koʼág̃a Jesús heʼi: “Entéro ojedivorsiáva hembirekógui ha omenda jey ótrare, oporomoakãratĩ hína. Ha pe omendáva peteĩ kuña ojedivorsia vaʼekuére, oporomoakãratĩ avei hína” (Lucas 16:18). Umi fariséo ningo oiko omoĩ heta rrégla. ¡Ajépa orrenegaiténe raʼe hikuái ohendúvo la Jesús heʼíva!

Upe rire, Jesús omombeʼu peteĩ ehémplo ohechaukáva mbaʼeichaitépa tuicha pe kámbio oikóva  upe tiémpope. Omombeʼu oĩ hague peteĩ kuimbaʼe iplátava ha ótro katu imboriahúva, péro peichaháguinte mokõivévagui tuichaiterei okambia isituasión. Ñaanalisávo ko ehémplo, ñanemanduʼa vaʼerã umi hénte apytépe oĩha umi fariséo iplatarayhuetereíva ha oñembotuicháva, pórke umi hénte omombaʼe chupekuéra.

Jesús omombeʼu: “Oĩ vaʼekue peteĩ karai ipláta hetáva, omondéva ao pytãhũ ha líno, ha koʼẽ koʼẽre ovyʼa umi mbaʼe porãita apytépe. Pe hóga rokẽme katu oñemoĩva jepi peteĩ karai mboriahumi, ikurupáva, hérava Lázaro. Haʼe anga hoʼuse asy umi tembiʼu hoʼáva pe karai ipláta hetáva meságui. Ha umi jagua jepe ou oheréi chugui pe ikuruha” (Lucas 16:19-21).

Umi fariséo ningo iplatarayhueterei, upévare jaikuaa porã Jesús okompara hague chupekuéra ‘pe karai ipláta hetávare’. Koʼã líder rrelihióso hudío omonde umi ao porã porã ha hepýva. Ha ndahaʼéi voi irríkovante hikuái; haʼekuéra oreko autorida ha heta oportunida noñemeʼẽiva umi ótra héntepe. Pe ao pytãhũ ohechauka orekoha hikuái peteĩ puésto iñimportánteva, ha pe líno katu heʼise opensaha hikuái hekojojaha (Daniel 5:7).

¿Mbaʼéichapa otrata umi ótra héntepe koʼã mboʼehára irríkova ha oñemombaʼeguasúva? Oapoʼi chupekuéra. Heʼi voi hesekuéra ‘ndoikuaaiha pe Léi’ ha nomereseiha oñemboʼe chupekuéra (Juan 7:49). Koʼã hénte ojogua pe ‘karai mboriahumíme’ hérava Lázaro, ha hoʼuse asýva “umi tembiʼu hoʼáva pe karai ipláta hetáva meságui”.  Lázaro ningo ikurupa, ha upévare avave voi ni nopenái hese. Péicha avei ojeapoʼi umi imboriahúvape ha ojeʼe voi haʼekuéra nomereseiha oñemoag̃ui Ñandejárare.

¡Ajépa ñambyasyete koʼã héntepe hetaite tiémporema ojedespresiáva! Péro Jesús heʼi koʼág̃a okambiataha isituasionkuéra, tahaʼe umi hénte ojoguáva pe karai iplátavape, ha avei umi ojoguáva Lázarope.

Koʼág̃a Jesús omombeʼu mbaʼéichapa okambia pe karai ha Lázaro situasión: “Upéi omano pe karai mboriahumi, ha umi ánhel ogueraha chupe oguapy hag̃ua Abrahán ykére. Ha omano avei pe karai ipláta hetáva ha oñeñotỹ. Ha umi omanóva oĩháme ohasa asyeterei jave, omaña yvate gotyo ha ohecha mombyry guive Abrahánpe, ha Lázaro oguapyha ijykére” (Lucas 16:22, 23).

Umi hénte ohendúva Jesúspe oikuaa porã Abrahán ymaitereíma omano ha oñeñotỹ hague. Ñandejára Ñeʼẽ heʼi voi umi oĩva pe sepultúra térã Seólpe, umíva apytépe Abrahán, ndaikatuiha ohecha ni oñeʼẽ (Eclesiastés 9:5, 10). Upéicharõ, ¿mbaʼépa omboʼese Jesús ko ehémplo rupive? ¿Mbaʼépa opensa umi líder rrelihióso? Ko ehémplope Jesús oñeʼẽ kuri umi hénte iñumíldevare ha umi líder rrelihióso iplatarayhuetévare.

