Oiméne Jesús oĩ gueteri Zaqueo rógape, upépe opyta kuri ohokuévo Jerusalénpe. Umi disípulo opensa haʼe oñepyrũtamaha ogoverna ‘Ñandejára Rréinope’ (Lucas 19:11). Haʼekuéra ningo nontendéi voi kuri Jesús tekotevẽha omano, ha koʼág̃a nontendeporãi avei ko téma. Upévare Jesús omoĩ peteĩ ehémplo ohechauka hag̃ua chupekuéra heta gueteri ofaltaha ou hag̃ua pe Rréino.

Jesús heʼi: “Peteĩ kuimbaʼe osẽ oho mombyry tetã ambuépe oiko hag̃ua chugui rréi, ha upéi ou jey hag̃ua” (Lucas 19:12). Jaikuaaháicha, javiaha hag̃ua ningo ñaikotevẽ tiémpo. Ko ehémplope Jesús hína pe “kuimbaʼe” osẽva “oho mombyry”, ha pe ‘tetã ambue’ katu pe yvága, upépe Itúva omeʼẽta chupe podér ogoverna hag̃ua.

Péro oviaha mboyve, pe kuimbaʼe ohenói 10 hembiguáipe, ha káda únope omeʼẽ heta porã pláta ha onkarga chupekuéra: “Pemombaʼapo ñandéve koʼãva aju jey peve” (Lucas 19:13). Ko patrón omeʼẽ chupekuéra “heta porã pláta”. Peteĩ chokokue ombaʼapo vaʼerã voi 3 méserupi ogana hag̃ua pe pláta oñemeʼẽva káda únope.

Umi disípulo oiméne oñemeʼẽ enkuénta haʼekuéra ojoguaha umi 10 tembiguáipe, pórke Jesús okomparáma kuri chupekuéra umi chokokue omonoʼõvare umi kóga (Mateo 9:35-38). Añetehápe, Jesús ndeʼiséi vaʼekue oho vaʼerãha hikuái okosecha umi kogaty. Upéva rangue, haʼe oipota umi disípulo ombyaty hetave tapicha ogovernátava avei Jesúsndi pe Rréinope. Ha haʼekuéra oipurupaite vaʼerã itiémpo, imbaretekue ha umi mbaʼe orekóva okumpli hag̃ua ko tembiapo.

¿Mbaʼépa ohechauka avei Jesús ko ehémplo rupive? Haʼe heʼi: “Péro umi ivalleguakuéra ndaijaʼéi hese ha upévare omondo hapykuéri hembijokuáipe heʼi hag̃ua: ‘Ndoroipotái chupe ore rreirã’” (Lucas 19:14). Umi disípulo oikuaa porã umi hudío orrechasaha Jesúspe, ha oĩ voi ojukaséva chupe. Jesús omano ha oho rire yvágape, umi hudío opersegi isegidorkuérape. Péicha ohechauka hikuái ndoipotaiha chupe irreikuerarã (Juan 19:15, 16; Hechos 4:13-18; 5:40).

¿Mbaʼépa ojapo umi 10 tembiguái pe plátagui? Jesús omombeʼu: “Upéi haʼe ou jey oiko rire chugui rréi, ha ohenoika umi hembiguáipe oikuaa hag̃ua mboýpa ogana hikuái omombaʼapóvo pe pláta oheja vaʼekue chupekuéra. Upévo ou pe tenondegua ha heʼi: ‘Karai, nde pláta oñembohetave diez vése’. Upémarõ heʼi chupe: ‘¡Ajépa ndeguápo che rembiguái! Rejapo porã haguére pe tembiapo michĩmi aheja vaʼekue nde kárgope, koʼág̃a amoĩta nde poguýpe diez siuda’. Upéi ou pe segundo ha heʼi: ‘Karai, nde pláta oñembohetave cinco vése’. Heʼi avei chupe: ‘Amoĩta nde poguýpe cinco siuda’” (Lucas 19:15-19).

Umi disípulo osegíramo koʼã tembiguái ehémplo, ha ojapóramo opa ikatúva okumpli porã hag̃ua Jesúsndi, katuete haʼe oguerohorýta chupekuéra. Ha ikatu ojerovia hikuái Jesús orrekompensataha chupekuéra. Añetehápe ningo opavave Jesús disípulo ohasa diferénte situasión, ha ndaikatúi ojapo peteĩchapa. Péro oiko rire Jesúsgui “rréi”, haʼe ovendesíta káda únope ojapo haguére ikatúva guive omboʼe hag̃ua umi héntepe (Mateo 28:19, 20).

Upéi Jesús omohuʼã ko ehémplo, ha heʼi: “Upéi ou ótro, ha heʼi: ‘Karai, koʼápe oĩ nde pláta añongatu vaʼekue peteĩ páñope. Nde ningo ndearhél, regana pláta ótro sakrifisiokuére, ha remonoʼõ nereñemitỹi haguépe, upévare akyhyje ndehegui’. Haʼe heʼi chupe: ‘Nde jurúrupi reʼa nde tembiguái aña. ¿Reikuaa piko añete chearhelha,  aganaha pláta ótro sakrifisiokuére, ha amonoʼõha nañemitỹi haguépe? ¿Mbaʼégui piko upéicharõ ndereguerahái raʼe che pláta vánkope? Upéicharire ag̃uahẽvo hetave akovra vaʼerãmoʼã’. Upévo heʼi umi oñemboʼývape upépe: ‘Peipeʼa chugui pe pláta ha pemeʼẽ pe ombohetave vaʼekuépe che pláta diez vése’” (Lucas 19:20-24).

Pe tembiguái nomombaʼapói rupi pe pláta onkargáva chupe ipatrón, ojepeʼa chugui pe orekóva. Péicha avei, umi apóstol oaprende haʼekuéra ndojapóiramo oñenkargáva chupekuéra, ikatuha operde ilugár pe Rréino yvagapeguápe.

Ko ehémplo Jesús omoĩva oipytyvõ vaʼerã idisipulokuérape ikyreʼỹ hag̃ua. Upévare Jesús heʼi: “Pe oguerekóvape oñemeʼẽvéta, péro pe oguerekoʼỹvagui katu, pe oguerekomíva jepe ojepeʼáta chugui”. Upéi haʼe heʼi avei ojejukataha umi iñenemígo ndoipotái vaʼekuépe oiko chugui rréi. Heʼipa rire koʼã mbaʼe, Jesús osegi iviáhe ha oho Jerusalénpe (Lucas 19:26-28).