Jesús ohechauka kuri oĩtaha peteĩ kámbio heʼívo: “Pe Léi ha umi Profetakuéra ojekuaauka Juan peve. Upe guive oñemombeʼu umi marandu porã oñeʼẽva Ñandejára Rréinore”. Upéicharõ, Juan ha Jesucristo predikasión rupive, pe kuimbaʼe iplátava ha Lázaro situasión okambiaite. Haʼete ku omanóva hikuái ha okambiaite isituasionkuéra Ñandejára renondépe.

Heta tiémporema noñepytyvõi umi imboriahumíva térã iñumíldevape oñemoag̃ui hag̃ua Ñandejárare. Péro koʼág̃a oñepytyvõma chupekuéra Juan ha Jesús predikasión rupive, ha oñevenefisia hikuái pe marandu porã oñeʼẽvagui pe Rréinore. Ymave ningo haʼekuéra ohómi umi líder rrelihióso rendápe, ha oñekontenta vaʼerã ‘umi tembiʼu hoʼávagui pe karai ipláta hetáva meságui’. Péro koʼág̃a Jesús ‘omongaru’ térã omboʼe koʼã héntepe pe añetegua oĩva Ñandejára Ñeʼẽme. Ha omyesakãvo chupekuéra heta mbaʼe iporãitereíva, haʼete ku opyta porãva hikuái Ñandejára renondépe.

Umi líder rrelihióso ipláta ha ipuésto yvatéva katu idiferentete. Juan opredika vaʼekue pe mensáhe oñeʼẽva pe Rréinore, ha Jesús opredika avei opárupi, péro umi líder rrelihióso nohenduséi (Mateo 3:1, 2; 4:17). Upe mensáhe ombosufri ha ojopi umi líder rrelihiósope, pórke ohechauka Ñandejára ohusgataha ha okondenataha chupekuéra (Mateo 3:7-12). Umi mboʼehára hudío  iplatarayhuetévape okonvenive Jesús ha idisipulokuéra ndopredikavéiramo pe mensáhe oúva Ñandejáragui. Haʼekuéra ojogua pe karai iplátavape ha heʼíva: “Che ru Abrahán cheporiahuverekomína, ha emondo Lázarope tomyakỹ pe ikuã púnta ýpe, ha tomoheʼõmi chéve che kũ, chepiroʼymi hag̃ua. Ahasa asyeterei ningo ko tatarendýpe” (Lucas 16:24).

Péro upéva ningo ndoikomoʼãi. Opavave lénto umi líder rrelihióso nokambiaséi. Haʼekuéra ndoaseptái “Moisés ha umi Proféta ohai vaʼekue”, ha norrekonoseséi Jesús haʼeha pe Mesías ha pe Rréi Ñandejára omoĩva (Lucas 16:29, 31; Gálatas 3:24). Koʼã mboʼehára oñembotuicha ha ni mbaʼevéicharõ ndoipotái oipytyvõ chupekuéra umi hénte iñumíldeva, oaseptáva Jesúspe ha koʼág̃a oĩ porãva Ñandejára renondépe. Jesús disipulokuéra katu omombeʼúmante vaʼerã pe añetegua. Ndaikatúi oguerokirirĩ ni okambiaʼimi pe mensáhe omeʼẽ hag̃ua gústo chupekuéra. Pe ehémplope Jesús ohechauka porã upéva, Abrahán heʼívo pe karai ipláta vaʼekuépe:

“Che raʼy, nemanduʼákena nerenyhẽ hague mbaʼe porãgui reikove aja, Lázaro katu heta ohasa asy vaʼekue. Koʼág̃a haʼe ovyʼa koʼápe, ha ndehaitéma rehasa asy. Ha hiʼarive oĩ peteĩ yvykua ipypukuetereíva ñane paʼũme, ha upéicha rupi umi ohasaséva koʼáguio upépe, térã upéguio koʼápe ndaikatúi” (Lucas 16:25, 26).

¡Ajépa oĩ porãite oñekambia haguére pe kuimbaʼe iplátava situasión ha avei Lázaro situasión! Ohechauka mbaʼéichapa oĩ Ñandejára renondépe umi líder rrelihióso oñembotuicháva, ha umi hénte imboriahu ha iñumíldeva. Koʼã iñumíldeva ningo oñemoĩ Jesús júgo guýpe, péicha rupi ‘ipiroʼy’ ha oaprende heta mbaʼe Ñandejáragui (Mateo 11:28-30). Ko kámbio ojekuaa porãve tiémpo riremi, pe pákto térã kompromíso pyahu orremplasárõ guare pe kompromíso ojejapo vaʼekuépe pe Léi rupive (Jeremías 31:31-33; Colosenses 2:14; Hebreos 8:7-13). Jehová oñohẽrõ guare espíritu sánto Pentekostés áño 33-pe, ohechauka porã oasepta ha oguerohoryha Jesús disipulokuérape, ha orrechasaha umi fariséo ha umi líder rrelihiósope.